Génesis 23:1-20
-
Sara nakháñuu ga̱jma̱a̱ najui̱ʼdi̱i̱ (1-20)
23 Sara nixtáa 127 tsiguʼ. Xígi̱ mba̱yu̱u̱ʼ nixtáa ikhaa.
2 Sara nikháñúu náa Quiryat-Arbá, rígi̱ nindxu̱u̱ Hebrón, náa ku̱ba̱ʼ ndrígóo Canaán. Abrahán nimbiyaʼ ga̱jma̱a̱ ra̱ʼkhá tháán nixtáa ngíná dí nikháñuu Sara.
3 Nda̱wa̱á, Abrahán niniñuuʼ náa kraʼaa a̱ʼgiu̱u̱ ga̱jma̱a̱ ni̱jkha̱ gáʼtámíjná gajmíi̱n e̱ji̱i̱n Het:
4 “Ikhúún nindxu̱ʼ mbáa xa̱bu̱ na̱ʼkha̱á ga̱jma̱a̱ mbáa xa̱bu̱ bi̱ nanújngo̱ó náa ikháanʼla. Gu̱xnu̱ʼ mbá chíʼgíiʼ* ku̱ba̱ʼ náa mbayala náa ma̱ndoo ma̱di̱i̱ a̱ʼgiu̱ʼ”.
5 Ikhú e̱ji̱i̱n Het niriʼñáán Abrahán:
6 “Tátá, atadxawunxu̱. Náa ikháanʼxu̱, ikháán nindxa̱a̱ʼ mbáa bi̱ kayá edxu̱u̱ bi̱ Dios niraʼwíi.* Ma̱ndoo mata̱di̱i̱ a̱ʼgia̱a̱ʼ náa rí itháan májánʼ náa nudíín wajñuxu̱. Nimbáa dí ikháanʼxu̱ xáʼni gaʼduunʼ maxnáaʼ náa naʼdíín wajñuuʼ mu matadi̱i̱ a̱ʼgia̱a̱ʼ”.
7 Abrahán nitu̱jxu̱u̱ ga̱jma̱a̱ nismbáti̱go̱o̱ náa inún xa̱bu̱, e̱ji̱i̱n Het,
8 niʼthúún: “Á mu nandala mu̱xnu̱ʼ náa madi̱i̱ a̱ʼgiu̱ʼ, gudxawunʼla dí ma̱ta̱: Gu̱tanla Efrón a̱ʼdióo Zóhar,
9 rí mago̱jo̱ʼ tsíñu dí rígá náa Macpelá, dí gíʼ náa rawuunʼ mbayuuʼ. Guniʼñúʼ dí ma̱ni̱ númuu náa inala mangáanʼ nguáthá má plata numuu. Mu xúʼko̱ magúʼdoʼ náa ma̱díín wajñuʼ”.
10 Mú Efrón gíʼ má náa majñu̱únʼ e̱ji̱i̱n Het. Ikha jngóo náa inún e̱ji̱i̱n Het ga̱jma̱a̱ náa inún xúgíinʼ xa̱bu̱ bi̱ natu̱ʼu̱u̱n náa xkrugoo xuajñuu, Efrón xa̱bu̱ hitita niriʼñuu Abrahán:
11 “¡Na̱nguá tátá! Atadxawunʼ. Raʼkháa i̱ndó maxna̱a̱ʼ tsíñu, ma̱ngaa maxna̱a̱ʼ mbaaʼ náa gíʼ. Maxna̱a̱ʼ náa inún xa̱bu̱ xuajñunʼ. Atadi̱i̱ a̱ʼgia̱a̱ʼ”.
12 Ikhú Abrahán nismbáti̱go̱o̱ náa inún xúgíinʼ xa̱bu̱ bi̱ kúwá ikhí
13 ga̱jma̱a̱ náa inún xúgíinʼ, niʼthúu̱n Efrón: “Atadxawunʼ dí ma̱ta̱a̱nʼ. Á mu májánʼ tayáá, ma̱ni̱ númuu xó má numuu mbaaʼ. Atri̱gú plata mu xúʼko̱ ma̱ndoo ma̱di̱i̱ a̱ʼgiu̱ʼ ikhí”.
14 Ga̱jma̱a̱ Efrón niriʼñuu Abrahán:
15 “Tátá, atadxawunʼ. Mbaaʼ rígi̱ minumuu 400 siclos* ndrígóo plata, mú raʼkháa rígi̱ gíʼdoo itháan numuu, ayuʼ, atadi̱i̱ a̱ʼgia̱a̱ʼ ikhí”.
16 Abrahán nigruigú maʼni numuu xó má niʼthí Efrón ga̱jma̱a̱ nigiewan plata xó má niʼthí ikhaa náa inún e̱ji̱i̱n Het: 400 siclos ndrígóo plata, xó má rí nugiewa̱n bi̱ nugujua̱.
17 Xúʼko̱ niʼni rí mbayuuʼ Efrón dí gíʼdoo náa Macpelá náa inuu Mamré, mbaaʼ, tsíñu dí rígá ikhí ga̱jma̱a̱ xúgíʼ ixi̱ dí rígá náa awúu̱n mbaaʼ, ni̱jkha̱nú ninindxu̱u̱
18 ndrígóo Abrahán, rí niʼtsi náa inún e̱ji̱i̱n Het ga̱jma̱a̱ náa inún xúgíinʼ bi̱ natu̱ʼu̱u̱n náa xkrugoo xuajin.
19 Nda̱wa̱á dí nirígá rígi̱, Abrahán niʼdi̱i̱ Sara bi̱ nindxu̱u̱ a̱ʼgiu̱u̱ náa tsíñu dí rígá náa Macpelá, inuu Mamré, rígi̱ nindxu̱u̱ Hebrón, náa ku̱ba̱ʼ ndrígóo Canaán.
20 Xúʼko̱ niʼni rí mbaaʼ ga̱jma̱a̱ tsíñu nánguá ninindxu̱u̱ ndrígu̱ún e̱ji̱i̱n Het, ni̱jkha̱nú niʼni mbayuuʼ Abrahán mu majmuu náa ma̱ʼdíín bi̱ nikháñún.
