Génesis 20:1-18
-
Sara naguma kríya̱a̱ʼ náa Abimélec (1-18)
20 Nda̱wa̱á, Abrahán ni̱jkha̱ kagu̱u̱ xúgíʼ dí gíʼdoo náa ku̱ba̱ʼ ndrígóo Négueb ga̱jma̱a̱ nixtáa náa majñu̱u̱ʼ Cadés ga̱jma̱a̱ Sur. Índo̱ ikhaa xtáa náa Guerar,
2 Abrahán niʼthí rígi̱ ga̱jma̱a̱ numuu Sara bi̱ nindxu̱u̱ a̱ʼgiu̱u̱. “Ikhaa nindxu̱u̱ giʼtioʼ”. Ikha jngóo Abimélec, rey bi̱ xtáa náa Guerar, nikuʼma dí mbuyáaʼ Sara ga̱jma̱a̱ maguwáʼ kuya̱a̱.
3 Nda̱wa̱á, mbá mbruʼun Dios nikujmaa náa xnuʼndoo Abimélec ga̱jma̱a̱ niʼthúu̱n: “Ma̱ndoo makhañáaʼ ga̱jma̱a̱ numuu dí nitaxuʼma maguwáʼ kuya̱a̱ a̱ʼgu̱, numuu dí ikhaa gíʼdaa má ajmbio̱o̱, nindxu̱u̱ a̱ʼgiu̱u̱ i̱mba̱a̱ xa̱bu̱”.
4 Abimélec na̱nguá má nibóoʼ ga̱jma̱a̱ Sara. Ikha jngóo nirajxu̱u̱: “Jeobá, lá matani gámbáa mbá xuajin dí ragíʼdoo aʼkhúun rá.
5 Lá raʼkháa ikhaa niʼthúnʼ ‹Ikhaa nindxu̱u̱ giʼtio̱ʼ› xáʼ. Lá raʼkháa Sara ma̱ngaa niʼthí, ‹Ikhaa nindxu̱u̱ ndxájuʼ› ráʼ. Ikhúún na̱nguá nindoʼ ma̱ni̱ mbá dí ra̱májánʼ, na̱nguá ndi̱yo̱o̱ á mu raʼkhí dí xtáá rani̱”.
6 Ikhú Dios bi̱ gajkhun niʼthúu̱n náa xnuʼndaa: “Nda̱yo̱o̱ má dí ikháán táʼndaaʼ matani̱ mbá dí ra̱májánʼ. Ikha jngóo taniʼñááʼ dí mataxuʼdáminaʼ aʼkhá náa ikhúún ga̱jma̱a̱ tániʼñaááʼ dí mataba̱a̱ʼ ga̱jma̱a̱ʼ.
7 Dí xúgi̱ araxniáa a̱ʼgiu̱u̱ xa̱bu̱, numuu dí ikhaa nindxu̱u̱ profeta.* Ikhaa maʼtájkháan ga̱jma̱a̱ numaaʼ mu xúʼko̱ ma̱ndoo maraxtaa xóó. Mú, á mu na̱nguá eraxniáa, natha̱a̱nʼ gajkhun rí ikháán gajmiáanʼ xúgíinʼ bi̱ kúwá náa guʼwáaʼ makhañún”.
8 Abimélec ndijui̱i̱ miʼcha̱ wéñuuʼ, nindxaʼwún xa̱bi̱i̱ ga̱jma̱a̱ niʼthúún dí nirígá. Ikhiin nimiñun wéñuuʼ.
9 Ikhú Abimélec nidxaʼwóo Abrahán ga̱jma̱a̱ niʼthúu̱n: “Dí lá nitaniu̱xu̱ rá. Dí lá raʼkhí ninia̱a̱ʼ jngóo rí matani̱ dí ikhúún gajmíʼ xa̱bu̱ xuajñunʼ muxuʼdámijnáxu̱ mbá aʼkhá mbiiʼ wéñuuʼ rá. Raʼkhí kayuuʼ nindxu̱u̱ dí nitani̱”.
10 Abimélec ma̱ngaa niʼthúu̱n Abrahán: “Náá numuu dí xígi̱ kaʼnii nitani̱ rá.”
11 Abrahán niriʼñuu: “Numuu dí nindxa̱ʼwa̱mínáʼ: ‹Xa̱bu̱ bi̱ kúwá gi̱i̱ na̱nguá míñúún kuyáá Dios, muxiñún ga̱jma̱a̱ numuu a̱ʼgiu̱ʼ›.
12 Gajkhun má dí nindxu̱u̱ giʼtioʼ. Numuu rí nindxu̱u̱ mbáwíí anu̱xu̱* mu mixtiʼkuiin ru̱dúxu̱. Rí xúgi̱ ma̱ngaa nindxu̱u̱ a̱ʼgiu̱ʼ.
13 Ikha jngóo índo̱ Dios niʼthúnʼ rí magajnúʼ náa goʼwóo anu̱ʼ mu maʼgá rajnguʼwún raxtáá, ikhúún ni̱thu̱u̱n: ‹Mbá péñu,* xígi̱ gátasngajmá rí gajkhun nandaaʼ xta̱yo̱ʼ,* rí asndu náá má guʼgua̱, marata rí nindxu̱ʼ ndxájuaaʼ›”.
14 Ikhú Abimélec nikuʼma rí maguwáʼ kudiin mugu̱, xedi̱ xó ma xa̱bekha ga̱jma̱a̱ gu̱ʼu̱ bi̱ mumbayíí ga̱jma̱a̱ nixniúu Abrahán. Ma̱ngaa nixniáa Sara bi̱ nindxu̱u̱ a̱ʼgiu̱u̱.
15 Abimélec ma̱ngaa niʼthúu̱n: “Nandoo natayáá xúgíʼ mbayuʼ, ma̱ndoo mi̱dxu̱ʼ gáraxtaa asndu náá má eyaaʼ ikháán”.
16 Ga̱jma̱a̱ Sara niʼthúu̱n: “Gi̱i̱ na̱xnu̱u̱ mbá 1,000 piezas ndrígóo plata ndxájuaaʼ. Mu makujmaa dí na̱nguá xtaʼdáá aʼkháanʼ náa xúgíinʼ bi̱ xtáa gajmiáanʼ ga̱jma̱a̱ náa xúgíinʼ xa̱bu̱. Nimbáa xándoo makruiga̱a̱n ga̱jma̱a̱ numuu nimbá”.
17 Ikhú Abrahán nigíʼdu̱u̱ niʼtákáñuu Dios bi̱ gajkhun, Dios niʼni tanuu Abimélec, a̱ʼgiu̱u̱, gu̱ʼu̱ yumbáá ga̱jma̱a̱ nindoo niguáʼdiin e̱ji̱n.
18 Numuu dí Jeobá niʼni dí xúgíinʼ gu̱ʼu̱ bi̱ kúwá náa goʼwóo Abimélec xándoo muguaʼdiin e̱ji̱n ga̱jma̱a̱ numuu Sara, a̱ʼgiu̱u̱ Abrahán.
