Génesis 43:1-34
43 Ra̱ʼkhá tháán gakhi̱i̱ niʼni ewiʼ náa xuajin.
2 Índo̱ niguámbá ganitsu rí kuda guwáánʼ náa Egipto, anu̱ún niʼthún: “Gagutangáanʼ mbu̱júu̱ mu mutsi xóó ganitsu”.
3 Ikhú Judá niʼthúu̱n: “Xa̱bu̱ niʼthúxu kaʼwu: ‹Xágutangáanʼ náa ikhúún á mu na̱nguá eguwaʼ gajmiála giʼtiala›.
4 Á mu natatsíñáánʼ rí muʼguá gajmiúxu giʼtiuxu̱, mu̱ʼguáxu gútsi ganitsu.
5 Xúʼguáxu á mu tsetatsíñááʼ maʼga ga̱jma̱á nindxu̱xu̱, numuu rí xa̱bu̱ niʼthúxu: ‹Xátangáanʼ náa ikhúún á mu tséguwaʼ gajmiála giʼtia̱la̱›”.
6 Ikhú Israel nirajxu̱u̱n: “Ndíjkha rí niniu̱ʼla rígi̱ rá. Ndíjkha rí ni̱tha̱a̱nʼ xa̱bu̱ buʼko̱ rí guáʼdaa imba̱a̱ giʼtiala rá.”
7 Ikhiin niriʼñáán: “Xa̱bu̱ niʼthúxu mbájmbu ga̱jma̱a̱ numuxu ma̱ngaa numún bi̱ ku̱ñu̱u̱n. Nirajxu̱xu̱: ‹Lá xtáa xóo ana̱la* ráʼ. Xtáa imba̱a̱ giʼtiala ráʼ.› Ga̱jma̱a̱ ikháanʼ niriʼña̱a̱ dí ikhaa nirajxu̱xu̱. Xú káʼnii lá gúyaa dí ikhaa gáʼthuxu ‹Gaguwaʼ ku̱ya̱a̱ gi̱ʼtia̱la rá.›”
8 Ikhú Judá niʼtákáñuu Israel bi̱ nindxu̱u̱ anu̱u̱:* “Atatsíñuʼ dí maʼgá gajmuʼ giʼtio̱ʼ. Atatsiñuxu rí muʼguáxu̱, mu xúʼko̱ xakháñulu ga̱jma̱a̱ ewiʼ, ni má ikháán, ni má ikháanʼxu̱ gajmiúxu e̱jñu̱xu̱.
9 Natha̱a̱nʼ gajkhun rí nda̱a̱ dí gágíʼnuu. Ikhúún gáñewu̱u̱n. Á mu tséʼkháaʼ ka̱ya̱a̱ mbu̱júu̱ maxniaánʼ, makiéʼkhunʼ* náa inaaʼ asndu kámuu.
10 Á mu na̱nguá ni̱ʼni̱ gajyumijnálú, ni̱jkuáxu má ga̱jma̱a̱ nitangaánʼxu má a̱jma̱ nuthu”.
11 Ikha jngóo Israel bi̱ nindxu̱u̱ anu̱ún niʼthún: “Á mu rí xúʼko̱, gu̱ni̱ rí matala. Gundríyáʼ náa gúxtala rí itháán májánʼ dí najma̱a̱ náa xuajin ga̱jma̱a̱ gudéʼgua xóo regalo mu muxna̱a̱ xa̱bu̱ buʼko̱: Mbá chíʼgíiʼ* bálsamo,* mbá chíʼgíiʼ jyááʼ, ládano,* xtáyoo ixi̱ rí mbrakha, pistache ga̱jma̱a̱ almendras.
12 Gudiéʼguala itháán mbújkha̱a̱ ma̱ngaa guʼdiéʼgua̱a̱la mbújkha̱a̱ dí ni̱ʼkha̱a̱ náa rawuunʼ gúxtala. Mbáa nijngawi̱i̱n.
13 Guʼgua̱ kuya̱a̱ giʼtiala ga̱jma̱a̱ gatangaánʼ náa xa̱bu̱ buʼko̱.
14 Dios bi̱ gíʼdoo xúgíʼ tsiaki̱i̱ gáʼni̱ rí xa̱bu̱ buʼko̱ magáwíinʼ a̱jkiu̱u̱n kaʼyala ga̱jma̱a̱ maniñuuʼ ma̱ʼkha̱a̱ ndxájuala ma̱ngaa maniñuuʼ ma̱ʼkha̱a̱ Benjamín. Á mu kaʼyoʼ ma̱ni̱ mbátigi̱i̱n e̱ji̱nʼ ma̱ni̱ mbátigi̱i̱n má”.
15 Nda̱wa̱á dí nindri̱ya̱’ má regalo ga̱jma̱a̱ itháán mbújkha̱a̱, ikhú nirajtuun kamba̱a̱ nigún náa Egipto gajmiún Benjamín. Nixnajxi̱mijna̱ mbu̱júu̱ náa inuu José.
16 Índo̱ José ndiʼyoo dí niguáʼnu gajmiún Benjamín, ikhú mbá nacha̱ niʼthúu̱n xa̱bu̱ bi̱ nañewu̱u̱n goʼwóo: “Ayuʼ xtiin xa̱bu̱ bugi̱ náa guʼwá, aradíin nguáthi̱i̱n xujkhúʼ ga̱jma̱a̱ atani̱ májáánʼ ganitsu numuu rí makhuíʼtsú gajmíʼ índo̱ gáʼni wakhaʼ”.
17 Mbá nacha̱ má niʼni xa̱bu̱ xó má niʼthúu̱n José ga̱jma̱a̱ ni̱jkha̱ kagui̱i̱n náa goʼwóo José.
18 Mú a̱ngui̱i̱n ra̱ʼkhá tháán nimíñúún índo̱ nigún náa goʼwóo José. Nigi̱ʼdi̱i̱ nitamijná: “Niguwáʼ kudánʼlu gi̱i̱ ga̱jma̱a̱ numuu mbújkha̱a̱ dí ni̱jkha̱a̱ náa gúxtulu nákha xúʼko̱. ¡Dí xúgi̱ muxnúlú ga̱jma̱a̱ manindxu̱lú ñumbáá ndrígu̱ún ma̱ngaa maguanún gajmiún burriulú!”.
19 Ikha jngóo nigún gúyáá xa̱bu̱ bi̱ niñewu̱u̱n goʼwóo José nitamijná gajmiún náa riejuun guʼwá.
20 Nitháán: “¡Mba̱a̱ a̱jkia̱a̱nʼ gátani̱ tátá! Nákha timbá aʼphu̱ dí niguájtaxu̱ gi̱i̱ mu mutsi ganitsu.
21 Índo̱ nitangáanʼxu ga̱jma̱a̱ índo̱ na̱jkuánú náa dí maguanúxu, nigíʼdi̱i̱ nirmbáʼtáá gúxtuxu̱, ndiya̱a̱ dí náa rawuunʼ gúxtuxu̱ kajkuáa mbújkho̱o̱ mámbáa. Kájxi̱ mbújkha̱a̱ kajti. Ikha jngóo rí xúgi̱ nanduxu muxnajxi̱i̱ mijnáanʼxu̱.
22 Ma̱ngaa nidiéwaʼxu̱ itháán mbújkha̱a̱ mu mutsi ganitsu, gajkhun rí tséya̱a̱ tsáá ñajuunʼ bi̱ nirajkuáa mbújkhu̱xu̱ náa gúxtuxu̱”.
23 Ikhaa niʼthún: “Xámiñala, ginún má nigruigú mbújkha̱la. Nda̱a̱ má dí gárígá. Dios ndrígala ga̱jma̱a̱ Dios ndrígóo ana̱la nirajkhuáa mbújkha̱a̱ rúʼko̱ náa gúxtala”. Nda̱wa̱á ni̱ʼkha̱ kayáa Simeón.
24 Ikhú xa̱bu̱ niʼni manújngún a̱ngui̱i̱n José náa goʼwóo ikhaa, nixnúún iyaʼ mu mujñáa rajkúún ga̱jma̱a̱ ganitsu mu̱phu̱ búrriu̱ún.
25 Numuu rí mangiin nidxawíín rí José ma̱ʼkha̱a̱ xuajkhaʼ mu muphiʼtsu gajmiún, ikha jngóo nirawíi regalo dí kuda mu muxnáá.
26 Índo̱ José nita̱ʼa̱a̱ náa goʼwóo ikhú ikhiin nixnáá regalo ga̱jma̱a̱ nismbati̱gu̱u̱n náa inuu.
27 Nda̱wa̱á José nirajxu̱u̱n xú káʼnii kúwá ma̱ngaa niʼthún: “Xú káʼnii xtáa xa̱bu̱ nikhi̱i̱ ana̱la bi̱ nithu̱nʼ ga̱jma̱a̱ numuu rá. Xtáa xóó ndaʼya xáʼ.”
28 Ikhiin niriʼñáán: “Xa̱bia̱a̱ʼ bi̱ nindxu̱u̱ anu̱xu̱, xtáa má májánʼ. Xtáa xóó ndaʼya”. Ikhú ikhiin nismbati̱gu̱u̱n ga̱jma̱a̱ nixruigú edxu̱ún.
29 Índo̱ nigrui̱ga̱a̱ májánʼ iduu, ndiʼyoo Benjamín bi̱ nindxu̱u̱ giʼtio̱o̱, bi̱ mbá yaʼdíín ga̱jma̱a̱, nirajxu̱u̱n: “Bugi̱ nindxu̱u̱ gi̱ʼtiala bi̱ itháán giʼtha̱, bi̱ nitala ga̱jma̱a̱ numuu ráʼ.” Ikhú niʼthúu̱n: “A̱ʼdióʼ, Dios gasngájmaaʼ rí májánʼ a̱jkiu̱u̱n kaʼyaaʼ”.
30 Mú José táʼngo̱o̱ a̱jkiu̱u̱n índo̱ ndiʼyoo giʼtio̱o̱, ikhú mbá nacha̱ nigájnuu numuu rí nindoo gámbiyaʼ, nito̱ʼo̱o̱ náa mbá cuarto mbáwii gámbiyaʼ,
31 nda̱wa̱á índo̱ niwi̱ji̱ nimbiyaʼ ikhú nixtájmuu iyaʼ inuu,* nigájnáa náa cuarto ga̱jma̱a̱ niʼthúún: “Gurajkhuáa ganitsu”.
32 Ikhaa nigi̱ʼi̱ náa mbá mesa, a̱ngui̱i̱n náa i̱mba̱ mesa ga̱jma̱a̱ xa̱bu̱ egipcio bi̱ xtáa gajmíi̱n José náa i̱mba̱ mesa. Numuu rí xa̱bu̱ Egipto tséphiʼtsu gajmiún xa̱bu̱ hebreos numuu rí mitsaga rúʼko̱ eyáá ikhiin.
33 Ikha jngóo nitrigi̱i̱n a̱ngui̱i̱n José náa inuu ikhaa. A̱ʼdá giʼnii nixnáá magi̱ʼi̱ náa kaʼyoo magiʼi, bi̱ a̱ʼdá giʼnii ga̱jma̱a̱ bi̱ giʼtha̱á nigi̱ʼi̱ náa má kaʼyoo xó má tsiguuʼ. Ikhiin i̱ndó nduyamijná tri̱gi̱i̱n ga̱jma̱a̱ niʼniún tsiánguá.
34 José niʼtáñajunʼ rí ganitsu dí katramaʼ náa mésóo magún kudúún náa mésu̱ún ikhiin. Mú niʼtáñajunʼ dí mura̱jkua̱a̱ itháan mba̱a̱ dí mi̱khu̱ Benjamín,* ki xóo rí mu̱phu̱ eʼwíinʼ. Nipiʼtsu má xúʼko̱ ga̱jma̱a̱ niʼwa̱a̱n gajmiún ikhaa asndu nigiʼmún.
Mbaʼa nota
^ O “tátiala’”.
^ O “tátée”.
^ O “Magúʼdoo aʼkhu̱nʼ”.
^ O “lajuíin”.
^ O “wájyaʼ dí ndataun”.
^ O “niʼxmbóoʼ”.
^ O “witsu nuthu itháán mba̱a̱”.
