Génesis 22:1-24
22 Nda̱wa̱á dí nirígá rígi̱, ikhú Dios bi̱ gajkhun nindoo mbaʼyoo á mu Abrahán naʼnimbo̱o̱ kaʼyoo. Niʼthúu̱n: “¡Abrahán!”. Ikhaa niriʼñuu: “¡Gi̱i̱ xtáá!”.
2 Ikhú Dios niʼthúu̱n: “Mbá péñu,* ayáa a̱ʼdiáaʼ, a̱ʼdiáaʼ bi̱ mbáwíí bi̱ ra̱ʼkhá tháán nandaaʼ xtayáá, Isaac, ayuʼ náa ku̱ba̱ʼ Moria. Ikhí gáraxnajxíi xóo tsigijñaʼ gamajkhu dí nakarámáʼ náa mbá kúbá rí ikhúún ma̱tha̱a̱nʼ”.
3 Ikhú Abrahán ndijui̱i̱ miʼcha̱ wéñuuʼ, nigrígúu xíliúu búrriu̱u̱ ma̱ngaa niʼthúún a̱jmi̱i̱n xa̱bi̱i̱ mu maʼga gajmíi̱n xúʼko̱ má Isaac bi̱ nindxu̱u̱ a̱ʼdióo. Ma̱ngaa nixpíʼthá ixi̱ mu majmaa náa mikarámáʼ tsigijñaʼ. Ikhú nigájnuu ni̱jkha̱ náa mbaaʼ rí Dios bi̱ gajkhun niʼthúu̱n maʼga.
4 Índo̱ niʼni ajtsú mbiʼi, Abrahán mitsínguánʼ niʼngo̱o̱ ndiʼyoo mbaaʼ.
5 Abrahán niʼthún xa̱bi̱i̱: “Gaguanála gi̱i̱ gajmiála búrru, ikhúún ga̱jmu̱ʼ a̱ʼdióʼ muʼguáxu̱ ñuʼún, mu mbuyamajkuííxu̱ Dios. Nda̱wa̱á matangáanʼxu”.
6 Ikha jngóo Abrahán nigruaʼmáʼ ixi̱ rí majmaa náa mikarámáʼ tsigijñaʼ, náa xpajpoo Isaac. Ikhaa niyéjkha̱ aguʼ ga̱jma̱a̱ chílú, ikhú mbá nájmi̱i̱n nigún.
7 Ikhú Isaac niʼthúu̱n Abrahán: “¡Anu̱ʼ!”. Ikhaa niriʼñuu: “¡Ndí rígá, a̱ʼdióʼ!”. Isaac niraxu̱u̱: “Kuʼyálú aguʼ ga̱jma̱a̱ ixi̱, mú, náá xtáa mugu̱ bi̱ mikarámáaʼ rá.”
8 Abrahán niriʼñuu: “Dios má gáxnulú mugu̱ bi̱ mikarámáaʼ a̱ʼdióʼ”. Ga̱jma̱a̱ nigún má xúʼko̱.
9 Nda̱wa̱á niguáʼnu náa mbaaʼ rí Dios bi̱ gajkhun niʼthúu̱n Abrahán. Ikhí niʼni mújúunʼ náa mikarámáʼ tsigijñaʼ ga̱jma̱a̱ tsu̱du̱u̱ nigruaʼmáʼ ixi̱. Nda̱wa̱á niroʼóo rajkúu ga̱jma̱a̱ ñawúunʼ Isaac, nitámáanʼ náa tsu̱du̱u̱ ixi̱ náa mikarámáʼ tsigijñaʼ.
10 Ikhú Abrahán niriyaʼ chílú mu maxíyáa a̱ʼdióo.
11 Mú ángel ndrígióo Jeobá niʼthúu̱n asndu mekhuíí, niʼthí: “¡Abrahán! ¡Abrahán!” Ikhaa niriʼñuu. “¡Gi̱i̱ xtáá!”.
12 Ikhú niʼthúu̱n: “Xátaxíyáa dxámá, xátani̱ nimbá. Rí xúgi̱ nda̱yo̱o̱ gajkhun dí nindxa̱a̱ʼ mbáa xa̱biya̱ bi̱ namíñuu kaʼyoo Dios, numuu dí na̱nguá nitani̱ gáʼdu̱u̱nʼ maraxnaxíi náa ikhúún a̱ʼdiáaʼ, a̱ʼdiáaʼ bi̱ mbáwíí”.
13 Abrahán mitsínguánʼ ndiʼyoo mbáa mugu̱ e̱jmba̱a̱ bi̱ kaxtambróʼoo chi̱jyu̱u̱ʼ náa mbá xtáʼdu̱u̱ iná. Ikhú ni̱jkha̱ gágutuwiin mugu̱ e̱jmba̱a̱ ga̱jma̱a̱ nixnáxi̱i̱ xóo tsigijñaʼ gamajkhu dí nakarámáʼ xóo xtiʼkhuu a̱ʼdióo.
14 Abrahán nixná mbiʼyuu mbaaʼ rúʼko̱, Jeobá-Yiré.* Ikha jngóo asndu xúgi̱ najuiʼthá “Náa kúbá ndrígóo Jeobá marigá dí gáʼyóoʼ”.
15 Ángel ndrígióo Jeobá niʼthúu̱n Abrahán rí maʼni a̱jma̱ nuthu asndu mekhuíí,
16 niʼthí: “Ma̱jmuʼ mbiʼyuʼ mu makuʼdámina̱ʼ rí maʼnimbánuu rígi̱, eʼthí Jeobá, ga̱jma̱a̱ numuu dí na̱nguá nitani̱ gaʼduunʼ rí maraxnaxíi a̱ʼdiáaʼ, a̱ʼdiáaʼ bi̱ mbáwíí,
17 gajkhun rí ma̱ni̱ tsajkurámáánʼ ga̱jma̱a̱ rí ma̱ni̱ mbaʼin e̱jña̱a̱ʼ* xóo a̱ʼgua̱a̱n bi̱ kúwá mekhuíí ga̱jma̱a̱ xóo jui̱ʼi̱ dí rígá náa rawuunʼ lamáa.* Ma̱ngaa, e̱jña̱a̱ʼ mundrígú xuajñún* xa̱bu̱ sia̱nʼ ndrígu̱ún.
18 Xúgíʼ xuajin dí rígá náa tsu̱du̱u̱ ku̱ba̱ʼ mudrigú dí maguma tsajkurámíínʼ ga̱jma̱a̱ numún e̱jña̱a̱ʼ, numuu dí ikháán nitadxawíín aʼwóʼ”.
19 Nda̱wa̱á dí nirígá rígi̱, Abrahán nitanga̱a̱ náa gíi̱nʼ xa̱bi̱i̱, ikhú nitangi̱i̱n mbá xúgíinʼ náa Beer-Seba. Abrahán nixtáa má xúʼko̱ náa Beer-Seba.
20 Tsiguʼ nda̱wa̱á, nitháán Abrahán: “Milcá nigiʼdiin e̱ji̱i̱n ndxájuaaʼ Nacor.
21 A̱ʼdá giʼniuu mbiʼyuu Uz, gi̱ʼtio̱o̱ mbiʼyuu Buz ga̱jma̱a̱ bi̱ nixtáa nda̱wa̱á mbiʼyuu Quemuel, anu̱u̱ Aram.
22 Késed, Hazó, Pildás, Jidlaf ga̱jma̱a̱ Betuel”.
23 Betuel ninindxu̱u̱ anu̱u̱* Rebeca. Ikhiin ninindxu̱ún mbá migiñiiʼ e̱ji̱i̱n Milcá bi̱ nigiʼdiin ga̱jma̱a̱ Nacor, ndxájuu Abrahán.
24 Ga̱jma̱a̱ a̱ʼgú ñawuun* bi̱ mbiʼyuu Reumá, nigiʼdiin e̱ji̱n bugi̱: Tébah, Gaham, Tahas ga̱jma̱a̱ Maacá.
Mbaʼa nota
^ O “atani̱ mbá rí májánʼ”.
^ Rí nandoo gáʼthúu̱n ‹Jeobá maxná› o ‹Jeobá gáʼyoo›.
^ Náa ajngáa hebreo naʼthí, “tsígóoʼ”.
^ O “mar”.
^ O “mudrigú xkrugún”.
^ O “tátée”.
