Génesis 21:1-34
21 Jeobá nirmáʼáan a̱jkiu̱u̱n kaʼyoo Sara, xó má niʼthí maʼni, Jeobá niʼnimbánuu rí niʼthúu̱n Sara.
2 Ikhú Sara niguewáan ada̱,* nigiʼdaa mbáa a̱ʼdióo Abrahán índo̱ ikhaa nikhi̱i̱ má, ikha má mbiʼi rí Dios niʼthí dí maxtáa.
3 Abrahán nixnúu mbiʼyuu Isaac ada̱ bi̱ Sara niʼnii.
4 Abrahán nirujtu xtóo xuyuuʼ tsáʼkhúun Isaac índo̱ gíʼdoo migiñuʼ mbiʼi rí nigumaa, xó ma Dios niʼtañajúnʼ maʼni.
5 Abrahán gíʼdoo 100 tsiguuʼ índo̱ nigumaa Isaac.
6 Ikhú Sara niʼthí: “Dios niʼni rí mandu̱ʼwa̱ ga̱jma̱a̱ xúgíinʼ bi̱ gudxawíín rígi̱ mundu̱ʼwa̱ ga̱jma̱á ni̱ndxu̱ʼ”.*
7 Ikhaa niʼthí xóó: “Tsáá lá gándxaʼwáminaʼ rí Sara a̱ʼgiu̱u̱ Abrahán: ‹Maxníxúuʼ mbáa ada̱ rá.› Mú nigúʼdaa mbáa a̱ʼdióo, xúgi̱ rí nikhi̱i̱ má”.
8 Ada̱ ni̱jkha̱ ra̱ja̱a̱ ga̱jma̱a̱ niniñuuʼ raʼxúuʼ. Mbiʼi rí niniñuuʼ raʼxúuʼ Isaac. Abrahán niʼni mbá ndxa̱a̱ mba̱a̱.
9 Mú Sara nixtáa raʼyoo dí a̱ʼdióo Agar a̱ʼgú egipcia, bi̱ nigiʼdaa ga̱jma̱a̱ Abrahán, xtáa ratsijmaa Isaac.
10 Ikha jngóo niʼthúu̱n Abrahán: “¡Ataxkriya̱a̱ʼ gi̱i̱ a̱ʼgú ñumbáá ga̱jma̱a̱ a̱ʼdióo! Numuu dí a̱ʼdióʼ Isaac xágruigúu mbóó ga̱jma̱a̱ rí kaʼyoo a̱ʼdióo a̱ʼgú ñumbáá buʼko̱”.
11 Mú Abrahán ra̱ʼkhá tháán nigawúunʼ rí xúʼko̱ niʼthí ga̱jma̱a̱ numuu a̱ʼdióo.
12 Ikha jngóo Dios niʼthúu̱n Abrahán: “Xájmáa a̱jkia̱a̱nʼ ga̱jma̱a̱ rí Sara niʼthí ga̱jma̱a̱ numuu dxámá ma̱ngaa numuu a̱ʼgú ñumbáá ndrígáaʼ. Atadxawíín dí naʼthí, numuu rí náa Isaac gáguwáʼ bi̱ mani̱ndxu̱ún ejña̱a̱nʼ.
13 Náa a̱ʼdióo a̱ʼgú ñumbáá ndrígáaʼ ma̱ni̱ rí magajnúu mbá xuajin numuu dí ma̱ngaa nindxu̱u̱ a̱ʼdiáaʼ”.
14 Ikha jngóo, Abrahán miʼcha̱ wéñuuʼ ndijui̱i̱, niguajtuun pan ga̱jma̱a̱ mbá kulámbra* iyaʼ ga̱jma̱a̱ nixnúu Agar. Ma̱ngaa nigruaʼmáʼ xúgíʼ náa xpajpoo ga̱jma̱a̱ niʼtángawuu ikhaa ga̱jma̱a̱ a̱ʼdióo. Ikhú ikhaa nigájnuu ni̱jkha̱, ga̱jma̱a̱ mba̱ʼ ni̱jkha̱á náa ku̱ba̱ʼ mijxooʼ* ndrígóo Beer-Seba.
15 Niguámbá iyaʼ rí ka̱jnu̱ʼ náa kulámbra ga̱jma̱a̱ ikhaa niniñuuʼ a̱ʼdióo náa agoo mbá xtáʼdu̱u̱ iná.
16 Ikhaa ni̱jkha̱ má xúʼko̱, ni̱jkha̱ gági̱ʼi̱ mbáwíí mitsínguánʼ wáa numuu rí niʼthí: “Tsíyoʼ gáyóo xóo gákáñúu a̱ʼdióʼ”. Ikha jngóo mitsínguánʼ ni̱jkha̱ gági̱ʼi̱ ga̱jma̱a̱ nigíʼdu̱u̱ nimbiyaʼ wéñuuʼ.
17 Ikhú Dios nindxaʼwuun ada̱ ga̱jma̱a̱ ángel ndrígióo Dios nindxaʼwóo Agar asndu mekhuíí ga̱jma̱a̱ niʼthúu̱n: “Agar, dí gíʼdaa rá. Xámiñaʼ numuu dí Dios nindxawuun ada̱ asndu náa xtáa.
18 Atujxa̱a̱ʼ atambáyíí matuxu̱u̱ ga̱jma̱a̱ atuwiin numuu rí ma̱ni̱ dí náa ikhaa magajnúu mbá xuajin mba̱a̱”.
19 Ikhú Dios niʼni rí mbaʼyoo mbá puzu rí ka̱jnu̱ʼ iyaʼ. Ikhaa ni̱jkha̱ asndu ikhí, niʼni majnííʼ iyaʼ kulámbra ga̱jma̱a̱ nixnúu maga̱a̱n a̱ʼdióo.
20 Índo̱ ni̱jkha̱ rakhi̱i̱ ada̱, Dios niʼni tsajkurámáaʼ ma xúʼko̱. Ikhaa nixtáa náa ku̱ba̱ʼ mixooʼ, nda̱wa̱á ninindxu̱u̱ mbáa bi̱ na̱da̱ʼ xkamídá.
21 Ikhaa ni̱jkha̱ gáxtáa náa ku̱ba̱ʼ ndrígóo Parán, ru̱dúu̱ ndiyáaʼ mbáa a̱ʼgu̱ bi̱ xtáa náa ku̱ba̱ʼ ndrígóo Egipto mu mbayáa.
22 Nákhá ikhú, Abimélec ni̱jkha̱ ga̱jma̱a̱ Ficol, bi̱ naʼtáñajúúnʼ soldado ndrígóo, gáʼtámijná ga̱jma̱a̱ Abrahán. Niʼthúu̱n: “Dios xtáa ga̱jma̱á nindxa̱a̱ʼ náa xúgíʼ rí natani̱.
23 Ikha jngóo gi̱i̱ xúgi̱, gajmaaʼ mbiʼyuu Dios mu marathu̱nʼ dí gajkhun xátaniuʼ dí raʼkhí ikhúún ni má e̱ji̱nʼ ni má e̱jñu̱ún e̱ji̱nʼ. Arathúnʼ dí gajkhun matasnga̱jmá dí májánʼ a̱jkia̱a̱nʼ* náa ikhúún ga̱jma̱a̱ náa ku̱ba̱ʼ dí nidxu̱ʼ rawanʼ raxtaa xó má ikhúún nisngajmáaʼ dí májánʼ a̱jkiu̱nʼ”.
24 Abrahán niʼthí: “Natha̱a̱nʼ gajkhun”.
25 Ikhú Abrahán nixiéʼkhá náa inuu Abimélec, niʼthúu̱n dí xa̱bi̱i̱ nindrigúu ga̱jma̱a̱ tsiaki mbá puzu ndrígóo iyaʼ.
26 Abimélec niriʼñuu: “Na̱nguá e̱yo̱o̱ tsáa niʼniaaʼ rígi̱. Ikháán nda̱a̱ dí niratá kayuuʼ asndu xúgi̱ níkhú xtáá radxawuun”.
27 Índo̱ Abrahán nidxawun rígi̱, ikhú ni̱ʼkha̱ kagui̱i̱n mugu̱, xedi̱, nixniúu Abimélec. Ikhú mbá nájmi̱i̱n nixna ajngún.
28 Índo̱ Abrahán nirkuájíinʼ mbá juwiin mugu̱ e̱ʼgú náa xujkiúu,
29 ikhú Abimélec nirajxu̱u̱: “Náá numuu rí nitarkuájíinʼ mbá juwiin mugu̱ bugi̱ rá.”
30 Abrahán niriʼñuu: “Mbaʼyóoʼ mi̱diin mbá juwiin mugu̱ bugi̱ bi̱ maxnia̱a̱ʼ. Mu xúʼko̱ makujmaa rí ikhúún gajkhun ni̱ndii puzu”.
31 Ikha jngóo ikhaa nixná mbiʼyuu Beer-Seba* náa mbaaʼ rúʼko̱, numuu rí ikhí mbá nájmi̱i̱n nixna ajngún.
32 Ikha jngóo náa Beer-Seba nimbánumijná. Nda̱wa̱á Abimélec nitanga̱a̱ náa ku̱ba̱ʼ ndrígu̱ún filisteos ga̱jma̱a̱ Ficol, bi̱ naʼtáñajúúnʼ soldado ndrígóo.
33 Nda̱wa̱á dí nirígá rígi̱, Abrahán ni̱ʼdu̱u̱ mbá ixi̱ tamarisco* náa Beer-Seba ga̱jma̱a̱ ikhí nigríga̱a̱* mbiʼyuu Jeobá, Dios bi̱ xtáa kámuu.
34 Abrahán nixtáa mba̱yu̱u̱ʼ tsiguʼ* náa mbañúúnʼ xa̱bu̱ filisteos.
Mbaʼa nota
^ O “niʼni endi̱i̱”.
^ O mbáa “manduʼwajmúún”.
^ O “odre”.
^ O “desierto”.
^ Mbáa nandoo gáʼthúu̱n ‹puzu rí nimbánún› o ‹puzu dí juwan›.
^ Ixi̱ rígi̱ najma̱a̱n náa ku̱ba̱ʼ mijxooʼ, majkhaʼ inúu ga̱jma̱a̱ riʼyu̱u̱ nindxu̱u̱ rosa o miʼxá.
^ O “nijmuu”.
^ Náa ajngáa hebreo naʼthí, “mba̱yu̱u̱ʼ mbiʼi”.
