Jeremías 11:1-23
11 Rígi̱ nindxu̱u̱ ajngóo Jeobá dí nigruigú Jeremías:
2 “¡Xa̱bu̱ xuajin! ¡Gudxawíínla ajngáa rí nimbánuu rígi̱!
Arathún* xa̱bekha bi̱ kúwá náa Judá ga̱jma̱a̱ xa̱bu̱ bi̱ kúwá náa Jerusalén,
3 arathún: ‹Rígi̱ dí naʼthí Jeobá, Dios ndrígóo Israel: “Gajuiʼtátsríguíi xa̱bu̱ bi̱ xáʼnimbánuu ajngáa rí nimbánuu rígi̱,
4 rí ikhúún ni̱thu̱u̱n wajin xiʼñála nákhá mbiʼi rí nigúwíin náa ku̱ba̱ʼ ndrígóo Egipto, rí nindxu̱u̱ xóo horno náa nijuiya̱a̱ʼ hierro, índo̱ ni̱thu̱u̱n: ‹Gunimbala aʼwóʼ ga̱jma̱a̱ gu̱ni̱ xúgíʼ rí ikhúún nakuʼmáanʼ mu̱ni̱, mu xúʼko̱ ikháanʼ mani̱ndxa̱la xa̱bu̱ xuajñunʼ ga̱jma̱a̱ ikhúún mani̱ndxu̱ʼ Dios ndrígala,
5 mu ikhúún ma̱ndoo manimbánuu ajngóʼ rí ni̱thu̱u̱n wajin xiʼñála dí maxnu̱u̱n mbá ku̱ba̱ʼ dí rígá wéñuuʼ yáʼdú ga̱jma̱a̱ jyááʼ, xó má e̱ya̱a̱ xúgi̱›”›”.
Ikhúún niriʼñuu: “Xúʼko̱ gáʼni,* Tátá Jeobá”.
6 Ikhú Jeobá niʼthúnʼ: “Arathá xúgíʼ ajngáa rígi̱ náa xuajin Judá ga̱jma̱a̱ náa kamba̱a̱ dí rígá náa Jerusalén: ‹Gudxawíínla ajngáa rígi̱ dí nimbánuu ga̱jma̱a̱ gunimbánííla.
7 Numuu rí asndu nákhá mbiʼi rí nigúwíin wajin xiʼñúnʼ náa ku̱ba̱ʼ ndrígóo Egipto asndu mbiʼi rígi̱, nángi eʼni ni̱thu̱u̱n:* “Gu̱nimba̱la aʼwóʼ”.
8 Mú ikhiin na̱nguá nixnatiʼñamijná mudxawíín,* rí phú nini̱, xúgíinʼ nini̱ xó má nagua̱ʼa̱ maʼni a̱jkiu̱ún rí xkawiʼ. Ikha jngóo ni̱ʼkhá ka̱gu̱ʼ náa ikhiin xúgíʼ ajngáa dí nimbánuu rígi̱ dí nitañájúúnʼ munimbáníí rí ikhiin nini̱ gaʼduunʼ munimbu̱u̱n›”.
9 Ikhú Jeobá niʼthúnʼ: “Xa̱bekha bi̱ kúwá náa Judá ga̱jma̱a̱ xa̱bu̱ bi̱ kúwá náa Jerusalén niriya̱ʼ awan dí muxujximíjna̱.
10 Mangiin nini̱ dí raʼkhí xó má wajin xiʼñúúnʼ bi̱ nikúwá nákhá wajyúuʼ, bi̱ nini̱ gaʼduunʼ munimbu̱ún ajngóʼ. Ikhiin mangiin nigún kidxu̱únʼ eʼwíinʼ dioses ga̱jma̱a̱ ndiyamajkhún. Bi̱ kúwá náa goʼwóo Israel ga̱jma̱a̱ bi̱ kúwá náa goʼwóo Judá nánguá ninimbaníí dí nimbánúʼ gajmíʼ wajin xiʼñúúnʼ.
11 Ikha jngóo, rígi̱ dí naʼthí Jeobá: ‹Makuʼmá mbá gamiéjunʼ náa ikhiin náa rí xáʼngu̱u̱n gákáwíin. Xádxawuun rí guthu̱nʼ, índo̱ gútakáñúnʼ rí mambáñún.
12 Ikhú xa̱bu̱ xuajin Judá ga̱jma̱a̱ xa̱bu̱ bi̱ kúwá náa Jerusalén magún gútakáñún rí mumbañún dioses bi̱ nuxnajxi̱ tsigijñaʼ inún, mú ikhiin xúni̱ káwíin índo̱ gáʼkha̱nú gamiéjunʼ.
13 Judá, dioses ndrígáaʼ niʼni mbaʼin wéñuuʼ xó má xuajñaanʼ, ga̱jma̱a̱ náa nuxnajxí tsigijñaʼ náa inuu bi̱ naʼni dí marigá ma̱jti̱ʼ* dí ikháanʼ ni̱nila, náa nuxnajxí tsigijñaʼ inuu Baal, ra̱ʼkhá tháán mbaʼa nindxu̱u̱ xó má kamba̱a̱ dí rígá náa Jerusalén›.
14 Ikháán* xáratajkáan ga̱jma̱a̱ numuu xuajin rígi̱. Xáratajkáan ni má xáratakáñúʼ ga̱jma̱a̱ numún ikhiin, numuu rí xádxa̱wún índo̱ ikhiin gáguwáʼ náa ikhúún ga̱jma̱a̱ numuu gamiéjunʼ dí gáʼkha̱nú inún.
15 Lá kaʼyoo xuajñunʼ bi̱ nandoʼ ka̱yo̱o̱ maxtáa náa goʼwóʼíndo̱ mbaʼin bi̱ kúwá ikhí nurawíi awan dí raʼkhí muni̱ ráʼ.
Índo̱ gáʼkha̱nú gamiéjunʼ, lá ikhiin muguajún jthi̱i̱n ga̱jma̱a̱ xuwiʼ dí mikaʼwu* xáʼ.
Lá maʼdxaaʼ ikhú rá’.
16 Nákhá wajyúuʼ, Jeobá nixná mbiʼyaaʼ ixi̱ olivo mba̱a̱ rí maxaʼ,dí mitsaanʼ,* dí najma̱a̱ májánʼ xndúu.
Gakhi̱i̱ niwán índo̱ nigído̱o̱ʼ agiuuʼ,ga̱jma̱a̱ ikhiin nixpi̱gu ñawúunʼ.
17 Jeobá bi̱ naʼtáñajúúnʼ ángeles, bi̱ niʼdu̱u̱ ixi̱ rígi̱, niʼthí dí ma̱ʼkha̱nú mbá gamiéjunʼ inaaʼ ga̱jma̱a̱ numuu xúgíʼ dí raʼkhí nini̱ bi̱ kúwá náa goʼwóo Israel ga̱jma̱a̱ bi̱ kúwá náa goʼwóo Judá, bi̱ nini̱ dí makásnga̱ñu̱ʼ ga̱jma̱a̱ numuu tsigijñaʼ dí nixnajxi̱ náa inuu Baal”.
18 Jeobá niʼthúnʼ mu ikhúún mba̱yo̱o̱,ikháán nirathúnʼ mu mba̱yo̱o̱ ndiéjunʼ kúwá runi̱.
19 Ikhúún ninindxu̱ʼ xóo mbáa a̱ʼdá múgú bi̱ tséjmangu̱u̱ʼ bi̱ nagún kuya̱a̱ muxiyáa.
Na̱nguá e̱yo̱o̱ á mu ga̱jma̱a̱ numuʼ ikhúún awan dí kúwá ruriya̱ʼ, índo̱ nithi:
“Gu̱ʼni̱ gámbáa ixi̱ ga̱jma̱a̱ xndúu,gurujtulú náa ku̱ba̱ʼ dí kúwá bi̱ nduyamu xúʼko̱ mbiʼyuu xátanga̱a̱ majuiʼthá”.
20 Mú Jeobá bi̱ naʼtáñajúúnʼ ángeles naʼni mbánúu xó má kaʼyoo,ikhaa naʼngo̱o̱ ndaʼyoo ndiéjunʼ endxa̱ʼwa̱míjnalú* ga̱jma̱a̱ dí rígá náa awúu̱n a̱jkiu̱lú.
Atatsíñúnʼ mba̱yo̱o̱ xóo gátaniu̱u̱n ikhiin,numuu rí náa ñawáanʼ niniʼñúuʼ dí matanimbáníí numuʼ.
21 Rígi̱ dí naʼthí Jeobá ga̱jma̱a̱ numún xa̱bekha bi̱ kúwá náa Anatot bi̱ nandún muxiñáán ga̱jma̱a̱ nuthi: “Ní xárataríyaʼ itháán ga̱jma̱a̱ numuu mbiʼyuu Jeobá, á mu naratá má xúʼko̱ muxiñáaxu̱”,
22 xúʼko̱, rígi̱ dí naʼthí Jeobá bi̱ naʼtáñajúúnʼ ángeles: “Mandi̱ʼi̱ín cuenta. Jiámiún makhañún ga̱jma̱a̱ espada, e̱jñu̱ún makhañún ga̱jma̱a̱ ewiʼ.
23 Náa ikhiin nímbáa ní xáguanúu, numuu rí makuʼmá mbá gamiéjunʼ náa xa̱bekha bi̱ kúwá náa Anatot náa tsiguʼ rí kaʼñún muxnajxi̱i̱ cuenta”.
Mbaʼa nota
^ Nakujmaa dí ajngáa rígi̱ najuiʼtháán Jeremías.
^ O “Amén”.
^ Náa ajngáa hebreo naʼthí, “nákhá miʼcha̱ nithu̱u̱n”.
^ Náa ajngáa hebreo naʼthí, “na̱nguá nixruigú cháʼwún”.
^ O “dios bi̱ naʼni marigá ma̱j̱ti̱ʼ”.
^ Xóo muʼthá, Jeremías.
^ Xóo muʼthá, tsigijñaʼ rí najuixnájxi̱ náa guʼwá rí nduyamajkuíí Dios.
^ O “nagui̱i̱”.
^ Náa ajngáa hebreo naʼthí, “riñón”.
