Jeremías 20:1-18
20 Pasjur a̱ʼdióo Imer, bi̱ nindxu̱u̱ ndxajkun ma̱ngaa nindxu̱u̱ bi̱ ndaʼyoo xóo eguma ñajunʼ náa goʼwóo Jeobá, ikhaa ma̱ngaa niʼdxawun índo̱ Jeremías niʼtáriyaʼ xúgíʼ dí marigá.
2 Ikhú Pasjur nixnúu profeta* Jeremías ga̱jma̱a̱ nigídáaʼ náa ixi̱* rí najmún mu muni̱ rí mbáa mamínuuʼ dí rígá náa Xkrugoo Benjamín dí gíʼ rijma̱a̱,* náa goʼwóo Jeobá.
3 Mú imbo̱o̱ mbiʼi, índo̱ Pasjur niniñuuʼ magajnáa Jeremías náa ixi̱, ikhú Jeremías niʼthúu̱n:
“Mbiʼyaaʼ Pasjur mú Jeobá niriʼkhu̱u̱, rí xúgi̱ magumbiʼyaaʼ Gamíi asndu Náá.
4 Numuu dí rígi̱ nindxu̱u̱ rí naʼthí Jeobá: ‹Ma̱ni̱ rí mamiñáanʼ xtayaminaʼ ga̱jma̱a̱ mamiñún gátani̱ xúgíinʼ bi̱ nambájxáaʼ gajmiáanʼ. Ikhiin makhañún ga̱jma̱a̱ espada ndrígu̱ún xa̱bu̱ sia̱nʼ, ikháán ma̱ta̱ya̱a̱. Xúgíinʼ xa̱bu̱ xuajin Judá maxnajxíin náa ñawúunʼ rey ndrígóo Babilonia, ikhaa maʼga kagui̱i̱n náa Babilonia, magudíin ga̱jma̱a̱ espada.
5 Maxnajxí náa ñawúunʼ xa̱bu̱ sia̱nʼ xúgíʼ dí gíʼdoo numuu dí rígá náa xuajin rígi̱ ga̱jma̱a̱ xúgíʼ dí guáʼdáá xa̱bu̱, xúʼko̱ má xúgíʼ dí guáʼdáá rí gíʼdoo numuu reyes bi̱ kúwá náa Judá. Ikhiin murawíi mu maʼni ndrígu̱ún ikhiin ga̱jma̱a̱ magún kudúún náa Babilonia.
6 Mú ikháán Pasjur, xúʼko̱ má xúgíinʼ bi̱ kúwá náa guʼwáaʼ maʼga kiʼdáanʼla. Maʼga kiʼñáán Babilonia, ikhí gákáñáanʼ ga̱jma̱a̱ ikhí gájuiʼdi̱ín gajmiáanʼ xúgíinʼ bi̱ nambájxáaʼ gajmiáanʼ, numuu dí minduwaʼ nindxu̱u̱ dí nirathúún›”.
7 Nitani̱ nduwúúnʼ Tátá Jeobá ga̱jma̱a̱ ninimboʼ náa minduwaʼ rígi̱.
Nijmaaʼ tsiaki̱i̱ ndrígáaʼ náa ikhúún ga̱jma̱a̱ niʼnga̱a̱ʼ.
Rí xúgi̱, xúgíʼ mbiʼi nunduʼwajmún,xúgíinʼ xa̱bu̱ i̱ndó nutsijmún.
8 Mámbá rí na̱tha̱ ndayóoʼ rí mandxa̱ʼwa̱,ga̱jma̱a̱ numuu dí nakáñún xa̱bu̱ ma̱ngaa numuu rí naguma gámbáa.
Ajngóo Jeobá niʼni rí xa̱bu̱ mundxaʼwajmún ga̱jma̱a̱ mutsijmún xúgíʼ mbiʼi.
9 Ikhú ni̱tha̱: “Xáta itháan ga̱jma̱a̱ numuuni má xáta itháan ga̱jma̱a̱ numuu mbiʼyuu”.
Mú ajngóo nigutajxi̱i̱ xóo aguʼ náa awúu̱n a̱jkiu̱nʼ xóo mbá aguʼ rí nakha asndu náa awúu̱n itsuʼ,Nánguá niʼngo̱ʼ itháan rí maʼni wíyúʼ,a̱jkiu̱nʼ nánguá niʼngo̱o̱ itháan.
10 Numuu dí nidxawuun mbaʼa dí raʼkhí dí nandún muniu̱ʼ,gamíi rígá asndu náá.
“¡Guxruígala! ¡Guʼgua̱ gúxruígalú!”.
Xúgíinʼ bi̱ nuthu̱nʼ dí maxtáá májánʼ kúwá xawii mbuyáá xóo gáxpátrigu̱u̱n, nuthi:
“Mbáa ikhaa marigá mbá náa manga̱wa̱a̱n,ga̱jma̱a̱ xúʼko̱ maʼngulú muʼni gajmiúlú ma̱ngaa muʼni rí mamínuuʼ náa xúgíʼ dí raʼkhí niʼniulúʼ”.
11 Mú Jeobá nixtáa ga̱jma̱á nindxu̱ʼ xóo mbáa soldado mixkujiiʼ ga̱jma̱a̱ gamíi.
Ikha jngóo bi̱ nuxkoʼ majnguti̱gi̱i̱n ga̱jma̱a̱ xáʼngu̱u̱n.
Ra̱ʼkhá tháán gátiñu̱u̱nʼ numuu dí xágájnuu májánʼ rí nandún muni̱.
Dí magajnúu gamajkhún mbajyúuʼ asndu kámuu, nimbáa xámbumuu.
12 Mú ikháán Tátá Jeobá bi̱ naʼtáñajúúnʼ ángeles, natayáá xóo nindxu̱u̱ xa̱bu̱ jmbii,Natayáá xóo endxaʼwamíjna̱ xa̱bu̱ asndu rí itháán mi̱jnu̱ʼ* ga̱jma̱a̱ ndiéjunʼ rígá náa awúu̱n a̱jkiu̱ún.
Atatsíñúnʼ mba̱yo̱o̱ xóo gátaniu̱u̱n ikhiin,numuu rí náa ñawáanʼ niniʼñúuʼ dí matanimbáníí numuʼ.
13 ¡Gu̱ni̱ ajmúú náa inuu Jeobá! ¡Gu̱ni̱ mba̱a̱ Jeobá!
Numuu rí ikhaa niʼni káwíin xa̱bu̱ ngíníi náa ñawúúnʼ xa̱bu̱ xkawi̱i̱nʼ.
14 ¡Itháán májánʼ má á mu táxtáá!
¡Itháan májánʼ gáʼni á mu ru̱dúʼ* na̱nguá niʼniún!
15 Gajuiʼtá tsríguíi xa̱bu̱ bi̱ ni̱jkha̱ gáʼthúu̱n anu̱ʼ,* niʼthúu̱n:
“¡Niraʼdaa mbáa ada̱, mbáa dxámá niraʼdaa!”,ga̱jma̱a̱ niʼni rí maʼdxuu a̱jkiu̱u̱n.
16 Xa̱bu̱ buʼko̱ ganindxu̱u̱ xóo xuajin dí Jeobá tágáwíinʼ a̱jkiu̱u̱n maʼni gámbóo.
Gaʼdxawun aʼwá rí miʼcha̱ ga̱jma̱a̱ aʼwá dí mugíʼdi̱i̱ muxmijná rí ta̱pha̱ mbiʼi.
17 Náá numuu dí tákáñúnʼ náa awúu̱n ru̱dúʼ rá.
Mu xúʼko̱ ikhí gánindxu̱u̱ náa majuiʼdiúnga̱jma̱a̱ xúʼko̱ maguanúʼ má ikhí asndu kámuu.
18 Náá numuu rí ndiyóoʼ magajnúʼ náa awúu̱n ru̱dúʼ,mu mba̱yo̱o̱ xúgíʼ ga̱ʼkhu̱ ga̱jma̱a̱ gamiéjunʼ rígi̱ma̱ngaa makañúnʼ ga̱jma̱a̱ ma̱jti̱ʼ rá.
Mbaʼa nota
^ O “gaʼyee, bi̱ naʼthí dí marigá”.
^ O “cepo”. Náa ajngáa hebreo naʼthí, “rígi̱ nindxu̱u̱ náa nuxudaʼ ñawu̱únʼ, rajkhún ga̱jma̱a̱ edxu̱ún”.
^ O “Puerta Superior de Benjamín”.
^ Náa ajngáa hebreo naʼthí, “riñón”.
^ O “náneʼ”.
^ O “táteʼ”.
