Génesis 33:1-20
33 Índo̱ Jacob ndiʼyoo rí na̱ʼkha̱ Esaú gajmíi̱n mbá 400 xa̱bekha. Ikha jngóo niruiʼtiin e̱ji̱i̱n, Lea gajmíi̱n e̱ji̱i̱n, xúʼko̱ má Raquel ma̱ngaa a̱jmi̱i̱n gu̱ʼu̱ ñumbáá gajmiún e̱jñu̱ún.
2 Ginii kayuʼ nitsuajun gu̱ʼú ñumbáá gajmiún e̱jñu̱ún, nda̱wa̱á nitsijii Lea gajmíi̱nʼ e̱ji̱i̱n, iwáá kayuuʼ Raquel ga̱jma̱a̱ José.
3 Ikhú Jacob nigájnuu ni̱jkha̱ ginii náa xúgíinʼ, xó má e̱ʼkha̱ maraʼnuu ndxájuu, nismbáti̱go̱o̱ mbá juwan nuthu mbayííʼ.
4 Mú Esaú ni̱jkha̱ ragáyúu mu maraʼnuu giʼtio̱o̱, ndiyáraʼaa ga̱jma̱a̱ nixnúu beso, mbá nájmi̱i̱n nigíʼdi̱i̱ nimbi̱ya̱ʼ.
5 Índo̱ Esaú ndiʼñún gu̱ʼu̱ ga̱jma̱a̱ e̱ji̱i̱n, nirajxu̱u̱n: “Tsíin ñajúún bi̱ naguwáʼ ga̱jma̱a̱ nindxa̱a̱ʼ rá.” Jacob niriʼñuu: “Nindxu̱ún e̱ji̱n bi̱ Dios nixniúu xa̱bia̱ʼ índo̱ niʼni tsajkurámáanʼ”.
6 Mbá nacha̱ nixuʼmamijná gu̱ʼú ñumbáá gajmiún e̱jñu̱ún ga̱jma̱a̱ nismbati̱gu̱u̱n.
7 Ma̱ngaa nikuʼmaminaʼ Lea gajmíi̱nʼ e̱ji̱i̱n ga̱jma̱a̱ nismbati̱gu̱u̱n. Nda̱wa̱á kayuuʼ nikuʼmaminaʼ José ga̱jma̱a̱ Raquel mangiin nismbati̱gu̱u̱n.
8 Esaú nirajxu̱u̱ Jacob: “Ndíjkha dí nitaxuʼmiin xúgíinʼ xa̱bu̱ bugi̱ bi̱ nixkamiin rá.” Jacob niriʼñuu: “Mu xúʼko̱ ma’ni a̱jkia̱a̱nʼ xta̱yo̱ʼ tátá”.
9 Ikhú Esaú niʼthúu̱n: “Giʼtioʼ, ikhúún gúʼdoo má mbaʼa wéñuuʼ. Ndrígáaʼ ikháán rígi̱. Aguanáaʼ má ga̱jma̱a̱ʼ”.
10 Mú Jacob niʼthúu̱n: “Na̱nguá, á mu naʼni a̱jkia̱a̱nʼ xta̱yo̱ʼ natakháñaaʼ rí matandrígú regalo dí na̱ʼkhá ka̱gu̱ʼ, numuu dí ni̱ʼkha̱ kagu̱ʼ mu xúʼko̱ ma̱ndoo mba̱yo̱o̱ inaaʼ. Ninindxu̱u̱ asndu xóo ndi̱yo̱o̱ inuu Dios. Numuu rí nitandrigún májánʼ.
11 Mbá péñu,* atandrigú regalo dí ni̱ʼkhá ka̱gu̱ʼ, numuu rí Dios niʼni tsajkurámúúnʼ ga̱jma̱a̱ gúʼdoo xúgíʼ rí ndayóʼ”. Niʼtákáñuu má xúʼko̱ asndu Esaú nigruigú.
12 Nda̱wa̱á, Esaú niʼthúu̱n: “Gurajthun kamba̱a̱ muʼgua. Ikhúún maxnaaʼ ikha”.
13 Mú Jacob niriʼñuu: “Tátá, natayáá má rí e̱ji̱n mitsaʼkhiin wéñuuʼ. Ma̱ngaa natayáá má rí kuʼdiin mugu̱, xedi̱ gajmiún e̱jñu̱ún. Á mu mbá mbiʼi muxuʼmíin magún mbá nacha̱ xujkhúʼ, xúgíinʼ makhañún.
14 Mbá péñu tátá, ayuʼ giníín. Ikhúún maʼgá mañú, maʼgá xóo gágún xujkhúʼ ga̱jma̱a̱ e̱ji̱i̱n, asndu índo̱ maxkamaa tátioʼ náa mbaaʼ Seír”.
15 Ikhú Esaú niʼthúu̱n: “Maniʼñúúnʼ mbá taphi̱i̱n xa̱bi̱ʼ”. Mú Jacob niriʼñuu: “Ndíjkha dí matani xúʼko̱ rá. Xí nitandrigún má májánʼ”.
16 Mbiʼi má rúʼko̱ Esaú nitanga̱a̱ náa mbaaʼ Seír.
17 Jacob ni̱jkha̱ náa Sucot. Ikhí niʼni mbá guʼwá ga̱jma̱a̱ náa rí magidi̱i̱n xujkiúu. Ikha jngóo nixná mbiʼyuu Sucot* mbaaʼ rúʼko̱.
18 Jacob nigájnuu náa Padán-Aram ni̱jkha̱nú májánʼ náa xuajin Siquem, dí rígá náa ku̱ba̱ʼ ndrígóo Canaán ga̱jma̱a̱ ikhí nigíʼ náa maxtáa náa rawuunʼ xuajin.
19 Nda̱wa̱á niʼni numuu mbá 100 mbújkha̱a̱ plata mbá chíʼgíiʼ* mbaaʼ náa rí nigíʼ guʼwá xtíin ndrígóo. Niʼtsi mbaaʼ rúʼko̱ náa e̱ji̱n Hamor rí kaʼyoo anu̱u̱* Siquem.
20 Ikhí niʼni mbá náa mikarámáʼ tsigijñaʼ gamajkhu ga̱jma̱a̱ nixná mbiʼyuu Dios, Dios ndrígóo Israel.
Mbaʼa nota
^ O “atani̱ mbá rí májánʼ”.
^ Rí nandoo gáʼthúu̱n ‹guʼwá› o náa ‹numbayúmíjná›.
^ O “lajuíin”.
^ O “tátée”.
