Génesis 42:1-38
42 Índo̱ Jacob niʼdxaun dí rígá ganitsu náa Egipto, ikhú niʼthúún e̱ji̱i̱n: “Náá numuu rí i̱ndó nduyamijnála ga̱jma̱a̱ nda̱a̱ dí eni̱ kayuuʼ rá.”
2 Niʼthí xóó: “Nidxawun dí rígá ganitsu náa Egipto. Gaʼgua gútsila ganitsu mu xúʼko̱ xákháñulú ga̱jma̱a̱ ewiʼ”.
3 Ikha jngóo bi̱ mbá gu̱wi̱i̱nʼ a̱ngui̱i̱n José niguájtaa gútsi ganitsu náa Egipto.
4 Mú Jacob tániñuuʼ dí Benjamín giʼtio̱o̱ José, maʼga gajmíi̱n a̱ngui̱i̱n, numuu dí niʼthí: “Raʼkháa gáʼni dí magíʼnuu mbá gamiéjunʼ ga̱jma̱a̱ makhañúu”.
5 Ikhú e̱ji̱i̱n Israel nigún náa Egipto gajmiún eʼwíinʼ xa̱bu̱ bi̱ nagún gútsi ganitsu, numuu dí asndu náa ku̱ba̱ʼ ndrígóo Canaán ni̱jkha̱nú ewiʼ.
6 José nindxu̱u̱ bi̱ kajkuáa ñawúunʼ náa xúgíʼ xuajin, ikhaa naguju̱u̱n ganitsu xa̱bu̱ bi̱ naguwáʼ náa xúgíʼ ku̱ba̱ʼ. Ikha jngóo a̱ngui̱i̱n José nigún asndu náa ikhaa ga̱jma̱a̱ nismbati̱gu̱u̱n asndu mbayííʼ.
7 Índo̱ José ndiʼñún, nacha̱ niʼninuwiinʼ dí nindxu̱ún a̱ngui̱i̱n, mú ikhaa tasngájma tsáa nindxu̱u̱. Ikhú ikhaa niraxu̱u̱n ga̱jma̱a̱ ajngáa mijkoo: “Náa eguwaʼla rá.” Ikhiin niriʼña: “Nagúwaʼxu náa ku̱ba̱ʼ ndrígóo Canaán mu mutsi ganitsu”.
8 José niʼninuwiinʼ a̱ngui̱i̱n, mú ikhiin túni̱ nuwiinʼ ikhaa.
9 Ikhú José nirmáʼáan a̱jkiu̱u̱n dí nigundaa numuu ikhiin ga̱jma̱a̱ niʼthún: “¡Ikháanʼ nindxa̱la bi̱ nuyama! ¡Niguwaʼla gúyáa náa kaʼnii mataʼalá mundrígúla xuajin!”.
10 Mú ikhiin nithi: “Na̱nguá tátá. Nindxu̱xu̱ xa̱bia̱ʼ nigúwaʼ gútsixu ganitsu.
11 Xúgiáanʼ, mbáwíí anu̱xu̱.* Nindxu̱xu̱ xa̱bu̱ bi̱ nuni̱ rí májánʼ. Xa̱bia̱ʼ na̱nguá nindxu̱ún bi̱ nuyama”.
12 Ikhaa niʼthí “¡Ragájkhun! ¡Niguwaʼla gúyáa náa kaʼnii mataʼala mundrígúla xuajin!”.
13 Ikhiin niriʼña: “Xúgiáanʼ nindxu̱xu̱ kaníkháanʼ nindxu̱xu̱ mbá 12. Nindxu̱xu̱ e̱ji̱i̱n mbáwíí xa̱bu̱ bi̱ xtáa náa ku̱ba̱ʼ ndrígóo Canaán. Bi̱ itháan chíʼgíiʼ* niguanúu ga̱jma̱a̱ anu̱xu̱, ga̱jma̱a̱ imba̱a̱ ndáwáa ga̱jma̱á nindxu̱xu̱”.
14 José niʼthún: “Ni̱tha̱la má: ‹¡Rí ikháan’ nindxa̱la xa̱bu̱ bi̱ nuyama!›
15 Mba̱yo̱o̱ á mu gajkhun rí nu̱tala. Xó má gajkhun rí xtáa faraón ikháanʼla xágajnáaʼla gi̱i̱ á mu tséguwaʼ ku̱ya̱a̱ giʼtiala.
16 Mbáa rí ikháanʼla gaʼga gáyáa giʼtiala ga̱jma̱a̱ eʼwíinʼ maxtuguariʼiin gi̱i̱. Xúʼko̱ gáyóo á mu gajkhun dí nu̱tala. Á mu na̱nguá, xó má gajkhun rí xtáa faraón gajkhun rí ikháanʼ nindxa̱la xa̱bu̱ bi̱ nuyama”.
17 Índo̱ niguámbóo niʼthí rígi̱, mbá xúgíinʼ nirúguariʼiin mbá ajtsú mbiʼi.
18 Rí maʼni ajtsú mbiʼi, José niʼthúún: “Ikhúún namíñúʼ eʼni Dios, ikha jngóo gu̱ni̱ dí gáthala mu xúʼko̱ xakáñala.
19 Á mu nindxa̱la xa̱bu̱ májáanʼ, mbáa rí ikháanʼ gaguanúu náa guʼwá e̱jua̱nʼ náa kaxtúguaraʼáanʼla xúgi̱, mú eʼwíinʼ ma̱ndoo maguáan kudúún ganitsu mu mu̱phu̱ bi̱ kúwá náa guʼwálaʼ.
20 Nda̱wa̱á gáguwaʼ ku̱ya̱a̱ gi̱ʼtiala bi̱ giʼtháá mu xúʼko̱ musngajmá dí gajkhun rí nitala, mu xúʼko̱ xákhañala”. Ikhiin nithi rí munimbaníí dí niʼthí.
21 Ikhú ikhiin nitamijná kaníkhíín: “Mbáa kúwáanʼ ru̱ʼni̱ numa̱a̱ dí niʼni̱i̱ giʼtiu̱lú. Ndiʼyáá xóo kaʼnii xtáa ramínúuʼ ga̱jma̱a̱ niʼtákáñulu dí magáwíinʼ a̱jkiu̱lú kuʼyáá, mú ikháanʼlu na̱nguá nimajkulu kuʼyáá. Ikha jngóo xúgi̱ kúwáanʼ rumíniiʼlú ga̱jma̱a̱ numuu gamiéjunʼ rígi̱”.
22 Rubén niʼthúún: “Lá narmáʼáan a̱jkia̱la rí nitha̱la ‹Rí xúni̱i̱ nimbá giʼtiu̱lú ráʼ.› Ikháanʼ na̱nguá nidxawunʼla. Mú rí xúgi̱ ndayóoʼ mu̱ʼni̱ numa̱a̱ eʼdiuu”.
23 Mú Ikhiin, na̱nguá eyáá á mu José nakro̱ʼo̱o̱ rí nuthi, numuu rí ikhaa najmiuu mbáa bi̱ naguíjngáa ajngáa mu maʼthúún.
24 Ikhú niríyaminaʼ ga̱jma̱a̱ nímbi̱ya̱ʼ. Índo̱ nitanga̱a̱ gaʼtámíjná gajmíi̱n, nigutuwiin Simeón ga̱jma̱a̱ niroʼóo náa inún ikhiin.
25 Nda̱wa̱á José nikuʼma dí muni̱ majtíí ganitsu náa gúxtu̱ún* ma̱ngaa dí matangi̱i̱n mudriʼya̱a̱ʼ mbújku̱ún náa mámbá gúxtu̱ún. Ma̱ngaa niʼtáñajunʼ dí muxnún ganitsu* dí mu̱phu̱ náa kamba̱a̱. Ga̱jma̱a̱ xúʼko̱ má niʼni.
26 Ikhiin nijxieʼdúún búrriu̱ún ganitsu, ikhú nigúun.
27 Índo̱ niguáʼnu náa maguanún, mbáa rí ikhiin nirmbáʼtoo gúxto̱o̱ mu maxnúu rí mi̱khu̱ búrriuu ga̱jma̱a̱ ndiʼyoo rí náa rawuunʼ gúxto̱o̱ kajkuáa mbújkho̱o̱.
28 Mbá nacha̱ niʼthúún a̱ngui̱i̱n: “¡Nixna̱a̱ʼ mbújkho̱ʼ! ¡Gu̱ya̱a̱! ¡Kajkuáa náa gúxto̱ʼ!”. Índo̱ nidxawíín asndu niguíʼiin rí nimíñún, ikhú nitamijná rígi̱: “Ndíjkhala rí xígi̱ eʼñulú Dios rá.”
29 Índo̱ niguáʼnuu náa xtáa Jacob bi̱ nindxu̱u̱ anu̱ún náa ku̱ba̱ʼ ndrígóo Canaán nitháán xúgíʼ rí niguáʼníí. Nitháán:
30 “Xa̱bu̱ bi̱ kajkuáa ñawúunʼ náa xúgíʼ xuajin niʼthúxu ga̱jma̱a̱ ajngáa mijkoo asndu niʼni tsudu̱xu̱ rí nindxu̱xu̱ xa̱bu̱ bi̱ nigún guyama náa xuajin.
31 Mú ikháanʼxu̱ ni̱tha̱a̱n: ‹Nindxu̱xu̱ xa̱bu̱ míjíinʼ. Ra̱ʼkhá xa̱bu̱ bi̱ nuyama.
32 Nindxu̱xu̱ mbá 12, mbáwíí anu̱xu̱. Mú mbáa ndáwáa ma ga̱jma̱á nindxu̱xu̱, bi̱ itháan chíʼgíiʼ niguanúu ga̱jma̱a̱ anu̱xu̱ náa ku̱ba̱ʼ ndrígóo Canaán›.
33 Xa̱bu̱ bi̱ kajkuáa ñawúunʼ náa xúgíʼ xuajin rúʼko̱ niʼthúxu: ‹Mba̱yo̱o̱ á mu gajkhun nindxa̱la xa̱bu̱ míjíinʼ á mu nuni̱la rí gáthala. Guniʼñááʼ mbáa ndxájuala ga̱jma̱a̱ nindxu̱ʼ. Gudalá ganitsu ga̱jma̱a̱ gudéʼgua̱a̱ʼ mu mu̱phu̱ bi̱ kúwá náa guʼwálaʼ ga̱jma̱a̱ gaʼgua̱a̱ʼ.
34 Nda̱wa̱á gáguwáʼ ku̱ya̱a̱ giʼtiala mu xúʼko̱ mba̱yo̱o̱ rí nindxa̱la xa̱bu̱ míjíinʼ, ra̱ʼkháa xa̱bu̱ bi̱ nuyama. Ikhúún maxnia̱ánʼla ndxájuala ga̱jma̱a̱ ikháanʼla ma̱ndoo mutsi asndu ndiéjunʼ má eyala náa xuajin›”.
35 Índo̱ nirawíi dí kajti náa gúxta̱a̱, mámbáa dí ikhiin nixkamaa mbújkho̱o̱ náa gúxto̱o̱. Ikhiin gajmiún anu̱ún nimíñúún índo̱ ndiyáá mbújkha̱a̱.
36 Jacob bi̱ nindxu̱u̱ anu̱ún niʼthí: “¡Ikháanʼla nu̱ni̱ rí ma̱ni̱ mbátigi̱i̱n e̱ji̱nʼ! ¡José nánguá xtáa ga̱jma̱a̱ nindxu̱lú! ¡Simeón nánguá xtáa ga̱jma̱a̱ nindxu̱lú! ¡Rí xúgi̱ nandala muʼgua ku̱ya̱a̱ Benjamín! ¡Ikhúún nindxu̱ʼ bi̱ namínuuʼ xúgíʼ rígi̱!”.
37 Mú Rubén niʼthúu̱n anu̱u̱: “Á mu tsétangu̱ún ka̱ya̱a̱, ma̱ndoo maradíin nájmi̱i̱n e̱ji̱nʼ. Atatsíñuʼ dí ikhúún má gañewu̱u̱n ga̱jma̱a̱ ma̱ʼkháa ka̱ya̱a̱”.
38 Jacob niriʼñuu: “A̱ʼdióʼ xáʼgá ga̱jma̱a̱ nindxa̱la, numuu rí ndxájuu nikháñu má, i̱ndó ikhaa xóó guanúu. Ikhúún nikiu̱u̱n má, á mu náa kamba̱a̱ʼ nagíʼnuu mbá gamiéjunʼ ga̱jma̱a̱ nakháñuu, munila rí maxtáá ngíná wéñuuʼ asndu índo̱ gáʼgáaʼ náa Iñá wajinʼ”.*
