Génesis 45:1-28
45 Índo̱ niʼdxawuun rígi̱, José na̱nguá niʼngo̱o̱ itháán a̱jkiu̱u̱n náa inún ñumbáá ndrígóo, ikhú niʼthún: “¡Agajnáanʼla xúgiáanʼ gi̱i̱!”. I̱ndó niguanúu gajmíi̱n a̱ngui̱i̱n, José niʼthún tsáá nindxu̱u̱.
2 Ra̱ʼkhá tháán xígu nikijxi̱i̱ nimbi̱ya̱ʼ rí asndu nidxawíín egipcios ga̱jma̱a̱ bi̱ kúwá náa goʼwóo faraón.
3 Asndu ikhú José niʼthún a̱ngui̱i̱n: “Ikhúún nindxu̱ʼ José. Lá xtáa xóó anu̱ʼ* ráʼ.” Mú a̱ngui̱i̱n táʼngu̱u̱n gúriʼñáá numuu rí ni̱jkha̱ a̱jkiu̱ún.
4 Ikhú José niʼthún a̱ngui̱i̱n: “Mbá péñu,* aguwaʼ kanuu”. Ga̱jma̱a̱ ikhiin nigún kanuu.
Ikhú niʼthún: “Nindxu̱ʼ gi̱ʼtia̱la José, bi̱ ikháanʼ nigujua̱a̱ náa Egipto.
5 Xúmíníin ga̱jma̱a̱ numuu rí niguju̱u̱n, ni má xútha rí mbáa gíʼdoo aʼkhúun, Dios nikungu̱u̱nʼ ginún ki xóo ikháanʼla mu xúʼko̱ ma̱ni̱ káwíin xa̱bu̱.
6 Dí xúgi̱ naʼni má a̱jma̱ tsiguʼ dí rígá ewiʼ náa xuajin, mú tígo̱o̱ imbá witsu tsiguʼ dí nimbáa xáxkubi̱ ni má nimbáa xágújxi̱i̱ dí majuiʼdu.
7 Dios nikuʼmún ma̱ʼkhá ginún gi̱i̱ ki xóo ikháanʼ mu xúʼko̱ ma̱ndoo ma̱ni̱ káwáanʼla ga̱jma̱a̱ makuwáanʼ xóó náa tsu̱du̱u̱ ku̱ba̱ʼ.
8 Dios bi̱ gajkhun nikuʼmún ma̱ʼkhá gi̱i̱, raʼkháa ikháanʼla. Niʼni mu mani̱ndxu̱ʼ mbáa xa̱bu̱ bi̱ itháán gíʼdoo numuu náa faraón ga̱jma̱a̱ mañewu̱u̱n goʼwóo ma̱ngaa matañájunʼ náa xúgíʼ ku̱ba̱ʼ ndrígóo Egipto.
9 Nacha̱, guʼgua̱a̱ʼ gúyaa anu̱ʼ ga̱jma̱a̱ gutha̱a̱n: ‹Rígi̱ rí naʼthí a̱ʼdiáaʼ José: “Dios niʼni rí matañájunʼ náa xúgíʼ Egipto. Ayi̱ gátayo̱ʼ. Xájyáala.
10 Maraxtaa náa ku̱ba̱ʼ ndrígóo Gosén, náa mijngii xtáá ikhúún ga̱jma̱a̱ ikhí maraxtaa gajmiáanʼ ejña̱a̱nʼ, e̱jín xíñáaʼ ga̱jma̱a̱ xúgíinʼ xujkiáaʼ ma̱ngaa xúgíʼ dí xtaʼdáá.
11 Ikhúún gáyóo xú káʼnii gáraʼdáá ganitsu ikhí, numuu rí naguanúu mbá witsu tsiguʼ dí marigá xóó ewiʼ. Á mu rí tsédxáʼ ikháán gajmiáanʼ bi̱ kúwá náa guʼwáaʼ mandátiga̱la xúgíʼ rí guaʼdáá”›.
12 Ikháanʼla ga̱jma̱a̱ gi̱ʼtio̱ʼ Benjamín nandoo ndu̱ya̱a̱ gajkhun rí ikhúún nindxu̱ʼ bi̱ xtáá rata̱la̱.
13 Mbaʼyóoʼ mutha̱a̱n anu̱ʼ xúgíʼ rí ndiya̱a̱ ga̱jma̱a̱ rí ni̱jkhánú ninindxu̱ʼ mbáa bi̱ gíʼdoo numuu náa Egipto. Gaʼchala gaguwaʼ ku̱ya̱a̱ anu̱ʼ”.
14 Ikhú ndiyaráʼa* Benjamín bi̱ nindxu̱u̱ giʼtio̱o̱ ga̱jma̱a̱ nimbi̱ya̱ʼ, xúʼko̱ má Benjamín ma̱ngaa ndiyaróʼoo aphuu ga̱jma̱a̱ nimbi̱ya̱ʼ.
15 José nixnúún beso xúgíinʼ a̱ngui̱i̱n ma̱ngaa niguriʼin ga̱jma̱a̱ nimbi̱ya̱ʼ. Nda̱wa̱á a̱ngui̱i̱n nitri̱gi̱i̱n nitamijná gajmiún.
16 Ajngáa rígi̱ ni̱jkha̱nú náa goʼwóo faraón: “¡Niguwáʼ a̱ngui̱i̱n José!” Índo̱ faraón niʼdxuun ajngáa rígi̱ gajmíi̱nʼ xa̱bi̱i̱, nidxúún wéñuuʼ.
17 Faraón niʼthúu̱n José: “Arathún a̱ngia̱a̱nʼ: ‹Gu̱nila rígi̱: Guxiéʼdún xujkiála ga̱jma̱a̱ gaʼgua náa ku̱ba̱ʼ ndrígóo Canaán,
18 Gaguwaʼ kuya̱a̱la náa ikhúún ana̱la ga̱jma̱a̱ bi̱ kúwi̱i̱n náa guʼwála. Maxnala rí itháán májánʼ dí rígá náa ku̱ba̱ʼ ndrígóo Egipto ga̱jma̱a̱ maxnala ganitsu rí itháán májánʼ dí rígá náa xuajin›.
19 Ma̱ngaa natañájuanʼ dí marathu̱u̱n: ‹Gu̱ni̱ rígi̱: Gudéʼgua carro dí rígá náa Egipto mu maguwa̱ʼ kudiin e̱jña̱la ga̱jma̱a̱ guʼyala, gugríguii ana̱la ma̱ʼkha̱ náa mbá carro.
20 Xaxmiéjuanla* ga̱jma̱a̱ numuu rí kuaʼdáá numuu rí itháán májánʼ dí rígá náa ku̱ba̱ʼ ndrígóo Egipto nindxu̱u̱ ndrígala ikháanʼ›”.
21 Xúʼko̱ nini̱ e̱ji̱i̱n Israel. José nixnúún carro, xóo má niʼtáñajunʼ faraón ma̱ngaa nixnúún ganitsu rí mu̱phu̱ kamba̱a̱.
22 Mámbáa dí ikhiin nixnúu mbá edi̱i̱ xtíin nuxi̱ʼ, mú Benjamín nixnúu 300 mbújkha̱a̱ plata ga̱jma̱a̱ mbá witsu edi̱i̱ xtíin rí nuxi̱ʼ.
23 Rígi̱ nikunguanʼ náa anu̱u̱:* Mbá gu̱wi̱i̱nʼ búrru itsí bi̱ kuda rí itháán májánʼ rí najma̱a̱ náa Egipto ga̱jma̱a̱ mbá gu̱wi̱i̱nʼ búrru e̱ʼgú bi̱ kuda trigo,* pan ga̱jma̱a̱ i̱ʼwáʼ ganitsu rí mi̱khu̱ anu̱u̱ índo̱ gáʼkha̱.
24 José niʼtángawún a̱ngui̱i̱n ga̱jma̱a̱ índo̱ nagúun má, niʼthún: “Raʼkháa nugiʼda̱la náa kamba̱a̱”.
25 Ikhiin nigájni̱ín náa Egipto nigúun gúyáá anu̱ún náa ku̱ba̱ʼ ndrígóo Canaán.
26 Ikhú nitháán anu̱ún: “¡José xtáa ndaʼya ga̱jma̱a̱ naʼtáñajunʼ náa xúgíʼ ku̱ba̱ʼ ndrígóo Egipto!”. Mú Jacob támajkhuu kaʼñún numuu rí táʼnimbo̱o̱ dí kúwá rutháán.
27 Índo̱ nitháán xúgíʼ rí José niʼthún ga̱jma̱a̱ índo̱ ndiʼyoo carro dí José nikunguanʼ mu maʼga kiʼyáa ga̱jma̱a̱, ikhú Jacob nidxuu wéñuuʼ.*
28 Israel niʼthí gakhi̱i̱: “¡Gajkhun rí nuthala! ¡A̱ʼdióʼ José xtáa ndaʼya! ¡Ndayóoʼ dí maʼgá gáyóo nákha xóó tsékháñúʼ!”.
Mbaʼa nota
^ O “táteʼ”.
^ O “guni̱ mbá rí májánʼ”.
^ Náa ajngáa hebreo naʼthí, “nismbraʼmáaʼ náa aphuu”.
^ O “maxáʼtá a̱jkia̱a̱nʼla”.
^ O “tátée”.
^ Náa ajngáa hebreo naʼthí, “tsígáʼ”.
^ Náa ajngáa hebreo naʼthí, “jxu̱u̱ʼ Jacob nitanga̱a̱”.
