Génesis 15:1-21
15 Nda̱wa̱á dí nirígá xúgíʼ rígi̱, náa mbá rí niwasngájmáá* Abrán nigruigú ajngóo Jeobá rí niʼthúu̱n: “Abrán, xámíñáaʼ. Ikhúún nindxu̱ʼ bi̱ nañe̱wa̱a̱nʼ.* Rí matandrígúu mani̱ndxu̱u̱ mba̱a̱ wéñuuʼ”.
2 Mú Abrán niʼthúu̱n: “Tátá Jeobá bi̱ itháán mba̱a̱, ndiéjunʼ lá gáraxnu̱ʼ dí asndu xóó tséguʼdiin e̱ji̱nʼ rá. Xúgíʼ dí gúʼdoo magu̱u̱ Eliezer mbáa xa̱bu̱ Damasco”.
3 Niʼthí xóó: “Na̱nguá niraxniúʼ e̱ji̱n, bi̱ magu̱u̱ dí gúʼdoo nindxu̱u̱ mbáa ñumbáá* bi̱ xtáa náa goʼwóʼ”.
4 Mú ikhú Jeobá niriʼñuu: “Na̱nguá, bi̱ magu̱u̱ rí xtaʼdáá xánindxu̱u̱ xa̱bu̱ bugi̱, mani̱ndxu̱u̱ mínaaʼ a̱ʼdiáaʼ”.
5 Nda̱wa̱á ni̱jkha̱ kayáa rexa̱a̱ ga̱jma̱a̱ niʼthúu̱n: “Mbá péñu,* atiejxi̱ra̱ʼa̱n mekhuíí ga̱jma̱a̱ atrajxnii a̱ʼgua̱a̱n... á mu kaʼnii maʼnga̱a̱ʼ matrajxnii”. Nda̱wa̱á niʼthúu̱n: “Xúʼko̱ mbaʼin gáʼni ejña̱a̱nʼ”.
6 Abrán nigiʼdoo fe náa Jeobá ga̱jma̱a̱ ikhaa ndiʼyoo rí nindxu̱u̱ mbáa xa̱bu̱ jmbii.
7 Mú xóó niʼthúu̱n: “Ikhúún nindxu̱ʼ Jeobá, bi̱ niʼni dí magajnáaʼ náa Ur náa kúwá xa̱bu̱ caldeos mu maxna̱a̱ʼ ku̱ba̱ʼ rígi̱ maʼni mbayaaʼ”.
8 Mú Abrán nirajxu̱u̱: “Tátá Jeobá bi̱ itháán mba̱a̱, xú kaʼnii gáyóo dí gajkhun maʼga̱nú manidxu̱u̱ mbayuʼ ráʼ.”
9 Ikhú Dios niʼthúu̱n: “Atríya̱a̱ʼ mbáa a̱ʼdá xédí bi̱ ajtsú tsiguuʼ, mbáa tsujthuunʼ bi̱ ajtsú tsiguuʼ, mbáa mugu̱ bi̱ ajtsú tsiguuʼ, mbáa gúgu̱ ga̱jma̱a̱ mbáa a̱ʼdá paloma mu maraxnaxíin náa ikhúún”.
10 Ikhú niguguiin xujkhúʼ ga̱jma̱a̱ nirujtungañii, mú tárujtungañii ñu̱ʼu̱. Mámbá xíʼtóo dí nirujtu nisngútámáʼ náa inuu i̱mba̱ xíʼtóo.
11 Ikhú ndxáʼan niguájthaa náa jngútámáʼ xuwiʼ, mú Abrán naxkúún.
12 Índo̱ inu marámáaʼ a̱jkha̱ʼ, ikhú Abrán ni̱ʼkha̱ ninuuʼ niʼgu ga̱jma̱a̱ mbá rí mikína mbiʼ ni̱ʼkha̱nú náa ikhaa.
13 Ikhú Dios niʼthúu̱n Abrán: “Ndayóoʼ ma̱ta̱ya̱a̱ dí e̱jña̱a̱ʼ mani̱ndxu̱ún xa̱bu̱ bi̱ naguwaáʼ náa mbá ku̱ba̱ʼ dí raʼkháa ku̱bu̱únʼ, xa̱bu̱ bi̱ kúwá ikhí muni̱ rí mani̱ndxu̱ún ñumbáá ma̱ngaa muni̱ gíníin mbá 400 tsiguʼ.
14 Ikhúún mandi̱ʼi̱ín cuenta xa̱bu̱ bi̱ gúni gíníi, índo̱ gágajna̱á ikhí, magajna̱á kudúún mbaʼa rí gíʼdoo numuu.
15 Mú ikháán mi̱khi̱i̱n, makhañáaʼ* ga̱jma̱a̱ majuiʼdíín tsímáá.
16 E̱jñu̱ún e̱jín xíñegiaaʼ nindxu̱ún bi̱ matangi̱ín gi̱i̱, numuu rí xóó má tséjkha̱nú mbiʼi rí mandi̱ʼi̱ín cuenta xa̱bu̱ amorreos ga̱jma̱a̱ numuu aʼkhúún”.
17 Índo̱ nirámáaʼ a̱jkha̱ʼ ga̱jma̱a̱ niʼni má mikína, ikhú nikujmaa mbá horno dí nagájnuu gúní ga̱jma̱a̱ mbá aguʼ dí nitsikhá xuñúnʼ xujkhúʼ.
18 Mbiʼi rúʼko̱, Jeobá nimbánuminaʼ ga̱jma̱a̱ Abrán, niʼthúu̱n: “E̱jña̱a̱ʼ maxnu̱u̱ ku̱ba̱ʼ rígi̱, náa mañu Egipto asndu náa mañu rí itháán mba̱a̱ rí nindxu̱u̱ mañu Éufrates,
19 ku̱bu̱únʼ xa̱bu̱ quenitas, xa̱bu̱ quenizitas, xa̱bu̱ cadmonitas,
20 ku̱bu̱únʼ xa̱bu̱ hititas, xa̱bu̱ perizitas, xa̱bu̱ refaím,
21 ku̱bu̱únʼ xa̱bu̱ amorreos, xa̱bu̱ cananeos, xa̱bu̱ guirgaseos ga̱jma̱a̱ ku̱bu̱únʼ xa̱bu̱ jebuseos”.
Mbaʼa nota
^ O “visión”.
^ Náa ajngáa hebreo naʼthí, “Ikhúún nindxu̱ʼ escudo ndrígáaʼ”.
^ Náa ajngáa hebreo naʼthí, “ada̱”.
^ O “atani̱ mbá rí májánʼ”.
^ Náa ajngáa hebreo naʼthí, “midxu̱u̱ʼ gajmiáanʼ wajin xiʼñáaʼ”.
