Jeremías 18:1-23
18 Jeremías nigruigú ajngáa rígi̱ náa Jeobá:
2 “Ayuʼ ga̱jma̱a̱ arajtaa náa goʼwóo bi̱ naʼni daan, ikhí gáni̱ matadxawíín rí nandoʼ ma̱tha̱a̱nʼ”.
3 Ikha jngóo nigájtáa náa goʼwóo bi̱ naʼni daan ga̱jma̱a̱ ndi̱yo̱o̱ dí xtáa raʼni mbá rayaʼ.
4 Mú rayaʼ dí xtáa raʼni ga̱jma̱a̱ ku̱ba̱ʼ na̱nguá nigájnuu májánʼ. Ikha jngóo nigíʼdu̱u̱ niñajuunʼ mbu̱júu̱ ku̱ba̱ʼ ga̱jma̱a̱ niʼni i̱mba̱ rayaʼ xó má rí májánʼ ndiʼyoo ikhaa.
5 Ikhú nigruígú ajngóo Jeobá. Niʼthúnʼ:
6 “‹Ikháanʼ, bi̱ kuwáanʼ náa goʼwóo Israel, lá xándoo ma̱ni̱ ga̱jma̱á nindxa̱la xó má niʼni bi̱ naʼni daan bugi̱ ráʼ. Eʼthí Jeobá. ¡Gu̱ya̱a̱la! Xó má ku̱ba̱ʼ náa ñawúunʼ bi̱ naʼni daan, xúʼko̱ kaʼnii nindxa̱la náa ñawúnʼ, ikháanʼ bi̱ kuwáanʼ náa goʼwóo Israel.
7 Mámbá rí ikhúún na̱tha̱ dí maruburi̱ya̱ʼ, makumígu̱u̱ ga̱jma̱a̱ ma̱ni̱ gámbóʼ mbá xuajin o mbá reino,
8 á mu xuajin rúʼko̱ naniñuuʼ dí raʼkhí naʼni xó má ikhúún nitha̱, ikhúún mariʼkhu̱u̱ dí ma̱ni̱ ga̱jma̱a̱ numuu gamiéjunʼ dí nindxa̱ʼwa̱mínáʼ makuʼmá inún.
9 Mú mámbá dí ikhúún na̱tha̱ dí mani̱i̱ ga̱jma̱a̱ maʼgíiʼ mbá xuajin o mbá reino,
10 mú, á mu xuajin rúʼko̱ naʼni dí ra̱májánʼ náa iduʼ ga̱jma̱a̱ tséʼnimbo̱o̱ aʼwóʼ, ikhúún mariʼkhu̱u̱ dí májánʼ nindxa̱ʼwa̱mínáʼ ma̱ni̱ ga̱jma̱a̱ numún›.
11 Dí xúgi̱, mbá péñu,* arathún xa̱bu̱ Judá ga̱jma̱a̱ xa̱bu̱ xuajin Jerusalén: ‹Rígi̱ dí naʼthí Jeobá: “Xtáá ra̱ni̱ ratoo* mbá gamiéjunʼ dí makuʼmá inala ga̱jma̱a̱ xtáá randxa̱ʼo̱o̱ edxu̱ʼ xóo ma̱ni̱ gínáanʼla. Mbá péñu, guniʼñááʼ rajkuala náa kambala dí raʼkhí ga̱jma̱a̱ guri̱ʼkhu̱u̱ xóo nindxa̱la ga̱jma̱a̱ dí nu̱ni̱”›”.
12 Mú ikhiin nithi: “¡Xájmaa rúʼko̱! Numuu rí mu̱nixu̱ xó má awan dí niríyáʼxu̱ ga̱jma̱a̱ xúgiáanʼ mu̱nixu̱ xó má nagua̱ʼa̱ maʼni a̱jkiu̱xu̱ dí xkawiʼ ga̱jma̱a̱ rí gújkhúʼ”.
13 Ikha jngóo rígi̱ dí naʼthí Jeobá:
“Mbá péñu, ikháanʼ míjnáaʼ má gúrajxi̱ náa i̱ʼwáʼ xuajin.
Lá xtáa mbáa tsáa niʼdxawun xóo rígi̱ ráʼ.
Wáxióo Israel bi̱ xóó tsébóoʼ ga̱jma̱a̱ xa̱bu̱ niʼni mbá dí xkawiʼ kayuuʼ...
14 Lá nandáti̱ga̱a̱ idiʼ dí nagrigu náa tsu̱du̱u̱ itsí dí rígá náa bíjní Líbano ráʼ.
O lá mujndooʼ iyaʼ wéʼtsí rí na̱ʼkha̱ asndu mitsínguánʼ ráʼ.
15 Mú xa̱bu̱ xuajñunʼ nimbumún kuyoʼ.
Numuu rí nuxnajxi̱ tsigijñaʼ náa mbá rí nda̱a̱ dí ejmaa mbá kayuuʼga̱jma̱a̱ nuni̱ dí xa̱bu̱ majnguti̱gi̱i̱n náa kambu̱ún, náa kamba̱a̱ wayuu,mu magajnúriñu̱u̱ʼ magún náa kamba̱a̱ dí na̱nguá ki̱ʼni̱ májánʼ,
16 rígi̱ numuu rí ku̱bu̱únʼ maguajta̱a̱ mbá rí maʼni míñúún eʼwíinʼga̱jma̱a̱ maguma gámbáa mbá kayuuʼ* asndu kámuu.
Xúgíinʼ bi̱ gánújngún ikhí muguajún muyejxi̱, mamiñún ga̱jma̱a̱ mubajngaa edxu̱ún.
17 Xó má giñán’ dí na̱ʼkha̱ náa nagájnuu a̱jkha̱ʼ,* maxidíriʼiin náa inún xa̱bu̱ sia̱nʼ ndrígu̱ún.
Mbiʼi rí gáʼkha̱nú gamiéjunʼ inún xámajkhu̱ʼ ka̱ñu̱u̱n ni má xámbáñún”.*
18 Ikhiin nithi: “Guríyalú mbá awan rí muʼni̱i̱ Jeremías, numuu rí xtángoo ndrígu̱ún ndxajkiulú, consejo rí nuxna xa̱bu̱ bi̱ najmañún ga̱jma̱a̱ ajngún profetas* marigá má xúʼko̱. Guʼgua̱, guʼtá ga̱jma̱a̱ numuu* ga̱jma̱a̱ xámajkulú rí ikhaa naʼthí”.
19 Tátá Jeobá, atadxawunʼ,ga̱jma̱a̱ atadxawíín rí nuthi xa̱bu̱ sia̱nʼ ndrígóʼ.
20 Lá mbaʼyóoʼ maguma numa̱a̱ dí májánʼ ga̱jma̱a̱ dí raʼkhí ráʼ.
Numuu rí ikhiin nindii mbá iñáʼ náa dí muxiñúun.
Garmáʼáan a̱jkia̱a̱nʼ xú kaʼnii niguájun náa inaaʼ mu ma̱ta̱ dí májánʼ ga̱jma̱a̱ numún,mu xúʼko̱ xákasngaña̱a̱ʼ xtañún.
21 Ataxnájxi̱i̱n e̱jñu̱ún náa ewiʼ,ataxnájxi̱i̱n makhañún ga̱jma̱a̱ espada.
Atani̱ rí gu̱ʼu̱ muni̱ mbátígi̱i̱n ajmbiu̱ún ga̱jma̱a̱ e̱jñu̱ún.
Xa̱bekha gakañún ga̱jma̱a̱ mbá nandii mbiiʼga̱jma̱a̱ jiámiu̱ún gakañún ga̱jma̱a̱ espada náa nuxmijná.
22 Gawán rí mundxa̱ʼwa̱ asndu náa guʼwúníndo̱ nda̱a̱ tsu̱ma̱ gátaxuʼmíin bi̱ murawíi káñún dí guáʼdáá.
Numuu rí nindii mbá iñáʼ náa muxu̱mu̱u̱ʼGa̱jma̱a̱ nindri̱ga̱ tsáʼkhá majngrádóoʼ rajkúʼ.
23 Mú ikháán Tátá Jeobá,natatsinuuʼ májánʼ awan dí niri̱ya̱ʼ mu muxiñúun.
Xátani̱ mba̱a̱ a̱jkia̱a̱nʼ rí nakiéʼkúúnga̱jma̱a̱ xátani̱ jngudi̱i̱ aʼkhá rí nuxudamíjna̱ náa ikháán.
Atatsíñúúnʼ majnguti̱gi̱i̱n náa inaaʼíndo̱ gátani̱ rí mumíniiʼ numuu dí nakásngáña̱a̱ʼ.
Mbaʼa nota
^ O “atani̱ mbá rí májánʼ”.
^ Náa ajngáa hebreo naʼthí, “na̱ni̱ mújúunʼ”.
^ Náa ajngáa hebreo naʼthí, “mbá náa mujuiyú”.
^ O “este”.
^ Náa ajngáa hebreo naʼthí, “ma̱xnu̱u̱n mbuyáá tsu̱du̱ʼ raʼkháa inuʼ”.
^ O “gaʼyee, bi̱ nuthi dí marigá”.
^ Náa ajngáa hebreo naʼthí, “gu̱ʼni̱ gawíínʼ ga̱jma̱a̱ rajunlú”.
