Génesis 50:1-26
50 Ikhú José nigi̱ʼndutiga̱* ga̱jma̱a̱ ndiyaráʼaa anu̱u̱,* nimbiyaʼ ga̱jma̱a̱ nixnúu beso.
2 Nda̱wa̱á José nikuʼmiin xa̱bi̱i̱ bi̱ nindxu̱ún médicos, rí muni̱ rata̱a̱ xuyuuʼ anu̱u̱. Ikhú médicos nini̱ rata̱a̱ xuyuuʼ Israel.
3 Ndijñúúnʼ mbá 40 mbiʼi muni rígi̱, numuu dí xúʼko̱ mba̱yu̱u̱ʼ ndajñúnʼ mu muni̱ ratáá xuyuuʼ mbáa bi̱ nikháñúu. Egipcios ma̱ngaa nimbi̱ya̱ʼ ga̱jma̱a̱ numuu mbá 70 mbiʼi.
4 Índo̱ niguámbá mbiʼi dí nikúwá ngíná, José niʼtámíjná gajmíi̱n xa̱bu̱ ñajunʼ bi̱ kúwá náa goʼwóo faraón, niʼthúún: “Á mu naʼni a̱jkia̱la kuyo̱ʼ, gu̱ta̱nla faraón rígi̱:
5 ‹Anu̱ʼ niʼthúnʼ mbá dí manimbánuu, ikhaa niʼthí: “Ikhúún xtáá má makhañúʼ, ayu̱u̱ʼ gátadiún náa iñáʼ dí ni̱ndii náa Canaán”. Mbá péñu,* atatsiñuʼ maʼgá gádi̱i̱ anu̱ʼ nda̱wa̱á maʼkháa má›”.
6 Ikhú faraón niriʼñuu: “Ayu̱u̱ʼ gátadi̱i̱ ana̱a̱ʼ xó má niʼtháanʼ matani̱”.
7 Ikhú José nijkha̱a̱ gáʼdi̱i̱ anu̱u̱. Nigún gajmiún xa̱bi̱i̱ faraón ma̱ngaa xa̱bu̱ bi̱ kuya̱ edxu̱u̱ náa guʼwá ñajunʼ ga̱jma̱a̱ xúgíinʼ bi̱ kuya̱ edxu̱u̱ náa Egipto,
8 xúʼko̱ má xúgíinʼ bi̱ kúwá náa goʼwóo José, a̱ngui̱i̱n ga̱jma̱a̱ bi̱ kúwá náa goʼwóo anu̱u̱. I̱ndó e̱jñu̱ún ga̱jma̱a̱ xujkiún niguanún náa ku̱ba̱ʼ ndrígóo Gosén.
9 Ma̱ngaa ni̱jkha̱ carro ga̱jma̱a̱ nigún xa̱bu̱ bi̱ kurúwíin wáyú. Ra̱ʼkhá tháán mbaʼin xa̱bu̱ nigún.
10 Ikhú niguánú náa xkua̱ rí najmaʼnuuʼ xóo Atad, dí rígá náa mbayuuʼ Jordán. Ikhí nigáwíinʼ wéñuuʼ a̱jkiu̱ún ga̱jma̱a̱ ra̱ʼkhá tháán nikúwá ngíná, José nixtáa má xúʼko̱ ngíná ga̱jma̱a̱ numuu anu̱u̱ mbá juwan mbiʼi.
11 Índo̱ cananeos bi̱ kúwá náa mbaaʼ rúʼko̱ ndiyáá dí kúwá ngíná náa xkua̱ rí najmaʼnuuʼ xóo Atad, nithi: “¡Ra̱ʼkhá tháán ngíná kúwá xa̱bu̱ egipcios!”. Ikhaa rúʼko̱ numuu, dí mbaaʼ rúʼko̱ dí rígá náa Jordán, nigumbiʼyuu Abel-Mizraim.*
12 E̱ji̱i̱n Jacob nini ikhaa má kayuuʼ xó má ikhaa nindu̱ʼu̱u̱n muni̱.
13 Ikha jngóo e̱ji̱i̱n nigúun ku̱ya̱a̱ náa ku̱ba̱ʼ ndrígóo Canaán ga̱jma̱a̱ nidi̱i̱ náa tsíñu dí rígá náa mbayuuʼ Macpelá, mbaaʼ dí gíʼ náa inuu Mamré rí Abrahán niʼtsi náa Efrón xa̱bu̱ hitita mu xúʼko̱ magiʼdoo mbá náa ma̱ʼdi̱ín wajñuuʼ.
14 Nda̱wa̱á rí niʼdi̱i̱ anu̱u̱, José nitanga̱a̱ náa Egipto gajmíi̱n a̱ngui̱i̱n ma̱ngaa xúgíinʼ bi̱ nigún gajmiún náa niʼdi̱i̱ anu̱u̱.
15 Nda̱wa̱á dí nikháñuu anu̱ún, a̱ngui̱i̱n José nigíʼdi̱i̱ nitamijná: “Mbáa José kaʼníí nayejxi̱i̱ sia̱nʼ kaʼyulú ga̱jma̱a̱ numuu xúgíʼ dí ra̱májánʼ niʼni̱i̱lú”.
16 Ikhú nixuʼma ajngáa rígi̱ náa inuu José: “Ana̱a̱ʼ* nikuʼma maguma rígi̱ nákhá xóó tsékháñuu:
17 ‹Rígi̱ dí gíʼmáanʼ mutha̱a̱n José: “Mbá péñu, natakáñáaʼ dí matani̱ mba̱a̱ a̱jkia̱a̱nʼ xtañún a̱ngia̱a̱nʼ ga̱jma̱a̱ numuu dí raʼkhí ninia̱a̱ʼ”›. Ikha jngóo mbá péñu, atani̱ mba̱a̱ a̱jkia̱a̱nʼ xtañún xa̱bi̱i̱ Dios ndrígóo ana̱a̱ʼ”. Índo̱ nitháán rígi̱ José nigíʼdu̱u̱ nimbiyaʼ.
18 Ikhú a̱ngui̱i̱n ma̱ngaa nigún, nisbati̱gu̱u̱n ga̱jma̱a̱ nixurigú edxu̱ún, ikhú nitháán: “¡Gi̱i̱ kuwáanʼxu̱, nindxu̱xu̱ ñumbáá ndrígáaʼ!”.
19 José niʼthúún: “Xámiñalaʼ. Lá ikhúún nindxu̱ʼ Dios mu ma̱ta̱ dí mugíʼníínla ráʼ.
20 Maski má ikháanʼ nindala mu̱niu̱nʼ mbá dí ra̱májánʼ, mú Dios nijmuu rúʼko̱ mu maʼni mbá dí májánʼ ga̱jma̱a̱ maʼni káwíin mbaʼin xa̱bu̱. Ikhaa rúʼko̱ dí xtáa raʼni xúgi̱.
21 Ikha jngóo xamíñala. Ikhúún maxnala má xúʼko̱ ganitsu mu muphula ikháanʼ gajmiála e̱jña̱la”. Xúʼko̱ niʼni̱i̱ a̱jkiu̱ún ga̱jma̱a̱ rí niʼthúún.
22 Xó má José gajmíi̱n xúgíinʼ bi̱ kúwá náa goʼwóo anu̱u̱ nikúwá má xúʼko̱ náa Egipto. Náa mbá xúgíʼ tsiguʼ rí nixtáa José ninindxu̱u̱ mbá 110 tsiguʼ.
23 José niʼngo̱o̱ ndiʼñún e̱jín xíñiiʼ Efraín, xúʼko̱ má e̱ji̱i̱n Makir, a̱ʼdióo Manasés. José niñewu̱u̱n e̱ji̱n bugi̱ xóo e̱ji̱i̱n.*
24 Nda̱wa̱á kayuuʼ, José niʼthúún a̱ngui̱i̱n: “Ikhúún inu má makhañúʼ, mú Dios maxtáa má xúʼko̱ rambáyala. Ikhaa gajkhun dí maguwáanʼla náa ku̱ba̱ʼ rígi̱ ga̱jma̱a̱ maʼga̱a̱ kaguáanʼ náa ku̱ba̱ʼ dí niʼthúu̱n maxnúu Abrahán, Isaac ga̱jma̱a̱ Jacob”.
25 Ikhú José niʼni dí e̱ji̱i̱n Israel muxna ajngún índo̱ niʼthúún: “Gajkhun rí Dios má gáxtáa rambáyala. Índo̱ gagajnáanʼla náa ku̱ba̱ʼ rígi̱, gáʼguáaʼlá ku̱da̱ itsuʼ”.
26 José nikháñuu índo̱ nigiʼdoo 110 tsiguuʼ. Ikhú nini rata̱a̱ xuyuuʼ ga̱jma̱a̱ nira̱jkua̱a̱ náa mbá e̱jna̱ náa Egipto.
Mbaʼa nota
^ O “nixngutigamínáʼ”.
^ O “tátée”.
^ O “ataniu̱ʼ mbá rí májánʼ”.
^ Rí nandoo gáʼthúu̱n ‹egipcios kúwá ngíná›.
^ O “tátiáaʼ”.
^ Náa ajngáa hebreo naʼthí, “nigumiin náa ragomiu̱u̱n José”.
