Génesis 8:1-22
8 Mú Dios támbumuu* kaʼyoo Noé, ni má xujkhú xáná, ni má xujkhú kraʼdiin bi̱ xtáa gajmíi̱n náa arca.* Ikha jngóo Dios niʼni rí maxnúu giñánʼ náa tsu̱du̱u̱ ku̱ba̱ʼ ga̱jma̱a̱ xúʼko̱ niʼni dí iyaʼ maʼga rujndo̱o̱ʼ.
2 Niniñuuʼ ragajtaa xúgíʼ iyaʼ dí rígá rijma̱a̱ ga̱jma̱a̱ nigúguáa xkrugoo mekhu, ikhú niniñuuʼ raxnúu ruʼwa.
3 Mañu mañúú ni̱jkha̱ ragu̱u̱ʼ iyaʼ náa tsu̱du̱u̱ ku̱ba̱ʼ. Índo̱ nijngoo 150 mbiʼi mba̱ji̱nʼ má iyaʼ niga̱jtha̱a̱.
4 Mbiʼi 17 rí maʼni juwan igu̱nʼ,* arca nigri̱gu̱ náa inuu kúbá Ararat.
5 Iyaʼ ni̱jkha̱ raga̱jta̱a̱ má xúʼko̱ asndu índo̱ nirámúuʼ gu̱wa̱ʼ igu̱nʼ.* Timbá mbiʼi rí maʼni gu̱wa̱ʼ igu̱nʼ nigíʼdu̱u̱ nikujmaa inuu kúbá.
6 Índo̱ ninújngoo 40 mbiʼi, Noé nimbáʼtoo ventana dí niʼni náa arca
7 ga̱jma̱a̱ nikuʼmaa maʼga rexa̱a̱ mbá yu̱wa̱ʼ. Yu̱wa̱ʼ ni̱jkha̱ ga̱jma̱a̱ nitanga̱a̱ asndu índo̱ ku̱ba̱ʼ niʼni̱i̱ mijxooʼ.
8 Nda̱wa̱á Noé nikuʼmaa maʼga rexa̱a̱ mbáa paloma mu mbaʼyoo á mu iyaʼ ni̱jkha̱ ragu̱u̱ʼ náa tsu̱du̱u̱ ku̱ba̱ʼ.
9 Mú paloma na̱nguá nixkamaa náa magri̱gu, numuu rí iyaʼ kaʼníí ka̱jnu̱ʼ náa tsu̱du̱u̱ ku̱ba̱ʼ ikha jngóo nitanga̱a̱ náa arca. Ikhú Noé nikrui̱ya̱ʼ ñawúunʼ mu makuda̱a̱ʼ paloma náa awúunʼ arca.
10 Nigi̱ʼthu̱u̱n mbá juwan mbiʼi xóó, ikhú niríyáaʼ mbu̱júu̱ náa arca ga̱jma̱a̱ nikuʼmaa maʼga rexa̱a̱.
11 Índo̱ niʼni wakíʼ paloma nitanga̱a̱. ¡Noé ndiʼyoo dí náa xu̱ráwúunʼ kayá mbá inúu ixi̱ olivo dí xáwíí maxaʼ!. Xúʼko̱ ndiʼyoo dí iyaʼ nigu̱u̱ʼ má náa tsu̱du̱u̱ ku̱ba̱ʼ.
12 Nigi̱ʼthu̱u̱n xóó i̱mbá juwan mbiʼi, ikhú nikuʼmaa mbu̱júu̱ paloma maʼga rexa̱a̱, mú ikhú nánguá nitanga̱a̱.
13 Nákhá Noé nigiʼdoo 601 tsiguuʼ, mbiʼi timbá rí timbá igu̱nʼ,* iyaʼ ni̱jkha̱ ra̱ga̱jta̱a̱ má náa tsu̱du̱u̱ ku̱ba̱ʼ. Noé nimbáʼtoo mbá chíʼgíiʼ* dí kúgoo ga̱jma̱a̱ arca, ikhú ndiʼyoo dí iyaʼ na̱jkha̱ má rujndo̱o̱ʼ.
14 Mbiʼi 27 dí raga̱jma̱ igu̱nʼ,* ku̱ba̱ʼ niʼni̱i̱ mijxooʼ.
15 Ikhú Dios niʼthúu̱n Noé:
16 “Agajnáaʼ náa arca ga̱jma̱a̱ a̱ʼgia̱a̱ʼ gajmiáanʼ ejña̱a̱nʼ mangiin gu̱jkia̱a̱nʼ.
17 Atrawíin xúgíinʼ bi̱ nduya,* xujkhúʼ bi̱ nagún rijma̱a̱, xujkhú xáná, xujkhúʼ kraʼdiin ga̱jma̱a̱ xujkhúʼ bi̱ nuxmajtamijná. Mu xúʼko̱ ma̱ndoo mawiʼthúún ga̱jma̱a̱ maʼni mbaʼiin náa tsu̱du̱u̱ ku̱ba̱ʼ”.
18 Ikhú Noé nigájna̱a̱ náa arca ga̱jma̱a̱ a̱ʼgiu̱u̱ gajmíi̱n e̱ji̱i̱n mangiin gu̱jkui̱i̱nʼ.
19 Ma̱ngaa xúgíinʼ bi̱ nduya, xúgíinʼ xujkhúʼ bi̱ nuxmajtamijná ga̱jma̱a̱ xúgíinʼ xujkhúʼ bi̱ nagún rijma̱a̱, xúgíinʼ xujkhúʼ bi̱ numbañimijna̱* náa tsu̱du̱u̱ ku̱ba̱ʼ, nigájnaán mámbá nguéjmi̱i̱n* náa tsu̱du̱u̱ ku̱ba̱ʼ.
20 Nda̱wa̱á, Noé niʼni mújúunʼ náa matsikárámáʼ tsigijñaʼ gamajkhu náa inuu Jeobá, ikhí nixnajxi̱i̱n tikhuun xujkhúʼ bi̱ mikaʼwiin, xúʼko̱ má xujkhúʼ bi̱ nagún rijma̱a̱ bi̱ nindxu̱ún mikaʼwiin, nixnajxi̱i̱n xóo tsigijñaʼ dí nakarámáʼ.
21 Ra̱ʼkhá tháán mitsaanʼ* ndataun* niyeyuuʼ Jeobá rígi̱. Ikha jngóo Jeobá niʼthúu̱n a̱jkiu̱u̱n: “Nímba miʼtsu xáta tsríguíi ku̱ba̱ʼ ga̱jma̱a̱ numún xa̱bu̱, numuu dí náa awúu̱n a̱jkiu̱ún gíwánʼ muni̱ dí raʼkhí asndu nákhá majkhiinʼ. Nímba míʼtsú xátangu̱ún ma̱ni̱ gámbíin xúgíinʼ bi̱ nduya xúgi̱ kaʼnii.
22 Asndu mbiʼi rígi̱ ga̱jma̱a̱ mbiʼi rí ma̱ʼkha̱ nda̱wa̱á, náa ku̱ba̱ʼ ma̱jma̱a̱ rí majuiʼdu, maʼni migúwán, maʼni mijkha, maʼni ruʼphu, maʼga̱nú gu̱nʼ dí maʼni migúwán,* maʼni mbiʼi ga̱jma̱a̱ mbruʼun”.
Mbaʼa nota
^ Náa ajngáa hebreo naʼthí, “Dios nirmáʼáan a̱jkiu̱u̱n”.
^ O “e̱jna̱”.
^ O “lajuíin”.
^ Náa ajngáa hebreo naʼthí, “xúgíinʼ bi̱ nduya bi̱ guáʼdáá xuñúnʼ”.
^ O “nagamidun”.
^ Náa ajngáa hebreo naʼthí, “mámbá gúʼwíin”.
^ O “nagui̱i̱”.
^ Náa ajngáa hebreo naʼthí, “niʼni̱i̱ a̱jkiu̱u̱n”.
^ O “gu̱nʼ rí nagajtaa idiʼ”.
