Génesis 39:1-23
39 Ismaelitas nigún kuya̱a̱ José náa Egipto. Ikhí nigujua̱a̱ náa mbáa xa̱bu̱ ñajunʼ egipcio bi̱ mbiʼyuu Potifar, bi̱ kayá edxu̱u̱ náa bi̱ nuñewa̱a̱n faraón.
2 Mú Jeobá nixtáa má xúʼko̱ ga̱jma̱a̱ José. Xúgíʼ rí naʼni nagájnuu májánʼ ga̱jma̱a̱ xa̱bu̱ bi̱ náa xtáa, niniñuuʼ rí José mañewu̱u̱n xúgíʼ dí rígá náa goʼwóo.
3 Xa̱bu̱ ndiʼyoo dí Jeobá xtáa ga̱jma̱a̱ José ga̱jma̱a̱ Jeobá naʼni dí magajnúu májánʼ xúgíʼ dí naʼni José.
4 Potifar ni̱jkha̱nú nindoo kaʼyoo José ga̱jma̱a̱ ninindxu̱u̱ mbáa bi̱ nambáyúu ikhaa. Potifar niniñuuʼ rí mbayá edxu̱u̱ náa goʼwóo ga̱jma̱a̱ náa xúgíʼ dí gíʼdoo.
5 Asndu mbiʼi rí niniñuuʼ mbayá edxu̱u̱ náa goʼwóo ga̱jma̱a̱ náa xúgíʼ dí gíʼdoo, Jeobá nigíʼdu̱u̱ niʼni tsajkúrámúuʼ goʼwóo xa̱bu̱ egipcio ga̱jma̱a̱ numuu José. Jeobá niʼni tsajkurámuuʼ xúgíʼ dí gíʼdoo náa goʼwóo ga̱jma̱a̱ náa mbayuuʼ.
6 Nda̱wa̱á, Potifar niniñuuʼ xúgíʼ dí gíʼdoo mu mañewu̱u̱n José. Ikhaa nimbá nda̱a̱ dí eʼni maxmiéjuunʼ, i̱ndó dí nandoo mi̱khu̱. José ma̱ngaa ni̱jkha̱nú ninindxu̱u̱ mbáa dxámá mixkujiiʼ ga̱jma̱a̱ mitsiʼyáa.
7 Ikhú a̱ʼgiu̱u̱ xa̱bu̱ nigíʼdu̱u̱ niyejxu̱u̱ José ga̱jma̱a̱ niʼthúu̱n: “Atabáaʼ ga̱jma̱á nindxu̱ʼ”.
8 Mu ikhaa naʼni gáʼdu̱u̱n ga̱jma̱a̱ naʼthúu̱n a̱ʼgiu̱u̱ xa̱bu̱ bi̱ nañajunʼ inuu: “Tatioʼ nda̱a̱ rí eʼni maxmiéjuunʼ ga̱jma̱a̱ dí rígá guʼwáá numuu dí xtáá ikhúún, ikhaa nixnájxu̱ʼ xúgíʼ dí gíʼdoo mu mañewu̱u̱n.
9 Nda̱wa̱a̱ i̱mba̱a̱ bi̱ gíʼdoo itháan numuu xóo ikhúún náa guʼwá rígi̱. Ikhaa nirajkuáa náa ñawúnʼ xúgíʼ dí gíʼdoo, mú i̱ndó ikháán dí na̱nguá, numuu dí nindxa̱a̱ʼ a̱ʼgiu̱u̱. Ikha jngóo, xú káʼnii gándoo gáni̱ mbá dí raʼkhí kayuuʼ ga̱jma̱a̱ makuʼdáminaʼ aʼkhá náa inuu Dios rá.”
10 A̱ʼgu̱ mámbá gájtsi naʼni káñuu, mú José na̱nguá eyoo rí mabóoʼ ga̱jma̱a̱ ni má rí maguanúu ga̱jma̱a̱.
11 Mú mbóo mbiʼi, ikhaa nito̱ʼo̱o̱ náa awúu̱n guʼwá mu maʼni ñajunʼ rí kaʼyoo maʼni ga̱jma̱a̱ nimbáa nda̱wa̱a̱ awúu̱n.
12 Ikhú a̱ʼgu̱ niguajtuun xtíñuu ga̱jma̱a̱ niʼthúu̱n: “¡Atabáaʼ ga̱jma̱á nindxu̱ʼ!”. Mú ikhaa nigájnuu ragáyúu ga̱jma̱a̱ niniñuuʼ xtíñuu náa ñawúunʼ ikhaa.
13 Índo̱ ndiʼyoo dí José nigájnuu ragáyúu ga̱jma̱a̱ rí niniñuuʼ xtíñuu náa ñawúunʼ,
14 ikhú nigíʼdu̱u̱ nindxaʼwáská ga̱jma̱a̱ nindxaʼwún xa̱bu̱ bi̱ kúwá náa guʼwá ga̱jma̱a̱ niʼthúún: “¡Gu̱yala! Xa̱bu̱ hebreo bi̱ ni̱ʼkha̱ kayáa a̱jmbio̱ʼ* nindoo matsijmáʼlú. Nigíʼ magugún, mú ikhúún nindxaʼwaská.
15 Índo̱ ndiʼyoo rí nigíʼdu̱u̱ nindxaʼwa, ikhaa nigájnuu ragáyúu ga̱jma̱a̱ niniñuuʼ xtíñuu náa nijniuʼ”.
16 Nda̱wa̱á nitámáʼ xtíñuu José náa níjniúu ga̱jma̱a̱ nigíʼthu̱u̱n ma̱ʼkha̱a̱ Potifar xa̱bu̱ bi̱ nañajunʼ inuu José.
17 Ikhú niʼthúu̱n Potifar xó má niʼthí nákhá ginii. Niʼthúu̱n: “Ñumbáá hebreo bi̱ ikháán ni̱dxa̱ʼ jcháa, nindoo matsijmúún.
18 Mú índo̱ nikijxu̱u̱n nindxaʼwaskhá, ikhaa nigájnuu ragáyúu ga̱jma̱a̱ niniñuuʼ xtíñuu náa níjniúʼ”.
19 Índo̱ xa̱bu̱ bi̱ nagogoo José niʼdxawuun rí niʼthúu̱n a̱ʼgiu̱u̱, “xígi̱ kaʼnii niʼniuʼ xa̱bia̱a̱ʼ”, ikhaa ra̱ʼkhá tháán nikiʼnáa.
20 Ikhú Potifar nigujtuwiin José ga̱jma̱a̱ nikudaaʼ náa guʼwá e̱jua̱nʼ náa najthiin preso ndrígóo rey. Ga̱jma̱a̱ José ni̱jkha̱ guʼwá e̱jua̱nʼ.
21 Mú Jeobá nixtáa má xúʼko̱ ga̱jma̱a̱ José. Nisngájmuu má xúʼko̱ ngajua rí tsétumuu* ga̱jma̱a̱ niʼni rí xa̱bu̱ bi̱ kayá edxu̱u̱ náa guʼwá e̱jua̱nʼ masngájmuu dí májánʼ a̱jkiu̱u̱n kaʼyoo.
22 Ikha jngóo bi̱ kayá edxu̱u̱ náa guʼwá e̱jua̱nʼ nigíiʼ José mu mañewu̱u̱n xúgíinʼ bi̱ kajchún ikhí. José kajkuáa ñawúunʼ mbaʼyoo á mu nunimbaníí xúgíʼ rí kaʼñún muni̱.
23 Bi̱ kayá edxu̱u̱ náa guʼwá e̱jua̱nʼ tsixmiéjuunʼ eʼni nimbá dí nixnúu mañewu̱u̱n José, numuu rí Jeobá xtáa ga̱jma̱a̱, ma̱ngaa Jeobá naʼni dí magajnúu xúgíʼ májánʼ dí naʼni José.
