Génesis 40:1-23
40 Nda̱wa̱á, bi̱ naʼtáñajúúnʼ copero ndrígóo rey bi̱ xtáa náa Egipto ga̱jma̱a̱ bi̱ naʼtáñajúúnʼ bi̱ nuni̱ pan, nikiéʼkúún náa tátiún, rey bi̱ xtáa náa Egipto.
2 Faraón tánigu̱u̱ʼ kaʼñún a̱jmi̱i̱n xa̱bu̱ ñajunʼ bugi̱, xóo muʼthá, bi̱ naʼtáñajúúnʼ copero ga̱jma̱a̱ bi̱ naʼtáñajúúnʼ bi̱ nuni̱ pan.
3 Ikhú nikudiinʼ náa guʼwá e̱jua̱nʼ náa kraʼaa má José, náa goʼwóo bi̱ kayá edxu̱u̱ náa bi̱ nuñewa̱a̱n faraón.
4 Bi̱ kayá edxu̱u̱ náa bi̱ nuñewa̱a̱n faraón nixnájxu̱u̱ José rí maxtáa gajmíi̱nʼ ikhiin ga̱jma̱a̱ rí maʼni mbaʼwi̱i̱n, ikhiin nikúwá má xúʼko̱ náa guʼwá e̱jua̱nʼ mbá nguáthá mba̱yu̱u̱ʼ.*
5 Copero ga̱jma̱a̱ bi̱ naʼni pan mu mikhu rey Egipto bi̱ kajchún náa guʼwá e̱jua̱nʼ, mbá nájmi̱i̱n nigundaa ikháá má mbruʼun. Xnuʼndaa dí niguaʼdáá mixtiʼkhu dí eyoo gáʼthúu̱n.
6 I̱mba̱ néjtsu̱u̱, índo̱ José nito̱ʼo̱o̱ náa kajchún, ndiʼyoo rí kúwá ngíná.
7 Ikhú niraxu̱u̱n xa̱bu̱ ñajunʼ ndrígóo faraón bi̱ kraʼaa gajmíi̱nʼ náa guʼwá e̱jua̱nʼ náa goʼwóo xa̱bu̱ bi̱ náa niñajunʼ: “Ndíjkha dí ngíná wéñuuʼ inala rá.”
8 Ikhiin niriʼñáán: “Mámbáa rí ikháanʼxu̱ nigundaa, mú na̱nguá kuaʼdaa mbáa bi̱ maʼtúxu̱ rí nandoo gáʼthúu̱n”. Ikhú José niʼthí. “Lá raʼkháa Dios kaʼyoo maʼtájuíi xnuʼndaa ráʼ. Guthu̱nʼ xnuʼndaa ndrígala mbá péñu”.*
9 Bi̱ naʼtáñajúúnʼ copero niʼthúu̱n José dí nigundaa. Niʼthúu̱n: “Náa xnuʼndoʼ ndi̱yo̱o̱ dí wíji̱ mbá ixi̱ uva náa inuʼ,
10 gíʼdoo mbá ajtsú ñawúunʼ. Ixi̱ uva nijmi̱di̱ riʼyu̱u̱ ga̱jma̱a̱ nixná uva dí niʼgo̱o̱ náa ñawúunʼ.
11 Ka̱ya̱ copa ndrígóo faraón. Nigruígú uva ga̱jma̱a̱ niduunʼ náa copa ndrígóo faraón. Nda̱wa̱á ni̱xnu̱u̱ maga̱a̱n faraón”.
12 Ikhú José niʼthúu̱n: “Rígi̱ dí nandoo gáʼthúu̱n xnuʼndaaʼ. Ajtsú ñawúunʼ ixi̱ uva, nandoo gáʼthúu̱n ajtsú mbiʼi.
13 Índo̱ gáʼni ajtsú mbiʼi, faraón mariña̱a̱ʼ náa guʼwá e̱jua̱nʼ, martanga̱a̱ ñajuaanʼ. Matanga̱án maraxna̱a̱ copa faraón xó má nákhá ginii nákhá nindxa̱a̱ʼ copero ndrígóo.
14 Xámbúmaaʼ xtayoʼ índo̱ gágíʼnaa dí májánʼ. Mbá péñu, atasngájmuʼ ngajua rí tsétumuu,* aratháán faraón ga̱jma̱a̱ numuʼ mu xúʼko̱ maríñúúnʼ gi̱i̱.
15 Nini̱ kuʼwúnʼ xa̱bu̱ náa ku̱ba̱ʼ ndrígu̱ún hebreos ga̱jma̱a̱ gi̱i̱ nda̱a̱ dí ni̱ni̱ mu muxudu̱u̱nʼ guʼwá e̱jua̱nʼ”.*
16 Índo̱ bi̱ naʼtáñajúúnʼ bi̱ nuni̱ pan ndiʼyoo dí José niʼthí mbá rí májánʼ ga̱jma̱a̱ numuu xnuʼndaa, ikhú ma̱ngaa niʼthúu̱n: “Ikhúún ma̱ngaa nigúndaa, náa edxu̱ʼ trámáʼ ajtsú canasta náa kajti pan miʼxá.
17 Canasta dí grígu asndu inuu, ikhí kajti xúgíʼ enii pan dí nigu̱ʼ náa horno dí mi̱khu̱ faraón ga̱jma̱a̱ ñu̱ʼu̱ naʼphu̱ dí kajti náa canasta rúʼko̱”.
18 Ikhú José niʼthúu̱n: “Rígi̱ dí nandoo gáʼthúu̱n xnuʼndaaʼ. Ajtsú canasta nandoo gáʼthúu̱n ajtsú mbiʼi.
19 Índo̱ gáʼni ajtsú mbiʼi, faraón marujtu rígú edxa̱a̱ʼ marájkhán náa mbá ixi̱ ga̱jma̱a̱ ñu̱ʼu̱ mu̱phu̱ xuyaaʼ”.
20 Ajtsú mbiʼi nda̱wa̱á, nirámáaʼ tsiguuʼ faraón. Ikhú faraón niʼni mbá ndxa̱a̱ náa nigímbíin xúgíinʼ xa̱bi̱i̱ ma̱ngaa nikuʼma ajngáa dí maguwáʼ kuya̱a̱ bi̱ naʼtáñajúúnʼ copero ma̱ngaa bi̱ naʼtáñajúúnʼ bi̱ nuni̱ pan náa inún xa̱bi̱i̱.
21 Ikhú nixnáa ñajunʼ ndrígóo bi̱ naʼtáñajúúnʼ copero ga̱jma̱a̱ ikhaa nixnúu má xúʼko̱ copa faraón.
22 Mú niʼtáñajunʼ dí murajkhaa bi̱ naʼtáñajúúnʼ bi̱ nuni̱ pan, xó má José niʼtájuíi xnuʼndoo.
23 Mú bi̱ naʼtáñajúúnʼ copero nimbumuu kaʼyoo José, nditháan nánguá nirmáʼáan a̱jkiu̱u̱n kaʼyoo.
Mbaʼa nota
^ Náa ajngáa hebreo naʼthí, “mbiʼi”.
^ O “guni̱ mbá rí májánʼ”.
^ Náa ajngáa hebreo naʼthí, “iñáʼ”.
