Génesis 34:1-31
34 Dina, wáxióo Lea bi̱ nigiʼdaa ga̱jma̱a̱ Jacob, naguʼwuun na̱jkha̱ gáʼñúún wa̱ʼxa̱ʼ* bi̱ kúwá náa xuajin.
2 Mbóo mbiʼi ndiʼyoo Siquem a̱ʼdióo Hamor bi̱ nindxu̱u̱ heveo, mbáa bi̱ kayá edxu̱u̱ náa xuajin rúʼko̱. Ikhaa ni̱jkha̱ kayáa, niguguaa ga̱jma̱a̱ tsiaki̱i̱ rí asndu nibóoʼ ga̱jma̱a̱.
3 Nindxa̱ʼwáminaʼ má xúʼko̱ ga̱jma̱a̱ numuu Dina wáxióo Jacob, ninigu̱u̱ʼ kaʼyoo ga̱jma̱a̱ niʼniminaʼ maʼnirajáaʼ.
4 Siquem niʼthúu̱n Hamor bi̱ nindxu̱u̱ anu̱u̱:* “Ayuʼ gátandaʼa̱a̱ dxáʼgú bugi̱ mu mani̱ndxu̱u̱ a̱ʼgiu̱ʼ”.
5 Índo̱ Jacob niʼdxawuun dí Siquem niríyaʼ gamajkuu Dina bi̱ nindxu̱u̱ wáxióo, e̱ji̱i̱n kúwá ruñúún xujkiúu náa xanáá. Ikha jngóo Jacob nda̱a̱ rí niʼthí asndu índo̱ ikhiin gaguwáanʼ.
6 Nda̱wa̱á anu̱u̱ Siquem, Hamor ni̱jkha̱ gáʼtamijná ga̱jma̱a̱ Jacob.
7 Índo̱ e̱ji̱i̱n Jacob nidxawíín, mbá nacha̱ niguwáa̱nʼ. Tánigu̱u̱nʼ ga̱jma̱a̱ ra̱ʼkhá tháán nikiʼníin numuu rí Siquem niríyaʼ gamajkuu Israel numuu rí nibóoʼ ga̱jma̱a̱ wáxióo Jacob, mbá dí ragíʼmaa maguma.
8 Hamor niʼtámíjná gajmíi̱n ga̱jma̱a̱ niʼthúún: “A̱ʼdióʼ Siquem nandoo kaʼyoo wáxiaaʼ. Mbá péñu* guxnaa mu maʼni a̱ʼgiu̱u̱.
9 Guʼni rí bi̱ kúwá náa guʼwúlú mudamijná. Araxniin waʼxiaanʼ mu mudíinxu ga̱jma̱a̱ waʼxiuxu ikháanʼ muxnuxu mudiin e̱jña̱la.
10 Ma̱ndoo makuwáanʼ ga̱jma̱á nindxu̱xu̱ ga̱jma̱a̱ maguáʼdáá ku̱ba̱ʼ ndríguxu asndu náá má gáʼndala ikháanʼ, gaguanála ma̱ngaa gugujua ga̱jma̱a̱ gutsi má gi̱i̱ ma̱ngaa gakuwáanʼ náa ku̱ba̱ʼ rígi̱”.
11 Ikhú Siquem niʼthúu̱n anu̱u̱ ga̱jma̱a̱ a̱ngui̱i̱n Dina: “Mu maʼni a̱jkia̱la kuyoʼ, maxnala asndu ndiéjunʼ má gunda̱ʼa̱.
12 Ma̱ndoo munda̱ʼa̱ mba̱a̱ mbújkha̱a̱ ga̱jma̱a̱ numuu dxáʼgú bi̱ mba̱ya̱a̱ ma̱ngaa mbá regalo. Xtáá xawii maxna asndu ndiéjunʼ má. Mú, mbá péñu guxniuʼla dxáʼgú mu maʼni a̱ʼgiu̱ʼ”.
13 E̱ji̱i̱n Jacob niriyaʼ awan dí muni̱ nduwaaʼ Siquem ga̱jma̱a̱ Hamor bi̱ nindxu̱u̱ anu̱u̱, numuu rí Siquem niríyaʼ gamajkuu Dina.
14 Ikha jngóo ikhiin nithi: “Xándoo munixu rúʼko̱. Xándoo muxniaa dxágiúxu mbáa xa̱biya̱ bi̱ na̱nguá nithu xtóo xuyuuʼ tsáʼkhúun, numuu dí rúʼko̱ nindxu̱u̱ mbá ma̱jti̱ʼ náa ikháanʼxu̱.
15 I̱ndó ma̱ndoo munixu rígi̱: Á mu ikháanʼla nani̱ndxa̱la xóo má ikháanʼxu̱ ga̱jma̱a̱ gurujthu xtóo xuyuuʼ tsáʼkhún xúgíinʼ xa̱bekha.
16 Nda̱wa̱á mudiinla waʼxiuxu ga̱jma̱a̱ waʼxiala ikháanʼ mudiinxu ikháanʼxu̱. Makuwáánʼlu ga̱jma̱a̱ manindxu̱lú mbóó xuajin.
17 Á mu tsénimbala ga̱jma̱a̱ tserujthu xtóo xuyuuʼ tsaʼkháanʼla, muʼguáaxu gajmiúxu waʼxiuxu”.
18 Hamor ga̱jma̱a̱ Siquem ndiyáá má rí májánʼ dí kúwá runda̱ʼa̱.
19 Mbá nacha̱ Siquem niʼni rí ninda̱ʼa̱a̱, numuu dí ra̱ʼkhá tháán nigiu̱u̱ wáxióo Jacob. Ma̱ngaa ikhaa nindxu̱u̱ bi̱ ra̱ʼkhá tháán nduyamajkhuíí náa goʼwóo anu̱u̱.
20 Hamor ga̱jma̱a̱ Siquem bi̱ nindxu̱u̱ a̱ʼdióo nigún náa riejuun xuajin ga̱jma̱a̱ nithúún xa̱bekha bi̱ kúwá náa xuajin:
21 “Xa̱bu̱ bugi̱ nandún makuwá tsímáá ga̱jma̱á nindxu̱lú. Guniʼñúún rí makuwá náa kubulu ma̱ngaa mugujua ga̱jma̱a̱ mutsi má gi̱i̱. Numuu rí mba̱a̱ ku̱ba̱ʼ kuáʼdáá. Ikháanʼlu ma̱ndoo muʼdiin waʼxiún ga̱jma̱a̱ waʼxiulú mudiin ikhiin.
22 I̱ndó rígi̱ rí nandún muʼnilú: Xúgíinʼ xa̱bekha murujthu̱ xtóo xuyuuʼ tsáʼkhún xóo má ikhiin. I̱ndó xúʼko̱ ma̱ndoo mundrígú rí makuwá ga̱jma̱á nindxu̱lú ma̱ngaa manindxu̱lú mbóó xuajin.
23 Lá tsékumala rí xúgíʼ rí guáʼdáá, xujkiu̱ún manindxu̱u̱ ndrígu̱lú mangáán ráʼ. Guʼni rí nundu̱ʼu̱lu mu xúʼko̱ maguanún makuwá ga̱jma̱á nindxu̱lú”.
24 Ikha jngóo xúgíinʼ bi̱ nagájnún náa xkrugoo xuajin ninimbu̱ún kuyáá Hamor ga̱jma̱a̱ Siquem bi̱ nindxu̱u̱ a̱ʼdióo xúgíinʼ xa̱bekha bi̱ nagájnún náa xkrugua nirujtu xtóo xuyuuʼ tsáʼkhún.
25 Índo̱ niʼni ajtsú mbiʼi, xa̱bekha xóó kaʼníí nagawúúnʼ, a̱jmi̱i̱n e̱ji̱i̱n Jacob a̱ngui̱i̱n Dina bi̱ nindxu̱u̱ Simeón ga̱jma̱a̱ Leví, mámbáa niriyaʼ espada ga̱jma̱a̱ nigún náa xuajin. Dí nimbáa tagíʼthu̱u̱n, niradíin xúgíinʼ xa̱bekha.
26 Nixiyáaʼ ga̱jma̱a̱ espada Hamor ma̱ngaa Siquem bi̱ nindxu̱u̱ a̱ʼdióo. Nda̱wa̱á niriyaaʼ Dina náa goʼwóo Siquem niguáanʼ gajmiún.
27 Índo̱ niguáʼnu eʼwíinʼ e̱ji̱i̱n Jacob, ndiyáá rí nikháñún xa̱bekha ga̱jma̱a̱ nirawíi xúgíʼ dí rígá náa xuajin ga̱jma̱a̱ numuu rí nigájnuu gamajkuu giʼtiún.
28 Nigún kudiin mugiuún, xediuún, buriuún ga̱jma̱a̱ xúgíʼ dí rígá náa xuajin rúʼko̱ ma̱ngaa náa jmba̱ñún.
29 Nigún kudúún xúgíʼ rí guáʼdáá, nigún kudiin e̱jñu̱ún ga̱jma̱a̱ nigún kudiin guʼñún ga̱jma̱a̱ xúgíʼ rí guáʼdáá náa guʼwún.
30 Índo̱ Jacob niʼdxawuun rígi̱, ikhú niʼthúu̱n Simeón ga̱jma̱a̱ Leví: “Ni̱nila rí magúʼdoo xkujndu. Xa̱bu̱ xuajin mawiñu̱u̱nʼ kuyoʼ ga̱jma̱a̱ numala: Cananeos mangiin perizitas. Ikháanʼ na̱nguá mbaʼánlu. Ikhiin muwiín mu xúʼko̱ maguwáʼ muxmijná ga̱jma̱á nindxu̱lú, muxiñún ikhúún ga̱jma̱a̱ xúgíinʼ bi̱ kúwá náa goʼwóʼ”.
31 Ikhiin niriʼñáán: “Lá muniʼñááxu rí muni̱i̱ dxágiúxu xóo mbáa a̱ʼgu̱ bi̱ nagujuamínáʼ ráʼ.”
