Jeremías 15:1-21
15 Ikhú Jeobá niʼthúnʼ: “Maski ajndu Moisés ga̱jma̱a̱ Samuel gáguwaʼ náa ikhúún, mú xágáwíinʼ a̱jkiu̱nʼ ka̱yo̱o̱ xuajin rígi̱. Tsíyóʼ gáyóo gi̱i̱. Gaʼga̱a̱.
2 Á mu nuthaanʼ ‹náa ejkualú rá.› Ikháán matriʼñún ‹Rígi̱ rí naʼthí Jeobá:
“¡Bi̱ gáʼniuu nandii mbiiʼ, makhañúu ga̱jma̱a̱ nandii mbiiʼ!
¡Bi̱ kaʼyoo magawúu̱nʼ ga̱jma̱a̱ espada, makhañúu ga̱jma̱a̱ espada!
¡Bi̱ gámínuuʼ ga̱jma̱a̱ ewiʼ, makhañúu ga̱jma̱a̱ ewiʼ!
¡Bi̱ kaʼyoo magún kuya̱a̱, magún kuya̱a̱!”›.
3 ‹Ikhúún makuʼnguánʼ a̱jkhu̱ gamiéjunʼ,* eʼthí Jeobá: Espada mu magudíin, xu̱wánʼ mu muxmajta̱a̱ xuñúnʼ índo̱ gákháñún ga̱jma̱a̱ xujkhú xnaʼ bi̱ jngruigu̱u̱n mekhuíí ma̱ngaa xujkhúʼ bi̱ kúwá náa ku̱ba̱ʼ muphu̱u̱n.
4 Ma̱ni̱ rí mani̱ndxu̱u̱ mbá gamíi náa xúgíinʼ xa̱bu̱ ñajunʼ bi̱ kúwá náa tsu̱du̱u̱ ku̱ba̱ʼ ga̱jma̱a̱ numuu aʼkhúun Manasés a̱ʼdióo Ezequías, rey ndrígóo Judá ga̱jma̱a̱ numuu rí niʼni náa Jerusalén.
5 Tsáá gágawíinʼ a̱jkiu̱u̱n kaʼyaaʼ rá Jerusalén.
Tsáá gágawíinʼ a̱jkiu̱u̱n gátani̱ rá.
Ga̱jma̱a̱ tsáá gawi̱ji̱ mu marajxa̱a̱ʼ xú kaʼnii xtaa rá.›
6 ‹Nitatsíñúʼ› eʼthí Jeobá.
‹Natani̱ tsingumínáʼ náa ikhúún.*
Ikha jngóo makruíya̱ʼ ñawúnʼ náa ikháán ga̱jma̱a̱ ma̱ni̱ gámbáanʼ.
Néʼngo̱ʼ má rí nagáwíinʼ a̱jkiu̱nʼ kayaaʼ.
7 Madajuíin náa xkrugoo xuajin xóo náskha.
Maniʼñúúnʼ ndajkuíín ni xáguáʼdiin e̱jñu̱ún.
Ma̱ni̱ gámbáa xuajñunʼ,numuu rí ikhiin nuni̱ gaʼduunʼ muniña̱a̱ʼ kambu̱ún.
8 Ma̱ni̱ rí gu̱ʼú xuáʼa̱ maʼni itháan mbaʼin xóo jui̱ʼi̱ dí rígá náa lamáa.*
Rí ta̱pha̱ mbiʼi makuʼnguáanʼ mbáa bi̱ maʼni mbáti̱gi̱i̱n ikhiin, rudúún e̱ji̱nʼ ga̱jma̱a̱ jiámá.
Ma̱ni̱ rí ni xúyáá rí muni̱ ga̱jma̱a̱ mamiñún.
9 A̱ʼgu̱ bi̱ nigiʼdiin mbá juwiin e̱ji̱i̱n xtáa rakámíndúu,nánguá eʼngo̱o̱ gáyá jxu̱u̱ʼ.
Kaʼníí xóó mbiʼi mú ikhaa xtáa náa mikína má,naʼni rí mati̱yu̱u̱ʼ ga̱jma̱a̱ magajnúu gamajkuu›.
‹Ga̱jma̱a̱ bi̱ xóó naguanún náa ikhaamaxnajxíin náa espada ndrígu̱ún xa̱bu̱ sia̱nʼ› eʼthí Jeobá”.
10 ¡Ru̱dúʼ, ngínún lá ikhúún dí nitatsíñáʼ maxtáá!
Náa majñuʼ ikhúún nuxmijná ma xúʼko̱ ga̱jma̱a̱ nagiʼdu̱u̱n náa xúgíʼ xuajin.
Na̱nguá ma nixnatiʼñaʼ ní má na̱nguá nitiʼñuu,mú xúgíinʼ ikhiin nutasrigúún.
11 Jeobá niʼthí: “Xáni̱ a̱jma̱ a̱jkiu̱nʼ rí ikhúún mambáyaaʼ,gajkhun rí ikhúún magújun náa inún bi̱ sia̱nʼ gajmiáanʼnáa mbiʼi rí ma̱ʼkha̱nú gamiéjunʼ ga̱jma̱a̱ mbiʼi rí ma̱ʼkha̱nú tsingíná.
12 Lá ma̱ndoo mbáa makumiguu hierro,hierro dí rígá náa norte o cobre ráʼ.
13 Maxnajxí rí xtaʼdáá ga̱jma̱a̱ magajta káyáaʼ rí gíʼdoo numuu,maʼga kiʼda xúʼkhi̱ín ga̱jma̱a̱ numuu aʼkhá rí nitaxúdaminaʼ náa xúgíʼ xuajñaanʼ.
14 Maxnajxu̱ún rígi̱ xa̱bu̱ sia̱nʼ ndrígáaʼmu magún kudúún náa mbá ku̱ba̱ʼ rí ikháán tsétatsinuuʼ.
Numuu dí nakásngáñuʼ nikamuu xóo mbá aguʼ,nikamuu rígi̱ ga̱jma̱a̱ numala ikháanʼ”.
15 Ikháán ma natayáá, Tátá Jeobá.
Garmáʼáan a̱jkia̱a̱nʼ xtayoʼ ga̱jma̱a̱ atadxawunʼ.
Atani̱ gíníin bi̱ nuxjkhoʼ.
Xátatsiʼñáʼ makhañúʼ* ga̱jma̱a̱ numuu rí naʼngo̱o̱ a̱jkia̱a̱nʼ.
Atayáá rí ga̱jma̱a̱ numaaʼ ikháán naʼngo̱o̱ a̱jkiu̱nʼ rí nuta wéñúʼ.
16 Ajngáaʼ nijuiʼya̱a̱ ga̱jma̱a̱ nikhu,ga̱jma̱a̱ ajngáaʼ niʼni rí maxtáa gagi a̱jkiu̱nʼ ga̱jma̱a̱ maʼdxuʼ wéñuuʼ,numuu rí ikhúún na̱jkhá ka̱yo̱ʼ mbiʼyaaʼ Tátá Jeobá Dios bi̱ naʼtáñajúúnʼ ángeles.
17 Tséʼgúnʼ gajmíʼ bi̱ i̱ndó nduyáʼ muni̱ gagimijná, ní má tséni̱ gagimijná gajmíʼ ikhiin.
Numuu rí ñawáanʼ rígá náa ikhúún, ikha jngóo naku̱mu̱ʼ rí xtáá mbáwúún,ikháán nitani̱ ma̱ta̱ rí tsénigua̱a̱ʼ rí nuni̱.
18 Nánguá gíʼdoo thanuu nandii rí gúʼdoo, nánguá xóo maguma thanáá náa nigawúnʼ.
Tsíyoo gáʼni̱i̱.
Lá mani̱ndxa̱a̱ʼ mbá iduu iyaʼ náa ikhúún dí rakáʼnii maku̱ma̱a̱ʼ xtayáádí i̱ndó naxnáʼ iyaʼ índo̱ nandoo ikhaa ráʼ.
19 Ikha jngóo rígi̱ rí naʼthí Jeobá:
“Á mu natangáanʼ, ma̱ni̱ mandáánga̱jma̱a̱ mañejúnʼ náa inuʼ.
Á mu natani̱ wájí rí gíʼdoo numuu ga̱jma̱a̱ rí na̱nguá,mi̱dxu̱ʼnú mani̱ndxa̱a̱ʼ xóo rawunʼ.*
Ikhiin matangi̱i̱n náa ikháán,mú ikháán xátangáanʼ náa ikhiin”.
20 “Ma̱ni̱ rí mani̱ndxa̱a̱ʼ náa xuajin rígi̱ mbá xtájtsí dí cobre dí wíji̱ gújkhúʼ.
Ikhiin muxmijná ga̱jma̱á nindxa̱a̱ʼ,mú ikhiin xáʼngu̱u̱n,numuu rí ikhúún xtáá ga̱jma̱á nindxa̱a̱ʼ mu ma̱ni̱ kríña̱a̱nʼ”, eʼthí Jeobá.
21 “Ikhúún ma̱ni̱ kríña̱a̱nʼ náa ñawúúnʼ bi̱ ramíjíin,ga̱jma̱a̱ ma̱ni̱ kríña̱a̱nʼ náa ñawúúnʼ bi̱ xkawiʼ a̱jkiu̱ún”.
Mbaʼa nota
^ Náa ajngáa hebreo naʼthí, “a̱jkhu̱ gúʼwíin xa̱bu̱”.
^ O mbáa “nadxuʼ skidiʼ”.
^ O “mar”.
^ Náa ajngáa hebreo naʼthí, “xatatsijñún níjní”.
^ O “mi̱dxu̱ʼnú manindxaʼ xóo bi̱ na̱jkha̱ kayoo ajngáa”.
