Génesis 46:1-34
46 Ikhú Israel nigímbóo xúgíʼ rí gíʼdoo* ga̱jma̱a̱ ni̱jkha̱, índo̱ nijkha̱nú náa Beer-Seba nixnájxi̱ tsigijñaʼ gamajkhu náa inuu Dios ndrígóo Isaac bi̱ nindxu̱u̱ anu̱u̱.*
2 Mbóo mbruʼun, Dios niʼthúu̱n Israel náa mbá rí niwasngájmáá,* niʼthúu̱n: “¡Jacob! ¡Jacob!”. “¡Gi̱i̱ xtáá!”, niʼthúu̱n ikhaa.
3 Dios niʼthúu̱n: “Ikhúún nindxu̱ʼ Dios bi̱ gajkhun, Dios ndrígóo ana̱a̱ʼ.* Xámiñanʼ dí mi̱dxu̱ʼ náa Egipto, numuu rí ikhí ma̱ni̱ rí manindxa̱a̱ʼ mbá xuajin mba̱a̱.
4 Ikhúún mínu̱u̱ʼ gáʼgá ga̱jma̱á nindxa̱a̱ʼ náa Egipto, ga̱jma̱a̱ ikhúún má minuuʼ gáʼkháaʼ ka̱ña̱a̱n. José maxkajma náa idaaʼ”.*
5 Nda̱wa̱á dí nirígá rúʼko̱, Jacob nigájnuu náa Beer-Seba. E̱ji̱i̱n Jacob* nigún kuya̱a̱, xó má e̱jñu̱ún, mangiin guʼñu̱ún. Náa carro dí faraón nikungua̱nʼ mu magún ga̱jma̱a̱.
6 Nigún kudiin xujkiún ga̱jma̱a̱ xúgíʼ rí niguáʼdáá náa ku̱ba̱ʼ ndrígóo Canaán. Xúʼko̱ Jacob gajmíi̱n xúgíinʼ e̱ji̱i̱n nigún náa Egipto.
7 Ni̱jkha̱ gajmíi̱n jiámii, waʼxiinʼ, e̱jín xíñíiʼ. Ni̱jkha̱ náa Egipto gajmíi̱n xúgíinʼ e̱ji̱i̱n.
8 Xígi̱ mbiʼñún e̱ji̱i̱n Israel, xóo muʼthá, e̱ji̱i̱n Jacob, bi̱ nigún náa Egipto, Rubén nindxu̱u̱ a̱ʼdá giʼniuu Jacob.
9 E̱ji̱i̱n Rubén ninindxu̱u̱ Hanok, Palú, Hezrón ga̱jma̱a̱ Carmí.
10 E̱ji̱i̱n Simeón ninindxu̱u̱ Jemuel, Jamín, Ohad, Jakín, Zóhar ga̱jma̱a̱ Shaúl, a̱ʼdióo mbáa cananea.
11 E̱ji̱i̱n Leví ninindxu̱u̱ Guersón, Cohat ga̱jma̱a̱ Merarí.
12 E̱ji̱i̱n Judá ninindxu̱u̱ Er, Onán, Selá, Pérez ga̱jma̱a̱ Zérah. Mú Er ga̱jma̱a̱ Onán nikháñún náa ku̱ba̱ʼ ndrígóo Canaán.
E̱ji̱i̱n Pérez ninindxu̱u̱ Hezrón ga̱jma̱a̱ Hamul.
13 E̱ji̱i̱n Isacar ninindxu̱u̱ Tolá, Puvá, Yob ga̱jma̱a̱ Simrón.
14 E̱ji̱i̱n Zabulón ninindxu̱u̱ Séred, Elón ga̱jma̱a̱ Jahleel.
15 Bugi̱ nindxu̱ún e̱ji̱i̱n Lea, bi̱ nigiʼdiin ga̱jma̱a̱ Jacob náa Padán-Aram, ma̱ngaa wáxiu̱ún bi̱ mbiʼyuu Dina. Dí mbá xúgíinʼ jiámii ga̱jma̱a̱ waʼxiinʼ Jacob, ninindxu̱ún 33.
16 E̱ji̱i̱n Gad ninindxu̱u̱ Zifión, Haguí, Suní, Ezbón, Erí, Arodí ga̱jma̱a̱ Arelí.
17 E̱ji̱i̱n Aser ninindxu̱u̱ Imná, Isvá, Isví ga̱jma̱a̱ Berías, ma̱ngaa nigiʼdaa mbáa wáxióo* bi̱ nigumbiʼyuu Sérah.
E̱ji̱i̱n Berías ninindxu̱u̱ Héber ga̱jma̱a̱ Malkiel.
18 Bugi̱ nindxu̱ún e̱ji̱i̱n Zilpá, a̱ʼgú ñumbáá bi̱ Labán nixniúu Lea bi̱ nindxu̱u̱ wáxióo. Mbá xúgíinʼ e̱ji̱i̱n Zilpá bi̱ nigiʼdiin ga̱jma̱a̱ Jacob, ninindxu̱ún mbá 16.
19 E̱ji̱i̱n Raquel bi̱ nindxu̱u̱ a̱ʼgiu̱u̱ Jacob, nindxu̱u̱ José ga̱jma̱a̱ Benjamín.
20 E̱ji̱i̱n José bi̱ nigiʼdiin náa Egipto, nindxu̱u̱ Manasés ga̱jma̱a̱ Efraín, bi̱ nigiʼdiin ga̱jma̱a̱ Asenat wáxióo Potifera ndxajkun ndrígóo On.*
21 E̱ji̱i̱n Benjamín ninindxu̱u̱ Bela, Béker, Asbel, Guerá, Naamán, Ehí, Ros, Mupim, Hupim ga̱jma̱a̱ Ard.
22 Bugi̱ nindxu̱ún e̱ji̱i̱n Raquel bi̱ nigiʼdiin ga̱jma̱a̱ Jacob, mbá xúgíinʼ e̱ji̱i̱n Raquel bi̱ nigiʼdiin ga̱jma̱a̱ Jacob, ninindxu̱ún mbá 14.
23 A̱ʼdióo* Dan nindxu̱u̱ Husim.
24 E̱ji̱i̱n Neftalí ninindxu̱u̱ Jahzeel, Guní, Jézer ga̱jma̱a̱ Silem.
25 Bigi̱ ninindxu̱u e̱ji̱i̱n Bilhá, a̱ʼgú ñumbáá bi̱ Labán nixniúu Raquel, bi̱ nindxu̱u̱ wáxióo. Mbá xúgíinʼ e̱ji̱i̱n Bilhá bi̱ nigiʼdiin ga̱jma̱a̱ Jacob ninindxu̱ún mbá juwiin.
26 Mbá xúgíinʼ e̱ji̱i̱n Jacob bi̱ nigún náa Egipto, ninindxu̱ún 66, mú tágixnii guʼñu̱ún e̱ji̱i̱n.
27 José nigiʼdiin a̱jmi̱i̱n e̱ji̱i̱n náa Egipto. Mbá xúgíinʼ xa̱bu̱ bi̱ nigájnún náa goʼwóo Jacob bi̱ nigún náa Egipto, ninindxu̱ún mbá 70.
28 Jacob niʼthúu̱n Judá dí maʼga ginii ga̱jma̱a̱ dí maʼthúu̱n José, rí nagún má náa kamba̱a̱ rí na̱jkha̱ náa Gosén. Índo̱ niguánú náa ku̱ba̱ʼ ndrígóo Gosén,
29 José niʼtáñajunʼ dí muniratáá carriuu, mu matsimuu náa Gosén, mu maxkamaminaʼ ga̱jma̱a̱ Israel bi̱ nindxu̱u̱ anu̱u̱. Índo̱ niraʼnumijná ndiyáraʼaa* ga̱jma̱a̱ mba̱yu̱u̱ʼ nitri̱gi̱i̱n nimbi̱ya̱ʼ.
30 Ikhú Israel niʼthúu̱n José: “Xúgi̱ dí ma̱ndoo makhañúʼ tsímáá rá, numuu rí ndi̱ya̱a̱ʼ ga̱jma̱a̱ nda̱yo̱o̱ rí xtaa mbiʼyaaʼ”.
31 Ikhú José niʼthúún a̱ngui̱i̱n ga̱jma̱a̱ bi̱ kúwá náa goʼwóo anu̱u̱: “Guniʼñúʼ maʼgáaʼ gáyóo faraón ga̱jma̱a̱ mathu̱u̱n: ‹Niguáʼnú a̱ngui̱nʼ ga̱jma̱a̱ bi̱ kúwíin náa goʼwóo anu̱ʼ, bi̱ kúwá náa ku̱ba̱ʼ ndrígóo Canaán.
32 Xa̱bu̱ bugi̱ nindxu̱ún baxtúu ga̱jma̱a̱ nurui̱ʼthu̱u̱n xujkhúʼ. Niguwáʼ kudiin mugiún, xediu̱ún ga̱jma̱a̱ xúgíʼ rí guáʼdáá›.
33 Índo̱ faraón gándxaʼwála ga̱jma̱a̱ marajxa̱la: ‹Ndiéjunʼ ñajunʼ eni̱la rá.›
34 Ikháanʼ gíʼmaa muriʼñánla: ‹Ikháanʼxu̱, bi̱ nindxu̱xu xa̱bia̱a̱ʼ, nurui̱ʼthi̱i̱nxu xujkhúʼ asndu nákha nindxu̱xu̱ jiámá. Ikháá má xóo wajin xiʼñúxu›. Mu xúʼko̱ maniñala makuwáanʼ náa ku̱ba̱ʼ Gosén. Numuu rí bi̱ egipcios nawiñu̱u̱nʼ kuñún baxtúu bi̱ nuñewu̱u̱n mugu̱”.
Mbaʼa nota
^ O “nigímbíin xúgíinʼ bi̱ kúwá náa goʼwóo”.
^ O “tátée”.
^ O “visión”.
^ O “tátiáaʼ”.
^ Nandoo gáʼthúu̱n rí ikhaa gárugua̱a̱ iduu Jacob índo̱ gákháñúu.
^ Náa ajngáa hebreo naʼthí, “Israel”.
^ O “a̱ʼdée dxáʼgú”.
^ Xóo muʼthá, Heliópolis.
^ Náa ajngáa hebreo naʼthí, “e̱ji̱i̱n”. Mbáa mbiʼñún bi̱ eʼwíinʼ e̱ji̱i̱n nijngudi̱i̱.
^ Náa ajngáa hebreo naʼthí, “nismbraʼmáaʼ náa aphuu”.
