Jeremías 12:1-17
12 Tátá Jeobá, ikháán nindxa̱a̱ʼ jmbii índo̱ na̱jkhá gákruíga̱ náa inaaʼ,índo̱ nuʼtámíjná ga̱jma̱a̱ rí kaʼyoo marigá.
Mú, náá numuu rí bi̱ ra̱míjíinʼ nagájnuu májánʼ rí nuni̱ rá.
Náá numuu rí xa̱bu̱ bi̱ nuni̱ nduwaʼ kúwíin májánʼ rá.
2 Ikhiin nindxu̱ún xóo ixi̱ rí ikháán nitadu ga̱jma̱a̱ ni̱jkha̱ ajmu̱u̱.
Nigaja̱a̱ ga̱jma̱a̱ nixná xndúu.
Ikhiin i̱ndó náa rawúúnʼ guáʼdáán, mú náa awúu̱n a̱jkiu̱ún* kúwá mitsínguánʼ náa ikháán.
3 Mú ikháán má natatsiniúúnʼ májánʼ Jeobá, ikháán natayo̱ʼ,natayáá májánʼ a̱jkiu̱nʼ ma̱ngaa natayáá rí xtáa ga̱jma̱á nindxa̱a̱ʼ.
Atraʼwíin xóo mugu̱ bi̱ muradíin,atani̱ wájíinʼ mu makhañún náa mbiʼi rí kaʼyoo.
4 Asndu nguáná gáwiji̱i̱ rujndo̱o̱ʼ ku̱ba̱ʼga̱jma̱a̱ mujndooʼ xúgíʼ iná dí rígá xanáá rá.
Ga̱jma̱a̱ numuu dí ra̱májánʼ rí nuni̱ bi̱ kúwá ikhí,xujkhúʼ ga̱jma̱a̱ xujkhú xnaʼ nindáti̱gi̱i̱n.
Numuu rí ikhiin nithi: “Ikhaa na̱nguá eʼyoo rí mugíʼníí”.
5 Á mu tséʼnga̱a̱ʼ gátagayáaʼ gajmiáanʼ xa̱bu̱,xú káʼnii gáʼnga̱a̱ʼ gátagayáaʼ gajmiáanʼ wáyú rá.
Mbáa naku̱ma̱a̱ʼ rí xtaa májánʼ náa mbá ku̱ba̱ʼ dí rígá rí tsímáá,mu xú kaʼnii gákuma̱a̱ʼ á mu rí xtaa náa xaxi̱ dí rígá náa Jordán rá.
6 Asndu bi̱ nindxu̱ún a̱ngia̱a̱nʼ, bi̱ kúwá náa goʼwóo ana̱a̱ʼ,nini̱ nduwáánʼ.
Nindxaʼwajmáán ga̱jma̱a̱ xúgíʼ tsiaki̱i̱ ndrígu̱ún.
Xáku̱ma̱a̱ʼ xtañún ikhiintséʼniuu á mu nuthaanʼ rí májánʼ.
7 “Niniʼñúuʼ goʼwóʼ, niniʼñúuʼ rí kaʼyoʼ,nixnajxíi bi̱ nandoʼ ka̱yo̱o̱ náa ñawúúnʼ bi̱ sia̱nʼ gajmíi̱n.
8 Rí kaʼyoʼ ni̱jkha̱nú ninindxu̱u̱ xóo mbáa león bi̱ xtáa náa xaxi̱,nandxaʼwajmúún.
Ikha jngóo nijkhánú niwiyu̱ʼ ka̱yo̱o̱.
9 Rí kaʼyoʼ ikhúún nindxu̱u̱ xóo mbáa xujkhú xnaʼ bi̱ mixtíi bi̱ na̱ʼkhu̱ xuwiʼ,eʼwíinʼ xujkhú xnaʼ bi̱ naʼphu̱ xuwiʼ nuruguama̱ʼa̱a̱n ga̱jma̱a̱ nandún gúphi̱i̱.
Gaguwaʼ xúgiáanʼlá xujkhú xáná, gagimbáanʼla,gaguwaʼ guphiʼtsu.
10 Mbaʼin baxtúu nini̱ gámbáa náa kiʼdu uva ndrígóʼ,nijngapri̱ga̱ mbayuʼ.
Nini̱ rí mbayuʼ rí mitsaanʼ* mani̱ndxu̱u̱ xóo ku̱ba̱ʼ mijxooʼ* rí ndáwa̱a̱ tsáa xtáa.
11 Ninindxu̱u̱ mbaaʼ rí niwanáa.
Ga̱jma̱a̱ nijndooʼ,*ní ndáwa̱a̱ tsáa xtáa ikhí.
Xúgíʼ xuajin niguámbáa,mú nimbáa ndáwa̱a̱ tsáa exmiéjuunʼ kaʼyoo.
12 Bi̱ nini̱ gámbáa niguwáʼ náa xúgíʼ kamba̱a̱ rí nanújngoo xígií náa ku̱ba̱ʼ mijxooʼ,numuu rí espada ndrígóo Jeobá xtáa raʼni gámbáa xuajin náa nagi̱ʼdu̱u̱ asndu náa námbári̱go̱o̱.
Nimbáa ndáwa̱a̱ tsáa xtáa tsímáá.*
13 Nidu trigo, mú mbáwíí tsuwanʼ nida̱a̱.
Ndaa má numuu niʼni néʼngu̱u̱n.
Rí muda̱a̱ mani̱ndxu̱u̱ mbá ma̱jti̱ʼ náa ikhiinnumuu rí nakásngañu̱u̱ʼ Jeobá”.
14 Rígi̱ rí naʼthí Jeobá ga̱jma̱a̱ numún bi̱ xkawi̱i̱nʼ bi̱ kúwá mijngii náa xtáá, bi̱ kúwá runi̱ ngínáa rí ni̱xnu̱u̱ xuajñunʼ Israel: “Marubuwíin náa ku̱ba̱ʼ rígi̱ ga̱jma̱a̱ marubuwíin bi̱ kúwá náa goʼwóo Judá náa majñu̱únʼ ikhiin.
15 Mú nda̱wa̱á rí marubuwíin, matangu̱ún magáwíinʼ a̱jkiu̱nʼ ga̱jma̱a̱ maʼkháaʼ kagui̱i̱n mámbíin dí ikhiin náa rí kaʼñún ga̱jma̱a̱ náa ku̱bu̱únʼ”.
16 “Á mu ikhiin gajkhun najmañún nuni̱ xó má eʼni xuajñunʼ, najmún mbiʼyuʼ mu muxna ajngún muthi ‹¡Na̱xna̱ ajngóʼ ga̱jma̱a̱ numuu mbiʼyuu Jeobá!›, xó má ikhiin nisngúún xa̱bu̱ xuajñunʼ muxna ajngún náa Baal, ikhú ma̱ndoo makuwá náa majñu̱únʼ xa̱bu̱ xuajñunʼ.
17 Mú, á mu nuni̱ gaʼduunʼ munimbu̱ún, ikhú maruburiya̱ʼ xuajin rúʼko̱, maruburiya̱ʼ ga̱jma̱a̱ ma̱ni̱ gámbáa”, eʼthí Jeobá.
Mbaʼa nota
^ Náa ajngáa hebreo naʼthí, “riñón”.
^ O “nagui̱i̱”.
^ O “desierto”.
^ O mbáa “xtáa ngíná”.
^ Náa ajngáa hebreo naʼthí, “nimbá xuwiʼ”.
