Jeremías 14:1-22
14 Rígi̱ nindxu̱u̱ ajngóo Jeobá dí nigruigú Jeremías ga̱jma̱a̱ numuu rí xáxnúu ruʼwa:
2 Judá xtáa ngíná ga̱jma̱a̱ xkrugoo nigudiri̱ga̱a̱.
Nijnguti̱ga̱ náa ku̱ba̱ʼ ga̱jma̱a̱ ra̱ʼkhá tháán ngíná kúwá,mbá aʼwá ngíná dí nawáán itháan gakhi̱i̱ náa Jerusalén.
3 Patrón nuxuʼmiin xa̱biu̱ún mbuyáʼ iyaʼ.
Nagún náa puzu, mú na̱nguá exkamaa iyaʼ.
I̱ndó rayaʼ kuda eguwáanʼ.
Nati̱ñu̱u̱nʼ ga̱jma̱a̱ najmáa a̱jkiu̱ún,ma̱ngaa nuruguáá edxu̱ún.
4 Numuu rí nánguá exnúu ruʼwa náa tsu̱du̱u̱ ku̱ba̱ʼikha jngóo mbaaʼ nijmídáa,bi̱ nudu nánguá eyáá rí muni̱ ga̱jma̱a̱ nuruguáá edxu̱ún.
5 Asndu aña̱ʼ e̱ʼgú bi̱ xtáa xanáá naniñuuʼ a̱ʼdióo bi̱ ndiʼkúú nigumaanumuu rí nda̱a̱ iná.
6 Búrru xáná jngruámúún’ náa bíjní tsaʼtsaʼ.
Nundxa̱ʼwa̱ xóo chacal,*nánguá eʼngu̱u̱n gúyejxi̱ numuu rí nda̱a̱ dí mu̱phu̱.
7 Maski ajndu rí nu̱ni̱xu̱ nasngájma dí guáʼdáá aʼkhúxu̱,Tátá Jeobá, atambáyuxu̱ ga̱jma̱a̱ numuu mbiʼyaaʼ.
Mbaʼa dí raʼkhí ninixu̱,ga̱jma̱a̱ náa inaaʼ ikháán nikiéʼkuxuʼ.
8 Ikháán nindxa̱a̱ʼ bi̱ Israel nagi̱ʼthu̱u̱n, bi̱ maʼni kríya̱a̱ʼ náa mbiʼi rí na̱ʼkha̱nú ga̱ʼkhu̱,náá numuu dí nindxa̱a̱ʼ xóo mbáa xa̱bu̱ na̱ʼkha̱á náa xuajin,ga̱jma̱a̱ xóo mbáa xa̱bu̱ bi̱ na̱ʼkha̱ mitsínguánʼ bi̱ nawi̱ji̱ manújngoo mbruʼun rá.
9 Náá numuu rí natani̱ xóo mbáa xa̱bu̱ bi̱ tséʼyoo,xóo mbáa xa̱bu̱ bi̱ gíʼdoo tsiaki̱i̱ mú tséʼngo̱o̱ gáʼni káwíin eʼwíinʼ rá.
Tátá Jeobá, ikháán xtaa náa majñu̱xu̱,ga̱jma̱a̱ ikháanʼ nuyéjkuaxu̱ mbiʼyaaʼ.
Xátatsiʼñúxu.
10 Rígi̱ dí naʼthí Jeobá ga̱jma̱a̱ numuu xuajin rígi̱: “Nanigu̱u̱nʼ mafrigu̱u̱n gi̱i̱ ñuʼún, nuba̱a̱n má xúʼko̱ rajkhúún. Ikhaa rúʼko̱ numuu dí Jeobá tsédxuu kaʼñún. Dí xúgi̱ marmáʼáan a̱jkiu̱u̱n kaʼyoo rí nikiéʼkhúún ga̱jma̱a̱ mandiʼi̱ín cuenta ga̱jma̱a̱ numuu aʼkhúún”.
11 Ikhú Jeobá niʼthúnʼ: “Xáratajkáan mu magajnúu májánʼ rí gáʼni xuajin rígi̱.
12 Índo̱ nurkueyimijná*, ikhúún tsédxawuun rí nutakáñúnʼ, ga̱jma̱a̱ índo̱ nuxnajxi̱ tsigijñaʼ rí nakarámáʼ ma̱ngaa tsigijñaʼ rí tsígáʼ ikhúún tségruígú. Majmuʼ espada, ewiʼ ga̱jma̱a̱ nandii mu ma̱ni̱ gámbíin”.
13 Ikhú ni̱thu̱u̱n: “¡Tátá Jeobá bi̱ itháán mba̱a̱! Profeta nuthúún: ‹Ikháanʼ xúyáala espada ni má ewiʼ, ikhúún ma̱ni̱ dí marigá dí tsímáá náa ku̱ba̱ʼ rígi̱›”.
14 Ikhú Jeobá niʼthúnʼ: “Profeta kúwá rajmún mbiʼyuʼ mu mutariya̱ʼ dí minduwaʼ. Ikhúún na̱nguá nikuʼmíin, ni má nda̱a̱ rí nitañájúúnʼ ni má nda̱a̱ rí ni̱thu̱u̱n. Nindxu̱u̱ minduwaʼ rí nawasngájmún* dí kúwá ruthi ga̱jma̱a̱ ragíʼdoo numuu dí nuthi, nuthi minduwaʼ dí rígá náa a̱jkiu̱ún.
15 Rígi̱ dí naʼthí Jeobá ga̱jma̱a̱ numún profetas buʼko̱, bi̱ najmún mbiʼyuʼ mu mutari̱ya̱ʼ, maski ajndu má ikhúún na̱nguá nikuʼmíin, ga̱jma̱a̱ nuthi dí náa xuajin rígi̱ xáʼkha̱ espada ni má ewiʼ: ‹Mú espada ga̱jma̱a̱ ewiʼ gáʼni̱ gámbíin profeta buʼko̱.
16 Ga̱jma̱a̱ xa̱bu̱ bi̱ nudxawíín dí nutariya̱ʼ makhañún ga̱jma̱a̱ espada ma̱ngaa ga̱jma̱a̱ ewiʼ, kááʼ jngútigi̱i̱n náa kamba̱a̱ ndrígóo Jerusalén gáʼni. Ndawa̱a̱ tsáa maʼdi̱ín, ni má ikhiin, ni má guʼñu̱ún, ni má jiámiu̱ún, ni má wa̱ʼxiúnʼ, numuu rí makuʼmá gamiéjunʼ náa ikhiin dí kaʼñún mudrigú›.
17 Arathún ajngáa rígi̱:
‹Mbiʼíí mbruʼun najnííʼ iyooʼ iduʼ, gumbi̱ya̱ʼ má xúʼko̱,numuu rí wáxióo xuajñunʼ bi̱ xóó tsébóoʼ ga̱jma̱a̱ xa̱bu̱ nixujmbiriga̱a̱ mbá kayuuʼ ga̱jma̱a̱ nini̱ gámbáa,ra̱ʼkhá tháán nini̱ gawíínʼ.
18 Á mu na̱jkhá xanáá,¡Nda̱ñu̱u̱n xa̱bu̱ bi̱ nikháñún ga̱jma̱a̱ espada!
Á mu nato̱ʼo̱ʼ náa xuajin,¡Nda̱yo̱o̱ nandii dí na̱ʼkha̱ kagu̱u̱ ewiʼ!
Xó má profeta ga̱jma̱a̱ ndxajkun jngúʼúún náa mbá ku̱ba̱ʼ rí tséniʼnuuʼ›”.
19 Lá nitatsíñáánʼ mbá kayuuʼ Judá ráʼ. Lá nawiya̱a̱ʼ xtayáá Sion ráʼ.
Náá numuu dí nitani̱ ngínáaʼxu̱ rá. Dí xúgi̱ nándáa xóo maguma tanuxu̱.
Niguáʼthi̱i̱nxu̱ marigá dí tsímáá, mú na̱nguá ni̱ʼkha̱nú dí májánʼ,mbá mbiʼi rí maʼni̱i̱ a̱jkiu̱xu̱, ¡Mú i̱ndó gamíi rígá!
20 Tátá Jeobá, ikháanʼ ndu̱ya̱a̱xu dí raʼkhí ninixu̱ga̱jma̱a̱ rí nikiéʼkhúún wajin xiʼñúxu,numuu rí nixuʼdámíjnáxu̱ aʼkhá náa inaaʼ ikháán.
21 Ga̱jma̱a̱ numuu mbiʼyaaʼ, xátatsiʼñúnxu̱,xáwi̱ya̱a̱ʼ xtayáá xília̱a̱ʼ* rí mitsaanʼ.*
Garmáʼáan a̱jkia̱a̱nʼ dí nimbánaaʼ ga̱jma̱á nindxu̱xu̱ ga̱jma̱a̱ xátani̱ rí mandáti̱ga̱a̱.
22 Lá majmiin xándú bi̱ nda̱a̱ dí ejmiin bi̱ kúwá náa i̱ʼwáʼ xuajin muni̱ rí maxnúu ruʼwa ráʼ.
Lá majmaa i̱ndó mekhu maʼni maxnúu ruʼwa gakhi̱i̱ ráʼ.
Tátá Jeobá Dios ndrígúxu̱, lá raʼkháa i̱ndó ikháán najmáán natani̱ rígi̱ ráʼ.
Ikháán nindxa̱a̱ʼ bi̱ guáʼthi̱i̱nxu̱,numuu rí i̱ndó ikháán natani̱ xúgíʼ rígi̱.
Mbaʼa nota
^ Xujkhúʼ bi̱ xóo xu̱wánʼ kaʼniún bi̱ najmangu̱u̱nʼ.
^ O “nduyamiʼchíí”.
^ O “visión”.
^ O “trono ndrígáaʼ”.
^ O “nagui̱i̱”.
