Génesis 30:1-43
30 Índo̱ Raquel ndiʼyoo rí na̱nguá egiʼdiin e̱ji̱i̱n Jacob, ikhú nixíyúu kaʼyoo ndxájuu ga̱jma̱a̱ niʼthúu̱n Jacob: “Araxniúʼ e̱ji̱n. Á mu na̱nguá, makhañúʼ”.
2 Jacob nikiʼnáa kaʼyoo Raquel ga̱jma̱a̱ niʼthúu̱n: “Lá ikhúún ñajunʼ Dios ráʼ. Ikhaa tseniñááʼ maraʼdiin e̱ji̱nʼ”.
3 Ikhú ikhaa niʼthúu̱n: “Gi̱i̱ xtáa Bilhá bi̱ nindxu̱u̱ a̱ʼgú ñumbáá ndrígóʼ. Atabáaʼ ga̱jma̱a̱ʼ mu xúʼko̱ ma̱ndoo magiʼdiin bi̱ mani̱ndxu̱ún e̱ji̱n. Mu xúʼko̱ mangún magúʼdiin e̱ji̱n ga̱jma̱a̱ numuu ikhaa”.
4 Xúʼko̱ nixniúu Bilhá bi̱ nindxu̱u̱ a̱ʼgú ñumbáá ndrígóo mu maʼni a̱ʼgiu̱u̱, ga̱jma̱a̱ Jacob nibóo̱ʼ ga̱jma̱a̱ ikhaa.
5 Bilhá niguewáan mbáa ada̱* ga̱jma̱a̱ nguáthá mba̱yu̱u̱ʼ nda̱wa̱á nigiʼdaa mbáa a̱ʼdióo Jacob.
6 Ikhú Raquel niʼthí: “Dios niʼnimbánuu numuʼ ma̱ngaa niʼdxawunʼ ikha jngóo nixniúʼ mbáa ada̱”. Ikha jngóo nixná mbiʼyuu Dan.*
7 Bilhá, a̱ʼgú ñumbáá ndrígóo Raquel, mbu̱júu̱ niguewáan mbáa ada̱ ga̱jma̱a̱ nguáthá mba̱yu̱ʼ nda̱wa̱á nigiʼdaa bi̱ maʼni a̱jmi̱i̱n e̱ji̱i̱n Jacob.
8 Ikhú Raquel niʼthí: “Ra̱ʼkhá tháán nigi̱ʼdu̱ʼ ga̱jmu̱ʼ ndxájuʼ. ¡Dí xúgi̱ niʼngo̱ʼ!”. Ikha jngóo nixná mbiʼyuu Neftalí.*
9 Índo̱ Lea ndiʼyoo rí nánguá eyoo magiʼdiin e̱ji̱n, nixniúu Zilpá a̱ʼgu̱ ñumbáá ndrígóo mu maʼni a̱ʼgiu̱u̱ Jacob.
10 Zilpá a̱ʼgú ñumbáá ndrígóo Lea, nigiʼdaa mbáa a̱ʼdióo Jacob.
11 Ikhú Lea niʼthí: “¡Ra̱ʼkhá tháán niguma tsajkurámúúnʼ!”. Ikha jngóo nixná mbiʼyuu Gad.*
12 Nda̱wa̱á, Zilpá a̱ʼgú ñumbáá ndrígóo Lea, nigiʼdaa bi̱ maʼni a̱jmi̱i̱n e̱ji̱i̱n Jacob.
13 Ga̱jma̱a̱ Lea niʼthí: “¡Ra̱ʼkhá tháán gagi xtáá! Xúgíinʼ gu̱ʼu̱ bi̱ mbuyoʼ muthunʼ dí xtáá gagi”. Ikha jngóo nixná mbiʼyuu Aser.*
14 Mbiʼi rí naxtagijxi̱i̱ trigo, Rubén xtáa ra̱jkha̱ pasiá xanáá ikhí nixkamaa xndú mandrágoras.* Ikha jngóo ni̱jkha̱a̱ kagu̱u̱ nixnúu ru̱dúu̱.* Ikhú Raquel niʼthúu̱n Lea: “Mbá péñu,* araxnúʼ, xndú mandrágoras ndrígóʼ a̱ʼdiáaʼ”.
15 Ikhaa niriʼñuu: “Lá tséʼngo̱o̱ dí naguanáaʼ ga̱jma̱a̱ʼ a̱jmbio̱ʼ* ráʼ. Dí xúgi̱ ma̱ngaa nandaaʼ maxna̱a̱ʼ xndú mandrágoras ndrígóo a̱ʼdióʼ ráʼ.” Mú Raquel niriʼñuu: “Májánʼ. Atabáaʼ ga̱jma̱a̱ ikháán mbruʼun rígi̱, mú araxnúʼ xndú mandrágoras ndrígóo a̱ʼdiáaʼ”.
16 Índo̱ Jacob na̱ʼkha̱a̱ náa xanáá, na̱jkha̱ raʼni mikína má, ikhú Lea ni̱jkha̱ gaxkamaa ga̱jma̱a̱ niʼthúu̱n: “Mbaʼyóoʼ mi̱dxa̱ʼ ga̱jma̱á ni̱ndxu̱ʼ, numuu rí niriʼkuíín ga̱jma̱a̱ xndú mandrágoras ndrígóo a̱ʼdióʼ mu mata̱ba̱a̱ʼ ga̱jma̱á ni̱ndxu̱ʼ”. Ikha jngóo, ikhaa nibóo̱ʼ ga̱jma̱a̱ mbruʼun rúʼko̱.
17 Dios niʼdxaun rí niʼtájkáan Lea. Ikhaa niguewáan ada̱ ga̱jma̱a̱ nguáthá mba̱yu̱ʼ nda̱wa̱á nigiʼdiin bi̱ maʼni witsiin e̱ji̱i̱n Jacob.
18 Ikhú Lea niʼthí: “Dios niʼni numa̱a̱ʼ, numuu dí nixniu̱u̱ a̱ʼgú ñumbáá ndrígóʼ a̱jmbio̱ʼ”. Ikha jngóo nixná mbiʼyuu Isacar.*
19 Nda̱wa̱á, Lea niguewáan ada̱ mbu̱júu̱ ga̱jma̱a̱ nguáthá mba̱yu̱u̱ʼ nda̱wa̱á nigiʼdiin bi̱ maʼni majuiin e̱ji̱n Jacob.
20 Lea niʼthí: “Dios nixnúʼ mbá májánʼ regalo. Dí xúgi̱ a̱jmbio̱ʼ maʼngo̱o̱ a̱jkiu̱u̱n kaʼyoʼ, numuu dí ni̱xnu̱u̱ mbá majuiin e̱ji̱n”. Ikha jngóo nixná mbiʼyuu Zabulón.*
21 Nda̱wa̱á nigiʼdaa mbáa wáxá* ga̱jma̱a̱ nixná mbiʼyuu Dina.
22 Nda̱wa̱á kayuuʼ, Dios nirmáʼáan a̱jkiu̱ún kaʼyoo Raquel. Niʼdxaun rí niʼtájkáan ga̱jma̱a̱ niniñuuʼ rí maguewáan ada̱.
23 Ikhaa niguewáanʼ mbáa ada̱ ga̱jma̱a̱ nigiʼdaa mbáa dxámá, ikhú niʼthí: “Dios nirígu̱u̱ rí naʼni magajnúu gamajkhuʼ”.
24 Ikha jngóo nixná mbiʼyuu José,* numuu rí niʼthí: “Jeobá nixnuʼ imba̱a̱ ada̱”.
25 Índo̱ Raquel nigiʼdaa José, Jacob niʼthúu̱n Labán: “Atatsíñúnʼ matangaán náa goʼwóʼ, náa ku̱bo̱ʼ.
26 Araxniáanʼ gu̱ʼwi̱ʼ ga̱jma̱a̱ e̱ji̱nʼ, bi̱ niñejunʼ ga̱jma̱a̱ numún, mu maʼgáaʼ. Ikháán má natayáá májánʼ xóo niñejunʼ ga̱jma̱a̱ nindxa̱a̱ʼ”.
27 Ikhú Labán niʼthí: “Á mu nandaaʼ xtayoʼ aguanáaʼ mbá péñu. Numuu rí náa nira̱jxi̱ numuʼ ndi̱yo̱o̱ dí Jeobá na’ni tsajkurámúúʼ ga̱jma̱a̱ numaaʼ ikháán”.
28 Ga̱jma̱a̱ niʼthúu̱n xóó: “Arathúnʼ nguáthá eʼyaaʼ matadaaʼ ga̱jma̱a̱ ikhúún ma̱ni̱ numaaʼ”.
29 Jacob niriʼñuu: “Ikháán má nataya májánʼ xóo niñejunʼ ga̱jma̱a̱ nindxa̱a̱ʼ ga̱jma̱a̱ dí ra̱ʼkhá tháán mbaʼin xujkiáaʼ nixpíʼtíin.
30 Nákhá xóó tséʼkhá, káaʼ nguéjmi̱i̱n xtaʼdiin, mu rí xúgi̱ ra̱ʼkhá tháán mbaʼin ni̱jkha̱nú niʼni. Asndu mbiʼi rí ni̱ʼkhá, Jeobá niʼni tsajkurámáánʼ. Náa lá mbiʼi gáñajunʼ ga̱jma̱a̱ numún bi̱ kúwá náa goʼwóʼ ikhúún rá.”
31 Ikhú Labán nirajxu̱u̱: “Ndiéjunʼ nandaaʼ maxna̱a̱ʼ rá.” Jacob niriʼñuu: “¡Xáraxnuʼ má nimbá! Á mu natani̱ rí manda̱ʼa̱a̱ʼ, mba̱ñu̱u̱n má xúʼko̱ xujkiáaʼ ga̱jma̱a̱ mañewu̱u̱n.
32 Xúgi̱ manújngoʼ náa majñu̱únʼ xujkiáaʼ, ikháán matarkuájíinʼ mugu̱ e̱ʼgú bi̱ mixtíin o bi̱ guáʼdáá mixtí mba̱ʼu̱, xúʼko̱ má mugu̱ bi̱ xániiʼ ma̱ngaa tsu̱jtuunʼ e̱ʼgú bi̱ mixtíin o bi̱ guáʼdáá mixtí mba̱ʼu̱. Ga̱jma̱a̱ xúgíinʼ xujkhúʼ bi̱ magumiin xúʼko̱ kaʼnii asndu mbiʼi xúgi̱ buʼko̱ nindxu̱ún bi̱ ikhúún ma̱daaʼ.
33 Á mu mbóo mbiʼi gídxáʼ gátañu̱u̱n xujkiúʼ, matayaa dí gajkhun ninimbánuu dí nitha̱nʼ. Á mu náa tsujtiunʼ gátaxkamaa mbáa bi̱ na̱nguá mixtíi ni má na̱nguá gíʼdoo mixtí mba̱ʼu̱ o mbáa mugu̱ bi̱ na̱nguá xániiʼ, xujkhúʼ buʼko̱ nini kuʼwáʼ gáʼni”.
34 Ikhú Labán niʼthí: “¡Májánʼ má! Xúʼko̱ má gaʼni”.
35 Nirkuájíinʼ chivátu* bi̱ guáʼdáá raya ga̱jma̱a̱ guaʼdáá mixtí mba̱ʼu̱ ma̱ngaa tsu̱jtuunʼ e̱ʼgú bi̱ mixtíin ga̱jma̱a̱ bi̱ guaʼdáá mixtí mba̱ʼu̱. Nirkuájiinʼ xúgíinʼ xujkhúʼ bi̱ guáʼdáá mixtiún miʼxá ga̱jma̱a̱ xúgíinʼ mugu̱ bi̱ xániiʼ. Ikhú nixnúu a̱ʼdióo mu mañewu̱u̱n.
36 Nda̱wa̱á ni̱jkha̱ kagui̱i̱n xujkhúʼ bugi̱ náa mbá mbaaʼ dí naguanúu ajtsú mbiʼi dí mi̱dxu̱ʼ náa xtáa Jacob, mú Jacob niguanúu niñewu̱u̱n xujkiúu Labán.
37 Ikhú Jacob nirujturígú ixi̱ almendro, xindxama* ga̱jma̱a̱ i̱ʼwáʼ ixi̱, niriʼyuu xtóo mu maguanúu i̱ndó xuyuuʼ dí miʼxá.
38 Nda̱wa̱á nigruiʼyáʼ ixi̱ dí niriʼyuu náa na̱jkha̱ iyaʼ ma̱ngaa náa naʼwa̱a̱n iyaʼ xujkhúʼ, mu xúʼko̱ mugíʼdi̱i̱ muxka índo̱ gágún gúwa̱a̱n iyaʼ.
39 Xúʼko̱ xujkhúʼ nuxka índo̱ nagún náa kajti ixi̱ ga̱jma̱a̱ niguáʼdiin e̱jñu̱ún bi̱ guáʼdáá raya, mixtíin ga̱jma̱a̱ guaʼdáá mba̱ʼu̱ mixtí.
40 Ikhú Jacob narkuájíinʼ mugu̱ ga̱jma̱a̱ naʼni dí mbuñún xujkhúʼ bi̱ guáʼdáá raya ga̱jma̱a̱ bi̱ xániiʼ bi̱ kúwá náa xujkiúu Labán. Nda̱wa̱á narkuáʼjíinʼ xujkiúu ikhaa mu xúʼko̱ xándawi̱i̱nʼ ga̱jma̱a̱ xujkiúu Labán.
41 Mámbá índo̱ xujkhúʼ bi̱ itháan rangíinʼ nugíʼdi̱i̱ nuxka, Jacob nagruiʼyáʼ ixi̱ náa na̱jkha̱ iyaʼ mu xúʼko̱ xujkhúʼ mbuyáá ga̱jma̱a̱ mugi̱ʼdi̱i̱ muxka ikhí.
42 Mú, á mu xujkhúʼ i̱ndó itsúún na̱nguá má egruiʼyáʼ ixi̱ ikhí. Ikha jngóo índo̱ nagumiin e̱jñu̱ún bi̱ itháan míjíinʼ naʼni xujkiúu Jacob, mú bi̱ itháan endi̱i̱ naʼni xujkiúu Labán.
43 Xúʼko̱ niʼni dí Jacob ni̱jkha̱nú nigiʼdoo wéñuuʼ. Ra̱ʼkhá tháán mbaʼin xujkhúʼ nigiʼdiin, camello, búrru, xúʼko̱ má xa̱bekha ga̱jma̱a̱ gu̱ʼu̱ bi̱ numbayíí.
Mbaʼa nota
^ O “niʼni endi̱i̱”.
^ Rí nandoo gáʼthúu̱n ‹bi̱ naʼnimbánuu xkujndu›.
^ Rí nandoo gáʼthúu̱n ‹bi naxmínaʼ›.
^ Rí nandoo gáʼthúu̱n ‹májánʼ rí nikhánáá›.
^ Rí nandoo gáʼthúu̱n ‹gagi› o ‹nixtáá gagi›.
^ Gu̱ʼu̱ naʼphu̱ xndúu iná rígi̱, numuu rí naku̱mu̱ún rí mambáñún mu mudewíin e̱ji̱n.
^ O “nánée”.
^ O “atani̱ mbá rí májánʼ”.
^ O “jmbayi̱ʼ”.
^ Rí nandoo gáʼthúu̱n ‹ikhaa nindxu̱u̱ bi̱ nidaaʼ›.
^ Rí nandoo gáʼthúu̱n ‹maʼngo̱o̱ a̱jkiu̱u̱n›.
^ O “a̱ʼdée dxáʼgú”.
^ Mbiʼyuu rí chiʼmbaʼ Josifías, nandoo gáʼthúu̱n ‹Ja maʼniraʼmáaʼ› o ‹Ja maʼni mba̱a̱›.
^ O “tsu̱jtu e̱jmba̱a̱”.
^ Xóo muʼthá, ixi̱ rúʼko̱ najmaʼnuuʼ xóo, xindxama oriental.
