Génesis 3:1-24
3 Náa xúgíinʼ xujkhú xáná bi̱ Jeobá Dios niʼniwíin,* a̱bu̱nʼ ninindxu̱u̱ bi̱ itháan wipii.* Ikhaa nirajxu̱u̱ a̱ʼgu̱: “Lá gajkhun rí Dios niʼtála rí xándoo mu̱phu̱la xúgíʼ xndúu ixi̱ dí rígá náa jardín* ráʼ.”
2 Ikhú a̱ʼgu̱ niriʼñuu: “Ma̱ndoo mu̱phúxu̱ má xndúu ixi̱ dí rígá náa jardín.
3 Mú ga̱jma̱a̱ numuu xndúu ixi̱ rí juáʼan náa tapo̱o̱ jardín Dios niʼthí: ‹Xándoo mu̱phu̱la ní má muru̱guala. Á mu nu̱nila, makhañála›”.
4 Mú a̱bu̱nʼ niʼthúu̱n a̱ʼgu̱: “Ragájkhun, xákáñala.
5 Numuu rí Dios ndaʼyoo, dí mbiʼi má rí gúphula xndúu ixi̱ rígi̱ mambaʼtoo idala manindxa̱la xóo Dios: Muniʼnúuʼla rí májánʼ ga̱jma̱a̱ dí ra̱májánʼ”.
6 Ikhú a̱ʼgu̱ ninigu̱u̱ʼ xndúu ixi̱ rúʼko̱ ga̱jma̱a̱ ndiʼyoo dí miʼtsí* mi̱khu̱. Ra̱ʼkhá tháán mitsaanʼ* ixi̱ ndiʼyoo, ikha jngóo nirígú xndú ga̱jma̱a̱ ni̱ʼkhu̱. Nda̱wa̱á nixnúu mi̱khu̱ ajmbio̱o̱* ma̱ngaa índo̱ nixtáa ga̱jma̱a̱, ikhaa ma̱ngaa nigíʼdu̱u̱ ni̱ʼkhu̱.
7 Ikhú nimbaʼtoo idún ndiyáá rí mitsaʼsiinʼ. Ikha jngóo nixmí inúu ixi̱ higo mu maguwúúnʼ.*
8 Itháan wakíʼ índo̱ a̱jkha̱ʼ inu marámáaʼ,* xa̱biya̱ ga̱jma̱a̱ a̱ʼgiu̱u̱ nidxawíín aʼwóo Jeobá índo̱ ikhaa jnguʼwúun náa jardín. Ikhú ikhiin nirkaʼwumijná náa ixi̱ dí rígá náa jardín mu Jeobá Dios xáʼñún.*
9 Jeobá Dios nindxaʼwóo xa̱biya̱ mbaʼa nuthu, niʼthúu̱n: “Náá jnguaʼáanʼ rá.”
10 Asndu náá xa̱biya̱ niriʼñuu: “Nimíñúʼ ga̱jma̱a̱ nirkaʼwuminaʼ índo̱ nidxawuun aʼwáaʼ náa jardín, numuu rí mitsaʼtsúnʼ”.
11 Ikhú Dios nirajxu̱u̱: “Tsáá niʼtháanʼ dí mitsaʼtsáánʼ ráʼ. Lá nitsu xndúu ixi̱ dí ni̱tha̱a̱nʼ dí xíʼtsu ráʼ.”
12 Xa̱biya̱ niriʼña: “A̱ʼgu̱ bi̱ niraxniúʼ nixnúʼ miʼkhu ga̱jma̱a̱ ikhúún nikhu”.
13 Ikha jngóo Jeobá Dios niʼthúu̱n a̱ʼgu̱: “Náá numuu nitani̱ rígi̱ ján.” Ikhaa niriʼña: “A̱bu̱nʼ niʼni nduwúnʼ. Ikha jngóo nikhu”.
14 Ikhú Jeobá Dios niʼthúu̱n a̱bu̱nʼ: “Ga̱jma̱a̱ numuu rí xígi̱ nitani̱ majuiʼthá tsríguíín náa xúgíinʼ xujkhúʼ kraʼdiin ga̱jma̱a̱ náa xúgíinʼ xujkhú xáná. Mataxmajtáminááʼ mi̱dxu̱ʼ ga̱jma̱a̱ náa xúgíʼ mbiʼi dí gáraxtaa miʼtsu yujndaʼ.
15 Ma̱ni̱ dí marigá sia̱nʼ náa ikháán ga̱jma̱a̱ náa a̱ʼgu̱, náa e̱ji̱i̱n* ikhaa ga̱jma̱a̱ náa e̱jña̱a̱ʼ marigá sia̱nʼ. Ikhaa makujmbi̱i̱* edxa̱a̱ʼ ga̱jma̱a̱ ikháán matani gawíínʼ níxtuun rajkúu”.
16 A̱ʼgu̱ niʼthúu̱n rígi̱: “Ma̱ni̱ rí matamíniiʼ índo̱ gídewíin e̱jña̱a̱ʼ* ga̱jma̱a̱ ga̱ʼkhu̱ gáraʼdiin e̱ji̱n. Ikháán maʼndaaʼ wéñuuʼ maraxtaa ga̱jma̱a̱ ajmbia̱a̱ʼ ga̱jma̱a̱ ikhaa maʼtáñajuaanʼ”.
17 Adán* ma̱ngaa niʼthúu̱n: “Numuu rí nitanimba̱a̱ʼ xtayáá a̱ʼgia̱a̱ʼ ga̱jma̱a̱ nitsu xndúu ixi̱ rí nitañájuanʼ ‹Di xíʼtsu›, ikha jngóo ku̱ba̱ʼ majuiʼtátsrigu ga̱jma̱a̱ numaaʼ. Maʼniaaʼ mingíjyúuʼ wéñuuʼ makánáaʼ ganitsu* náa xúgíʼ mbiʼi dí gáraxtaa.
18 Náa ku̱ba̱ʼ marigá tsuwanʼ ga̱jma̱a̱ iná dí gíʼdoo tsuñuuʼ ma̱ngaa ikháán miʼtsu ya̱ʼu̱ dí rígá xanáá.
19 Mbaʼyóoʼ matiejunʼ gakhi̱i̱ mu makánáaʼ dí miʼtsu* asndu índo̱ gídxúu̱ʼ náa ku̱ba̱ʼ, numuu dí ikhaa nigumáán ga̱jma̱a̱, numuu rí yujndaʼ nindxa̱a̱ʼ ga̱jma̱a̱ náa yujndaʼ má gídxúu̱ʼ”.
20 Nda̱wa̱a̱ dí nirígá rígi̱, Adán niʼthí dí Eva* gáʼni mbiʼyuu a̱ʼgiu̱u̱, numuu dí ikhaa mani̱ndxu̱u̱ ru̱du̱ún xúgíinʼ xa̱bu̱ numbaaʼ.*
21 Jeobá Dios niʼni xtíin mbi̱jua̱ dí nindxu̱u̱ xtún xujkhúʼ mu magúwúunʼ Adán ga̱jma̱a̱ a̱ʼgiu̱u̱.
22 Nda̱wa̱á Jeobá Dios niʼthí: “Rí xúgi̱ xa̱biya̱ nindxu̱u̱ xóo mbáa dí ikháánʼ, naninuuʼ dí májánʼ ga̱jma̱a̱ dí ra̱májánʼ. Mu xáʼga gárígú xndúu ixi̱ rí ndaʼya mu mi̱khu̱ ga̱jma̱a̱ xúʼko̱ maxtáa kámuu...”.
23 Ikha jngóo Jeobá nixkriya̱a̱ʼ náa jardín dí rígá náa Edén mu mañajuunʼ ku̱ba̱ʼ dí ikhaa má nigumaa ga̱jma̱a̱.
24 Ikha jngóo nixkriya̱a̱ʼ xa̱biya̱, ma̱ngaa náa nagájnuu a̱jkha̱ʼ* náa jardín dí rígá náa Edén nitsuajuun* querubines ga̱jma̱a̱ mbá espada dí gíʼdoo agiuuʼ dí nagutáʼáan má xúʼko̱. Xúʼko̱ nirúgoo kamba̱a̱ dí na̱jkha̱ náa juáʼan ixi̱ rí ndaʼya.
Mbaʼa nota
^ O “neʼnekumiin”.
^ O “lístíi”.
^ O “ixi̱ ri̱ʼi̱”.
^ O “ndasko̱ʼ”.
^ O “nagui̱i̱”.
^ O “jmba̱yi̱i̱”.
^ O “muruguáá tsáʼkhún, rí mumbra’án majné náa nijíún”.
^ O “hora dí nagíʼdu̱u̱ naxnúu giñánʼ”.
^ Náa ajngáa hebreo naʼthí, “nirkaʼwumijná náa inuu”.
^ Náa ajngáa hebreo naʼthí, “tsígooʼ”.
^ O “matsangotegó”.
^ O “gáʼni endi̱i̱n”.
^ Rí nandoo gáʼthúu̱n ‹xa̱bu̱ numbaaʼ›.
^ Náa ajngáa hebreo naʼthí, “Ga̱jma̱a̱ ga̱ʼkhu̱ miʼtsu dí na̱jma̱a̱ náa ku̱ba̱ʼ”.
^ Náa ajngáa hebreo naʼthí, “asndu maruyaʼ inaaʼ mu makánáaʼ rí miʼtsu”.
^ Rí nandoo gáʼthúu̱n ‹bi̱ ndaʼya›.
^ Náa ajngáa hebreo naʼthí, “xúgíinʼ bi̱ makuwá”.
^ O “este”.
^ O “nisdriguin”.
