Génesis 48:1-22
48 Nda̱wa̱á dí nirígá rígi̱, nitháán José: “Néʼngo̱o̱ ana̱a̱ʼ”.* Ikha jngóo ikhaa ni̱jkha̱ gáʼyoo gajmíi̱n a̱jmi̱i̱n e̱ji̱i̱n, Manasés ga̱jma̱a̱ Efraín.
2 Ikhú nitháán Jacob: “A̱ʼdiáaʼ José xtáa gi̱i̱. Ni̱ʼkha̱ gáʼyaaʼ”. Ikha jngóo Israel niʼni mbá tsiaki̱i̱, nitu̱jxu̱u̱ ga̱jma̱a̱ nigi̱ʼi̱ náa xie̱wuu.
3 Jacob niʼthúu̱n José:
“Dios bi̱ gíʼdoo xúgíʼ tsiaki̱i̱ nisngájmaminaʼ náa ikhúún náa xuajin rí mbiʼyuu Luz, náa ku̱ba̱ʼ ndrígóo Canaán ga̱jma̱a̱ niʼni tsajkurámúúʼ.
4 Ikhaa niʼthúnʼ: ‹Ma̱ni̱ dí maraʼdiin e̱jña̱a̱ʼ ga̱jma̱a̱ maʼni mbaʼin wéñuuʼ. Ma̱ni̱ dí mani̱ndxa̱a̱ʼ anu̱ún xa̱bu̱ bi̱ mbaʼin wéñuuʼ. Maxnuu ku̱ba̱ʼ rígi̱ e̱jña̱a̱ʼ ga̱jma̱a̱ maʼni jmbañún ikhiin asndu kámuu›.
5 A̱jmi̱i̱n e̱jña̱a̱ʼ bi̱ niraʼdiin gi̱i̱ náa ku̱ba̱ʼ ndrígóo Egipto nákha ikhúún xóó tséʼkhá gi̱i̱ ga̱jma̱á nindxa̱a̱ʼ, mani̱ndxu̱ún e̱ji̱nʼ. Efraín ga̱jma̱a̱ Manasés maguánú mani̱ndxu̱ún e̱ji̱nʼ ikhúún xó má nindxu̱u̱ Rubén ga̱jma̱a̱ Simeón.
6 Mú e̱ji̱n bi̱ maraʼdiin nda̱wa̱á mani̱ndxu̱ún ejña̱a̱nʼ ikháán. Magumbiʼñúún xó má mbiʼñún a̱ngiu̱ún mu xúʼko̱ mundrígúu dí kaʼñúún.
7 Índo̱ nixtáá rajkhá náa Padán náa ku̱ba̱ʼ ndrígóo Canaán nikháñu Raquel e̱ni̱. Numuu rí mba̱á’ xóó tígo̱o̱ maʼgánú náa Efrat, ikha jngóo nidi̱i̱ ikhí, náa kamba̱a̱ dí na̱jkha̱ Efrat, xóo muʼthá Belén”.
8 Ikhú Israel ndiʼñún e̱ji̱i̱n José ga̱jma̱a̱ nirajxu̱u̱: “Tsíín nindxu̱ún bugi̱.”
9 Ikhú José niriʼñuu: “Nindxu̱ún e̱ji̱nʼ bi̱ Dios nixnúʼ náa ku̱ba̱ʼ rígi̱”. Ikhú anu̱u̱ niʼthúu̱n: “Mbá péñu,* ayi̱ xtiin mijngii gi̱i̱ mu ma̱ni̱ tsajkurámiinʼ”.
10 Israel nánguá krui̱go̱o̱ má májánʼ numuu rí nikhi̱i̱ má wéñuuʼ. Ikha jngóo José ni̱ʼkha̱ kagui̱i̱n mijngii, ikhaa niguriʼin ga̱jma̱a̱ nixnúún beso.
11 Nda̱wa̱á Israel niʼthúu̱n José: “Nimbá miʼtsú tándxaʼwamínáʼ rí matangu̱ún mba̱ya̱a̱ʼ, mú xúgi̱ Dios niniñuʼ rí mba̱ñu̱u̱n e̱jña̱a̱ʼ”.
12 Ikhú José nigruiguíin e̱ji̱i̱n náa níjniúu ragómiuu Israel ga̱jma̱a̱ nismbáti̱go̱o̱ mbayííʼ.
13 Nda̱wa̱á José ni̱jkha̱ kagui̱i̱n a̱jmi̱i̱n e̱ji̱i̱n náa inuu Israel. Niguajtuwiin ga̱jma̱a̱ ñawún mújúunʼ Efraín ga̱jma̱a̱ nitsijii náa ñawún xti̱yu̱u̱ʼ Israel, Manasés niguajtuwiin ga̱jma̱a̱ ñawún xti̱yu̱u̱ʼ ga̱jma̱a̱ nitsijii náa ñawún mújúunʼ Israel.
14 Mú Israel nixkrámáʼ edxu̱u̱ Efraín ga̱jma̱a̱ ñawúnʼ mújúunʼ maski má ikhaa nindxu̱u̱ gi̱ʼta̱ ga̱jma̱a̱ ñawún xti̱yu̱u̱ʼ nixkrámáʼ náa edxu̱u̱ Manasés. Ikhaa niʼni kiejuunʼ rígi̱, maski má ndaʼyoo dí Manasés nindxu̱u̱ a̱ʼdá giʼnii.
15 Nda̱wa̱á niʼni tsajkurámaaʼ José, niʼthí:
“Dios bi̱ gajkhun, bi̱ anu̱ʼ* Isaac ga̱jma̱a̱ xiʼñúnʼ Abrahán niʼni ñajuunʼ,*Dios bi̱ gajkhun, bi̱ ninindxu̱u̱ baxtiúʼ náa xúgíʼ mbiʼi rí nixtáá asndu rí mbiʼi xúgi̱,
16 ángel bi̱ niʼni kríñúu’ náa xúgíʼ dí ra̱májánʼ nigíʼnuʼ, ikhaa má gáʼni tsajkurámiinʼ jiámá bugi̱.
Ga̱jma̱a̱ ikhiin gúya̱ mbiʼyuʼ ga̱jma̱a̱ mbiʼyuu anu̱ʼ Isaac ga̱jma̱a̱ xiʼñúnʼ Abrahán,ma̱ngaa gaʼga̱nú mani̱ndxu̱ún mbaʼin wéñuuʼ náa tsu̱du̱u̱ ku̱ba̱ʼ”.
17 Mú José tánigu̱u̱ʼ índo̱ ndiʼyoo rí ñawún mújúunʼ anu̱u̱* grígu má xúʼko̱ náa edxu̱u̱ Efraín. Ikha jngóo niʼniminaʼ dí marígúu ñawúunʼ anu̱u̱ náa edxu̱u̱ Efraín mu matámáʼ náa edxu̱u̱ Manasés.
18 José niʼthúunʼ anu̱u̱: “Raʼkháa xúʼko̱ anu̱ʼ, bigi̱ nindxu̱u̱ a̱ʼdá giʼnii atámáʼ ñawún mijiáanʼ náa edxu̱u̱ ikhaa”.
19 Mú tándoo gáʼni, ikha jngóo niʼthúu̱n: “Nda̱yo̱o̱ má a̱ʼdióʼ, nda̱yo̱o̱ má. Ikhaa ma̱ngaa maʼga̱nú mani̱ndxu̱u̱ mbá xuajin mba̱a̱ ga̱jma̱a̱ magiʼdoo numuu. Mú giʼtio̱o̱ magiʼdoo itháán numuu ga̱jma̱a̱ e̱ji̱i̱n maʼni mbaʼin wéñuuʼ rí asndu maʼga̱nú mani̱ndxu̱u̱ mbá xuajin mba̱a̱”.
20 Mbiʼi má rúʼko̱ niʼni tsajkurámiinʼ xóó, niʼthí:
“Gaʼni rí e̱ji̱i̱n Israel muthi mbiʼyaaʼ índo̱ gúni tsajkurámiinʼ eʼwíinʼ, gúthi:‹Dios gaʼni ga̱jma̱á nindxa̱a̱ʼ xóo má Efraín ga̱jma̱a̱ Manasés›”.
Ikhaa niríyaʼ mbiʼyuu Efraín, niʼni tsajkurámaaʼ má xúʼko̱ ginii Efraín ki xóo Manasés.
21 Nda̱wa̱á Israel niʼthúu̱n José: “Atayáá, ikhúún xtáá má makhañúʼ mú Dios, gajkhun rí maxtáa má xúʼko̱ ga̱jma̱á nindxa̱la ga̱jma̱a̱ matanga̱a̱ kaguáanʼla náa ku̱ba̱ʼ ndrígu̱ún wajin xiʼñála.
22 Ikháán maxna̱a̱ʼ itháán mba̱a̱ ku̱ba̱ʼ ki xóo a̱ngia̱a̱nʼ, mbá ku̱ba̱ʼ dí nirígú káñúúnʼ xa̱bu̱ amorreos ga̱jma̱a̱ espada ndrígóʼ ma̱ngaa ga̱jma̱a̱ xkamídá ndrígóʼ”.
Mbaʼa nota
^ O “tátiaaʼ”.
^ O “atani̱ mbá rí májánʼ”.
^ O “táteʼ”.
^ Náa ajngáa hebreo naʼthí, “bi̱ nijngruigu̱u̱n inuu”.
^ O “tátée”.
