Génesis 47:1-31
47 Ikhú José ni̱jkha̱ gáʼthúu̱n faraón: “Anu̱ʼ* gajmíi̱n a̱ngui̱nʼ nigájnún náa ku̱ba̱ʼ ndrígóo Canaán gajmiún mugiu̱ún, xediu̱ún ga̱jma̱a̱ xúgíʼ dí guáʼdáá. Kúwíin náa ku̱ba̱ʼ ndrígóo Gosén”.
2 José niraʼwíin mbá witsiin a̱ngui̱i̱n ga̱jma̱a̱ ni̱jkha̱ kagui̱i̱n mu faraón maniniún.
3 Faraón nirajxu̱u̱n a̱ngui̱i̱n José: “Ndiéjunʼ ñajunʼ eni̱la rá.” Ikhiin niriʼñáán: “Ikháanʼxu̱ bi̱ nindxu̱xu̱ xa̱bia̱a̱ʼ, nindxu̱xu̱ baxtúu bi̱ nuñewu̱u̱n mugu̱, xó má wajin xiʼñúxu”.
4 Ma̱ngaa nitháán faraón: “Nigúwaʼxu náa xuajin rígi̱ mu makuwáanʼxu xóo xa̱bu̱ bi̱ naguwaáʼ, numuu dí rígá ewiʼ náa ku̱ba̱ʼ ndrígóo Canaán, ma̱ngaa nda̱a̱ rajxa̱ mu̱phu̱ xujkiún xa̱bia̱a̱ʼ. Mbá péñu,* atatsiñááʼ dí xa̱bia̱a̱ʼ makuwá náa ku̱ba̱ʼ ndrígóo Gosén”.
5 Ikhú faraón niʼthúu̱n José: “Ana̱a̱ʼ gajmíi̱n a̱ngia̱a̱nʼ niguwáʼ gúyáaʼ.
6 Ku̱ba̱ʼ ndrígóo Egipto kajkuáa ñawáanʼ. Ayuʼ jcháa ana̱a̱ʼ gajmíi̱nʼ a̱ngia̱a̱nʼ mu makuwá náa ku̱ba̱ʼ dí itháan májánʼ dí rígá náa xuajin rígi̱. Gakuwá náa ku̱ba̱ʼ ndrígóo Gosén. Á mu natayáá dí mbáa dí ikhiin najmañuu májánʼ mañewu̱u̱n xujkhúʼ, atagíiʼ mu mañewu̱u̱n xujkiúʼ”.
7 Nda̱wa̱á José ni̱jkha̱ kayáa Jacob bi̱ nindxu̱u̱ anu̱u̱ náa faraón mu maniniiʼ. Jacob niʼni tsajkurámaaʼ faraón.
8 Faraón nirajxu̱u̱ Jacob: “Nguáthá tsiguaaʼ rá.”
9 Jacob niriʼñuu faraón: “Gúʼdoʼ má 130 tsiguʼ, nindxu̱ʼ xa̱bu̱ bi̱ na̱jkha̱ rajnguʼúun. Ninindxu̱u̱ tsiguʼ gakhi̱i̱ wéñuuʼ, mú tsémbríguii ga̱jma̱a̱ tsiguʼ rí xóo nikúwá wajin xiʼñúnʼ bi̱ nigún rajnguʼúún”.
10 Nda̱wa̱á Jacob niʼni tsajkurámaaʼ faraón ga̱jma̱a̱ nigájnáa náa inuu.
11 Ikha jngóo José ni̱jkha̱ kayáa anu̱u̱ gajmíi̱n a̱ngui̱i̱n náa ku̱ba̱ʼ ndrígóo Egipto náa itháan májánʼ dí rígá náa xuajin, náa ku̱ba̱ʼ ndrígóo Ramesés, xó má niʼtáñajunʼ faraón.
12 José nixnúu ganitsu* anu̱u̱ gajmíi̱n a̱ngui̱i̱n, mangiin xúgíinʼ bi̱ kúwá náa goʼwóo anu̱u̱ xó má mbaʼin e̱jñu̱ún.
13 Nándáa ganitsu* náa xúgíʼ xuajin, numuu dí ewiʼ ninindxu̱u̱ gakhi̱i̱ wéñuuʼ. Ewiʼ ni̱jkha̱nú asndu náa ku̱ba̱ʼ ndrígóo Egipto ga̱jma̱a̱ náa ku̱ba̱ʼ ndrígóo Canaán.
14 José naguju̱u̱n ganitsu xa̱bu̱ Egipto ga̱jma̱a̱ xa̱bu̱ Canaán ga̱jma̱a̱ xúgíʼ mbújkha̱a̱ rúʼko̱ najkha̱a̱ kagu̱u̱ náa goʼwóo faraón.
15 Ni̱jkha̱nú mbiʼi dí niguámbá mbújkha̱a̱ náa Egipto ga̱jma̱a̱ náa Canaán. Ikha jngóo xúgíinʼ xa̱bu̱ egipcios nigún gúyáá José mu muthán: “¡Araxnúxu̱ ganitsu! Lá matatsiʼñáánʼ makañúxu numuu dí niguámbá mbújku̱xu ráʼ.”
16 José niʼthún: “Á mu nánguá kuaʼdáála mbújkha̱a̱, gaguwaʼ kudiin xujkiála mu muriʼkuiin ga̱jma̱a̱ ganitsu”.
17 Ikhú ikhiin nigi̱ʼdi̱i̱ nigún kudiin xujkiún. José nixnúún ganitsu dí niriʼkuiin ga̱jma̱a̱ wáyú, nigún kudiin mugiu̱ún, tsujtiúúnʼ, xediu̱ún, búrriu̱ún. Náa xúgíʼ tsiguʼ rúʼko̱ José nixnúún ganitsu dí niriʼkuiin ga̱jma̱a̱ xujkiún.
18 Índo̱ niguámbá tsiguʼ rúʼko̱. Nigi̱ʼdu̱u̱ imbo̱o̱ tsiguʼ, ikhiin nigíʼdi̱i̱ nigún gúyáá José ga̱jma̱a̱ nitháán: “Xándoo murkaʼwumáʼánxu náa inaaʼ dí nixna̱a̱ʼxu má xúgíʼ mbújku̱xu, ga̱jma̱a̱ xúgíinʼ xujkhúʼ bi̱ kuáʼdíinʼxu. I̱ndó dí naguanúu dí muxna̱a̱xu̱ nindxu̱u̱ ku̱bu̱xu̱ʼ ga̱jma̱a̱ ikháanʼxu̱.
19 Lá matatsiʼñúxu dí makañúxu, ga̱jma̱a̱ dí mawanaa xúʼkhi̱ínʼ ku̱ba̱ʼ ndrígúxu̱ ráʼ. Aratsiáanʼxu̱ ga̱jma̱a̱ aratsi̱i̱ mbayuxu, araxnúxu̱ ganitsu. Mani̱ndxu̱xuʼ ñumbáá ndrígóo faraón ga̱jma̱a̱ mbayuxu mani̱ndxu̱u̱ ndrígóo ikhaa. Araxnúxu̱ tsígáʼ mudúxu mu marigá ganitsu muphúxu mu xúʼko̱ xákáñunxu̱, ga̱jma̱a̱ mu mbayuxu̱ xáwánaa xúʼkhi̱ínʼ”.
20 Numuu dí ewiʼ niʼni gakhi̱i̱ wéñuuʼ, xa̱bu̱ egipcios nigujua̱a̱ mbañúúnʼ náa José ga̱jma̱a̱ ikhaa niʼtsi̱i̱ xúgíʼ mbañúúnʼ mu maʼni ndrígóo faraón. Ikha jngóo xúgíʼ mbaaʼ ni̱jkha̱nú ninindxu̱u̱ ndrígóo faraón.
21 José niʼthún xa̱bu̱ bi̱ kúwá náa xúgíʼ mbayuuʼ Egipto, dí maguwáʼ gákúwá náa xuajin.
22 I̱ndó ku̱ba̱ʼ dí táʼtsi̱ nindxu̱u̱ ndrígu̱ún ndxajkun. Numuu dí faraón naxnún má dí mu̱phu̱, ikha jngóo túgujua̱a̱ mbañúúnʼ.
23 Ikhú José niʼthún xa̱bu̱: “Gu̱ya̱a̱la, xúgi̱ nitsiaanʼla ikháanʼ ga̱jma̱a̱ mbayala mu maʼni ndrígóo faraón. Gi̱i̱ rígá tsígáʼ dí ma̱ndoo mu̱dula náa mbayala.
24 Índo̱ gúrajxi̱i̱ dí gúdula, á mu nugímbo̱o̱ mbá witsu ru̱tsu̱u̱ tsígáʼ, mbá ru̱tsu̱u̱ gúxnáa faraón. A̱jkhu̱ ru̱tsu̱u̱ dí maguanála ga̱jma̱a̱ majmala mu muxníʼtsúún bi̱ kúwá náa guʼwála ga̱jma̱a̱ e̱jña̱la, ma̱ngaa mu mu̱dula náa mbayala”.
25 Ikhiin nitháán: “Tátá, nitani̱ káwáanʼxu. Á mu májánʼ tayáá mani̱ndxu̱xu ñumbáá ndrígóo faraón”.
26 José niríyaʼ mbá xtángoo dí najmaa asndu dí mbiʼi xúgi̱ náa ku̱ba̱ʼ ndrígóo Egipto: Á mu naxtagijxi̱i̱ mbá witsu ru̱tsu̱u̱ tsígáʼ, mbá ru̱tsu̱u̱ gákánáá faraón. I̱ndó ku̱bu̱únʼ ndxajkun táʼga̱nú mani̱ndxu̱u̱ ndrígóo faraón.
27 Israel niguanúu nixtáa náa Egipto náa ku̱ba̱ʼ ndrígóo Gosén. Ikhaa gajmíi̱n bi̱ kúwá náa goʼwóo nikúwíin ikhí, niguáʼdiin e̱jñu̱ún ga̱jma̱a̱ ni̱jkha̱nú niʼni mbaʼin.
28 Jacob nixtáa mbá 17 tsiguʼ náa Egipto. Xúgíʼ tsiguʼ dí nixtáa ninindxu̱u̱ 147 tsiguʼ.
29 Índo̱ inu makhañúu Israel nindxa̱ʼóo José bi̱ nindxu̱u̱ a̱ʼdióo, ga̱jma̱a̱ niʼthúu̱n: “Á mu gajkhun nandaaʼ xtayoʼ, natakháñaaʼ dí matani̱ rígi̱: Atagídáʼ ñawáanʼ náa agoo xti̱yu̱ʼ,* ga̱jma̱a̱ arathúnʼ gajkhun dí matasngajmúʼ ngajua rí tsétumuu* ga̱jma̱a̱ dí matanimbáníí ajngáaʼ. Mbá péñu xátadiu̱ún náa Egipto.
30 Índo̱ gákhañuʼ, atríñu̱u̱n náa Egipto ga̱jma̱a̱ ayuʼ gátadiu̱ún náa nijuiʼdi̱ín wajin xiʼñúnʼ”. Ikhú José niʼthúu̱n: “Ma̱ni̱ xó má nitando̱ʼo̱ʼ”.
31 Ikhaa niʼthúu̱n: “Arathúnʼ gajkhun dí matanimbáníí”. José nixná ajngóo. Ikhú Israel nikruígúu edxu̱u̱ índo̱ grígu náa edxu̱u̱ xie̱wuu.
Mbaʼa nota
^ O “táteʼ”.
^ O “atani̱ mbá rí májánʼ”.
^ Náa ajngáa hebreo naʼthí, “pan”.
^ Náa ajngáa hebreo naʼthí, “pan”.
^ Nakujmaa dí xígi̱ kaʼnii eni̱ xa̱bu̱ nákha wajyúuʼ mu musngajma dí gajkhun munimbáníí ajngún.
