Génesis 7:1-24
7 Nda̱wa̱á dí nirígá rígi̱, Jeobá niʼthúu̱n Noé: “Ata̱ʼa̱a̱ʼ náa arca,* ikháán gajmiáanʼ bi̱ kúwá náa guʼwáaʼ, numuu rí ndi̱yo̱o̱ dí ikháán nindxa̱a̱ʼ mbáa xa̱bu̱ májáanʼ náa majñu̱únʼ xúgíinʼ xa̱bu̱ bi̱ kúwá.
2 Mámbíin xujkhúʼ bi̱ kaʼwiin mata̱ʼa̱a̱ʼ xtiin mbá juwiin,* xujkhú i̱ya̱ ga̱jma̱a̱ xujkhú e̱ʼgú. Mú xujkhúʼ bi̱ tsagiin i̱ndó mata̱ʼa̱a̱ʼ xtiin a̱jmi̱i̱n, mbáa xujkhú i̱ya̱ ga̱jma̱a̱ mbáa xujkhú e̱ʼgú.
3 Xúʼko̱ má xujkhúʼ bi̱ nagún rijma̱a̱ ma̱ngaa, mataxuʼdíinʼ mbá juwiin, xujkhú i̱ya̱ ga̱jma̱a̱ xujkhú e̱ʼgú, xúʼko̱ ma̱ndoo makáwíin ga̱jma̱a̱ muguaʼdiin e̱jñu̱ún náa tsu̱du̱u̱ ku̱ba̱ʼ.
4 Numuu rí índo̱ gáʼni juwan mbiʼi, ma̱ni̱ rí maxnúu ruʼwa náa tsu̱du̱u̱ ku̱ba̱ʼ mbá 40 mbiʼi ga̱jma̱a̱ mbá 40 mbruʼun, ma̱ni̱ gámbíin xúgíinʼ bi̱ nduya bi̱ ni̱ni̱i̱ náa tsu̱du̱u̱ ku̱ba̱ʼ”.
5 Noé niʼni xúgíʼ dí Jeobá niʼtáñajuunʼ maʼni.
6 Noé nigíʼdoo 600 tsiguuʼ índo̱ nixnúu ruʼwambiʼ ga̱jma̱a̱ nijnííʼ iyaʼ náa tsu̱du̱u̱ ku̱ba̱ʼ.
7 Nákhá xóó tséxnúu ruʼwambiʼ, Noé nito̱ʼo̱o̱ náa arca ga̱jma̱a̱ a̱ʼgiu̱u̱ gajmíi̱n e̱ji̱i̱n mangiin gu̱jkui̱i̱nʼ.
8 Xujkhúʼ bi̱ kaʼwiin, xujkhúʼ bi̱ mitsagiin, xujkhúʼ bi̱ nagún rijma̱a̱ ga̱jma̱a̱ xúgíinʼ bi̱ nduya náa tsu̱du̱u̱ ku̱ba̱ʼ,
9 nigún náa xtáa Noé ga̱jma̱a̱ majmi̱i̱n nitu̱ʼu̱u̱n náa arca, xujkhú i̱ya̱ ga̱jma̱a̱ xujkhú e̱ʼgú nitu̱ʼu̱u̱n, xó má Dios niʼtáñajunʼ maʼni Noé.
10 Juwan mbiʼi nda̱wa̱á nigíʼdu̱u̱ nixnúu ruʼwambiʼ náa tsu̱du̱u̱ ku̱ba̱ʼ.
11 Índo̱ Noé nigiʼdoo 600 tsiguuʼ, mbiʼi 17 rí maʼni a̱jma̱ igu̱nʼ,* mbiʼi rúʼko̱ nimbaʼtari̱ya̱ʼ iyaʼ mbaji̱nʼ dí rígá rijma̱a̱ ga̱jma̱a̱ nimbaʼtoo xkrugoo mekhu.
12 Nixnúu gakhi̱i̱ wéñuuʼ ruʼwa mbá 40 mbiʼi ga̱jma̱a̱ mbá 40 mbruʼun.
13 Mbiʼi má rúʼko̱, Noé nito̱ʼo̱o̱ náa arca gajmíi̱n e̱ji̱i̱n, Sem, Cam ga̱jma̱a̱ Jafet, ma̱ngaa a̱ʼgiu̱u̱ gajmíi̱n gu̱jkui̱i̱nʼ.
14 Nitu̱ʼu̱u̱n gajmiún xúgíinʼ xujkhú xáná xó má nindxu̱ún mámbíin, xúgíinʼ xujkhúʼ kraʼdiin xó má nindxu̱ún mámbíin, xúgíinʼ xujkhúʼ bi̱ kúwá náa ku̱ba̱ʼ bi̱ nuxmajtamijná xó má nindxu̱ún mámbíin, xúgíinʼ xujkhúʼ bi̱ nagún rijma̱a̱ xó má nindxu̱ún mámbíin, xúgíinʼ xujkhú xnaʼ ga̱jma̱a̱ xúgíinʼ xujkhú bi̱ guáʼdáá xpíjpiúún.
15 Xúgíinʼ enii xujkhúʼ bi̱ nduya xi̱ʼ nigún náa Noé ga̱jma̱a̱ majmi̱i̱n nitu̱ʼu̱u̱n náa arca.
16 Náa xúgíinʼ enii xujkhúʼ, nito̱ʼo̱o̱ xujkhú i̱ya̱ ga̱jma̱a̱ xujkhú e̱ʼgú, xó má Dios niʼtáñajuunʼ Noé. Nda̱wa̱á, Jeobá nirúguáa xkrugua.
17 Nixnúu má xúʼko̱ ruʼwambiʼ mbá 40 mbiʼi. Iyaʼ ni̱jkha̱ rajnííʼ ga̱jma̱a̱ nigíʼdu̱u̱ nikujxi̱ arca ga̱jma̱a̱ ni̱jkha̱ kruámuuʼ kayóo náa inuu iyaʼ.
18 Iyaʼ ni̱jkha̱ rajnííʼ má xúʼko̱ náa tsu̱du̱u̱ ku̱ba̱ʼ. Mú arca inuu iyaʼ jngruámuuʼ.
19 Iyaʼ ra̱ʼkhá tháán nijnííʼ náa tsu̱du̱u̱ ku̱ba̱ʼ dí asndu nirámáaʼ* xúgíʼ kúbá dí itháan mitsídánʼ dí rígá.
20 Iyaʼ rí nijnííʼ náa tsu̱du̱u̱ ku̱ba̱ʼ ninújngo̱ó dí juwan metro* náa inuu kúbá.
21 Xúʼko̱ nikháñún xúgíinʼ bi̱ nduya* bi̱ kúwíin náa tsu̱du̱u̱ ku̱ba̱ʼ, xóo xujkhúʼ bi̱ nagún rijma̱a̱, xujkhúʼ kraʼdiin, xujkhú xáná, xujkhúʼ majkhiinʼ* bi̱ kúwá náa ku̱ba̱ʼ ga̱jma̱a̱ xúgíinʼ xa̱bu̱ numbaaʼ.
22 Niguámbáa xúgíʼ dí rígá náa tsu̱du̱u̱ ku̱ba̱ʼ ga̱jma̱a̱ bi̱ nduya xi̱ʼ náa rakhún.
23 Dios* niʼni gámbáa xúgíʼ rí ndaʼya dí rígá náa tsu̱du̱u̱ ku̱ba̱ʼ, asndu xa̱bu̱ numbaaʼ, xujkhú xáná, xujkhúʼ kraʼdiin, xujkhúʼ bi̱ nuxmajtamijná ga̱jma̱a̱ xujkhúʼ bi̱ nagún rijma̱a̱. Xúgíinʼ niguma gámbíin. I̱ndó nikríyáaʼ Noé gajmíi̱n bi̱ nitu̱ʼu̱u̱n náa arca.
24 Iyaʼ nijni̱ʼ má xúʼko̱ náa tsu̱du̱u̱ ku̱ba̱ʼ mbá 150 mbiʼi.
Mbaʼa nota
^ O “e̱jna̱”.
^ O mbáa “juwiin xujkhú i̱ya̱ ga̱jma̱a̱ juwiin xujkhú e̱ʼgú”.
^ Nda̱wa̱á rí bi̱ israelitas nigájnún náa Egipto Jeobá nixnún mbá calendario, raga̱jma̱ igu̱nʼ nijkanú niʼni̱i̱ juwan igu̱nʼ rí nijmaʼnuu xóo Bul. Atayáá glosario, bul.
^ O “niguguamá’a”.
^ Náa ajngáa hebreo naʼthí, “xúgíʼ xuwiʼ”.
^ Mbáa nandoo gáʼthí ga̱jma̱a̱ numún xujkhúʼ majkhiin bi̱ kúwá mba jnduʼ.
^ Náa ajngáa hebreo naʼthí, “Ikhaa”.
