Génesis 49:1-33
49 Jacob nindxaʼwún e̱ji̱i̱n ga̱jma̱a̱ niʼthúún: “Gagimbáanʼla mu matala ndiéjunʼ dí gugíʼníí índo̱ gáʼni iwáá mbiʼi.
2 Gagimbáanʼla mu mudxawun’ e̱ji̱i̱n Jacob. Gudxawíín rí maʼthí ana̱la* Israel.
3 Rubén, ikháán nindxa̱a̱ʼ a̱ʼdá giʼniuʼ, tsiaki̱i̱ ndrígóʼ, timbáa a̱ʼdióʼ bi̱ nigúʼdaa. Ikháán niraʼdáá itháan gamajkuaʼ nákha ginii ga̱jma̱a̱ niraʼdáá itháan tsiaki̱i̱.
4 Mú ní xáraʼdáá itháán numaaʼ, numuu rí ninindxa̱a̱ʼ xóo xkujyuuʼ iyaʼ rí naʼbajxu̱u̱, nitatsimaaʼ náa xie̱wuu ana̱a̱ʼ. Mbiʼi rúʼko̱ nitani̱ tsagáá* xie̱wuʼ. ¡Gajkhun rí xúʼko̱ niʼni!
5 Simeón ga̱jma̱a̱ Leví nindxu̱ún kaníkiin. Espada ndrígu̱ún i̱ndó najmún mu muradíin xa̱bu̱.
6 Tsíyóʼ dí mambajxú’ gajmíʼ, a̱jkiu̱nʼ* xátaʼyáʼ dí matruwamínáʼ gajmiáanʼ. Numuu rí índo̱ nikásngañu̱únʼ niradíin xa̱bu̱ ga̱jma̱a̱ nixmigi̱i̱nʼ xedi̱ numuu dí ikhiin ninigu̱u̱nʼ.
7 Gajuiʼtátsriguii rí nakásngañu̱únʼ, numuu rí mbiʼi dí nikásngañu̱únʼ nini̱ dí ra̱májánʼ. Ikhúún maxidiríʼiin náa mbayuuʼ Jacob. Maxnu̱u̱n magún asndu náá gákúwá, náa mbayuuʼ Israel.
8 Ikháán Judá, a̱ngia̱a̱nʼ mbuyamajkuaaʼ. Maʼnga̱a̱ʼ matani̱ gajmiáanʼ xa̱bu̱ sia̱nʼ ndrígáaʼ.* E̱ji̱i̱n ana̱a̱ʼ* musmbati̱gu̱u̱n náa inaaʼ.
9 Judá nindxu̱u̱ mbáa a̱ʼdá león. Ikháán a̱ʼdióʼ, matatsimaaʼ asndu náa nitatsíñáánʼ xujkhúʼ bi̱ nitrugua̱a̱. Ikhaa nigiʼnduti̱ga̱* ga̱jma̱a̱ naxúmaa itsu̱u̱ xóo mbáa león. Tsáa lá tsémiñuu dí maxka̱jui̱i̱ mbáa león rá.
10 Ixi̱ rí najmuu rey mu maʼtáñajunʼ marigá má xúʼko̱ náa Judá, ixi̱ ñajunʼ mawiji̱ má xúʼko̱ náa inuu rajkúu* asndu índo̱ gáʼkha̱ Siló,* ikhaa kaʼyoo dí xa̱bu̱ xuajin munimbu̱ún kuyáá.
11 Ikhaa marájmaa búrriu̱u̱ náa mbá ixi̱ uva ga̱jma̱a̱ a̱ʼdá búrriu̱u̱ marájmaa náa mbá ixi̱ uva rí itháán májánʼ. Xtíñuu maʼjñáa ga̱jma̱a̱ vino ga̱jma̱a̱ xtíñuu rí nagúwúunʼ mbájníí maʼjñáa ga̱jma̱a̱ iyooʼ uva.*
12 Iduu maña̱ʼ xngeʼdi numuu dí naʼga̱a̱n vino ga̱jma̱a̱ iñuuʼ miʼxídiʼ numuu rí naʼga̱a̱n yáʼdú.
13 Zabulón maxtáa náa rawunʼ lamáa* mijngii náa naguájun barcos. Ndawaa ndrígóo maʼga̱nú marigá mijngii náa Sidón.
14 Isacar nindxu̱u̱ xóo mbáa búrru bi̱ mixkujiʼ, bi̱ kri̱ga̱a̱ kagu̱ a̱jma̱ eʼda.
15 Náa mbaaʼ rí mbayáa jxu̱u̱ʼ mbaʼyoo dí nindxu̱u̱ májánʼ ga̱jma̱a̱ rí ku̱ba̱ʼ nindxu̱u̱ mitsaanʼ.* Maginduti̱ga̱ mu maʼga̱ kagu̱u̱ eʼda ma̱ngaa maniñaminaʼ dí mañajunʼ gakhi̱i̱.
16 Dan, nindxu̱u̱ mbá xuajin chíʼgíiʼ* ndrígóo Israel, bi̱ mandi̱ʼi̱i̱n cuenta xa̱bu̱ xuajñuu.*
17 Dan mani̱ndxu̱u̱ mbáa a̱bu̱nʼ bi̱ kri̱ga̱a̱ náa kamba̱a̱, mbáa a̱bu̱nʼ bi̱ gíʼdoo chi̱jyu̱u̱ʼ bi̱ kri̱ga̱a̱ náa kamba̱a̱ smídú,* mi̱khu̱ rajkhúún wáyú mu maʼni rí magandríguíin bi̱ kudrúwíin.
18 Jeobá, magúʼthu̱u̱n rí ikháán matani̱ káwáanʼxu.
19 Gad muni̱ gínáa wéñuuʼ kuʼwáʼ, mú ikhaa xaniñaminaʼ, maʼga raxkhúún.
20 Aser magiʼdoo wéñuuʼ ganitsu ga̱jma̱a̱ ikhaa maxná ganitsu xóo rí na̱ʼkhu̱ rey.
21 Neftalí nindxu̱u̱ mbáa aña̱ʼ e̱ʼgú bi̱ tsiʼyáa ga̱jma̱a̱ naʼthí ajngáa rí mitsaanʼ.
22 José nindxu̱u̱ rudiuuʼ mbá ixi̱ rí naxná xndúu, mbá ixi̱ rí naxná xndúu rí wíji̱ náa rawuunʼ iduu iyaʼ, naxkrámáʼ ñawúunʼ náa tsu̱du̱u̱ xtájtsí.
23 Mú bi̱ najmún xkamídá nini̱ gínáa, nixnáá ga̱jma̱a̱ xkamídá ma̱ngaa niwi̱ñu̱u̱nʼ kuyáá má xúʼko̱.
24 Maski má xúʼko̱, xkamídá ndrígóo niwi̱ji̱ jxa̱ʼ ga̱jma̱a̱ ñawúunʼ niʼni xkujyuʼ ma̱ngaa niʼni wiphi. Nirígá rígi̱ numuu rí nimbáyúu bi̱ gíʼdoo tsiaki̱i̱ bi̱ nixtáa ga̱jma̱a̱ Jacob, núma̱aʼ má baxtúu bugi̱ bi̱ ni̱ndxu̱u̱ itsí ndrígóo Israel.
25 Ikhaa* na̱ʼkha̱ náa Dios ndrígóo ana̱a̱ʼ, Dios má gámbáyáaʼ. Ikhaa xtáa ga̱jma̱a̱ bi̱ gíʼdoo xúgíʼ tsiaki̱i̱, Dios gáʼni tsajkurámáánʼ ga̱jma̱a̱ ruʼwa rí nagajtaa rijma̱a̱, maʼni tsajkurámáánʼ ga̱jma̱a̱ iyaʼ dí rígá náa agoo ku̱ba̱ʼ, maʼni rí maraʼdiin mbaʼin e̱jña̱a̱ʼ ga̱jma̱a̱ matruiʼti̱i̱n mbaʼin xujkhúʼ.
26 Dí niʼni tsajkurámáanʼ ana̱a̱ʼ mani̱ndxu̱u̱ itháán ki xóo dí rígá náa kúbá rí mbajyúuʼ asndu kámuu, mani̱ndxu̱u̱ itháan ki xóo xúgíʼ dí gíʼdoo numuu dí rígá náa bíjní rí mbajyúuʼ asndu kámuu. Marigá má xúʼko̱ náa edxu̱u̱ José, náa nuʼwu̱u̱n bi̱ nixtiyáaʼ náa majñu̱únʼ a̱ngui̱i̱n.
27 Benjamín maʼga raʼkungayii xujkhúʼ bi̱ niguguaa, xóo eʼni mbáa lobo.* Rí miʼcha̱ mi̱ku̱u̱ xujkhúʼ bi̱ niguguaa ga̱jma̱a̱ rí wakíʼ makuíʼtáa xuyuuʼ xujkhúʼ bi̱ niguguaa”.
28 Xúgíinʼ bugi̱ ninindxu̱ún mbá 12 xuajin majkhaʼ ndrígóo Israel ga̱jma̱a̱ rígi̱ nindxu̱u̱ rí niʼthún anu̱ún índo̱ niʼni tsajkurámíinʼ. Mámbáa niguma tsajkurámáanʼ xó má kaʼyoo.
29 Nda̱wa̱á niʼtáñajúúnʼ e̱ji̱i̱n muni̱ rígi̱: “Maʼgáaʼ gáyáa jxu̱ʼ gajmíʼ xa̱bu̱ xuajñunʼ.* Gudiu̱únla náa nijuiʼdi̱ín wajin xiʼñúnʼ náa tsíñu dí rígá náa mbayuuʼ Efrón xa̱bu̱ hitita.
30 Tsíñu rígi̱ rígá náa mbayuuʼ Macpelá, inuu Mamré, náa ku̱ba̱ʼ ndrígóo Canaán. Ku̱ba̱ʼ rí niʼtsi Abrahán náa Efrón xa̱bu̱ hitita mu xúʼko̱ magiʼdoo náa maʼdi̱ín wajñuuʼ.
31 Ikhí nijuiʼdi̱i̱ Abrahán ga̱jma̱a̱ Sara bi̱ nindxu̱u̱ a̱ʼgiu̱u̱. Ikhí nijuiʼdi̱i̱ Isaac ga̱jma̱a̱ Rebeca bi̱ nindxu̱u̱ a̱ʼgiu̱u̱. Ga̱jma̱a̱ ikhí nidi̱i̱ Lea.
32 Mbaaʼ ga̱jma̱a̱ tsíñu rúʼko̱ nijui̱ʼtsi̱ náa e̱ji̱i̱n Het”.
33 Xúʼko̱ Jacob niguámbóo niʼtañajúnʼ e̱ji̱i̱n muni̱ rígi̱. Nda̱wa̱á nikudáanʼ rajkhúu náa xiyoo, nigatíyáaʼ jxu̱u̱ʼ ga̱jma̱a̱ ni̱jkha̱a̱ gáyáa jxu̱u̱ʼ gajmíi̱n xa̱bu̱ xuajñuu.
Mbaʼa nota
^ O “tátiala’”.
^ O “nitríya̱ʼ majkhuíí”.
^ Náa ajngáa hebreo naʼthí, “gamajkhu ndrígóʼ”.
^ Náa ajngáa hebreo naʼthí, “matámáʼ ñawáanʼ náa xpajpún xa̱bu̱ sia̱nʼ ndrígáaʼ”.
^ O “tátiáaʼ”.
^ O “nixngutigamínáʼ”.
^ Náa ajngáa hebreo naʼthí, “ixi̱ ñajunʼ marigá má xúʼko̱ náa majñu̱u̱ʼ rajkúu”.
^ Rí nandoo gáʼthúu̱n ‹bi̱ nindxu̱u̱› o ‹bi̱ kaʼyoo›.
^ Náa ajngáa hebreo naʼthí, “eʼdiuu uva”.
^ O “mar”.
^ O “nagui̱i̱”.
^ O “tribu”.
^ O “maʼtáñájúúnʼ xa̱bu̱ xuajñuu”.
^ O “chíma̱ja̱nʼ”.
^ Xóo muʼthá, José.
^ Xujkhúʼ bugi̱ ni̱ndxu̱u̱ xóo iña̱ʼ mú itháan mba̱a̱.
^ Ajngáa mitsaanʼ rígi̱ najmún índo̱ mbáa nakáñuu.
