Génesis 17:1-27
17 Índo̱ Abrán nigiʼdoo 99 tsiguuʼ, Jeobá nikujmaa náa Abrán ga̱jma̱a̱ niʼthúu̱n: “Ikhúún ni̱ndxu̱ʼ Dios bi̱ gíʼdoo xúgíʼ tsiaki̱i̱. Gajngruiga̱a̱ʼ náa kambo̱ʼ ga̱jma̱a̱ xákiéʼkáanʼ.*
2 Manimbánuu rí nikuʼdáminaʼ ma̱ni̱ náa ikháán, ma̱ni̱ rí maraʼdiin mbaʼin, mbaʼin wéñuuʼ ejña̱a̱nʼ”.
3 Ikhú Abrán nismbáti̱go̱o̱ mbayííʼ, mú Dios niʼtámíjná má xúʼko̱ ga̱jma̱a̱. Niʼthúu̱n:
4 “Ikhúún rígá mbá rí nimbánuʼ ga̱jma̱á nindxa̱a̱ʼ gajkhun rí mi̱dxu̱ʼnú ma̱nindxa̱a̱ʼ anu̱ún xa̱bu̱ bi̱ makuwá náa mbaʼa xuajin.*
5 Ní xágu mbiʼyaaʼ Abrán.* Rí xúgi̱ magu mbiʼyaaʼ Abrahán,* numuu rí ma̱ni̱ dí ma̱nindxa̱a̱ʼ anu̱ún xa̱bu̱ bi̱ makuwá náa mbaʼa xuajin.
6 Ma̱ni̱ rí maraʼdiin mbaʼin wéñuuʼ ejña̱a̱nʼ, mbaʼa xuajin magajnúu náa ikháán. Náa ejña̱a̱nʼ makuwá reyes.
7 Ikhúún manimbánuu rí nimbánulú, xúʼko̱ má náa xúgíinʼ ejña̱a̱nʼ bi̱ makuwá nda̱wa̱á. Rígi̱ nindxu̱u̱ mbá rí nambánulú dí mbajyúuʼ asndu kámuu, rí ikhúún mani̱ndxu̱ʼ Dios ndrígáaʼ ga̱jma̱a̱ Dios ndrígu̱ún ejña̱a̱nʼ.
8 Maxna̱a̱ʼ ikháán ga̱jma̱a̱ maxnu̱u̱ ejña̱a̱nʼ ku̱ba̱ʼ náa nidxu̱ʼ rawa̱nʼ raxtaa xóo mbáa xa̱bu̱ na̱ʼkha̱á, xúgíʼ ku̱ba̱ʼ ndrígóo Canaán mani̱ndxu̱u̱ ku̱ba̱la ikháanʼ asndu kámuu. Ikhúún mani̱ndxu̱ʼ Dios ndrígu̱ún ejña̱a̱nʼ”.
9 Dios ma̱ngaa niʼthúu̱n Abrahán: “Mú rí gíʼmaa matani̱ ikháán, mbaʼyóoʼ matanimbánii rí nimbánulú, xúʼko̱ má náa xúgíinʼ ejña̱a̱nʼ bi̱ makuwá nda̱wa̱á.
10 Rígi̱ nindxu̱u̱ rí nambánulu rí mbaʼyóoʼ matanimbáníí ikháán gajmiáanʼ ejña̱a̱nʼ: Mbaʼyóoʼ muthu xtóo xuyuuʼ tsáʼkhún xúgíinʼ xa̱bekha bi̱ kúwá náa ikháanʼla.
11 Mbaʼyóoʼ muthu xtóo xuyuuʼ tsáʼkhún xóo mbá tsinaʼ dí rígá mbá rí nambánulú.
12 Xúgíinʼ bi̱ makuwá nda̱wa̱á mbaʼyóoʼ muthu xtóo xuyuuʼ tsáʼkhún, xúgíinʼ jiámá bi̱ makuwá náa ikháanʼla nda̱wa̱á rí nijngoo migiñuʼ mbiʼi dí nigumiin, asndu tsáa bi̱ gáxtáa náa guʼwála tséʼñuu á mu na̱nguá kuya̱a̱la o nijui̱ʼtsi̱i̱n náa mbáa xa̱bu̱ na̱ʼkha̱á.
13 Xúgíinʼ jiámá bi̱ magu̱miin náa guʼwáaʼ ga̱jma̱a̱ xúgíinʼ bi̱ niratsi̱i̱n mbaʼyóoʼ muthu xtóo xuyuuʼ tsáʼkhún. Rí nimbánulú dí nigiʼma tsinuuʼ náa xuyala mani̱ndxu̱u̱ rí mbajyúuʼ asndu kámuu.
14 Á mu mbáa xa̱biya̱ tsíyoo muthu xtóo xuyuuʼ tsáʼkhún mbaʼyóoʼ makhañúu. Numuu rí tséʼyamajkhuu rí nimbánulú”.
15 Nda̱wa̱á, Dios niʼthúu̱n Abrahán: “Ga̱jma̱a̱ a̱ʼgia̱a̱ʼ Sarái* ní xáraxna mbíʼíí Sarái, numuu rí mbiʼyuu mani̱ndxu̱u̱ Sara.*
16 Ikhúún ma̱ni̱ tsajkurámáaʼ ga̱jma̱a̱ ma̱ni̱ dí ikhaa magiʼdaa mbáa a̱ʼdiáaʼ. Ma̱ni̱ tsajkurámáaʼ, náa ikhaa magajnúu mbaʼa xuajin. Ma̱ngaa náa e̱ji̱i̱n makuwá reyes”.
17 Ikhú Abrahán nismbáti̱go̱o̱ mbayííʼ. Nigíʼdu̱u̱ ninduʼwá ga̱jma̱a̱ niʼtáminaʼ náa awúu̱n a̱jkiu̱u̱n: “Lá gajkhun rí mbáa xa̱bu̱ nikhi̱i̱ bi̱ gíʼdoo 100 tsiguuʼ magiʼdaa mbáa ada̱ ráʼ. Ga̱jma̱a̱ Sara mbáa a̱ʼgu̱ nikhi̱i̱ bi̱ gíʼdoo 90 tsiguuʼ maʼnii mbáa ada̱ ráʼ.”
18 Ikha jngóo Abrahán niʼthúu̱n Dios bi̱ gajkhun: “¡Mbá péñu,* Ismael gátani̱ tsajkurámáanʼ!”.
19 Mú Dios niʼthúu̱n: “Sara bi̱ nindxu̱u̱ a̱ʼgia̱a̱ʼ, gajkhun dí magiʼdaa mbáa a̱ʼdiáaʼ ga̱jma̱a̱ mbaʼyóoʼ maraxna mbíʼíí Isaac.* Ikhúún mambanúʼ gajmúʼ ikhaa ga̱jma̱a̱ ma̱ni̱ dí marigá náa ikhaa dí nimbánulú. Rí nimbánulú rígi̱ mbajyúuʼ asndu kámuu náa e̱ji̱i̱n.
20 Nidxawuun dí niratá ga̱jma̱a̱ numuu Ismael. Ikhaa ma̱ngaa ma̱ni̱ tsajkurámáanʼ. Ma̱ni̱ rí e̱ji̱i̱n maʼni mbaʼin. Náa ikhaa magajnún mbá 12 xa̱bu̱ bi̱ nuxna ikha ga̱jma̱a̱ ma̱ni̱ rí xuajñuu mani̱ndxu̱u̱ mba̱a̱.
21 Mú rí nimbánulú marigá náa Isaac ada̱ bi̱ maʼnii Sara gu̱nʼ ma rígi̱ dí i̱mba̱ tsiguʼ”.
22 Índo̱ Dios niguámbóo niʼtámíjná ga̱jma̱a̱ Abrahán, ikhú ni̱jkha̱a̱.
23 Nda̱wa̱á Abrahán nigímbíin xúgíinʼ xa̱bekha bi̱ nigumiin náa goʼwóoʼ xúʼko̱ má Ismael bi̱ nindxu̱u̱ a̱ʼdióo ga̱jma̱a̱ xúgíinʼ xa̱bekha bi̱ ni̱ʼtsi̱i̱n, xóo muʼthá, mbá xúgíinʼ xa̱bekha bi̱ kúwá náa goʼwóo, Abrahán nirujtu xtóo xuyuuʼ tsáʼkhún mbiʼi ma rúʼko̱, xó ma Dios niʼtáñajuunʼ maʼni.
24 Abrahán gíʼdoo 99 tsiguuʼ índo̱ nirujtu xtóo xuyuuʼ tsáʼkhúun.
25 Ga̱jma̱a̱ 13 tsiguuʼ Ismael índo̱ nirujtu xtóo xuyuuʼ tsáʼkhúun.
26 Mbiʼi ma rúʼko̱ niturígú xtóo xuyuuʼ tsáʼkhúun Abrahán ga̱jma̱a̱ Ismael bi̱ nindxu̱u̱ a̱ʼdióo.
27 Xúʼko̱ ma xúgíinʼ xa̱bekha bi̱ kúwá náa goʼwóo, bi̱ nigumiin náa goʼwóo ga̱jma̱a̱ bi̱ nijui̱ʼtsi̱i̱n náa mbáa xa̱bu̱ bi̱ na̱ʼkha̱á, mangiin nithu xtóo xuyuuʼ tsáʼkhún.
Mbaʼa nota
^ O “xáraʼdáá aʼkháanʼ”.
^ O “anu̱ún mbaʼa xuajin”.
^ Rí nandoo gáʼthúu̱n ‹anu̱ún bi̱ gíʼdoo numuu›.
^ Rí nandoo gáʼthúu̱n ‹anu̱ún xa̱bu̱ bi̱ mbaʼin›.
^ Mbáa nandoo gáʼthúu̱n ‹bi̱ naʼni xkujndu›.
^ Rí nandoo gáʼthúu̱n ‹princesa›.
^ O “atani̱ mbá rí májánʼ”.
^ Rí nandoo gáʼthúu̱n ‹xnduʼwá›.
