Jeremías 2:1-37
2 Nigruígú ajngóo Jeobá. Niʼthúnʼ:
2 “Ayuʼ ga̱jma̱a̱ aratá náa xúgíʼ xuajin Jerusalén: ‹Rígi̱ rí naʼthí Jeobá:
“Nditháan tsímbumuʼ ngajua rí nitasngájmuʼ nákha dxáʼgú nindxa̱a̱ʼ,ngajua rí nitasngájma índo̱ nicha̱a̱ʼ matanujúnʼ,ma̱ngaa xóo nidxu̱ʼ kidxuʼ nákha ni̱jkhá ka̱ña̱a̱n náa ku̱ba̱ʼ mijxooʼ,*náa mbá ku̱ba̱ʼ rí nda̱a̱ rí kiʼdu.
3 Israel ninindxu̱u̱ mikaʼwii náa inuu Jeobá, rí nijma̱a̱ ginii náa niʼdu”›.
‹Asndu tsáá má bi̱ naʼni gawúunʼ nagiʼdoo aʼkhúun.
Na̱ʼkha̱nú gamiéjunʼ náa inuu›, eʼthí Jeobá”.
4 Bi̱ kúwá náa goʼwóo Jacob gudxawíín ajngóo Jeobá,ga̱jma̱a̱ xúgiáanʼ ikháanʼla bi̱ kúwáanʼ náa goʼwóo Israel.
5 Rígi̱ rí naʼthí Jeobá:
“Ndiéjunʼ rí nixkamaa wajin xiʼñála náa ikhúúnmu matsíngúunʼ wéñuuʼ náa ikhúúnga̱jma̱a̱ magún kidxu̱únʼ xándú bi̱ nda̱a̱ rí ejmiin ma̱ngaa rí asndu ikhiin nánguá niguaʼdáá numún xá.
6 Na̱nguá nirajxi̱: ‹Náá xtáa Jeobá,bi̱ niguwáanʼlu náa ku̱ba̱ʼ ndrígóo Egipto,bi̱ nixnulu ikha náa ku̱ba̱ʼ mijxooʼ,náa mbá ku̱ba̱ʼ mijxooʼ dí rígá mbaʼa iñáʼnáa mbá ku̱ba̱ʼ mijxooʼ dí mikína mbiʼ,náa mbá ku̱ba̱ʼ rí ndawa̱a̱ tsáa ejkha̱ga̱jma̱a̱ nimbáa ndawa̱a̱ tsáa xtáa ikhí rá.›
7 Nda̱wa̱á ni̱ʼkhá kaguáanʼla náa ku̱ba̱ʼ rí májánʼmu mu̱phu rí najma̱a̱ ikhí ga̱jma̱a̱ xúgíʼ rí májánʼ dí rígá.
Mu índo̱ nitaʼala ni̱ni̱ tsagáá ku̱bo̱ʼ,rí ni̱xna̱la ni̱ni̱ rí xágiʼdoo numuu.
8 Ndxajkun na̱nguá nirajxi̱: ‹Náá xtáa Jeobá rá.›
Bi̱ kaʼñún musngáa Xtángoo na̱nguá niniʼniúnʼ,bi̱ nindxu̱ún baxtúu nixujximíjna náa inuʼ,bi̱ nindxu̱ún profetas nitariyaʼ ga̱jma̱a̱ numuu Baal,ga̱jma̱a̱ nigún kidxu̱únʼ bi̱ nda̱a̱ rí ejmiin muni̱ rí májánʼ.
9 ‹Ikha jngóo makruigáanʼla má xúʼko̱, eʼthí Jeobá,ga̱jma̱a̱ makruígi̱i̱n e̱jñu̱ún e̱jñala›.
10 ‹Guʼgualá náa ku̱bu̱únʼ xa̱bu̱ kitim dí rígá náa rawuunʼ lamáa* ga̱jma̱a̱ gu̱ya̱a̱.
Xúʼko̱, guxuʼnguíinʼ bi̱ magún kuñu̱u̱n ajngáa náa Quedar ga̱jma̱a̱ gu̱ya̱a̱ májánʼ,gu̱ya̱a̱ á mu nirígá xóo rígi̱.
11 Lá mbá miʼtsú mbá xuajin niniñu̱u̱nʼ dioses ndrígiu̱ún mu mbuyamajkún bi̱ na̱nguá nindxu̱ún dioses ráʼ.
Mú, xuajñunʼ niniñuʼ ikhúún Dios bi̱ gíʼdoo xúgíʼ tsiaki̱i̱ ga̱jma̱a̱ mbá dí ragíʼdoo numuu.
12 Mekhu atiejxi̱ ga̱jma̱a̱ gaʼniaanʼ tsiánguá,gaguáʼáán ga̱jma̱a̱ gamiñáanʼ eʼthí Jeobá,
13 numuu rí xa̱bu̱ xuajñunʼ a̱jma̱ dí ra̱májánʼ nini̱:
niniñuʼ ikhúún bi̱ nindxu̱ʼ iduu i̱ya̱a̱ʼ rí ndaʼyaga̱jma̱a̱ nindii iñáʼ,iñáʼ rí gíʼdoo tsúwo̱o̱ʼ, rí tséʼngo̱o̱ gájnu̱ʼ iyaʼ›.
14 ‹Lá ñumbáá nindxu̱u̱ Israel ráʼ. Lá nindxu̱u̱ mbáa ñumbáá bi̱ nigumaa náa goʼwóo patriúun xáʼ.
Á mu na̱nguá, náa numuu rí nijuixnájxi̱i̱ mu magajta káyííʼ xúgíʼ rí gíʼdoo xá.
15 Ikhaa nundxa̱ʼwa̱jmaa león bi̱ gújkuíinʼ*nuxujxi̱ aʼwún.
Nini̱ rí maʼni gamíi náa ku̱bo̱o̱ʼ.
Ga̱jma̱a̱ xuajñuu nindra̱ʼa̱a̱ agiuuʼ nikha̱a̱, ndáwi̱i̱n xa̱bu̱ ikhí.
16 Xa̱bu̱ bi̱ kúwá náa Nof* ga̱jma̱a̱ Tahpanés naʼphu̱ nu̱ʼu̱u̱n edxa̱a̱ʼ.
17 Lá raʼkháa ikháán má nitayáʼ rí magíʼnáaʼnumuu rí nitatsíñáánʼ Jeobá Dios ndrígáaʼíndo̱ ikhaa xtáa raxnáaʼ ikha náa kamba̱a̱ xáʼ.
18 Rí xúgi̱, náá numuu rí nandaaʼ mi̱dxu̱ʼ náa kamba̱a̱ rí na̱jkha̱ náa Egiptoga̱jma̱a̱ migi̱i̱n iyaʼ dí rígá náa Sihor* rá.
Náá numuu rí nandaaʼ mi̱dxu̱ʼ náa kamba̱a̱ rí na̱jkha̱ Asiriaga̱jma̱a̱ migi̱i̱n iyaʼ rí na̱jkha̱ náa Mañu* rá.
19 Gajmañaaʼ náa dí raʼkhí nitani̱ga̱jma̱a̱ rí táñejún jmbu gáxpríguáaʼ.
Gajmañaaʼ dí raʼkhí ga̱jma̱a̱ miʼkhu̱u̱n nindxu̱u̱ rímatatsiʼñáánʼ Jeobá Dios ndrígáaʼ,na̱nguá nitasngájma nimbá gamíi náa inuʼ ikhúún› eʼthí Tátá bi̱ itháán mba̱a̱, Jeobá bi̱ naʼtáñajúúnʼ ángeles.
20 ‹Numuu rí niʼníí má nixpígaʼ yugo ndrígáaʼga̱jma̱a̱ nixkuʼtu cadena ndrígáaʼ.
Mú niratá: “Xáni̱ ñajuaanʼ”,náa mámbá bíjní rí mitsídánʼ ga̱jma̱a̱ náa mámbá agoo ixi̱ mba̱ʼu̱ rí maxaʼkri̱ga̱a̱n xtabáaʼ ratagujuamínáʼ.
21 Nindxa̱a̱ʼ xó mbá uva rí maña̱ʼ rí itháan májánʼ rí ikhúún nidu dí nigaja̱a̱ náa mbá tsígáʼ rí itháan májánʼ.
Xú kaʼnii nitani̱ rí nitriʼkuminaʼ ga̱jma̱a̱ náa ikháán ni̱ʼkha̱ ñawúunʼ uva xáná rá.›
22 ‹Tséʼniuu á mu nataxmíndumínaʼ ga̱jma̱a̱ mi̱na májánʼ, miʼsmbáán má xúʼko̱ gáʼni̱,aʼkháanʼ mani̱ndxu̱u̱ tsaga náa inuʼ ikhúún›, eʼthí Tátá Jeobá bi̱ itháán mba̱a̱.
23 Xú kaʼnii gándoo gárata ‹Na̱nguá ni̱ni̱ tságamináʼ,na̱nguá ni̱jkhá kidxu̱únʼ Baal›.
Atayáá májánʼ rí nitani̱ náa mata.*
Atiejxi̱i̱ májánʼ rí nitani̱.
Nindxa̱a̱ʼ xóo mbáa camello e̱ʼgu̱ʼ bi̱ nagáyúu nacha̱,bi̱ mbaʼ najkháá ragáyúu gi̱i̱ ñuʼún,
24 mbáa búrra xáná bi̱ naguʼwuun náa ku̱ba̱ʼ mijxooʼ,nayeyuu náa giñánʼ mu mbayáaʼ mbáa xujkhú i̱ya̱ mu maʼni ga̱jma̱a̱ rí nagua̱ʼa̱ náa a̱jkiu̱u̱n.
Tsáá gáʼngo̱o̱ gátsíjíi índo̱ rí nandoo majxka xá.
Nimbáa xujkhú i̱ya̱ xáʼgaaʼ dí mbayáaʼ.
Náa gu̱nʼ rí nuxka maxkamaa.
25 Israel xátatsiʼñááʼ rí maʼguuʼ rajkuáaʼni má xátatsiʼñááʼ rí mujndooʼ aphaaʼ numuu rí nadxu̱ʼ kidxuuʼ mbá dí ragíʼdoo numuu.
Mú ikháán niratá: ‹¡Na̱nguá! ¡Xájmaa rúʼko̱!
Nindoʼ ka̱ñu̱u̱n bi̱ tséniʼniúnʼ*ga̱jma̱a̱ maʼgá kidxu̱únʼ ikhiin›.
26 Xó má mbáa kuʼwáʼ nati̱yu̱u̱ʼ índo̱ nuxkamaa,bi̱ kúwá náa goʼwóo Israel niguma majti̱i̱nʼ,ikhiin, reyes ndrígu̱ún ga̱jma̱a̱ príncipes,ndxajkun, ga̱jma̱a̱ profetas ndrígiu̱ún.
27 ‹Ikháán nindxa̱a̱ʼ anu̱ʼ›* ethán mbá ixi̱,‹Ikháán nitani̱ rí makuwáanʼxu̱› ethán mbá itsí.
Mú náa ikhúún nánguá tanga̱a̱ inala, nitangañaʼla xígií.
Índo̱ gáʼkha̱nú gamiéjunʼ mu̱tha̱‹¡Ayi̱, atani̱ káwáanʼxu̱!›.
28 Náá nigún dioses bi̱ nitani̱i̱ rá.
Gaguwáʼ ikhiin muni̱ kríña̱a̱nʼ mbiʼi dí gáraʼdáá gamiéjunʼ á mu majmiin.
Numuu dí ra̱ʼkhá tháán mbaʼin dioses ndrígáaʼ Judá, xó má mbaʼa xuajñaaʼ.
29 ‹Náá numuu dí nuxurígu̱u̱n má xúʼko̱ rá.
Náá numuu dí xúgiáanʼ kayuuʼ nixuxímíjná náa inuʼ rá.› Eʼthí Jeobá.
30 Nda̱a̱ má numuu nixpajtíin e̱jña̱la.
Ikhiin táʼndún gundrigú dí nixprígún.
Espada ndrígala niʼkhu̱u̱n profeta ndrígiálaxó mbáa león bi̱ najmangu̱u̱ʼ.
31 Ikháanʼla xa̱bu̱ xuajñunʼ, gudxawíín májánʼ ajngóo Jeobá.
Lá ninindxu̱ʼ xóo mbá ku̱ba̱ʼ mijxooʼ náa Israel ráʼ.
O mbá ku̱ba̱ʼ rí mikína mbiʼ ráʼ.
Náá numuu rí xa̱bu̱ xuajñunʼ nuthi, ‹Kuwáanʼxu asndu xó má eyuxu,ni xutangáanʼxu itháan náa ikháán›.
32 Lá ma̱ndoo mbáa ndxáʼgú* mambumuu xóo niʼnirataminaʼ ráʼ.
O mbáa dxáʼgú bi̱ inu manujúnʼ mambumuu xtíin rí kaxtoʼóo náa tso̱xto̱o̱ ráʼ.
Mú xa̱bu̱ xuajñunʼ nimbumún kuyoʼ asndu nákhá wajyúuʼ.
33 ¡Ikháán a̱ʼgu̱, ra̱ʼkhá tháán najmañaaʼ matríyaʼ awan rí mi̱dxu̱ʼ gátaʼyáaʼ mbáa xa̱biya̱ ma̱ndoo kaʼyaaʼ!
Ikháán má nirasngáminaʼ mi̱dxu̱ʼ náa kamba̱a̱ dí ra̱májánʼ.
34 Asndu náa xtíñáaʼ kagu̱u̱ eʼdiún bi̱ mingíníi ga̱jma̱a̱ bi̱ nda̱a̱ aʼkhúún,maski ajndu táyóo xóo nitu̱ʼu̱u̱n ga̱jma̱a̱ tsiaki̱i̱,xúgíʼ xtíñaaʼ kagu̱u̱ eʼdiún.
35 Mú ikháán naratá ‹Nda̱a̱ aʼkhúnʼ.
Mbáa niwi̱ji̱i̱ má dí nakiʼnáa kaʼyoʼ›.
Dí xúgi̱ maʼgá ka̱ña̱a̱n mambanúu numaaʼnumuu dí naratá ‹Na̱nguá nikuʼdáminaʼ aʼkhá›.
36 Náá numuu dí tsetagíiʼ a̱jkia̱a̱nʼ matriʼkhu̱u̱ dí xóo natani̱ rá.
Egipto ma̱ngaa matiya̱a̱ʼ gáʼni,xó má niti̱ya̱a̱ʼ niʼni Asiria.
37 Ga̱jma̱a̱ numuu rígi̱ frájkárígú edxa̱a̱ʼ* gágajna̱a̱ʼ,numuu dí Jeobá tágruiguíin bi̱ ikháán niku̱ma̱a̱ʼ xtañún,ikhiin xúni̱ dí maraxtaa májánʼ”.
Mbaʼa nota
^ O “desierto”.
^ O “islas”.
^ O “león bi̱ guáʼdáá tátsiuún náa aphún”.
^ O “Menfis”.
^ Xóo muʼthá, mbá ñawúunʼ mañu Nilo.
^ Xóo muʼthá, mañu Éufrates.
^ O “bóo”.
^ O “dioses bi̱ ragájkhun”.
^ O “táteʼ”.
^ Náa ajngáa hebreo naʼthí, “ndxá’gú bi xóó tsébóo’ ga̱jma̱a̱ xabu”.
^ Náa ajngáa hebreo naʼthí, “asndu xtajthuun edxa̱a̱ʼ”.
