Génesis 44:1-34
44 Nda̱wa̱á José niʼtáñajuunʼ xa̱bu̱ bi̱ nañewu̱u̱n goʼwóo: “Atani̱ majthíí ganitsu náa gúxtu̱ún xa̱bu̱ bugi̱ mu ma̱ndoo muda̱ gágúun, ma̱ngaa atrajkuáa mbújku̱ún náa rawuunʼ gúxtu̱ún.
2 Mú náa gúxto̱o̱ bi̱ itháan chíʼgíiʼ,* madríyáʼ má ganitsu náa rawuunʼ matrajkuáa mbújkho̱o̱ ga̱jma̱a̱ copa ndrígóʼ, copa dí plata”. Ga̱jma̱a̱ xa̱bu̱ niʼni xó má José niʼthúu̱n.
3 Índo̱ nijtsi, xa̱bu̱ nigúun gajmiún búrriu̱ún.
4 Xó má tségúun mitsínguánʼ wéñuuʼ náa xuajin índo̱ José niʼthúu̱n xa̱bu̱ bi̱ nañewu̱u̱n goʼwóo: “¡Atagáyáaʼ! ¡Ayuʼ raxkhúún! Índo̱ gátaxkamiin, arathún: ‹Xúʼko̱ e̱ni̱ numa̱a̱ʼla dí ninia̱la dí májánʼ ráʼ.
5 Náá numuu ni̱ni̱ kuʼwáʼ copa ndrígóo patriúnʼ, lá tséya̱a̱la dí ikhaa rúʼko̱ najmuu mu maʼtájuíi mbájmbu dí marigá nda̱wa̱á xáʼ. Raʼkhí kayuuʼ nindxu̱u̱ dí ni̱nila›”.
6 Ikhaa niʼngo̱o̱ nixkamiin ga̱jma̱a̱ rúʼko̱ dí niʼthún.
7 Mú ikhiin niriʼñáán: “Náá numuu dí xúʼko̱ ratúxu tátá. Ikháanʼxu̱ nimbá miʼtsú xúnixu xúʼko̱ kaʼnii.
8 ¡Á mu asndu náa ku̱ba̱ʼ ndrígóo Canaán nigúwáaʼ ku̱yuxu̱ mbújkha̱a̱ dí nixkamaaxu náa rawuunʼ gúxtuxu̱! Xú káʼnii gáʼni dí mu̱ni̱ kuʼwáʼxu oro o plata dí rígá náa goʼwóo patriáan rá.
9 Á mu náa ikháanʼxu̱ gákujma̱a̱ copa dí natayáaʼ, bi̱ kayá mbaʼyóoʼ makhañúu, ga̱jma̱a̱ xúgiáanʼxu mani̱ndxu̱xuʼ ñumbáá ndrígóo patriáan”.*
10 Ikhú, ikhaa niʼthún: “Maguma xó má ikháanʼla e̱tha. Mú i̱ndó bi̱ kayá rí ndaʼyáaʼ buʼko̱ bi̱ mani̱ndxu̱u̱ ñumbáá ndrígóʼ. Bi̱ na̱nguá kuaʼdáá aʼkhála ma̱ndoo má mu̱ʼgua̱a̱ʼla”.
11 Ikhú xúgíinʼ nindrigú gúxtu̱ún ga̱jma̱a̱ mámbáa nirajkúu gúxto̱o̱.
12 Ikhaa nigíʼdúu ndiyáaʼ náa mámbá gúxta̱a̱, nigíʼdúu náa gúxto̱o̱ bi̱ giʼnii niguámbóo náa gúxto̱o̱ bi̱ itháan gi̱ʼta̱. Ga̱jma̱a̱ copa nixkamaa náa gúxto̱o̱ Benjamín.
13 Ikhú nirujtu xtíñún. Mámbáa nixiéʼda̱a̱ búrriu̱u̱ ga̱jma̱a̱ nitangiín náa xuajin.
14 Índo̱ Judá gajmíi̱n a̱ngui̱i̱n niguáʼnú náa goʼwóo José, ikhaa kaʼníí xóó xtáa ikhí. Ikhú ikhiin nismbati̱gu̱u̱n asndu mbayííʼ náa inuu ikhaa.
15 José niʼthún: “Náá numuu dí xígi̱ kaʼnii ni̱nila rá. Lá na̱nguá e̱ya̱a̱ dí mbáa xa̱bu̱ xóo ikhúún naʼngo̱o̱ naʼtájuíi mbájmbu dí narígá ráʼ.”
16 Judá niriʼñuu: “Dí lá gándoo gúta̱a̱nʼxu rá. Dí lá kuáʼdáá dí muta̱a̱nʼxu rá. Xú káʼnii gándoo gúsngajmaxu dí na̱nguá kuáʼdáá aʼkhúxu̱ rá. Dios bi̱ gajkhun nigíʼ pa̱jnu dí raʼkhí nini̱ ñumbáá ndrígáaʼ. ¡Dí xúgi̱ xúgiáanʼxu asndu bi̱ kayá copa mani̱ndxu̱xuʼ ñumbáá ndrígáaʼ!”.
17 Ikhú José niʼthí xígú: “¡Ikhúún xáni̱ mbá dí xúʼko̱ kaʼnii! Xa̱bu̱ bi̱ kayá copa ikhaa buʼko̱ bi̱ mani̱ndxu̱u̱ ñumbáá ndrígóʼ. Eʼwíinʼ ma̱ndoo magúun tsímáá matangi̱ín gajmiún anu̱ún”.
18 Ikhú Judá ni̱jkha̱ kanuu náa ikhaa ga̱jma̱a̱ niʼthúu̱n: “Natakháñaaʼ tátioʼ, mbá péñu,* atatsíñuʼ matha̱a̱n, ga̱jma̱a̱ xákiʼnán numuu dí nindxu̱ʼ ñumbáá ndrígáaʼ, ikháán nindxa̱a̱ʼ xó má faraón.
19 Tátioʼ, ikháán nitrajxuxu: ‹Guaʼdaa ana̱la* ráʼ. Guaʼdiin xóó a̱ngia̱la ráʼ.›
20 Ga̱jma̱a̱ ikháanʼ nitha̱a̱n’xu: ‹Aán, guáʼdaaxu anu̱xu̱, mú nikhi̱i̱ má. Ma̱ngaa guáʼdaaxu i̱mba̱a̱ gi̱ʼtiu̱xu. Anu̱xu̱ nigiʼdaa gi̱ʼtiu̱xu índo̱ nikhi̱i̱ má, ga̱jma̱a̱ gíʼdaa mbáa ndxájuu bi̱ mbáwíí rudún, mú ndxájuu nikháñúu, ikha jngóo i̱ndó ikhaa guanúu. Ga̱jma̱a̱ anu̱xu̱ ra̱ʼkhá tháán endoo kaʼyoo›.
21 Nda̱wa̱á niratúxu: ‹Aguwaʼ kuya̱a̱la mu ikhúún mba̱yo̱o̱›.
22 Ikháanʼ nitha̱a̱nxu: ‹Rí dxámá xándoo maniñuuʼ anu̱u̱. Á mu naniñuuʼ gajkhun dí anu̱u̱ makhañúu›.
23 Mú ikháán niratúxu: ‹I̱ndó ma̱ndoo maguwa̱a̱ʼla náa ikhúún á mu naguwáʼ kuya̱a̱la gi̱ʼtia̱la bi̱ itháan chíʼgíiʼ›.
24 Índo̱ nijkuáaʼxu gúya̱a̱ anu̱xu̱ bi̱ nindxu̱u̱ xa̱bia̱a̱ʼ, nitha̱a̱nxu dí ikháán niratúxu, tátioʼ.
25 Nda̱wa̱á anu̱xu̱ niʼthúxu: ‹Gutangáanʼla mu mutsi xóó ganitsu›.
26 Mú ikháanʼ nitha̱a̱nxu: ‹Xándoo mu̱ʼguáxu. Xándoo muxnajximíjnáxu náa inuu xa̱bu̱ buʼko̱, á mu na̱nguá ejkuáxu̱ kuya̱a̱ gi̱ʼtiu̱xu bi̱ itháan chíʼgíiʼ. I̱ndó ma̱ndoo muʼguáxu̱ á mu na̱jkha̱ gi̱ʼtiu̱xu bi̱ itháan chíʼgíiʼ ga̱jma̱á nindxu̱xu̱›.
27 Ikhú anu̱xu̱ bi̱ nindxu̱u̱ xa̱bia̱a̱ʼ niʼthúxu: ‹Ikháanʼla má ndu̱ya̱a̱ májánʼ dí a̱ʼgiu̱ʼ káaʼ a̱jmi̱i̱n e̱ji̱nʼ nigiʼdiin.
28 Mbáa dí ikhaa niniñuʼ ga̱jma̱a̱ nitha̱: “¡Mbáa xujkhú xáná niʼkujkuii!”. Asndu mbiʼi rúʼko̱ nánguá nitangu̱ún ndi̱yo̱o̱.
29 Á mu xúgi̱ na̱jkua̱ kuya̱a̱la a̱ʼdióʼ bugi̱ ga̱jma̱a̱ á mu nagíʼnuu mbá gamiéjunʼ ga̱jma̱a̱ nakháñúu, mu̱nila dí maxtáá ngíná asndu mbiʼi dí majnguáanʼ náa Iñá wajinʼ›.*
30 Anu̱xu̱ ra̱ʼkhá tháán eyoo kaʼyoo a̱ʼdióo. Dí asndu xáʼngo̱o̱ gáxtáa á mu nda̱wa̱a̱ ikhaa, á mu xúgi̱ natanga̱án náa anu̱ʼ bi̱ nindxu̱u̱ xa̱bia̱a̱ʼ ga̱jma̱a̱ dxámá tséjka̱a̱’ gajmiúxu,
31 anu̱xu̱ makhañúu índo̱ gáʼyoo dí nda̱wa̱a̱ a̱ʼdióo. Xáʼngo̱o̱ gáʼni̱i̱ a̱jkiu̱u̱n, maxtáa ngíná asndu mbiʼi dí majnguáanʼ náa Iñá wajinʼ.
32 Ikhúún ni̱thu̱u̱n anu̱ʼ dí ikhúún má gáñewu̱u̱n gi̱ʼtio̱ʼ. Ni̱thu̱u̱n: ‹Á mu tséʼkháaʼ ka̱ya̱a̱ mu maxnia̱áʼ, makiéʼkhun* náa inaaʼ asndu kámuu›.
33 Ikha jngóo mbá péñu tátá, atatsiñááʼ dí ikhúún maguanúʼ xóo ñumbáá ndrígáaʼ xtiʼkhuu gi̱ʼtio̱ʼ, mu xúʼko̱ ikhaa ma̱ndoo matanga̱a̱ gajmíi̱n a̱ngui̱i̱n.
34 Xú káʼnii gáʼgánúu’ náa anu̱ʼ á mú tséjkha̱a̱’ ka̱ya̱a̱ dxámá rá. ¡Xáʼngo̱ʼ gáyóo mamínuuʼ anu̱ʼ ga̱jma̱a̱ numuu tsingíná rígi̱!”.
Mbaʼa nota
^ O “lajuíin”.
^ Náa ajngáa hebreo naʼthí, “patriúnʼ”.
^ O “ataniu̱ʼ mbá rí májánʼ”.
^ O “tátiala”.
^ O “magúʼdoo aʼkhu̱nʼ”.
