Génesis 26:1-35
26 Ni̱jkha̱nú mbóo mbiʼi dí nirígá ewiʼ náa ku̱ba̱ʼ rúʼko̱, raʼkháa dí nirígá nákhá mbiʼi ndrígóo Abrahán. Isaac ni̱jkha̱ náa Guerar, náa xtáa Abimélec, rey ndrígu̱ún filisteos.
2 Ikhú Jeobá nikujmaa ga̱jma̱a̱ niʼthúu̱n: “Xídxúʼ náa Egipto. Aguanáaʼ náa ku̱ba̱ʼ dí ikhúún gátháanʼ.
3 Aguanáaʼ maraxtaa xóo mbáa xa̱bu̱ na̱ʼkha̱á náa ku̱ba̱ʼ rígi̱, ikhúún maxtáá ga̱jma̱á nindxa̱a̱ʼ ga̱jma̱a̱ ma̱ni̱ tsajkurámáánʼ. Maxna̱a̱ʼ xúgíʼ ku̱ba̱ʼ rígi̱ ikháán gajmiáanʼ e̱jña̱a̱ʼ. Manimbánuu ajngóʼ dí nikuʼdáminaʼ náa ana̱a̱ʼ* Abrahán índo̱ ni̱thu̱u̱n:
4 ‹Ma̱ni̱ mbaʼin e̱jña̱a̱ʼ xóo a̱ʼgua̱a̱n bi̱ kúwá mekhuíí ga̱jma̱a̱ ikhiin maxnu̱u̱ xúgíʼ ku̱ba̱ʼ rígi̱. Xúgíʼ xuajin dí rígá náa tsu̱du̱u̱ ku̱ba̱ʼ mudrigú dí maguma tsajkurámíinʼ ga̱jma̱a̱ numún e̱jña̱a̱ʼ›.
5 Ma̱ni̱ numuu dí Abrahán niʼdxawuun aʼwóʼ ga̱jma̱a̱ niʼnimbánuu kiʼtáñajunʼ ga̱jma̱a̱ xtángoo ndrígóʼ”.
6 Ikha jngóo Isaac nixtáa má xúʼko̱ náa Guerar.
7 Índo̱ xa̱bu̱ bi̱ kúwá ikhí nirajxi̱i̱ ga̱jma̱a̱ numuu Rebeca, ikhaa niʼthúún “nindxu̱u̱ gi̱ʼtio̱ʼ”. Niʼthí rígi̱ numuu rí namíñuu maʼthí dí nindxu̱u̱ a̱ʼgiu̱u̱. Numuu rí ikhaa raʼkhá tháán mitsiʼyaa, ikha jngóo nindxa̱ʼwáminaʼ: “Xa̱bu̱ bi̱ kúwá gi̱i̱ gamíi muxiñún ga̱jma̱a̱ numuu Rebeca”.
8 Abimélec, rey ndrígu̱ún filisteos, xtáa rayejxi̱ náa ventana ga̱jma̱a̱ ndiʼyoo rí Isaac kayáraʼaa Rebeca bi̱ nindxu̱u̱ a̱ʼgiu̱u̱.
9 Abimélec nindxa̱ʼóo mbá nacha̱ Isaac ga̱jma̱a̱ niʼthúu̱n: “¡Ikhaa nindxu̱u̱ a̱ʼgia̱a̱ʼ! Náá numuu dí nirathúnʼ ‹Nindxu̱u̱ gi̱ʼtio̱ʼ› xá.” Isaac niriʼña: “Nimíñúʼ dí muxiñún ga̱jma̱a̱ numuu ikhaa”.
10 Abimélec niʼthí: “Náá numuu nitani̱ rígi̱ rá. ¡Asndu tsáa xa̱bu̱ bi̱ xtáa náa xuajin rígi̱ ma̱ndoo mabóoʼ ga̱jma̱a̱ a̱ʼgia̱a̱ʼ, ga̱jma̱a̱ ikháán matani̱ rí muguaʼdáá aʼkhúxu̱!”.
11 Ikhú Abimélec niʼtáñajúúnʼ xúgíinʼ xa̱bu̱ xuajin. Niʼthún: “¡Asndu tsáa bi̱ gáʼniuu dí ra̱májánʼ xa̱biya̱ bugi̱ ga̱jma̱a̱ a̱ʼgiu̱u̱ makhañúu!”.
12 Isaac nigíʼdu̱u̱ niʼdu náa mbaaʼ rúʼko̱, ga̱jma̱a̱ tsiguʼ rúʼko̱ nigujxi̱i̱ 100 nuthu itháan ki xóo rí niʼdu, numuu dí Jeobá xtáa raʼni tsajkurámaaʼ.
13 Isaac nigiʼdoo wéñuuʼ, ga̱jma̱a̱ ni̱jkha̱ ragíʼdoo má xúʼko̱ rí asndu ni̱jkha̱nú ninindxu̱u̱ mbáa xa̱bu̱ bi̱ nigiʼdoo wéñuuʼ.
14 Ni̱jkha̱nú nigiʼdiin mbaʼin mugu̱, mbaʼin xedi̱, mbaʼin xa̱bu̱ bi̱ numbayíí. Mú filisteos nigi̱ʼdi̱i̱ nixígu̱u̱n kuyáá.
15 Filisteos niruguáá ga̱jma̱a̱ ku̱ba̱ʼ puzu rí nindii xa̱bi̱i̱ Abrahán bi̱ nindxu̱u̱ anu̱u̱,* nákha ikhaa xóó xtáa.
16 Ikhú Abimélec niʼthúu̱n Isaac: “Ayuʼ gáraxtaa mitsínguánʼ náa ikháanʼxu̱, numuu dí ikháán nindxuaʼnú niraʼdáá itháan tsiaki̱i̱ ki xóo ikháanʼxu”.
17 Ikhú Isaac nigájnuu ni̱jkha̱ gáxtáa náa mata* ndrígóo Guerar.
18 Isaac nirmbáʼta̱a̱ puzu dí niguma nákha xóó xtáa Abrahán bi̱ nindxu̱u̱ anu̱u̱, mú bi̱ filisteos niruguáá índo̱ nikháñuu Abrahán. Ma̱ngaa, ikhaa nixná mbiʼyuu xó má nixná mbiʼyuu anu̱u̱.
19 Índo̱ kúwá rundii náa mata, xa̱bi̱i̱ Isaac nixkamaa puzu ndrígóo iyaʼ.
20 Baxtúu bi̱ kúwá náa Guerar nigi̱ʼdu̱u̱n gajmiún baxtúu ndrígóʼ Isaac ga̱jma̱a̱ nithi: “¡Iyaʼ rúʼko̱ ndrígúxu̱ ikháanʼ!”. Ikha jngóo, Isaac nixná mbiʼyuu puzo rúʼko̱ Ésec,* numuu rí nigi̱ʼdu̱u̱ gajmiún.
21 Ikhú nigi̱ʼdi̱i̱ nindii imbo̱o̱ puzu, ma̱ngaa nigiʼdu̱u̱n ga̱jma̱a̱ numuu puzu rúʼko̱. Ikha jngóo, nixná mbiʼyuu Sitná.*
22 Nda̱wa̱á nigájnuu ni̱jkha̱ gáxtáa i̱mba̱ níʼkhá ga̱jma̱a̱ niʼndii imbo̱o̱ puzu, mu nánguá nigiʼdu̱u̱n ga̱jma̱a̱ numuu ikhaa. Ikha jngóo nixná mbiʼyuu Rehobot* ga̱jma̱a̱ niʼthí: “Xúgíʼ rígi̱ núma̱aʼ má Jeobá, dí ikhaa nixnulu mba̱a̱ mbaaʼ ga̱jma̱a̱ dí manindxu̱lú mbaʼáanʼ náa ku̱ba̱ʼ rígi̱”.
23 Nda̱wa̱á nigájnuu ikhí ga̱jma̱a̱ ni̱jkha̱ náa Beer-Seba.
24 Mbruʼun rúʼko̱ nikujmaa Jeobá náa ikhaa ga̱jma̱a̱ niʼthúu̱n: “Nindxu̱ʼ Dios ndrígóo ana̱a̱ʼ Abrahán. Xámiñaʼ, numuu dí ikhúún xtáá ga̱jma̱á nindxa̱a̱ʼ. Ma̱ni̱ tsajkurámáánʼ ga̱jma̱a̱ ma̱ni̱ rí e̱jña̱a̱ʼ maʼni mbaʼin ga̱jma̱a̱ numuu xa̱bi̱ʼ Abrahán”.
25 Ikhú Isaac ikhí niʼni náa matsikárámáʼ tsigijñaʼ, ma̱ngaa nigíʼdúu nigríga̱a̱* mbiʼyuu Jeobá. Ikhí nigíʼ guʼwá xtíin ndrígóo, ga̱jma̱a̱ xa̱bi̱i̱ nindii puzu ikhí.
26 Nda̱wa̱á, Abimélec nigájnuu ni̱jkha̱ náa Guerar mu maʼga gáʼyoo. Ni̱jkha̱ ga̱jma̱a̱ Ahuzat bi̱ naxnúu ikha ma̱ngaa Ficol bi̱ kayá edxu̱u̱ náa soldado ndrígóo.
27 Isaac nirajxu̱u̱n: “Náá numuu rí niguwaʼla gúʼyo̱ʼ rá. Lá raʼkháa ikháanʼ nithu̱nʼ dí maʼgá gáxtáá mitsínguánʼ náa ikháanʼla numuu rí nikiʼnáaʼ kuyo̱ʼ ráʼ.”
28 Ikhiin nithi: “Ndu̱ya̱a̱xu kaʼwu dí Jeobá xtáa ga̱jma̱á nindxa̱a̱ʼ. Ikha jngóo niraʼwííxu̱ rí mutha̱a̱nʼ rígi̱: ‹Mbá péñu* gambanúlú. Atatsíñuxu̱ muxná ajngúxu̱ʼ:
29 Ikháán xátaniuxu̱ dí ra̱májánʼ xó má ikháanʼ tuniaʼxu̱ nimbá dí ra̱májánʼ. Ikháán má natayáá rí ni̱nia̱ʼxu̱ rí májánʼ ga̱jma̱a̱ índo̱ nitha̱a̱nʼ magajnáaʼ nitha̱a̱nʼ midxu̱u̱ʼ tsímáá. Mú rí xúgi̱ ikháán nindxa̱a̱ʼ bi̱ Jeobá niʼni tsajkurámááʼ›”.
30 Ikhú, ikhaa niʼni mújúunʼ mbá ganitsu kiejuunʼ ga̱jma̱a̱ ikhiin nipiʼtsu ma̱ngaa niʼwa̱a̱n.
31 Miʼcha̱ ndi̱jui̱ín ga̱jma̱a̱ nimbánúún rí muni̱. Nda̱wa̱á, Isaac niʼtágawúún ga̱jma̱a̱ ikhiin nigúun tsímáá.
32 Mbiʼi má rúʼko̱, xa̱bi̱i̱ Isaac nigún gútháán ga̱jma̱a̱ numuu puzu rí nindii. Nitháán: “¡Nixkámaxu̱ iyaʼ!”.
33 Ikha jngóo, puzu rúʼko̱ nixná mbiʼyuu Sibá. Ikhaa rúʼko̱ numuu dí xuajin nigumbiʼyuu Beer-Seba asndu rí mbiʼi xúgi̱.
34 Índo̱ Esaú nigiʼdoo 40 tsiguuʼ, ndiyáa Judit wáxióo Beerí xa̱bu̱ hitita ma̱ngaa Basemat wáxióo Elón xa̱bu̱ hitita.
35 Ga̱jma̱a̱ númúún gu̱ʼu̱ buʼko̱ niʼni dí Isaac ga̱jma̱a̱ Rebeca makuwá ngíná wéñuuʼ.
Mbaʼa nota
^ O “tátiaaʼ”.
^ O “tátée”.
^ O “bóo”.
^ Rí nandoo gáʼthúu̱n ‹nagi̱ʼdu̱u̱n›.
^ Rí nandoo gáʼthúu̱n ‹nini tsu̱di̱i̱›.
^ Rí nandoo gáʼthúu̱n ‹ku̱ba̱ʼ rí ma̱ja̱nti̱ga̱›.
^ O “nijmuu”.
^ O “atani̱ mbá rí májánʼ”.
