Génesis 4:1-26
4 Adán nibóoʼ* ga̱jma̱a̱ Eva, bi̱ nindxu̱u̱ a̱ʼgiu̱u̱ ga̱jma̱a̱ ikhaa niguewáan mbáa ada̱.* Índo̱ niʼnii Caín, ikhaa niʼthí: “Jeobá nimbáyúʼ mu mani̱i̱ mbáa ada̱”.
2 Nda̱wa̱á nigiʼdaa Abel, giʼtio̱o̱ Caín.
Abel ninindxu̱u̱ baxtúu, bi̱ niñewu̱u̱n mugu̱, Caín ninindxu̱u̱ mbáa bi̱ niʼdu xanáá.
3 Nguáthá tsiguʼ nda̱wa̱á, Caín nixnájxi̱ tikhu rí niʼdu xóo tsigijñaʼ gamajkhu náa inuu Jeobá.
4 Mú Abel nixnáxi̱i̱n tikhuun mugiu̱u̱ bi̱ giʼnuu, bi̱ itháan míjíinʼ.* Jeobá ninigu̱u̱ʼ rí naʼni Abel ga̱jma̱a̱ nigruigú tsigijñaʼ gamajkhu dí nixnájxi̱,
5 mú tánigu̱u̱ʼ rí naʼni Caín ni má tsigijñaʼ ndrígóo. Ikhaa rúʼko̱ numuu dí Caín ra̱ʼkhá tháán nikiʼnáa ga̱jma̱a̱ nijmáa a̱jkiu̱u̱n.*
6 Ikhú Jeobá niʼthúu̱n Caín: “Náá numuu rí nakiʼnáá wéñuuʼ ga̱jma̱a̱ najmáa a̱jkia̱a̱nʼ rá.
7 Á mu natriʼkumina̱a̱ʼ ga̱jma̱a̱ natani̱ dí májánʼ, lá xáʼni a̱jkiu̱nʼ ka̱ya̱a̱ʼ ráʼ. Mú, á mu tsétriʼkumina̱a̱ʼ ga̱jma̱a̱ tsétagíʼ ma̱ta̱ni̱ dí májánʼ, aʼkhá mawiji̱ ngu̱ʼwa̱ mañamáá náa xkruguaaʼ mu magutuwíín,* lá maʼnga̱a̱ʼ matani ga̱jma̱a̱ʼ xáʼ.”
8 Nda̱wa̱á Caín niʼthúu̱n Abel: “Guʼgua̱ xanáá”. Índo̱ kúwá ikhí, Caín nixnúu giʼtio̱o̱ asndu nixíyáa.
9 Ikhú Jeobá nirajxu̱u̱ Caín: “Náá xtáa gi̱ʼtia̱a̱ʼ Abel rá.” Ikhaa niriʼña: “Tséyoo jún. Lá ikhúún ña̱wu̱u̱n gitio̱ʼ jngóo ráʼ.”
10 Ikha jngóo Dios niʼthúu̱n: “Dí lá nitani̱ ján. ¡Atadxawíín! Eʼdiuu gi̱ʼtia̱a̱ʼ dí nigadíí mbayííʼ xtáa randxaʼwóʼ mu ma̱nda̱ʼa̱a̱ cuenta.
11 Ikha jngóo rí xúgi̱ najuiʼtátsríguíín ga̱jma̱a̱ najuaxkriña̱a̱ʼ náa ku̱ba̱ʼ rí niʼga̱a̱n eʼdiuu gi̱ʼtia̱a̱ʼ, rí ikháán nitaxídíí.
12 Ní xájma̱a̱ rí ma̱ta̱du. Ma̱nindxa̱a̱ʼ mbáa xa̱bu̱ bi̱ na̱jkha̱ rajnguʼwúún má xúʼko̱ náa tsu̱du̱u̱ ku̱ba̱ʼ”.
13 Ikhú Caín niʼthúu̱n Jeobá: “Xáʼngo̱ʼ gáʼni gamiéjunʼ rí magruígú ga̱jma̱a̱ numuu dí raʼkhí ni̱ni̱, nindxu̱u̱ mba̱a̱ wéñuuʼ.
14 Xúgi̱ nataxkriñu̱u̱n’ náa ku̱ba̱ʼ rígi̱,* ga̱jma̱a̱ ní xáxtáá mijngii náa ikháán.* Mani̱ndxu̱ʼ mbáa xa̱bu̱ bi̱ najngu̱ʼwúún náa tsu̱du̱u̱ ku̱ba̱ʼ ga̱jma̱a̱ asndu tsáá bi̱ gáxkamún gajkhun rí maxíñúu”.
15 Ikha jngóo Jeobá niʼthúu̱n: “Asndu tsáá bi̱ gáxíyáa Caín, mbaʼyóoʼ mamínuuʼ mbá juwan nuthu”.
Jeobá nigíʼ mbá tsinaʼ* náa Caín mu xúʼko̱ nimbáa xáxíyáa á mu naxkamaa.
16 Caín nigájnáa náa inuu Jeobá ga̱jma̱a̱ ni̱jkha̱ gáxtáa náa mbaaʼ rí nijuixkáá maʼga,* dí gíʼ náa níjniúu Edén náa nagájnuu a̱jkha̱ʼ.*
17 Nda̱wa̱á Caín nibóoʼ ga̱jma̱a̱ a̱ʼgiu̱u̱ ga̱jma̱a̱ ikhaa niguewáan mbáa ada̱, índo̱ nixtáa nixná mbiʼyuu Enoc. Nda̱wa̱á Caín nigíʼ mbá xuajin rí nixná mbiʼyuu xó má mbiʼyuu a̱ʼdióo, Enoc.
18 Nda̱wa̱á, Enoc ninindxu̱u̱ anu̱u̱* Irad, Irad ninindxu̱u̱ anu̱u̱ Mehujael, Mehujael ninindxu̱u̱ anu̱u̱ Metusael xóo má Metusael ninindxu̱u̱ anu̱u̱ Lamec.
19 Lamec nigui̱in* a̱jmi̱i̱n gu̱ʼu̱. Bi̱ timbáa nigumbiʼyuu Adá bi̱ maʼni a̱jmi̱i̱n nigumbiʼyuu Zilá.
20 Adá nigiʼdaa Jabal. Ikhaa ninindxu̱u̱ timbáa bi̱ nixtáa náa guʼwá xtíin ga̱jma̱a̱ nikuiʼthún xujkhúʼ.
21 Giʼtio̱o̱ nigumbiʼyuu Jubal. Ikhaa ninindxu̱u̱ timbáa bi̱ ni̱ʼdu̱u̱ arpa ga̱jma̱a̱ flauta.
22 Zilá ma̱ngaa nigiʼdaa Tubal-Caín, bi̱ niʼni xúgíʼ ajua̱nʼ rí najmaa ga̱jma̱a̱ cobre ma̱ngaa hierro. Ma̱ngaa Tubal-Caín nigiʼdaa mbáa giʼtio̱o̱ dxáʼgú bi̱ nigumbiʼyuu Naamá.
23 Ikhú Lamec niʼthún ajngáa rígi̱ gu̱ʼwi̱i̱, Adá ga̱jma̱a̱ Zilá:
“Gudxawíín aʼwóʼ gu̱ʼwi̱i̱ Lamec.Gudxawíínla rí ma̱ta̱la:
Nixíyáa mbáa xa̱bu̱ bi̱ niʼni gawúnʼ,xúʼko̱, mbáa dxámá bi̱ nixnúʼ.
24 Á mu bi̱ gáxíyáa Caín mbaʼyóoʼ mamínuuʼ mbá juwan nuthu,bi̱ gáxíyáa Lamec mbaʼyóoʼ mamínuuʼ mbá 77 nuthu”.
25 Nda̱wa̱á Adán nitanga̱a̱ nibóoʼ ga̱jma̱a̱ a̱ʼgiu̱u̱ ga̱jma̱a̱ ikhaa nigiʼdaa mbáa ada̱ bi̱ nixná mbiʼyuu Set,* numuu rí niʼthí: “Dios nixniúʼ i̱mba̱a̱ ada̱ bi̱ mariʼkuriya̱a̱ʼ Abel, numuu rí Caín nixíyáa”.
26 Set ma̱ngaa nigiʼdaa mbáa ada̱, ga̱jma̱a̱ nixná mbiʼyuu Enós. Mbiʼi rúʼko̱ xa̱bu̱ nigi̱ʼdi̱i̱ nigríga̱a̱* mbiʼyuu Jeobá.
Mbaʼa nota
^ O “niʼgu ga̱jma̱a̱”.
^ O “niʼni endi̱i̱”.
^ O “bi̱ itháan xtangún, itháan kuitsúunʼ”.
^ Náa ajngáa hebreo naʼthí, “niʼni i̱mba̱ nuthu inuu”.
^ Xóo muʼthá, xóo eʼni mbáa xujkhú xáná bi̱ nandoo mikua̱a̱ʼ.
^ Náa ajngáa hebreo naʼthí, “náa inuu ku̱ba̱ʼ”.
^ Náa ajngáa hebreo naʼthí, “maxtáá ngu̱ʼwa̱ náa inaaʼ”.
^ Mbáa rígi̱ ninindxu̱u̱ mbá kiʼtáñajunʼ dí nijmaa mu maʼtámúʼúún eʼwíinʼ dí rágíʼmaa muni̱.
^ O “náa ku̱ba̱ʼ ndrígóo Nod”.
^ O “este”.
^ O “tátée”.
^ O “nigiʼdiin”.
^ Rí nandoo gáʼthúu̱n ‹nixtiʼkuriya̱a̱ʼ›.
^ O “nijmúú”.
