Génesis 16:1-16
-
Agar ga̱jma̱a̱ Ismael (1-16)
16 Sarái a̱ʼgiu̱u̱ Abrán, na̱nguá gíʼdiin e̱ji̱n. Mú ikhaa gíʼdaa mbáa a̱ʼgú ñumbáá bi̱ mbiʼyuu Agar.
2 Ikhú Sarái niʼthúu̱n Abrán: “¡Mbá péñu,* atadxuun rí ma̱tha̱a̱nʼ! Jeobá na̱nguá niniñuʼ rí magúʼdiin e̱ji̱n. Mbá péñu, atabáaʼ ga̱jma̱a̱ʼ a̱ʼgú ñumbáá ndrígóʼ, mbáa xúʼko̱ ma̱ndoo magúʼdiin e̱ji̱n ga̱jma̱a̱ numuu ikhaa”. Ikhú Abrán niʼni xó má niʼthúunʼ Sarái.
3 Índo̱ Abrán nayéjkha̱ má gu̱wa̱ʼ tsiguʼ xtáa náa ku̱ba̱ʼ ndrígóo Canaán, ikhú Sarái, a̱ʼgiu̱u̱ Abrán, ni̱jkha̱ kayáa a̱ʼgú egipcia, Agar bi̱ nindxu̱u̱ a̱ʼgú ñumbáá ndrígóo náa Abrán, nixniúu mu mani̱ndxu̱u̱ a̱ʼgiu̱u̱.
4 Ikhú, Abrán nibóoʼ ga̱jma̱a̱ Agar ga̱jma̱a̱ ikhaa niguewáan mbáa ada̱.* Índo̱ Agar ndiʼyoo rí kaguewáan ada̱, ikhú niwiyu̱u̱ʼ kaʼyoo a̱ʼgu̱ bi̱ nambáyúu.
5 Índo̱ Sarái ndiʼyoo rígi̱, ikhú niʼthúu̱n Abrán: “Ikháán xtaʼdáá aʼkháanʼ dí ikhaa xtáa raʼniuʼ dí raʼkhí. Ikhúún mínu̱u̱ʼ nixnia̱a̱ʼ* a̱ʼgu̱ bugi̱, mú índo̱ ndiʼyoo rí kagu̱ ewáan mbáa ada̱, ikhaa nigíʼdu̱u̱ niwiyu̱u̱ʼ kaʼyoʼ. Jeobá má gánda̱ʼa̱a̱ cuenta tsáá phú niʼni dí raʼkhí, ikhúún o ikháán”.
6 Ikhú Abrán niʼthúu̱n Sarái: “Ikháán naratañájuíín a̱ʼgú ñumbáá ndrígáaʼ, ikha jngóo atani̱ ga̱jma̱a̱ʼ asndu ndiéjúúnʼ má dí míjiánʼ gáta̱ya̱a̱”. Ikhú Sarái niʼni gínáa ga̱jma̱a̱ ikhaa nigáyúu.
7 Nda̱wa̱á, ángel ndrígióo Jeobá nixkamaa náa ku̱ba̱ʼ mijxooʼ* náa gíʼ mbá iduu iyaʼ, iduu iyaʼ rígi̱ gíʼ náa kamba̱a̱ rí na̱jkha̱ xígi̱í náa Sur.
8 Ikhaa niʼthúu̱n: “Agar, a̱ʼgú ñumbáá ndrígóo Sarái, náá edxa̱ʼ ga̱jma̱a̱ náá edxu̱ʼ rá.” Ikhaa niriʼñuu: “Xtáá ragayúʼ náa inuu Sarái a̱ʼgu̱ bi̱ nambáyúu”.
9 Ikhú ángel ndrígióo Jeobá niʼthúu̱n: “Atanga̱án gátáya̱a̱ a̱ʼgu̱ bi̱ natambáyíí, atayamajkuíí ga̱jma̱a̱ atatsimbaaʼ dí gáʼtháanʼ”.
10 Nda̱wa̱á ángel ndrígióo Jeobá niʼthúu̱n: “Ma̱ni̱ rí maʼni mbaʼin wéñuuʼ e̱jña̱a̱ʼ. Ra̱ʼkhá tháán mbaʼin gáʼni dí asndu xáʼngo̱o̱ gági̱xnii”.
11 Ángel ndrígióo Jeobá niʼthúu̱n xóó: “Xtewáan mbáa ada̱, maraʼdaa mbáa dxámá. Mbaʼyóoʼ maraxna mbiʼíí Ismael,* numuu rí Jeobá niʼdxawaanʼ dí nitambi̱ya̱ʼ numuu rí natamíníiʼ.
12 Ikhaa mani̱ndxu̱u̱ xóo mbáa búrrú xáná. Maxmínaʼ gajmíi̱n xúgíinʼ ga̱jma̱a̱ xúgíinʼ muxmijná gajmiún. Maxtáa náa i̱mba̱ ridoo dí kúwá* xúgíinʼ a̱ngui̱i̱n”.
13 Ikhú, ikhaa niríyáʼ mbiʼyuu Jeobá bi̱ xtáa raʼtámíjná ga̱jma̱a̱, niʼthúu̱n: “Ikháán nindxa̱a̱ʼ mbáa Dios bi̱ nayejxi̱”. Niʼthí rígi̱ numuu rí nindxaʼwáminaʼ: “Lá gajkhun rí gi̱i̱ ndi̱yo̱o̱ bi̱ ndaʼyoʼ ráʼ.”
14 Ikhaa rúʼko̱ numuu dí puzu dí gíʼ náa majñu̱u̱ʼ Cadés ga̱jma̱a̱ Bered, nigumbiʼyuu Beer-Lahái-Roí.*
15 Nda̱wa̱á, Agar nigiʼdaa mbáa a̱ʼdióo Abrán ga̱jma̱a̱ Abrán nixná mbiʼyuu Ismael ada̱ bi̱ nigiʼdaa Agar.
16 Abrán gíʼdoo 86 tsiguuʼ índo̱ Agar nigiʼdaa Ismael.
Mbaʼa nota
^ O “ataniu̱ʼ mbá rí májánʼ”.
^ O “niʼni endi̱i̱”.
^ Náa ajngáa hebreo naʼthí, “nirajkuáaʼ náa tsoxta̱a̱ʼ”.
^ O “desierto”.
^ Rí nandoo gáʼthúu̱n ‹Dios naʼdxuun›.
^ O mbáa “xámbájxu̱u̱ gajmíin”.
^ Mbáa nandoo gáʼthúu̱n ‹puzu ndrígóo bi̱ Ndaʼya bi̱ ndiʼyoʼ›.
