Génesis 18:1-33
18 Nda̱wa̱á, Jeobá nisngájmaminaʼ náa Abrahán náa rígá ixi̱ mba̱ʼu̱ ndrígóo Mamré. Naʼni xóo mbá xuájka̱ʼ índo̱ ra̱ʼkhá tháán mijkha, Abrahán gíʼ náa riejuun guʼwá xtíin ndrígóo.
2 Índo̱ nikuxi̱i̱ edxu̱u̱ ndiʼyoo rí mitsínguánʼ wáa guájun ajtsíin xa̱bekha. Índo̱ ndiʼñún, mbá nacha̱ nigatíya̱a̱ʼ ragáyúu náa gíʼ náa riejuun guʼwá xtíin ndrígóo mu maʼga gagruiguíin, ikhú nismbáti̱go̱o̱ asndu mbayííʼ.
3 Ikhú niʼthí: “Jeobá, á mu naʼni a̱jkia̱a̱nʼ xta̱yo̱ʼ* mbá péñu* ganújngaaʼ náa xtáá.
4 Matañájunʼ rí maguwáʼ kuñu̱u̱n chíʼgíiʼ* iyaʼ mu mujñáa rajkuálá. Nda̱wa̱á ma̱ndoo mbuya̱a̱xala náa agoo mijxoo ixi̱.
5 Numuu rí niguwáʼ gúyáa xa̱bia̱la, guniʼñúnʼ rí ma̱ʼkha̱ ka̱gu̱ʼ chíʼgíiʼ ganitsu mu mbuya̱a̱ tsiaki̱i̱.* Nda̱wa̱á ma̱ndoo má muʼguala náa najkuala”. Ikhiin niriʼñáán: “Májánʼ má. Atani xó má niratá”.
6 Ikhú Abrahán nacha̱ ni̱jkha̱ náa guʼwá xtíin gáyáaʼ Sara ga̱jma̱a̱ niʼthúu̱n: “¡Nacha̱! Arawíi 13 kilo* harina dí itháan májánʼ, ataxmíndu atani̱ nguéjma̱ pan”.
7 Ikhú Abrahán ni̱jkha̱ ragáyúu náa gíi̱nʼ xujkiúu, nigutuwiin mbáa a̱ʼdá xédí bi̱ kaʼníí guabaʼ xuyuuʼ nixniúu xa̱bu̱ bi̱ nambáyúu, ikhaa mbá nacha̱ ni̱jkha̱ gáʼni májáanʼ.
8 Nda̱wa̱á niguajthun mantequilla, yáʼdú ga̱jma̱a̱ a̱ʼdá xédí bi̱ niguma májáanʼ, nigruaʼmáʼ mu̱phu̱. Ikhú ikhaa niguanúu náa nijniun ikhiin náa agoo ixi̱, índo̱ ikhiin kúwá ruphiʼtsu.
9 Ikhiin nirajxi̱i̱: “Náá xtáa a̱ʼgia̱a̱ʼ Sara rá.” Ikhaa niriʼñún: “Gi̱i̱ má xtáa ma̱ngaa náa guʼwá xtíin”.
10 Mbáa rí ikhiin niʼthí: “Matanga̱án ma gi̱i̱ gu̱nʼ rígi̱ dí i̱mba̱ tsígúʼ ga̱jma̱a̱ a̱ʼgia̱a̱ʼ Sara magiʼdaa mbáa ada̱”. Mú, Sara wíji̱ raʼdxawun náa kidxuuʼ xa̱biya̱ náa riejuun guʼwá xtíin.
11 Nákha mbiʼi rúʼko̱, Abrahán ga̱jma̱a̱ Sara guanii má. Nijngoo má tsiguuʼ rí magiʼdiin e̱ji̱n.*
12 Ikha jngóo, Sara nigíʼdu̱u̱ ninduʼwá náa awúu̱n a̱jkiu̱u̱n ga̱jma̱a̱ niʼthí: “Xúgi̱ dí nikiu̱u̱n má ga̱jma̱a̱ rí tátioʼ nikhi̱i̱ má, lá gajkhun rí ma̱ʼkha̱nú gagi rígi̱ náa ikhúún dí ma̱ndoo magúʼdaa ada̱ ráʼ.”
13 Ikhú Jeobá niʼthúu̱n Abrahán: “Náá numuu dí ninduʼwá Sara rá. Náa numuu niʼthí dí xándoo magiʼdaa ada̱ numuu rí nijngoo ma tsiguuʼ xá.
14 Lá rígá mbá dí xáʼngo̱o̱ gáʼni Jeobá ráʼ. Matanga̱án ma gi̱i̱ gu̱nʼ rígi̱ dí i̱mba̱ tsígúʼ ga̱jma̱a̱ a̱ʼgia̱a̱ʼ Sara magiʼdaa mbáa ada̱”.
15 Mú, numuu dí Sara nimíñuu, ikha jngóo niʼthí: “¡Jáʼan! ¡Tandu̱ʼwa̱ jún!”. Mú ikhaa* niʼthí: “Gajkhun rí ikháán nitanduʼwá”.
16 Índo̱ xa̱bu̱ nituxu̱u̱n magúun. Abrahán ni̱jkha̱ mbá chímba̱ʼ gajmíi̱nʼ mu maʼtángawúún, ikhiin nitangi̱i̱n niyexi xígií náa gíwánʼ Sodoma.
17 Ikhú Jeobá niʼthí: “Mathu̱u̱n Abrahán rí ma̱ni̱.
18 Abrahán maʼga̱nú mani̱ndxu̱u̱ mbá xuajin mba̱a̱ ga̱jma̱a̱ magiʼdoo tsiaki̱i̱, xúgíʼ xuajin dí rígá náa tsu̱du̱u̱ ku̱ba̱ʼ maguma tsajkurámiinʼ ga̱jma̱a̱ numuu ikhaa.
19 Ikhúún nijkhánú nimbájxuʼ gajmuʼ mu xúʼko̱ maʼtáñajúúnʼ e̱ji̱i̱n ga̱jma̱a̱ e̱ji̱i̱n bi̱ makuwá nda̱wa̱á rí magún má xúʼko̱ náa kambo̱o̱ Jeobá mu muni̱ rí májánʼ ga̱jma̱a̱ dí jmbu. Mu xúʼko̱ ikhúún, Jeobá, manimbánuu dí nikuʼdáminaʼ náa Abrahán”.
20 Ikha jngóo Jeobá niʼthí: “Nidxawuun aʼwá rí nuxieʼkhá ga̱jma̱a̱ numuu dí raʼkhí nuni̱ xa̱bu̱ Sodoma ga̱jma̱a̱ Gomorra ma̱ngaa dí aʼkhá rí nuni̱ nindxu̱u̱ mbiiʼ wéñuuʼ.
21 Magájtáa gáyóo á mu gajkhun nindxu̱u̱ rí nidxawun, mba̱yo̱o̱ á mu gajkhun dí raʼkhí kayuuʼ dí kúwá runi̱. Á mu ragájkhun, mba̱yo̱o̱ má”.
22 Nda̱wa̱á xa̱bu̱ nigún xígií náa gíwánʼ Sodoma, mú Jeobá niguanúu ga̱jma̱a̱ Abrahán.
23 Ikhú Abrahán nikuʼmaminaʼ náa ikhaa ga̱jma̱a̱ niʼthúu̱n: “Gajkhun rí matani gámbíin xa̱bu̱ míjíinʼ mbóó gajmiún xa̱bu̱ ra̱míjíinʼ ráʼ.
24 Guʼthá rí náa xuajin kúwá mbá 50 xa̱bu̱ míjíinʼ, lá matani gámbíin xúgíinʼ xa̱bu̱ ráʼ. Lá xátani mba̱a̱ a̱jkia̱a̱nʼ xtayáá xuajin ga̱jma̱a̱ numún 50 xa̱bu̱ míjíinʼ bi̱ kúwá ikhí ráʼ.
25 ¡Ikháán nimbá miʼtsú xataxíyáa mbáa xa̱bu̱ májáanʼ mbóó ga̱jma̱a̱ xa̱bu̱ ra̱májáanʼ! ¡Xátaniʼñánʼ rí mbá nájmi̱i̱n makhañún mbóó! Nimbá miʼtsú ikháán xátani̱ xígi̱ káʼnii. Lá bi̱ nagrui̱ga̱ xtángoo náa xúgíʼ tsu̱du̱u̱ ku̱ba̱ʼ xáʼni xó má gíʼmaa ráʼ.”
26 Ikhú Jeobá niʼthúu̱n: “Á mu naxkamii 50 xa̱bu̱ míjíinʼ náa xuajin Sodoma ga̱jma̱a̱ numuu ikhiin ma̱ni̱ mba̱a̱ a̱jkiu̱nʼ ka̱yo̱o̱ xuajin”.
27 Ikhú Abrahán niriʼñuu: “Jeobá, mba̱a̱ a̱jkia̱a̱nʼ gátani̱ rí na̱ni̱ gajmáaʼ má xúʼko̱, nda̱yo̱o̱ má dí idiʼ ga̱jma̱a̱ yujndaʼ nindxu̱ʼ.
28 Mú guʼthá rí ndayóoʼ witsiin mu majxíin* maʼni 50. Lá matani̱ gámbáa xuajin numuu rí ndayóoʼ witsiin xáʼ.” Dios niriʼñuu: “Xáni gámbóʼ á mu naxkamii ikhí mbá 45 xa̱bu̱ míjíinʼ”.
29 Mbu̱júu̱ Abrahán nirajxu̱u̱: “Tia̱a̱ á mu kúwá 40 xá.” Ikhaa niriʼñuu: “Xáni gámbóʼ á mu kúwá 40”.
30 Abrahán niʼthí xóó: “Jeobá, xákiʼnánla, mbá péñu, atatsíñuʼ matha̱nʼ xóó. Tia̱a̱ á mu nataxkamiin ikhí mbá 30 xá.” Ikhaa niriʼñuu: “Á mu naxkamiin 30, xáni gámbóʼ”.
31 Mbu̱júu̱ Abrahán niʼthí: “Jeobá, atani̱ mba̱a̱ a̱jkia̱a̱nʼ rí na̱ni̱ gajmáaʼ má xúʼko̱. Tia̱a̱ á mu i̱ndó kúwá mbá 20 xa̱bu̱ míjíinʼ rá.” Dios niriʼñu̱u̱: “Á mu kúwá 20, xáni gámbóʼ”.
32 Nda̱wa̱á kayuuʼ Abrahán niʼthí: “Jeobá, xakiʼnála, mbá péñu, atatsíñuʼ ma̱ta̱ xóó imbóó nuthu. Á mu nataxkamiin káʼ mbá gu̱wi̱i̱nʼ xá.” Ikhaa niriʼñuu: “Xáni gámbóʼ á mu naxkamiin mbá gu̱wi̱i̱nʼ”.
33 Índo̱ niguámbóo niʼtámíjná ga̱jma̱a̱ Abrahán, Jeobá ni̱jkha̱a̱, ikhú Abrahán nitanga̱a̱ náa gíʼ guʼwá xtíin ndrígóo.
Mbaʼa nota
^ Náa ajngáa hebreo naʼthí, “á mu idaaʼ naʼni a̱jkiu̱u̱n kaʼyoʼ”.
^ O “ataniu̱ʼ mbá rí májánʼ”.
^ O “lajuíin”.
^ Náa ajngáa hebreo naʼthí, “mu mbayáa tsiaki̱i̱ a̱jkia̱la”.
^ Náa ajngáa hebreo naʼthí, “nánguá gajtaa eʼdiuu xó ma eʼwíinʼ gu̱ʼu̱”.
^ Xóo muʼthá, “Dios”.
^ O “maʼgooʼ”.
