Jeremías 19:1-15
19 Rígi̱ rí niʼthí Jeobá: “Ayuʼ gáratsi̱ mbá rayaʼ chíʼgíiʼ* dí ku̱ba̱ʼ náa bi̱ naʼni daan. Ayuʼ gajmiáanʼ tikhuun xabuanii ga̱jma̱a̱ tikhuun bi̱ kuya̱ edxu̱u̱ náa ndxajkun,
2 ayuʼ náa mata* A̱ʼdióo Hinón, náa gíʼ Xkrugún bi̱ nuni̱ Daan* ikhí gárata ajngáa rí ikhúún ma̱tha̱a̱nʼ.
3 Marata: ‹Gudxawíín ajngóo Jeobá, reyes bi̱ kúwá náa Judá ga̱jma̱a̱ xa̱bu̱ bi̱ kúwá náa Jerusalén. Rígi̱ rí naʼthí Jeobá bi̱ naʼtáñajúúnʼ ángeles, Dios ndrígóo Israel:
“Ma̱ʼkhá ka̱yo̱ʼ mbá gamiéjunʼ náa xuajin rígi̱, bi̱ gaʼdxawun gamiéjunʼ rígi̱ mamiñúu.*
4 Ma̱ni̱ rígi̱ numuu rí ikhiin niniñu̱ʼ ga̱jma̱a̱ niniña̱a̱nʼ rí asndu nánguá matsiʼnúuʼ xuajin rígi̱. Nuxnajxi̱ tsigijñaʼ náa inún eʼwíinʼ dioses, ni má ikhiin ni má wajin xiʼñúúnʼ ni má reyes bi̱ nikúwá náa Judá na̱nguá niniʼnuuʼ nákhá ginii rígi̱, ga̱jma̱a̱ náa mbaaʼ rígi̱ ninimajnííʼ eʼdiún xa̱bu̱ bi̱ ndaa aʼkhúún.
5 Nini̱ mbaaʼ mitsídánʼ náa Baal mu mutsikhi̱i̱n e̱jñu̱ún náa aguʼ xóo tsigijñaʼ dí nakarámáʼ náa Baal mbá dí ikhúún tátañájúúnʼ muni̱, ni má asndu nditháan tándxa̱ʼwa̱mínáʼ”›.*
6 ‹“Ikha jngóo atayáá, na̱ʼkha̱ mbiʼi, eʼthí Jeobá, dí ni xúxna mbiʼíí mbaaʼ rígi̱ Tófet ni má mata A̱ʼdióo Hinón, muxna mbiʼíí mata náa Niradíin.
7 Ma̱ni̱ gámbáa awan dí niríyaʼ Judá ga̱jma̱a̱ Jerusalén náa mbaaʼ rígi̱ ma̱ngaa ma̱ni̱ rí makhañún ga̱jma̱a̱ espada náa inún xa̱bu̱ sia̱nʼ ga̱jma̱a̱ náa ñawúúnʼ bi̱ nandún muradíin. Maxnu̱u̱n xúñún mu̱phu̱ xujkhú xnaʼ bi̱ jngruigu̱u̱n mekhuíí ga̱jma̱a̱ xujkhúʼ bi̱ kúwá náa ku̱ba̱ʼ rígi̱.
8 Ma̱ni̱ rí xuajin rígi̱ maguajta̱a̱ mbá rí maʼni míñúún eʼwíinʼ ga̱jma̱a̱ maguma gámbáa mbá kayuuʼ.* Xúgíinʼ bi̱ gánújngún ikhí muguajún muyejxi, mamiñún, mujuiyú ga̱jma̱a̱ numuu xúgíʼ gamiéjunʼ.
9 Ma̱ni̱ rí mu̱phu̱ xuñúúnʼ jiámiu̱ún ga̱jma̱a̱ wa̱ʼxiúnʼ, mu̱phu̱ mijna kaníkhiin asndu ni má xúyáá rí muni̱ índo̱ bi̱ sia̱nʼ gajmiún ga̱jma̱a̱ bi̱ nandún muradíin gúruguami̱ʼi̱i̱n”›.
10 Ikhú ataxpíʼthá rayaʼ náa inún xa̱bu̱ bi̱ nadxuʼ gajmiáanʼ,
11 ga̱jma̱a̱ arathún: ‹Rígi̱ rí naʼthí Jeobá bi̱ naʼtáñajúúnʼ ángeles: “Xígi̱ kaʼnii gákumígúu xuajin rígi̱ xóo índo̱ mbáa naxpíʼthá mbá rayaʼ dí niʼni bi̱ naʼni daan rí asndu nánguá xóo maguma májáanʼ, ga̱jma̱a̱ mudi̱ín wajñúúnʼ náa Tófet asndu ni xáguanúu nimbá chíʼgíiʼ ku̱ba̱ʼ”›.
12 ‹Rúʼko̱ rí ma̱ni̱ náa mbaaʼ rígi̱ xúʼko̱ má gániu̱u̱n xa̱bu̱ bi̱ kúwá gi̱i̱, eʼthí Jeobá, mu xúʼko̱ xuajin rígi̱ mani̱ndxu̱u̱ xóo Tófet.
13 Guʼwá dí rígá náa Jerusalén ga̱jma̱a̱ guʼwún reyes bi̱ kúwá náa Judá niguma tsagáá xó má mbaaʼ rígi̱, Tófet, xúʼko̱, xúgíʼ guʼwá rí náa tsu̱du̱u̱ nijuixnáxi̱ tsigijñaʼ náa inuu xúgíʼ dí rígá mekhuíí ma̱ngaa tsigijñaʼ dí nagadirámuuʼ nijuixnáxi̱ náa inún eʼwíinʼ dioses›”.
14 Índo̱ Jeremías nitanga̱a̱ náa Tófet, náa rí Jeobá nikuʼmaa maʼga gáʼtáriyaʼ ajngáa, ni̱jkha̱ náa rexo̱o̱ goʼwóo Jeobá ga̱jma̱a̱ niʼthún xúgíinʼ xa̱bu̱ xuajin:
15 “Rígi̱ rí naʼthí Jeobá bi̱ naʼtáñajúúnʼ ángeles, Dios ndrígóo Israel: ‹Makuʼnguánʼ náa xuajin rígi̱ ga̱jma̱a̱ náa xúgíʼ xuajin dí tri̱ga̱ mijngii gamiéjunʼ rí nitha̱ makunguanʼ, numuu rí nini̱ gújkhúʼ a̱jkiu̱ún* ga̱jma̱a̱ nini̱ gaʼduunʼ munimbu̱u̱n ajngóʼ›”.
Mbaʼa nota
^ O “lajuíin”.
^ O “bóo”.
^ O “Puerta de los Tiestos”.
^ Náa ajngáa hebreo naʼthí, “muwán cháʼwuun”.
^ Náa ajngáa hebreo naʼthí, “táʼkha̱ a̱jkiu̱nʼ ma̱ni̱”.
^ Náa ajngáa hebreo naʼthí, “mbá náa mujuiyú”.
^ Náa ajngáa hebreo naʼthí, “gújkhúʼ itsu̱ rexu̱ún”.
