Génesis 25:1-34
25 Abrahán nitanga̱a̱ ninigúu̱nʼ ga̱jma̱a̱ a̱ʼgiu̱u̱ nigumbiʼyuu Queturá.
2 Nda̱wa̱á, a̱ʼgu̱* bugi̱ nigiʼdiin e̱ji̱n, ninindxu̱u̱: Zimrán, Jocsán, Medán, Madián, Isbac ga̱jma̱a̱ Súah.
3 Jocsán nindxu̱u̱ anu̱u̱* Seba ga̱jma̱a̱ Dedán.
E̱ji̱i̱n Dedán ninindxu̱u̱ Asurim, Letusim ga̱jma̱a̱ Leumim.
4 E̱ji̱i̱n Madián ninindxu̱u̱ Efá, Éfer, Hanok, Abidá ga̱jma̱a̱ Eldaá.
Xúgíinʼ bugi̱ ninindxu̱ún e̱ji̱i̱n Queturá.
5 Nda̱wa̱á, Abrahán nixnúu xúgíʼ dí gíʼdoo Isaac.
6 Mú, e̱jñu̱ún gu̱ʼú ñawiin,* Abrahán i̱ndó nixnúún regalos. Nda̱wa̱á nikuʼmiin magún gákuwá xígií náa ku̱ba̱ʼ ndrígóo Oriente, náa nagájnuu a̱jkha̱ʼ* mu xákúwá mijngii gajmiún Isaac.
7 Abrahán nixtáa 175 tsiguʼ.
8 Ikhú nigatíyáaʼ jxu̱u̱ʼ ga̱jma̱a̱ nikháñuu índo̱ ikhaa nikhi̱i̱ má, niʼngo̱o̱ nixtáa mba̱yu̱u̱ʼ tsiguʼ ma̱ngaa nixtáa gagi, ikhú ni̱jkha̱a̱ gáyáa jxu̱u̱ʼ gajmíi̱n xa̱bu̱ xuajñuu.*
9 Isaac bi̱ nindxu̱u̱ a̱ʼdióo ga̱jma̱a̱ Ismael nidi̱i̱ náa tsíñu ndrígóo Macpelá dí gíʼ náa mbayuuʼ Efrón a̱ʼdióo Zóhar xa̱bu̱ hitita, inuu Mamré.
10 Rígi̱ nindxu̱u̱ mbaaʼ dí ni̱ʼtsi̱ Abrahán náa e̱ji̱i̱n Het. Ikhí nidi̱i̱ Abrahán náa níjniúu Sara bi̱ nindxu̱u̱ a̱ʼgiu̱u̱.
11 Nda̱wa̱á rí nikháñuu Abrahán, Dios niʼni tsajkurámaaʼ má xúʼko̱ Isaac bi̱ nindxu̱u̱ a̱ʼdióo. Isaac nixtáa mijngii náa Beer-Laháin-Roí.
12 Rígi̱ nindxu̱u̱ historia ndrígóo Ismael, ada̱ bi̱ Abrahán nigiʼdaa ga̱jma̱a̱ Agar, a̱ʼgú egipcia, a̱ʼgú ñumbáá ndrígóo Sara.
13 Xúgi̱ kaʼnii mbiʼñún e̱ji̱i̱n Ismael bi̱ nikúwá mámbá guʼwíin. Timbáa a̱ʼdióo Ismael nigumbiʼyuu Nebayot, nda̱wa̱á nixtáa Quedar, Adbeel, Mibsam,
14 Mismá, Dumá, Masá,
15 Hadad, Temá, Jetur, Nafís ga̱jma̱a̱ Quedemá.
16 Bugi̱ ninindxu̱ún e̱ji̱i̱n Ismael, xúgi̱ kaʼnii mbiʼñún bi̱ nikúwá mámbá xuajin ga̱jma̱a̱ náa campamento. Ikhiin nindxu̱ún bi̱ mbá 12 xa̱bu̱ bi̱ nuxnún ikha* bi̱ kuñún.
17 Ismael nixtáa 137 tsiguʼ. Ikhú nigatíyáaʼ jxu̱u̱ʼ ga̱jma̱a̱ ni̱jkha̱a̱ gáyáa jxu̱u̱ʼ gajmíi̱n xa̱bu̱ xuajñuu.
18 Ikhiin nikúwá náa mbaaʼ dí na̱jkha̱ xígií náa Havilá, mijngii Sur, dí gíʼ mijngii Egipto, asndu Asiria. Ikhaa nixtáa náa mijngii kúwá* xúgíinʼ a̱ngui̱i̱n.
19 Rígi̱ nindxu̱u̱ historia ndrígóo Isaac a̱ʼdióo Abrahán.
Abrahán nindxu̱u̱ anu̱u̱ Isaac.
20 Isaac gíʼdoo 40 tsiguuʼ índo̱ ndiyáa Rebeca, wáxióo Betuel xa̱bu̱ arameo bi̱ xtáa náa Padán-Aram, giʼtio̱o̱ Labán xa̱bu̱ arameo.
21 Isaac niʼtákáñuu Jeobá ga̱jma̱a̱ numuu a̱ʼgiu̱u̱ numuu rí tséndoo magiʼdiin e̱ji̱n.* Ikhú Jeobá niʼdxawun rí niʼtájkháan, Rebeca bi̱ nindxu̱u̱ a̱ʼgiu̱u̱ niguewáan ada̱.*
22 E̱ji̱n bi̱ kajchún náa awúu̱n nigíʼdi̱i̱ nigiʼdu̱u̱n, ikha jngóo ikhaa niʼthí: “Á mu xúgi̱ kaʼnii gámínuuʼ, itháan má májánʼ makhañúʼ”. Ikhú niraxu̱u̱ Jeobá.
23 Ga̱jma̱a̱ Jeobá niʼthúu̱n: “Náa awáanʼ rígá a̱jma̱ xuajin. A̱jma̱ xuajin magajnún náa ikháán. Mbá xuajin magiʼdoo itháan tsiaki̱i̱ ki xóo imbo̱ʼ, bi̱ giʼnii mani̱ndxu̱u̱ ñumbáá ndrígóo bi̱ chíʼgíiʼ”.*
24 Índo̱ ni̱jkha̱nú mbiʼi rí maʼnii ada̱, ikhú ndiʼyoo rí kuateʼ kagui̱i̱n.
25 Timbáa bi̱ nigumaa asndu maña̱a̱ʼ kri̱ga̱a̱ numuu dí ra̱ʼkhá tháán gíʼdoo tasiu̱u̱n, ikha jngóo nixná mbiʼyuu Esaú.*
26 Nda̱wa̱á nigájnuu giʼtio̱o̱ kuajtuun níxtuun rajkúu Esaú. Ikha jngóo nixna mbiʼíí Jacob.* Isaac gíʼdoo 60 tsiguuʼ índo̱ a̱ʼgiu̱u̱ niʼnii e̱ji̱n.
27 Jiámá nigún ranuu. Nda̱wa̱á Esaú ni̱jkha̱nú nijmañuu magudíin xujkhúʼ ga̱jma̱a̱ nanigu̱u̱ʼ maxtáa xáná, mú Jacob nindxu̱u̱ mbáa xa̱bu̱ májáanʼ bi̱ xtáa náa guʼwá xtíin.
28 Isaac nindoo kaʼyoo itháan Esaú numuu rí najkha̱a̱ kagu̱u̱ mi̱khu̱ xuñúnʼ xujkhúʼ bi̱ nagudíin, mú Rebeca nindoo kaʼyoo itháan Jacob.
29 Mbóo’ mbiʼi, Jacob xtáa raʼni mújúunʼ ganitsu índo̱ Esaú ni̱ʼkha̱núu̱ néʼngo̱o̱ nijkha xanáá.
30 Ikhú Esaú niʼthúu̱n Jacob: “¡Gaʼcha̱a̱ʼ mbá péñu!* ¡Araxnúʼ chíʼgíiʼ ganitsu maña̱ʼ dí xtaʼdáá a̱ʼkhu̱, numuu dí néʼngo̱ʼ xki̱dxu̱ʼ!”. Ikhaa rúʼko̱ numuu dí nixna mbiʼí Edom.*
31 Mú Jacob niʼthúu̱n: “Ginii atago̱jo̱ʼ dí kaʼyaaʼ xóo a̱ʼdá giʼnii”.
32 Ikhú Esaú niriʼña: “Xtáá makhañúʼ, dí kaʼyoʼ xóo a̱ʼdá giʼnii nda̱a̱ dí gájmuʼ”.
33 Ga̱jma̱a̱ Jacob niʼthúu̱n: “¡Mú ginii arathúnʼ á mu gajkhun maraxnu̱ʼ dí kaʼyaaʼ xóo a̱ʼdá giʼnii!”. Ikhú ikhaa niʼthúu̱n dí maxnúu Jacob ga̱jma̱a̱ xúʼko̱ nigujua̱a̱ dí kaʼyoo xóo a̱ʼdá giʼnii.
34 Nda̱wa̱á, Jacob nixnúu pan ga̱jma̱a̱ lentejas, ga̱jma̱a̱ Esaú nikuiʼtsu ga̱jma̱a̱ niʼga̱a̱n. Nda̱wa̱á nitu̱xu̱u̱ ni̱jkha̱a̱. Xúʼko̱ niʼni dí Esaú táʼyamajkuu dí kaʼyoo xóo a̱ʼdá giʼnii.
Mbaʼa nota
^ O “náná”.
^ O “tátée”.
^ O “este”.
^ Ajngáa mitsaanʼ rígi̱ najmún índo̱ mbáa nakáñuu.
^ O “xa̱bu̱ bi̱ guáʼdáá numún”.
^ O mbáa “xámbájxu̱u̱ gajmíin”.
^ O “nindxu̱u̱ estéril”.
^ O “niʼni endi̱i̱”.
^ O “lajuíin”.
^ Rí nandoo gáʼthúu̱n ‹bi̱ gíʼdoo tátsiu̱u̱n›.
^ Rí nandoo gáʼthúu̱n ‹bi̱ naguajthuun tsítu̱u̱ʼ rajkhúu› o ‹nagruigú káyúuʼ›.
^ O “atani̱ mbá rí májánʼ”.
^ Rí nandoo gáʼthúu̱n ‹maña̱ʼ›.
