Génesis 28:1-22
28 Ikhú Isaac nindxa̱ʼóo Jacob, niʼni tsajkurámaaʼ ma̱ngaa niʼtáñajunʼ maʼni rígi̱: “Xáʼyóoʼ mbi̱ya̱a̱ nimbáa waxiún xa̱bu̱ Canaán.
2 Ayuʼ náa Padán-Aram, náa goʼwóo Betuel anu̱u̱ ru̱dáaʼ,* ikhí gíya̱a̱ mbáa wáxióo Labán, bi̱ nindxu̱u̱ ndxájuu ru̱dáaʼ.
3 Dios bi̱ gíʼdoo xúgíʼ tsiaki̱i̱ maʼni tsajkurámáánʼ, ga̱jma̱a̱ maʼni dí e̱jña̱a̱ʼ maʼni mbaʼin. Ga̱jma̱a̱ ikháán midxuʼnú manindxa̱ʼ anu̱ún mbaʼa xuajin.
4 Ikhaa maʼni tsajkurámáánʼ xó má niʼthúu̱n Abrahán mangiin e̱jña̱a̱ʼ, mu maʼni mbayaaʼ náa ku̱ba̱ʼ rí nidxu̱ʼ raraxtaa xóo xa̱bu̱ bi̱ na̱ʼkha̱á, rí Dios nixnúu Abrahán”.
5 Isaac niʼtángawuu Jacob. Ikhú Jacob nijkha náa Padán-Aram náa xtáa Labán a̱ʼdióo Betuel xa̱bu̱ arameo. Ndxájuu Rebeca, ru̱dúu̱ Jacob ga̱jma̱a̱ Esaú.
6 Esaú ndiʼyoo rí Isaac niʼni tsajkurámááʼ Jacob ga̱jma̱a̱ nikuʼmaa maʼga náa Padán-Aram mu mbayáaʼ mbáa a̱ʼgu̱ bi̱ mbayáa ga̱jma̱a̱ niʼtáñajuunʼ rígi̱ índo̱ niʼni tsajkurámaaʼ: “Xáyaa nimbáa wáxióo xa̱bu̱ Canaán”.
7 Ma̱ngaa ndiʼyoo dí Jacob niʼnimbo̱o̱ rí niʼthúu̱n anu̱u̱ ma̱ngaa ru̱dúu̱ ga̱jma̱a̱ ni̱jkha̱ náa Padán-Aram.
8 Ikhú Esaú ni̱jkha̱nú ndiʼyoo dí Isaac bi̱ nindxu̱u̱ anu̱u̱ tsíyoo gaʼñún wa̱ʼxiúnʼ xa̱bu̱ Canaán.
9 Maski ajndu gíʼdiin má a̱jmi̱i̱n gu̱ʼwi̱i̱, Esaú ni̱jkha̱ náa xtáa Ismael, a̱ʼdióo Abrahán, ga̱jma̱a̱ ndiyáa Mahalat, wáxióo Ismael giʼtio̱o̱ Nebayot.
10 Jacob nigájnuu náa Beer-Seba ga̱jma̱a̱ niguajtuun kamba̱a̱ ni̱jkha̱ xígií náa Harán.
11 Nirámaaʼ má a̱jkha̱ʼ índo̱ ni̱jkha̱nú náa mbaaʼ dí maguanúu, ga̱jma̱a̱ ikhí niʼni mújúunʼ náa mi̱gu. Ikhí niyexi mbá itsí mu magídáʼ edxu̱u̱, nibóoʼ mi̱gu náa mbaaʼ rúʼko̱.
12 Ikhú nigundaa, rí ndiʼyoo mbá escalera dí nagi̱ʼdu̱u̱ náa tsu̱du̱u̱ ku̱ba̱ʼ gi̱i̱ ga̱jma̱a̱ na̱jkha̱nú asndu mekhuíí, ma̱ngaa dí ángeles ndrígóo Dios natsimún ga̱jma̱a̱ naguajta̱a̱n ikhí.
13 Ma̱ngaa ndiʼyoo Jeobá grígu náa itháan rijma̱a̱, niʼthí:
“Ikhúún ni̱ndxu̱ʼ Jeobá, Dios ndrígóo wajin xiʼñáaʼ Abrahán, Dios ndrígóo Isaac. Náa ku̱ba̱ʼ dí xtabáaʼ maxna̱ʼ ikháán ma̱ngaa ejña̱a̱nʼ.
14 Ra̱ʼkhá tháán mbaʼin ejña̱a̱nʼ gáʼni, mani̱ndxu̱u̱n xóo jui̱ʼi̱ dí rígá náa tsu̱du̱u̱ ku̱ba̱ʼ. Mbayaaʼ martumuu asndu náa nagájnuu a̱jkha̱ʼ* ga̱jma̱a̱ asndu náa narámaaʼ a̱jkha̱ʼ* náa xígií norte ga̱jma̱a̱ sur. Xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ maguma tsajkurámíinʼ ga̱jma̱a̱ numaaʼ ikháán ma̱ngaa ga̱jma̱a̱ numún ejña̱a̱nʼ.
15 Xtáá ga̱jma̱á nindxa̱a̱ʼ ga̱jma̱a̱ mañewa̱a̱n asndu náá má edxu̱ʼ, ma̱ni̱ rí matanga̱án náa ku̱ba̱ʼ rígi̱. Xániʼñáaʼ asndu gánimbánuu rí nitha̱nʼ”.
16 Índo̱ Jacob ndijui̱i̱ náa xnuʼndaa ndrígóo, niʼthí: “Jeobá gajkhun xtáa náa mbaaʼ rígi̱ ga̱jma̱a̱ ikhúún na̱nguá eyoo”.
17 Ikhú nimíñuu, niʼthí: “¡Ra̱ʼkhá tháán nagui̱i̱ mbaaʼ rígi̱! Mbáa rígi̱ nindxu̱u̱ goʼwóo Dios, ga̱jma̱a̱ gi̱i̱ nindxu̱u̱ xkrugoo mekhu”.
18 Jacob ndijui̱i̱ miʼcha̱ wéñuuʼ, ga̱jma̱a̱ niyexi itsí rí nigídáʼ náa edxu̱u̱, ga̱jma̱a̱ nigíʼ xóo mbá tsinaʼ ma̱ngaa nixtrámuuʼ aceite ikhí.
19 Ikha jngóo mbaaʼ rúʼko̱ nixná mbiʼyuu Betel.* Nákha ginii xuajin rúʼko̱ mbiʼyuu Luz.
20 Jacob nikudaminaʼ maʼni: “Á mu Dios xtáa ga̱jma̱á ni̱ndxu̱ʼ ma̱ngaa nañewu̱nʼ náa na̱jkhá ga̱jma̱a̱ naxnúʼ ganitsu dí miʼkhu ma̱ngaa xtíin dí maʼgíʼ,
21 á mu nda̱a̱ dí gágiʼnuʼ asndu matanga̱án náa goʼwóo anu̱ʼ,* ikhú gáyóo dí Jeobá nisngájma rí nindxu̱u̱ Dios ndrígóʼ.
22 Itsí rígi̱ rí niʼgíʼ xóo tsinaʼ mani̱ndxu̱u̱ xóo goʼwóo Dios. Dios ndrígóʼ, phú gajkhun dí maxna̱a̱ʼ mbá nguéjma̱* náa xúgíʼ dí gáraxnu̱ʼ”.
Mbaʼa nota
^ O “tátée nániáaʼ”.
^ O “este”.
^ O “oeste”.
^ Rí nandoo gáʼthúu̱n ‹goʼwóo Dios›.
^ O “táteʼ”.
