Génesis 9:1-29
9 Dios niʼni tsajkurámaaʼ Noé gajmíi̱n e̱ji̱i̱n ga̱jma̱a̱ niʼthún: “Gaguaʼdiin mbaʼiin e̱jñala, gaʼni mbaʼáanʼ ga̱jma̱a̱ gakuwáanʼla náa xúgíʼ tsu̱du̱u̱ ku̱ba̱ʼ.
2 Xúgíinʼ bi̱ nduya bi̱ kúwá náa ku̱ba̱ʼ, xujkhúʼ bi̱ nagún rijma̱a̱, xúgíinʼ bi̱ numbañimijna̱* náa ku̱ba̱ʼ ga̱jma̱a̱ e̱gi̱ʼ bi̱ kúwá náa lamáa* mamiñún kuyala. Rí xúgi̱, xujkhúʼ bugi̱ maguanún náa ñawánlá.
3 Ma̱ndoo mu̱phíí asndu tsáá xujkhúʼ bi̱ ndaʼya bi̱ nambañimínáʼ. Xó má nixna̱la̱ yaʼwu mu̱phu̱, xúʼko̱ má exniala xujkhúʼ mu̱phún ma̱ngaa.
4 Mú i̱ndó rí xándoo mu̱phu̱la, xuwiʼ rí gíʼdoo eʼdi. Numuu rí eʼdi nindxu̱u̱ vida.*
5 Mú raʼkháa i̱ndó rúʼko̱, manda̱ʼa̱a̱ cuenta asndu tsáá bi̱ gáxídíí eʼdiala. Asndu tsáá xujkhúʼ bi̱ gágudiáanʼla manda̱ʼa̱a̱ cuenta, xúʼko̱ má xa̱bu̱ bi̱ gáxíyáa ndxájuu manda̱ʼa̱a̱ cuenta ga̱jma̱a̱ numuu ndxájuu.
6 Á mu mbáa xa̱bu̱ gáxíyáa ndxájuu,* imba̱a̱ xa̱bu̱ maxíyáa xa̱bu̱ buʼko̱, numuu rí Dios niʼnii xa̱bu̱ xó má nindxu̱u̱ ikhaa.
7 Xó má ikháanʼla gaguaʼdiin e̱jñala, gaʼni mbaʼáanʼla, gakuwáanʼla náa xúgíʼ tsu̱du̱u̱ ku̱ba̱ʼ”.
8 Nda̱wa̱á, Dios niʼthúu̱n Noé gajmíi̱n e̱ji̱i̱n:
9 “Xúgi̱ nambánuʼ ga̱jma̱a̱ nindxa̱la ma̱ngaa náa e̱jña̱la,
10 xúʼko̱ má náa xúgíinʼ bi̱ nduya bi̱ nigájnaán ga̱jma̱a̱ níndxala náa arca,* xujkhú xnaʼ, xujkhú xaná, xujkhúʼ kraʼdiin, xujkhúʼ bi̱ nuxmajtamijná ga̱jma̱a̱ xúgíinʼ bi̱ nduya bi̱ kúwá náa tsu̱du̱u̱ ku̱ba̱ʼ bi̱ kúwáanʼ gajmiála, xóo mu̱ʼthá, xúgíinʼ xujkhúʼ bi̱ nduya bi̱ kúwá náa tsu̱du̱u̱ ku̱ba̱ʼ.
11 Rígi̱ rí nambánuʼ ga̱jma̱a̱ nindxa̱la: Nimbá miʼtsú xáʼkhá ka̱yo̱ʼ mbá ruʼwambiʼ rí ma̱ni̱ gámbíin xúgíinʼ bi̱ nduya* ni má rí ma̱ni̱ gámbáa ku̱ba̱ʼ”.
12 Nda̱wa̱á Dios xóó niʼthí: “Rígi̱ nindxu̱u̱ tsinaʼ dí rígá rí nambánúʼ ga̱jma̱ánʼ nindxa̱la ikháanʼ, xúʼko̱ má náa xúgíinʼ xujkhúʼ bi̱ nduya bi̱ kúwáanʼ gajmiála ma̱ngaa, mu mbuyáá xúgíinʼ bi̱ makuwá nda̱wa̱á:
13 Náa du̱u̱n natsijii takua̱ya̱ʼ ndrígóʼ. Majmaa xóo tsinaʼ dí rígá mbá dí nambánuʼ ga̱jmu̱ʼ ku̱ba̱ʼ.
14 Mámbá dí ma̱ni̱ ma̱ʼkha̱a̱ du̱u̱n náa tsu̱du̱u̱ ku̱ba̱ʼ, takua̱ya̱ʼ makujmaa ikhí.
15 Ikhú marmáʼáan a̱jkiu̱ún rí nimbánulú náa ikháanʼ ga̱jma̱a̱ náa xúgíinʼ bi̱ nduya. Rí iyaʼ nimbá miʼtsú xátanga̱a̱ mani̱ndxu̱u̱ mbá ruʼwambiʼ mu maʼni gámbíin xúgíinʼ bi̱ nduya* bi̱ kúwá náa tsu̱du̱u̱ ku̱ba̱ʼ.
16 Índo̱ takua̱ya̱ʼ gákujmaa náa du̱u̱n, ikhúún* mba̱yo̱o̱ ga̱jma̱a̱ marmáʼáan a̱jkiu̱nʼ dí mbajyúuʼ asndu kámuu rí nimbánúʼ gajmíʼ xúgíinʼ bi̱ nduya bi̱ kúwá náa tsu̱du̱u̱ ku̱ba̱ʼ”.
17 Dios nitanga̱a̱ niʼthúu̱n Noé: “Rígi̱ nindxu̱u̱ tsinaʼ rí nambánuʼ gajmíʼ xúgíinʼ bi̱ nduya, bi̱ kúwá náa tsu̱du̱u̱ ku̱ba̱ʼ”.
18 Bugi̱ nindxu̱ún e̱ji̱i̱n Noé bi̱ nigájnaaʼ gajmíi̱nʼ náa arca, Sem, Cam ga̱jma̱a̱ Jafet. Nda̱wa̱á Cam ninindxu̱u̱ anu̱u̱* Canaán.
19 Ajtsíin bugi̱ nindxu̱ún e̱ji̱i̱n Noé, náa ikhiin niguwáʼ xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ.
20 Nda̱wa̱á Noé nigíʼdu̱u̱ niʼdu uva.
21 Índo̱ niʼga̱a̱n vino, nijnga̱a̱ ga̱jma̱a̱ niguwíi xtíñuu náa awúu̱n guʼwá xtíin rí xtáa.
22 Cam, anu̱u̱ Canaán, ndiʼyoo rí mbáraʼtsaaʼ anu̱u̱ ga̱jma̱a̱ ni̱jkha̱ gáʼthúún a̱jmi̱i̱n a̱ngui̱i̱n bi̱ gíi̱nʼ rexa̱a̱.
23 Ikhú Sem ga̱jma̱a̱ Jafet mbá nájmi̱i̱n nirajtuun mbá xtíin guajpha, nixtajma náa xpajphún ga̱jma̱a̱ nigún skidiʼ ikhú nixtra̱ma̱a̱ʼ anu̱ún, mú ikhiin niyejxi̱ i̱mba̱ níʼkhá ga̱jma̱a̱ xúʼko̱ túyáá dí tsaʼtsaaʼ anu̱ún.
24 Índo̱ Noé nigriʼguíi, ndijui̱i̱. Ikhú nidxawun rí niʼni a̱ʼdióo bi̱ chíʼgíiʼ,*
25 ikhú niʼthí:
“Gajuiʼtátsríguíi Canaán.
Ganindxu̱u̱ ñumbáá bi̱ xágiʼdoo nditháan numuu náa a̱ngui̱i̱n”.
26 Ga̱jma̱a̱ niʼthí xóó:
“Gaguma mba̱a̱ Jeobá Dios ndrígóo Sem.Canaán ganindxu̱u̱ ñumbáá ndrígóo.
27 Dios gaxnúu mba̱a̱ ku̱ba̱ʼ Jafetga̱jma̱a̱ Jafet gaxtáa náa guʼwá xtíin ndrígóo Sem.
Ma̱ngaa Canaán ganindxu̱u̱ ñumbáá ndrígóo”.
28 Noé xóó nixtáa i̱mbá 350 tsiguʼ nda̱wa̱á rí nixnúu ruʼwambiʼ.
29 Xúgíʼ tsiguʼ rí nixtáa Noé ninindxu̱u̱ mbá 950 tsiguʼ. Nda̱wa̱á nikháñúu.
Mbaʼa nota
^ O “nagamidun”.
^ O “mar”.
^ O “rí ndaʼya”.
^ O “asndu tsáa bi̱ gáxídíí eʼdi”.
^ O “e̱jna̱”.
^ Náa ajngáa hebreo naʼthí, “xúgíʼ xuwiʼ”.
^ Náa ajngáa hebreo naʼthí, “xúgíʼ xuwiʼ”.
^ Náa ajngáa hebreo naʼthí, “Dios”.
^ O “tátée”.
^ O “lajuíin”.
