Jeremías 21:1-14
21 Jeremías nigruigú ajngóo Jeobá índo̱ rey Sedequías nikuʼmaa Pasjur a̱ʼdióo Malkías ga̱jma̱a̱ Sofonías a̱ʼdióo Maaseya, bi̱ nindxu̱u̱ ndxajkun, mu munda̱ʼa̱a̱ rígi̱:
2 “Mbá péñu,* atrajxi̱i̱ Jeobá ga̱jma̱a̱ numuxu, numuu dí rey Nabucodonosor* bi̱ xtáa náa Babilonia na̱ʼkha̱ mu maxmína̱ʼ ga̱jma̱á nindxu̱xu̱. Ma̱ʼni̱í á mu Jeobá ma̱ndoo mambáyuxuʼ maʼni milagro mu matsudaa ma̱ʼga̱a̱”.
3 Jeremías niʼthúún: “Guta̱a̱nla rígi̱ Sedequías:
4 ‹Rígi̱ rí naʼthí Jeobá, Dios ndrígóo Israel: “Ma̱ni̱ rí ajua̱nʼ dí kudala dí nuxmijná ga̱jma̱a̱ matanga̱a̱ kaguáanʼla, rí xúgi̱ najmala mu mumbáyumíjnála náa rey ndrígóo Babilonia ga̱jma̱a̱ náa xa̱bu̱ caldeos bi̱ kúwá rugumáʼáanʼ xtájtsí. Ga̱jma̱a̱ magímbo̱o̱ ajua̱nʼ* náa tapo̱o̱ xuajin.
5 Ikhúún mínu̱u̱ʼ maxmína̱ʼ ga̱jma̱á nindxa̱la ga̱jma̱a̱ tsiaki̱i̱ rí gíʼdoo ñawúnʼ numuu rí tsénigu̱ʼ dí eni̱la, ikha jngóo nakiʼnún ga̱jma̱a̱ nakásngañu̱ʼ.
6 Ma̱ni̱ gawúnʼ xa̱bu̱ bi̱ kúwá náa xuajin rígi̱, xa̱bu̱ ga̱jma̱a̱ xujkhúʼ. Mbá nandii mbiiʼ magudíin”›.
7 ‹“Nda̱wa̱á dí rúʼko̱, eʼthí Jeobá, ma̱ni̱ dí rey Sedequías bi̱ xtáa náa Judá, gajmíi̱n xa̱bi̱i̱ ma̱ngaa xa̱bu̱ xuajin, bi̱ gákáwíin náa nandii mbiiʼ, náa espada ma̱ngaa náa ewiʼ, maniʼñúúnʼ náa ñawúunʼ rey Nabucodonosor* bi̱ xtáa náa Babilonia ga̱jma̱a̱ náa ñawúúnʼ xa̱bu̱ sia̱nʼ ndrígu̱ún ma̱ngaa náa ñawúúnʼ bi̱ nandún muradíin. Ikhaa magudíin ga̱jma̱a̱ espada. Ni xágáwíinʼ a̱jkiu̱u̱n kaʼñún, ni má xáʼni mba̱a̱ a̱jkiu̱u̱n kaʼñún”›.
8 Arathún xa̱bu̱ xuajin: ‹Rígi̱ rí naʼthí Jeobá: “Naʼgíʼ náa inala ikháanʼ kamba̱a̱ dí maʼga kaguáanʼ mu makuwáanʼ ga̱jma̱a̱ kamba̱a̱ dí maʼga kaguáanʼ makhañála.
9 Xúgíinʼ bi̱ gáguanún náa xuajin makhañún ga̱jma̱a̱ espada, ewiʼ o nandii mbiiʼ. Mú xúgíinʼ bi̱ gágajnún ga̱jma̱a̱ nu̱ni̱ wabamijná náa inún xa̱bu̱ caldeos bi̱ kúwá ruguami̱ʼi̱i̱n makáwíin, rúʼko̱ nindxu̱u̱ rí makánún”›.*
10 ‹“Numuu dí niraʼwíí ma̱ʼkhá ka̱yo̱ʼ mbá gamiéjunʼ náa xuajin rígi̱,* ki xóo ma̱ʼkhá ka̱yo̱ʼ dí májánʼ, eʼthí Jeobá. Majuixnájxi̱ náa ñawúunʼ rey ndrígóo Babilonia ga̱jma̱a̱ ikhaa matsikháa”.
11 Bi̱ kúwá náa goʼwóo rey ndrígóo Judá, gudxawíín ajngóo Jeobá.
12 Ikháanʼla bi̱ kuwáanʼ náa goʼwóo David, rígi̱ rí naʼthí Jeobá:
“Xúgíʼ mbiʼi gu̱ni̱ dí marigá rí jmbu,gu̱ni̱ káwíin bi̱ nigu̱ma̱ kuʼwúún náa ñawúúnʼ bi̱ nuni̱ nduwaʼ,mu xúʼko̱ dí nakásngañu̱ʼ xakamuu xóo mbá aguʼga̱jma̱a̱ dí mikamuu má xúʼko̱ dí nimbáa xáʼngo̱o̱ gáʼni wíyúuʼga̱jma̱a̱ numuu dí raʼkhí nuni̱la”›.
13 ‹Gi̱i̱ xtáá ma̱ni̱ gínáanʼla, xa̱bu̱ bi̱ kúwáanʼ náa mata,*ikháanʼla xa̱bu̱ xuajin bi̱ kúwáanʼ náa tsu̱du̱u̱ itsí›, eʼthí Jeobá.
‹Ikháanʼla bi̱ nu̱ta̱, “tsáá gágajtaa maʼni gínáánʼlú rá.
Tsáá gáʼngo̱o̱ gáto̱ʼo̱o̱ náa guʼwúlú rá.”
14 Ma̱ni̱ gínáanʼlaxó má niʼni mámbáa, eʼthí Jeobá.
‹Magído̱o̱ʼ agiuuʼ mi̱kha xaxi̱ ndrígáaʼ,mi̱kha xúgíʼ dí rígá›”.
Mbaʼa nota
^ O “atani̱ mbá rí májánʼ”.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ O mbáa “magímbiín xa̱bu̱”.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ Náa ajngáa hebreo naʼthí, “rí nuda̱a̱ náa guerra”.
^ Náa ajngáa hebreo naʼthí, “ni̱ni̱ inuʼ náa xuajin rígi̱”.
^ O “bóo”.
