Jeremías 17:1-27
17 “Aʼkhá ndrígóo Judá nigumaraʼmáʼ ga̱jma̱a̱ mbá cincel* dí hierro.
Náa inuu grígu diamante dí niʼnirámáʼ náa mbá xajpa dí paska náa a̱jkiu̱únma̱ngaa náa chi̱jyu̱u̱ʼ dí nakarámáʼ tsigijñaʼ ndrígu̱ún,
2 e̱jña̱la narmáʼáan a̱jkiu̱ún eʼni náa nakarámáʼ tsigijñaʼ ga̱jma̱a̱ poste rí mitsúʼkháan*náa níjniúu mbá ixi̱ maxaʼ rí mba̱a̱, náa inuu bíjní rí mitsídánʼ,
3 náa tsu̱du̱u̱ kúbá.
Maxnajxí rí xtaʼdáá ga̱jma̱a̱ magajta káʼyáaʼ xúgíʼ rí gíʼdoo numuu, maʼga kiʼda,xúʼko̱ má náa mbaaʼ ndrígáaʼ rí mitsídánʼ, ga̱jma̱a̱ numuu aʼkhá rí nitaxúdaminaʼ náa xúgíʼ xuajñaanʼ.
4 Matatsiʼñááʼ kiejunʼ rí ikhúún ni̱xna̱a̱ʼ.
Matsudáán mu matani̱ ñajúúnʼ xa̱bu̱ sia̱nʼ ndrígáaʼ náa mbá ku̱ba̱ʼ dí ikháán tsétatsinuuʼ,numuu dí ikháanʼla niskamáá rí nakásngáñu̱ʼ xóo mbá aguʼ.*
Mikamuu asndu kámuu”.
5 Rígi̱ rí naʼthí Jeobá:
“Gajuiʼtátsríguíi xa̱bu̱ bi̱ naku̱mu̱u̱ kaʼñún xa̱bu̱ numbaaʼ,ga̱jma̱a̱ nambáyuminaʼ náa tsiaki̱i̱ rí gíʼdoo xa̱bu̱ numbaaʼ,ga̱jma̱a̱ a̱jkiu̱u̱n natsíngúunʼ náa inuu Jeobá.
6 Mani̱ndxu̱u̱ xóo mbá ixi̱ dí juáʼan mbóó náa ku̱ba̱ʼ mijxooʼ.*
Índo̱ gáʼkha̱ rí májánʼ, xáʼyoo,numuu rí i̱ndó maxtáa náa ku̱ba̱ʼ mijxooʼ,náa mbá ku̱ba̱ʼ dí miríná náa nimbáa xándoo maxtáa.
7 Gaguma tsajkurámáanʼ xa̱bu̱ bi̱ naku̱mu̱u̱ kaʼyoo Jeobá,numuu rí naʼnimbo̱o̱ kaʼyoo Jeobá.
8 Maʼga̱nú mani̱ndxu̱u̱ xóo mbá ixi̱ rí wíji̱ náa rawuunʼ iyaʼ,rí naxkraʼa ajmu̱u̱ asndu náa rígá iyaʼ.
Índo̱ gáʼni mijkha xújndooʼ,maʼni má xúʼko̱ maxaʼ.
Índo̱ gáʼni tsiguʼ rí xáxnúu ruʼwa nda̱a̱ rí gágíʼnuuni má xániñuuʼ raxná xndúu.
9 Nda̱a̱ imbo̱o̱ rí maʼni nduwáanʼlú ki xóo a̱jkiu̱lú ga̱jma̱a̱ tségiʼthu̱u̱n.
Tsáa gáʼngo̱o̱ mbaʼyoo xú káʼnii nindxu̱u̱ rá.
10 Ikhúún, Jeobá, nda̱yo̱o̱ rí gíwánʼ náa a̱jkiu̱ún xa̱bu̱,nda̱yo̱o̱ rí e̱ndxa̱ʼwa̱míjna̱ asndu náa itháán mi̱jnu̱ʼ,*mu xúʼko̱ ma̱ni̱ numa̱a̱ mámbáa ga̱jma̱a̱ numuu xóo nindxu̱u̱,xó má ñajunʼ rí naʼni.
11 Xóo mbáa perdiz* bi̱ nagímbóó xndú dí raʼkháa ikhaa niʼni,xúʼko̱ nindxu̱u̱ bi̱ naʼni dí ra̱májánʼ mu magímbóó dí magiʼdoo.
Rígi̱ maniñuuʼ náa ta̱pha̱ mbiʼi rí maxtáa,mú nda̱wa̱á makujmaa kaʼwu rí nindxu̱u̱ mbáa bi̱ tséʼni rí májánʼ”.
12 Asndu nákha nigíʼdu̱u̱ nigi̱ʼi̱ xílí* mitsaanʼ,* niguma mba̱a̱,ikhí nindxu̱u̱ náa mbuʼyamajkuíí Dios.
13 Tátá Jeobá, ikháán nindxa̱a̱ʼ bi̱ Israel nagi̱ʼthu̱u̱n,xúgíinʼ bi̱ gúniña̱a̱nʼ ikháán,* mati̱ñu̱u̱nʼ.
Xúgíinʼ bi̱ gúni̱ tsíngumi̱jna̱ náa ikháán magumaraʼmáʼ mbiʼñún náa yujndaʼ,numuu rí niniña̱a̱nʼ Jeobá, bi̱ nindxu̱u̱ iduu iyaʼ rí ndaʼya.
14 Atani̱ thanuʼ, Tátá Jeobá, mu maʼni̱i̱ a̱jkiu̱nʼ.
Atani̱ kríñu̱u̱nʼ mu ma̱ndoo makríñu̱u̱nʼ,numuu rí ikháán nindxa̱a̱ʼ bi̱ nda̱yamajkuu.
15 Atayáá, tikhuun nuthu̱nʼ:
“Náá rígá ajngóo Jeobá rá.
¡Mbá péñu,* gamba̱núu!”.
16 Mú ikhúún ni̱jkhá má xúʼko̱ kidxaaʼ xóo baxtúu,ni táʼndoʼ ma̱ʼkha̱nú mbiʼi dí ma̱ʼkha̱ gamiéjunʼ.
Ikháán nitayáá májánʼ xú káʼnii ajngáa nigájnuu náa rawunʼ.
¡Xúgíʼ nirígá náa inaaʼ!
17 Xátani̱ rí mamiñúʼ.
Ikháán nindxa̱a̱ʼ náa ma̱ni̱ kríyamínáʼ índo̱ na̱ʼkha̱ gamiéjunʼ.
18 Atani̱ rí mati̱ñu̱u̱nʼ bi̱ nuxkhoʼ,mú ikhúún xágájnuu gamajkhuʼ.
Gamiñúún ikhiin,mú ikhúún xámiñuʼ.
Atani̱ rí ma̱ʼkha̱ gamiéjunʼ náa inún ikhiinatrujtsi̱i̱n ga̱jma̱a̱ atani̱ gámbíin mbá kayuuʼ.
19 Rígi̱ rí niʼthúnʼ Jeobá: “Ayuʼ gáriejún náa xkrugoo xuajin* náa natu̱ʼu̱u̱n ga̱jma̱a̱ náa nagájnaán reyes ndrígóo Judá, ma̱ngaa náa i̱ʼwáʼ xkrugua ndrígóo Jerusalén.
20 Mbaʼyóoʼ marathu̱u̱n: ‹Ikháanʼla rey bi̱ kúwáanʼ náa Judá, xúgíinʼ xa̱bu̱ bi̱ kúwá náa Judá ga̱jma̱a̱ xúgíinʼ xa̱bu̱ Jerusalén, bi̱ natu̱ʼu̱u̱n náa xkrugua rígi̱, gudxawíín ajngóo Jeobá.
21 Rígi̱ rí naʼthí Jeobá: “Tsu̱ma̱á gúnila xúʼguala ku̱da eʼda ni má xáta̱ʼa̱la náa xkrugoo Jerusalén mbiʼi sábado.
22 Xúrawíi nimbá eʼda náa guʼwála mbiʼi sábado xúni̱ nimbá enii ñajunʼ. Gu̱ni̱ rí mbiʼi sábado mani̱ndxu̱u̱ mitsúʼkháan, xó má nitañájúúnʼ wajin xiʼñála.
23 Mú ikhiin na̱nguá nixnatiʼñamijná mudxawíín* ga̱jma̱a̱ dí gujkhuʼ a̱jkiu̱ún* nini̱ gaʼduunʼ munimbu̱u̱n ga̱jma̱a̱ nini̱ gaʼduunʼ rí mudrigú dí nijuaxprígún”›.
24 ‹“Á mu ikháanʼla nu̱nimbala kuduun, eʼthí Jeobá, ga̱jma̱a̱ na̱nguá ta̱ʼa̱a̱la ku̱da eʼda náa xkrugoo xuajin rígi̱ rí mbiʼi sábado ga̱jma̱a̱ nuni̱ rí mbiʼi sábado mani̱ndxu̱u̱ mitsúʼkháan ga̱jma̱a̱ tséni nimbá enii ñajunʼ mbiʼi rúʼko̱,
25 ikhú reyes ga̱jma̱a̱ príncipes bi̱ nutrigi̱i̱n náa xíliu̱u̱ David matu̱ʼu̱u̱n náa xkrugoo xuajin rígi̱, kadrámiúnʼ wáñu̱ún ga̱jma̱a̱ cárriu̱ún, reyes ga̱jma̱a̱ príncipes, ma̱ngaa xa̱bu̱ bi̱ kúwá náa Judá ma̱ngaa náa Jerusalén, xuajin rígi̱ makuwíin má xúʼko̱ xa̱bu̱ asndu kámuu.
26 Maguwáʼ xa̱bu̱ bi̱ kúwá náa xuajin ndrígóo Judá, ma̱ngaa xuajin rí tri̱ga̱ mijngii náa Jerusalén, ga̱jma̱a̱ xa̱bu̱ bi̱ kúwá náa ku̱ba̱ʼ ndrígóo Benjamín, bi̱ kúwá náa kúbá mijmbaaʼ ma̱ngaa bi̱ kúwá náa kúbá mitsidanʼ ga̱jma̱a̱ náa Négueb. Maguwáʼ kudúún tsigijñaʼ dí nakarámáʼ, dí majuixnáxi, tsigijñaʼ dí tsígáʼ, olíbano ga̱jma̱a̱ tsigijñaʼ dí muxna̱a̱ núma̱aʼ náa goʼwóo Jeobá.
27 Á mu tsénimbala ga̱jma̱a̱ tséni̱ rí sábado mani̱ndxu̱u̱ mitsúʼkháan ga̱jma̱a̱ sábado najkuala ku̱da eʼda náa xkrugoo Jerusalén, magído̱o̱ʼ agiuuʼ xkrugua. Aguʼ matsikáa torre rí wájun gújkhúʼ náa Jerusalén ga̱jma̱a̱ xawiyúuʼ”›”.
Mbaʼa nota
^ O mbáa “xó má mbá aguʼ ikháanʼla nikháanʼla ga̱jma̱a̱ numuu rí nakásngañu̱u̱ʼ”.
^ O “desierto”.
^ Náa ajngáa hebreo naʼthí, “riñón”.
^ Ñu̱ʼu̱ bugi̱ kaʼnii xóo mbáa xtílá.
^ O “trono”.
^ O “nagui̱i̱”.
^ Náa ajngáa hebreo naʼthí, “náa ikhúún”. Nakujmaa dí xtáa raʼthí ga̱jma̱a̱ numuu Jeobá.
^ O “atani̱ mbá rí májánʼ”.
^ Náa ajngáa hebreo naʼthí, “náa xkrugún e̱jñu̱ún xa̱bu̱ xuajin”.
^ Náa ajngáa hebreo naʼthí, “na̱nguá nixruigú cháʼwún”.
^ Náa ajngáa hebreo naʼthí, “gújkhúʼ itsu̱ rexu̱ún”.
