Jeremías 10:1-25
10 Gudxawíín ajngóo Jeobá rí niʼthí ga̱jma̱a̱ numala, ikháanʼ bi̱ kuwáanʼ náa goʼwóo Israel.
2 Rígi̱ dí naʼthí Jeobá:
“Xúnila xó má nuni̱ xa̱bu̱ bi̱ kúwá náa i̱ʼwáʼ xuajin,xámiñalaʼ gáʼni tsinaʼ dí narígá mekhuííi̱ndó numuu rí ikhiin namíñúún eʼni.
3 Numuu rí minduwaʼ* nindxu̱u̱ dí naguʼwún nuni̱ xa̱bu̱.
I̱ndó nindxu̱u̱ mbá ixi̱ dí rígá xanáá dí nuru̱jthu,ga̱jma̱a̱ xa̱bu̱ bi̱ najmañuu, naʼthóo mu maʼnii mbáa xándú.
4 Nuxtajmaa plata ga̱jma̱a̱ oro,najmún martillo ga̱jma̱a̱ clavo mu mugiʼmaa jxa̱ʼ mu xáxpátríguíi.
5 Xándú buʼko̱ nindxu̱ún xó mbá xkambóó dí juáʼán náa mbaaʼ rí kiʼdu pepinos, tséjmiin gúthi.
Ndayóoʼ rí mudiin magún numuu rí tséjmiin gágún.
Xámíñáaʼ xtañún, numuu rí ikhiin xándoo munia̱a̱nʼ dí ra̱májánʼní má xándoo muni̱ mbá dí májánʼ”.
6 Ndawa̱a̱ i̱mba̱a̱ xóo ikháán, Tátá Jeobá.
Ikháán nindxa̱a̱ʼ mba̱a̱n ga̱jma̱a̱ mbiʼyaaʼ nindxu̱u̱ mba̱a̱ ga̱jma̱a̱ gíʼdoo tsiaki̱i̱.
7 Tsáá lá xáʼyóoʼ mamiñúu kaʼyaaʼ rá. Tátá Rey bi̱ naʼtáñajunʼ náa xúgíʼ xuajin, rúʼko̱ rí ndayóoʼ maguma.
Numuu rí náa xúgíinʼ xa̱bu̱ bi̱ najmañún bi̱ kúwá náa xúgíʼ xuajin,ndawa̱a̱ i̱mba̱a̱ xóo ikháán.
8 Xúgíinʼ nindxu̱ún skágui̱i̱nʼ ga̱jma̱a̱ tséndxa̱ʼwa̱a̱ májánʼ edxu̱ún.
Ikha rí na̱ʼkha̱ náa mbá ixi̱ nindxu̱u̱ minduwaʼ.*
9 Naguwáʼ kudúún lámina dí plata dí rígá náa Tarsis ga̱jma̱a̱ oro dí rígá náa Ufaz.
Nindxu̱u̱ ñajunʼ dí naʼni mbáa bi̱ najmañuu naʼni ñajunʼ mitsaanʼ,* mbáa bi̱ nañajuunʼ ajua̱nʼ.
Xtíñún niguma ga̱jma̱a̱ gúmá azul ma̱ngaa mugu̱ rí miʼñuu.
Xúgíinʼ ikhiin niʼniwíin mbáa bi̱ naʼni ñajunʼ mitsaanʼ.
10 Mú Jeobá nindxu̱u̱ Dios bi̱ gajkhun.
Ikhaa nindxu̱u̱ Dios bi̱ ndaʼya ga̱jma̱a̱ Rey bi̱ xtáa kámuu.
Rí nakásngañu̱u̱ʼ maʼni rí maʼba̱a̱n ku̱ba̱ʼ,Nimbá xuajin xáʼngo̱o̱ gáʼni dí nakásngañu̱u̱ʼ.
11 * Rígi̱ dí gíʼmaa mu̱thu̱u̱nla:
“Bi̱ nindxu̱ún dioses, bi̱ túni mekhu ni má ku̱ba̱ʼmaguma gámbíin náa ku̱ba̱ʼ náa agoo mekhu rígi̱”.
12 Ikhaa nindxu̱u̱ bi̱ niʼni ku̱ba̱ʼ, niʼni ga̱jma̱a̱ tsiaki̱i̱ ndrígóo,bi̱ nijmuu ku̱ma̱ ndrígóo mu magíʼ ku̱ba̱ʼ náa ma̱jma̱a̱ rí miʼduma̱ngaa niʼni mekhu ga̱jma̱a̱ ku̱ma̱ ndrígóo.
13 Índo̱ naniñuuʼ mawáán aʼwóo,iyaʼ dí rígá náa mekhu nandxaʼwá,ikhaa naʼni rí iyu̱u̱ iyaʼ matujxu̱u̱ asndu náa naguámbári̱go̱o̱ ku̱ba̱ʼ.
Naʼni dí maxpíbínʼ* índo̱ naxnúu ruʼwaga̱jma̱a̱ narmbáʼtariya̱ʼ giñánʼ náa rígá.
14 Xúgíinʼ nuni̱ xóo xa̱bu̱ skágunʼ ga̱jma̱a̱ xóo bi̱ raguáʼdáá ku̱ma̱.
Xúgíinʼ bi̱ nuñejuíínʼ ajua̱nʼ mati̱ñu̱u̱nʼ gáʼni xándú bi̱ niniwíin,nda̱a̱ xi̱ʼ náa xándú bi̱ niniwíin ga̱jma̱a̱ ajua̱nʼnumuu dí nindxu̱u̱ minduwaʼ.
15 Mbá rí nda̱a̱ dí ejmaa mbá kayuuʼ, mbá ñajunʼ katsíjma.
Índo̱ gáʼga̱nú mbiʼi rí mixtanda̱ʼa̱a̱ cuenta, maguma gámbíin.
16 Mú, bi̱ kaʼyoo Jacob na̱nguá nindxu̱u̱ xóo rígi̱,numuu rí ikhaa nindxu̱u̱ bi̱ niʼni xúgíʼ,Israel nindxu̱u̱ ragótiu̱u̱, dí kaʼyoo makhánáá.
Jeobá bi̱ naʼtáñajúúnʼ ángeles, xúʼko̱ kaʼnii mbiʼyuu.
17 Atrajxi̱i̱ dí xta,ikháán a̱ʼgu̱ bi̱ nuruguama̱ʼa̱a̱n xa̱bu̱ sia̱nʼ.
18 Numuu dí rígi̱ rí naʼthí Jeobá:
“Dí xúgi̱ madajuíin xa̱bu̱ bi̱ kúwá náa ku̱ba̱ʼ rígi̱,ga̱jma̱a̱ ma̱ni̱ rí mumíníinʼ”.
19 ¡Gínúnla ikhúún ga̱jma̱a̱ gamiéjunʼ dí ni̱ʼkha̱nú inuʼ!
Rakháʼniin maʼni̱i̱ náa nigawúnʼ.
Nitha̱: “Gajkhun dí rígi̱ nindxu̱u̱ nandii dí gúʼdoo, ndayóoʼ rí maʼngo̱ʼ.
20 Nini̱ gámbáa guʼwá xtíin ndrígóʼ ga̱jma̱a̱ nirujtu ñuñuu.
E̱ji̱nʼ nini̱ñu̱nʼ ga̱jma̱a̱ nánguá kúwá.
Ndáwa̱a̱ nimbáa tsáa magíiʼ goʼwóʼ ga̱jma̱a̱ tsáa maxtrámáanʼ xtíñúu.
21 Numuu rí baxtúu nini̱ xó má xa̱bu̱ skágunʼna̱nguá nirajxi̱i̱ Jeobá.
Ikhaa rúʼko̱ numuu rí túsgajma ku̱ma̱ga̱jma̱a̱ xúgíinʼ mugu̱ nijuidáríʼiin”.
22 ¡Atadxawíín! ¡Mbá ajngáa! ¡A̱ʼkhu̱ e̱ʼkha̱!
Mbá gaʼxma rí na̱ʼkha̱ asndu náa ku̱ba̱ʼ dí rígá náa norte,maʼni rí xuajin Judá maguanáa ga̱jma̱a̱ maʼni̱i̱ náa makuwá chacal.*
23 Tátá Jeobá, ikhúún nda̱yo̱o̱ májánʼ dí xa̱bu̱ numbaaʼ na̱nguá kaʼyoo maraʼwíí náá kamba̱a̱ gáʼga.
Na̱nguá kaʼyoo xa̱bu̱ numbaaʼ maraʼwíí náá gájngríga.
24 Tátá Jeobá, ataxprígúʼ xó má gíʼmaa,mú raʼkháa índo̱ nakásnga̱ña̱a̱ʼ, mu xúʼko̱ xátani gámbúun.
25 Atasngátrámááʼ dí nakásngaña̱a̱ʼ náa xuajin rí tsémajkhún tani̱ga̱jma̱a̱ náa mbá guʼwíin xa̱bu̱ bi̱ tségri̱ga̱a̱ mbiʼyaaʼ.
Numuu rí ni̱ʼphi̱i̱ Jacob.
Xúʼko̱, ni̱ʼphi̱i̱ asndu nini̱ gámbáaga̱jma̱a̱ nini̱ dí ku̱bo̱o̱ʼ maguanáa.
Mbaʼa nota
^ O “nda̱a̱ rí ejmaa”.
^ O “nda̱a̱ rí ejmaa mbá kayuuʼ”.
^ O “nagui̱i̱”.
^ Versículo 11 nigumarámáʼ náa ajngáa arameo.
^ O mbáa “tsúwáʼ”.
^ Xujkhúʼ bi̱ xóo xu̱wánʼ kaʼniún bi̱ najmangu̱u̱nʼ.
