Génesis 35:1-29
35 Nda̱wa̱á Dios niʼthúu̱n Jacob: “Ayuʼ náa kamba̱a̱ rí natsimuu náa Betel ga̱jma̱a̱ aguanáaʼ ikhí. Ikhí gíʼmaa matani mbá náa mikarámáʼ tsigijñaʼ rí mixnájxi̱ náa inuu Dios bi̱ gajkhun, bi̱ nisngájmaminaʼ náa ikháán índo̱ xtaa ratagáyaaʼ náa ndxájuaaʼ Esaú”.
2 Ikhú Jacob niʼthún bi̱ kúwá náa goʼwóo ma̱ngaa xúgíinʼ bi̱ xtáa gajmíi̱n: “Guxidíin xúgíinʼ dioses bi̱ ragájkhun, gu̱ni̱ kaʼwumijnáʼla ga̱jma̱a̱ guriʼkhu̱u̱ xtíñala.
3 Guʼgua̱ náa kamba̱a̱ rí natsimuuʼ xuajin Betel. Ikhí ma̱ni̱ mbá náa mikarámáʼ tsigijñaʼ gamajkhu rí mixnájxi̱ náa inuu Dios bi̱ gajkhun, bi̱ niriʼñuʼ índo̱ nitakáñuu náa mbiʼi mingíjyúuʼ rí nixtáá ma̱ngaa bi̱ nixtáa ga̱jma̱á nindxu̱ʼ asndu náá má ni̱jkhá”.
4 Ikha jngóo ikhiin nixnáá Jacob xúgíinʼ dioses bi̱ ragájkhun bi̱ kuáʼdíin ma̱ngaa xábí rí nundrajkha náa cháʼwúún, ga̱jma̱a̱ Jacob niʼdumáʼá* náa agoo ixi̱ mba̱a̱ rí wíji̱ náa mijngii xuajin Siquem.
5 Índo̱ nirajthuun mbu̱júu̱ kamba̱a̱ mu magún, Dios niʼni dí náa awúu̱n a̱jkiu̱ún xa̱bu̱ bi̱ kúwá náa xuajin rí rígá mijngii mamiñún, ikha jngóo rí tágún ruxkúún e̱ji̱i̱n Jacob mu muxmijná gajmiún.
6 Nda̱wa̱á Jacob ni̱jkha̱nú gajmíi̱nʼ xúgíinʼ xa̱bi̱i̱ náa xuajin Luz, xóo muʼthá Betel dí rígá náa ku̱ba̱ʼ Canaán.
7 Ikhí niʼni mbá náa mikarámáʼ tsigijñaʼ gamajkhu ga̱jma̱a̱ nixná mbiʼyuu mbaaʼ rúʼko̱ El-Betel,* numuu rí índo̱ xtáa ragáyúu e̱ʼni̱ ndxájuu, ikhí nisngájmaminaʼ Dios bi̱ gajkhun náa ikhaa.
8 Nda̱wa̱á nikháñuu Débora bi̱ nañewu̱u̱n Rebeca ga̱jma̱a̱ nijuiʼdi̱i̱ náa agoo ixi̱ roble, náa nagi̱ʼdu̱u̱ bíjní dí rígá náa Betel. Ikha jngóo nixná mbiʼyuu Alón-Bacut* ixi̱ rúʼko̱.
9 Índo̱ Jacob xtáa ra̱jkha̱ má xúʼko̱ kamba̱a̱ rí nigájnuu náa Padán-Aram, Dios nisngájmaminaʼ mbu̱júu̱ ga̱jma̱a̱ niʼni tsajkurámaaʼ.
10 Ikhú Dios niʼthúu̱n: “Mbiʼyaaʼ Jacob, mú nánguá magumbiʼyaaʼ Jacob magu̱mbiʼyaaʼ Israel”. Ikha jngóo nixná mbiʼyuu Israel.
11 Dios ma̱ngaa niʼthúu̱n: “Ikhúún nindxu̱ʼ Dios bi̱ gíʼdoo xúgíʼ tsiaki̱i̱. Maraʼdiin mbaʼin ejña̱a̱nʼ ga̱jma̱a̱ maʼni mbaʼin itháán. Mani̱ndxa̱a̱ʼ anu̱ún xa̱bu̱, anu̱ún xa̱bu̱ bi̱ mbaʼin wéñuuʼ ga̱jma̱a̱ náa ejña̱a̱nʼ makuwá reyes.
12 Ku̱ba̱ʼ rí ni̱xnu̱u̱ Abrahán, Isaac ma̱ngaa maxnáaʼ mangáán ga̱jma̱a̱ maxnuu e̱jña̱a̱ʼ bi̱ maraʼdiin”.
13 Ikhú Dios niniñuuʼ Jacob ga̱jma̱a̱ nitsimuu náa niʼtámijná ga̱jma̱a̱ nákhá ginii.
14 Jacob nigíʼ mbá tsinaʼ, mbá tsinuuʼ itsí náa rí niʼtámíjná ga̱jma̱a̱ Dios, ikhí nixidirámuuʼ vino rí najmaa náa tsigijñaʼ ma̱ngaa nixidirámuuʼ aceite náa tsu̱du̱u̱.
15 Jacob nixná mbiʼyuu má xúʼko̱ Betel mbaaʼ rúʼko̱ náa rí Dios niʼtámijná ga̱jma̱a̱.
16 Ikhú nigájnún náa Betel. Índo̱ kaʼníí xóó kúwá mitsinguánʼ náa xuajin Efrat, Raquel nigíʼdu̱u̱ nixtáa a̱ʼdióo ga̱jma̱a̱ niʼniuu gakhi̱i̱ mu maʼnii.
17 Índo̱ itháán naʼniuu gakhi̱i̱ mu maʼnii ada̱, partera niʼthúu̱n: “Xámiñaaʼ numuu dí maraʼdaa má dxámá bugi̱ ma̱ngaa”.
18 Raquel na̱jkha̱ rakháñun má. Índo̱ iwáá ndiya jxu̱u̱ʼ ikhú nixná mbiʼyuu Ben-Oní.* Mú anu̱u̱ nixná mbiʼyuu Benjamín.*
19 Xúʼko̱ káʼnii nikháñuu Raquel ga̱jma̱a̱ nijuiʼdi̱i̱ náa kamba̱a̱ rí na̱jkha̱ náa Efrat, xóo muʼthá Belén.
20 Jacob nigíʼ mbá tsinaʼ náa dí nijuiʼdi̱i̱ Raquel. Rígi̱ nindxu̱u̱ tsinaʼ náa dí nijuiʼdi̱i̱ Raquel asndu rí mbiʼi xúgi̱.
21 Nda̱wa̱á Israel nigájnuu ni̱jkha̱ ikhí ga̱jma̱a̱ nigíʼ guʼwá xtíin ndrígóo náa itháán ñuʼún náa dí wíji̱ torre dí mbiʼyuu Éder.
22 Nákha Israel xtáa má náa ku̱ba̱ʼ rúʼko̱, mbóo mbiʼi Rubén ni̱jkha̱ nibóoʼ ga̱jma̱a̱ Bilhá ñawuun anu̱u̱* ga̱jma̱a̱ Israel niʼdxawuun.
Nda̱wa̱á Jacob nigiʼdiin mbá 12 e̱ji̱i̱n.
23 Lea nigiʼdaa ga̱jma̱a̱ a̱ʼdá giʼnii Rubén ma̱ngaa Simeón, Leví, Judá, Isacar ga̱jma̱a̱ Zabulón.
24 Raquel nigiʼdaa ga̱jma̱a̱ José ma̱ngaa Benjamín.
25 Bilhá a̱ʼgú ñumbáá ndrígóo Raquel, nigiʼdaa ga̱jma̱a̱ Dan ma̱ngaa Neftalí.
26 Zilpá a̱ʼgú ñumbáá ndrígóo Lea nigiʼdaa ga̱jma̱a̱ Gad ma̱ngaa Aser. Bugi̱ ninindxu̱ún e̱ji̱i̱n Jacob bi̱ nigiʼdiin náa Padán-Aram.
27 Nda̱wa̱á Jacob ni̱jkha̱nú náa nixtáa anu̱u̱ Isaac. Ni̱jkha̱nú náa Mamré, náa mbayuuʼ Quiryat-Arbá, xóo muʼthá Hebrón, náa nixtáa ma̱ngaa Abrahán ga̱jma̱a̱ Isaac xóo xa̱bu̱ bi̱ naguwaáʼ.
28 Isaac nixtáa mbá 180 tsiguʼ.
29 Ikhú nigatíyáaʼ jxu̱u̱ʼ ga̱jma̱a̱ nikháñuu, ni̱jkha̱a̱ gáyáa jxu̱u̱ʼ gajmíi̱n xa̱bu̱ xuajñuu,* nixtáa mbayuuʼ tsiguʼ ma̱ngaa nixtáa gagi, niʼdi̱i̱ Esaú ga̱jma̱a̱ Jacob bi̱ nindxu̱ún e̱ji̱i̱n.
Mbaʼa nota
^ O “nirkaʼwiin”.
^ Rí nandoo gáʼthúu̱n ‹Dios ndrígóo Betel›.
^ Rí nandoo gáʼthúu̱n ‹ixi̱ roble náa nimbi̱ya̱ʼ›.
^ Rí nandoo gáʼthúu̱n, ‹a̱ʼdióoʼ bi̱ niʼni maxtáá ngíná›.
^ Rí nandoo gáʼthúu̱n, ‹a̱ʼdióo ñawún mújúnʼ›.
^ O “tátée”.
^ Ajngáa mitsaanʼ rígi̱ najmún índo̱ mbáa nakáñuu.
