Jeremías 23:1-40
23 “¡Gíníinla baxtúu bi̱ nuni̱ gámbíin mugu̱ bi̱ kúwá náa mbayuʼ ga̱jma̱a̱ nuxkúún!”, eʼthí Jeobá.
2 Rígi̱ nindxu̱u̱ dí Jeobá Dios ndrígóo Israel, naʼthí ga̱jma̱a̱ numún baxtúu bi̱ nuñewu̱u̱n xa̱bu̱ xuajñunʼ: “Ikháanʼ nuxkúún mugiu̱ʼ ga̱jma̱a̱ ni̱nila má xúʼko̱ rígi̱ na̱nguá niña̱wu̱nla̱”.
“Ikha jngóo ma̱ni̱ rí mumíníinʼla ga̱jma̱a̱ numuu dí raʼkhí ni̱nila”, eʼthí Jeobá.
3 “Nda̱wa̱á magímbi̱ín mugiu̱ʼ náa xúgíʼ ku̱ba̱ʼ rí ikhúún nixidíríʼiin ga̱jma̱a̱ maʼkháaʼ kagui̱i̱n náa mbaaʼ rí nuphiʼtsu, ikhí mawiʼthúún ga̱jma̱a̱ maʼga̱nú maʼni mbaʼin.
4 Magruígi̱i̱n náa ikhiin baxtúu bi̱ gajkhun muñewu̱u̱n. Xámíñún ni má xáguíʼiin ga̱jma̱a̱ nimbáa xándatiga̱a̱”, eʼthí Jeobá.
5 “Gu̱ya̱a̱, na̱ʼkha̱ mbiʼi, eʼthí Jeobá, ma̱ni̱ rí náa David makráʼáan mbá rudiuuʼ* rí maʼni dí jmbu. Mbáa rey maʼtáñajunʼ ga̱jma̱a̱ ku̱ma̱ maʼni xó má kaʼyoo ga̱jma̱a̱ maʼni rí jmbu náa tsu̱du̱u̱ ku̱ba̱ʼ.
6 Mbiʼi rí maxtáa maguma kríyaaʼ Judá, ní xámíñuu maxtáa Israel. Xúgi̱ kaʼnii gágu̱ mbiʼyuu: Náa Jeobá na̱ʼkha̱ rí májánʼ”.*
7 “Mú, na̱ʼkha̱ mbiʼi, eʼthí Jeobá, rí ni xájuiʼthá: ‹¡Na̱xna̱ ajngóʼ ga̱jma̱a̱ numuu mbiʼyuu Jeobá, bi̱ niríyaaʼ xuajin Israel náa ku̱ba̱ʼ ndrígóo Egipto!›.
8 Rí majuiʼthá mani̱ndxu̱u̱: ‹Na̱xna̱ ajngóʼ ga̱jma̱a̱ numuu mbiʼyuu Jeobá, bi̱ niguwíin ga̱jma̱a̱ ni̱ʼkha̱a̱ kagui̱i̱n bi̱ naguwáʼ náa goʼwóo Israel xígií náa ku̱ba̱ʼ dí rígá náa norte ga̱jma̱a̱ náa xúgíʼ ku̱ba̱ʼ rí ikhúún nixidíriʼiin›. Ikhiin makuwá náa ku̱bu̱únʼ”.
9 Mbá ajngáa rí na̱jkha̱ inún profeta:*
Niʼni rí magawúunʼ a̱jkiu̱nʼ.
Mbá xúgíʼ itsuʼ naguáʼáan.
Na̱ni̱ xó mbáa xa̱bu̱ najnga̱a̱,xóo mbáa xa̱bu̱ bi̱ tájmaa gágáan vino,ga̱jma̱a̱ numuu Jeobá ma̱ngaa numuu ajngóo rí mikaʼwu.
10 Numuu rí náa ku̱ba̱ʼ rígi̱ kajtíin bi̱ nuni̱ aʼkhá gajmiún eʼwíinʼ,*ku̱ba̱ʼ xtáa ngíná ga̱jma̱a̱ numuu rí nijuiʼtátsrígúni̱jndo̱o̱ʼ ra̱jxa̱ dí rígá náa ku̱ba̱ʼ mijxooʼ.*
Nuni̱ dí xkawiʼ ga̱jma̱a̱ najmún tsiaki̱i̱ rí guáʼdáá mu muni̱ dí raʼkhí.
11 “Xó má profeta ga̱jma̱a̱ ndxajkun niguma gachíin.*
Asndu náa goʼwóʼ nixkamaa dí raʼkhí eni̱”, eʼthí Jeobá.
12 “Kambu̱ún nindxu̱u̱ nundu̱ʼ ga̱jma̱a̱ mikína,muxningui̱i̱nʼ ga̱jma̱a̱ majnguti̱gi̱i̱n.
Numuu rí makuʼmá mbá gamiéjunʼ náa inún,náa tsiguʼ rí muxnajxi̱i̱ cuenta”, eʼthí Jeobá.
13 “Ndi̱yo̱o̱ mbá rí xkawiʼ dí nuni̱ profetas bi̱ kúwá náa Samaria.
Nutari̱ya̱ʼ ga̱jma̱a̱ numuu Baalma̱ngaa nuni̱ dí majngawi̱i̱n xa̱bu̱ xuajñunʼ Israel.
14 Ga̱jma̱a̱ ndi̱yo̱o̱ dí xkawiʼ kayuuʼ dí kúwá runi̱ profetas bi̱ kúwá náa Jerusalén.
Nuxudamíjna̱ aʼkhá gajmiún eʼwíinʼ ga̱jma̱a̱ nuthi rí minduwaʼ,numbañún* xa̱bu̱ ra̱míjíinʼ,tsétanga̱a̱ a̱jkiu̱ún náa dí raʼkhí nuni̱.
Ikhúún nda̱yo̱o̱ rí xúgíinʼ ikhiin nindxu̱ún xóo Sodoma,ga̱jma̱a̱ xa̱bu̱ bi̱ kúwá ikhí nindxu̱ún xóo Gomorra”.
15 Ikha jngóo rígi̱ dí naʼthí Jeobá bi̱ naʼtáñajúúnʼ ángeles ga̱jma̱a̱ numún profetas buʼko̱:
“Maxnu̱u̱ mu̱phu̱ iná miʼkhu̱u̱nga̱jma̱a̱ maxnu̱u̱ muwa̱a̱n iyaʼ dí gíʼdoo thana mbiiʼ.
Numuu rí profetas bi̱ kúwá náa Jerusalén nini̱ rí nduwaʼ maʼga roʼoo náa xúgíʼ xuajin”.
16 Rígi̱ dí naʼthí Jeobá bi̱ naʼtáñajúúnʼ ángeles:
“Xúdxawíín ajngáa rí nutariyaʼ profetas.
Kúwá runi̱ nduwáanʼla.
Rí niwasngájmún rí ikhiin nuthi nindxu̱u̱ dí nagájnuu náa a̱jkiu̱únraʼkháa dí naʼthí Jeobá.
17 Bi̱ nda̱a̱ gamajkhún tséniña̱a̱ʼ ruthi:
‹Jeobá niʼthí : “Makuwáanʼla tsímáá”›.
Ga̱jma̱a̱ xúgíinʼ bi̱ nuni̱ rí nandoo a̱jkiu̱ún rí xkawiʼ nuthi:
‹Xáʼka̱nú nimbá gamiéjunʼ inala›.
18 Tsáá nixtáa náa majñu̱únʼ bi̱ nambájxu̱u̱ májánʼ gajmíi̱n Jeobá,mu mbaʼyoo ga̱jma̱a̱ maʼdxawuun ajngóo rá.
Tsáá nixnátiʼñaminaʼ maʼdxawuun ajngóo xá.
19 ¡Gu̱ya̱a̱! Giñámbiʼ ndrígóo Jeobá mambaʼtariya̱ʼ ga̱jma̱a̱ sia̱nʼ,magajtaa xóo nanuʼ náa edxu̱ún xa̱bu̱ xkawi̱i̱nʼ.
20 Xáwi̱ji̱i̱ rí nakásngañu̱u̱ʼ Jeobáasndu índo̱ gáʼnimbánuu rí naʼthúu̱n a̱jkiu̱u̱n maʼni.
Ikháanʼ makrua̱ʼa̱la májánʼ rígi̱ índo̱ gáʼni iwáá mbiʼi.
21 Ikhúún na̱nguá nikuʼmíin profetas, mú ikhiin nigún ragáñúún.
Ikhúún nda̱a̱ rí ni̱thu̱u̱n, mú ikhiin nitariyaʼ.
22 Á mu ikhiin nikúwá náa majñu̱únʼ xa̱bu̱ bi̱ nambájxu̱ʼ májánʼ gajmíʼ,nini̱ rí xa̱bu̱ xuajñunʼ mudxawíín ajngóʼ,ma̱ngaa muniña̱a̱ʼ kambu̱ún dí ra̱májánʼ ga̱jma̱a̱ dí raʼkhí nuni̱”.
23 “Lá i̱ndó nindxu̱ʼ mbáa Dios bi̱ ndaʼyoo dí narígá mijngii raʼkháa bi̱ ma̱ngaa ndaʼyoo dí narígá mitsínguánʼ ráʼ.” eʼthí Jeobá.
24 “Lá ma̱ndoo mbáa xa̱bu̱ markaʼwuminaʼ náa ikhúún xándoo gáyóo ráʼ.” Eʼthí Jeobá.
“Lá raʼkháa ikhúún nindxu̱ʼ bi̱ na̱ni̱ majthíí dí rígá náa mekhu ga̱jma̱a̱ náa ku̱ba̱ʼ ráʼ.” eʼthí Jeobá.
25 “Profetas bi̱ najmún mbiʼyuʼ mutariya̱ʼ dí minduwaʼ nidxawuun rí nuthi ‹¡Rígá dí nigúndaa! ¡Rígá dí nigundaa!›.
26 Asndu nguáthá mba̱yu̱u̱ʼ xóó gárígá náa a̱jkiu̱ún profetas bugi̱ dí mutariyaʼ má xúʼko̱ dí minduwaʼ rá. Nindxu̱ún profetas bi̱ nuthi nduwaʼ dí rígá náa a̱jkiu̱ún.
27 Ga̱jma̱a̱ xnuʼndaa dí nutamijná kaniki̱ín, nuni̱ rí xa̱bu̱ xuajñunʼ mambumún mbiʼyuʼ, xó má anu̱ún nimbumún mbiʼyuʼ ga̱jma̱a̱ numuu Baal.
28 Profeta bi̱ nagiʼdoo mbá xnuʼndaa gaʼthí rí nigundaa, mú bi̱ gíʼdoo ajngóʼ, kuduun gáʼthí ajngóʼ”.
“Lá nambríguii ra̱jxa̱ ga̱jma̱a̱ tsígáʼ ráʼ.” eʼthí Jeobá.
29 “Lá raʼkháa ajngóʼ nindxu̱u̱ xó mbá aguʼ ga̱jma̱a̱ xó mbá martillo rí naxpígu pátsí ráʼ.” eʼthí Jeobá.
30 “Ikha jngóo, eʼthí Jeobá, gi̱i̱ xtáá ikhúún mu ma̱ni̱ rí mumíniiʼ profetas buʼko̱, bi̱ nuni̱ kuʼwúún eʼwíinʼ ajngóʼ”.
31 “Gi̱i̱ xtáá ikhúún mu ma̱ni̱ rí mumíniiʼ profetas, eʼthí Jeobá, bi̱ najmún rajúún mu muthi ‹¡Eʼthí ikhaa!›”.
32 “Gi̱i̱ xtáá ikhúún mu ma̱ni̱ rí mumíniiʼ profetas bi̱ nuthi xnuʼndaa rí minduwaʼ, eʼthí Jeobá, bi̱ nuthi rí nigundaa ga̱jma̱a̱ nuni̱ dí majngawi̱i̱n xa̱bu̱ xuajñunʼ ga̱jma̱a̱ minduwaʼ rí nuthi ma̱ngaa rí nuni̱ mba̱ʼwu̱míjna̱”.
Mú ikhúún na̱nguá nikuʼmíin ga̱jma̱a̱ nda̱a̱ rí ni̱thu̱u̱n. Ikha jngóo nda̱a̱ dí májánʼ gúni̱ náa xuajin rígi̱”, eʼthí Jeobá.
33 “Á mu mbáa xa̱bu̱ xuajin, o mbáa profeta o mbáa ndxajkun gárajxa̱a̱ʼ: ‹Ndiéjunʼ eʼda* rí kagu̱ Jeobá rá.› Ikháán mbaʼyóoʼ matriʼñáá ‹“¡Ikháanʼla nindxa̱la eʼda ruʼko̱! Ga̱jma̱a̱ ma̱ni̱ wajímináʼ náa ikháanʼla”, eʼthí Jeobá›.
34 Á mu mbáa profeta, ndxajkun o mbáa xa̱bu̱ xuajin gáʼthí ‹¡Rígi̱ nindxu̱u̱ eʼda rí kagu̱ Jeobá!›, ma̱ni̱ rí mamínuuʼ xa̱bu̱ buʼko̱ ga̱jma̱a̱ bi̱ kúwá náa goʼwóo.
35 Rígi̱ dí mámbáa ikháanʼla nuthu̱u̱n xa̱bu̱ numbaaʼ gajmiála ga̱jma̱a̱ a̱ngia̱la: ‹Ndiéjunʼ dí niriʼñaa Jeobá rá. Ndiéjunʼ rí niʼthí Jeobá rá.›
36 Mú ni xútha itháan ga̱jma̱a̱ numuu eʼdoo Jeobá, numuu rí eʼda nindxu̱u̱ ajngóo mámbáa rí ikháanʼla ga̱jma̱a̱ niriʼkhu̱u̱ ajngóo Dios bi̱ ndaʼya, Jeobá bi̱ naʼtáñajúúnʼ ángeles, bi̱ nindxu̱u̱ Dios ndrígúlú.
37 Rígi̱ dí gáratha̱a̱n profeta: ‹Ndiéjunʼ dí niriʼñaaʼ Jeobá rá. Ndiéjunʼ rí niʼthí Jeobá rá.
38 Á mu ikháanʼla nu̱ta̱ má xúʼko̱ “¡Eʼdoo Jeobá!”, rígi̱ nindxu̱u̱ dí naʼthí Jeobá: “Ga̱jma̱a̱ numuu rí nu̱tala má xúʼko̱ ‹Ajngáa rígi̱ nindxu̱u̱ eʼdoo Jeobá’› maski ajndu má ikhúún nitañájuanla ‹Xútala “¡Eʼdoo Jeobá!”›,
39 ikhaa rúʼko̱ numuu dí magújxanʼla ga̱jma̱a̱ madajuáanʼla mitsínguánʼ náa inuʼ, xó má ikháanʼla xúʼko̱ má xuajin rí ni̱xna̱la ikháanʼ ga̱jma̱a̱ wajin xiʼñála.
40 Ma̱ʼkhá ka̱yo̱ʼ ma̱jti̱ʼ ga̱jma̱a̱ magajnúu gamajkuala asndu kámuu, nimbáa xámbumuu”›”.
Mbaʼa nota
^ O “bi̱ kaʼyoo magruigúu”.
^ O “jmbu”.
^ O “gaʼyee, bi̱ nuʼthi dí marigá”.
^ O “desierto”.
^ O “nindxu̱ún apóstatas”.
^ Náa ajngáa hebreo naʼthí, “nuxna̱a̱ tsiaki̱i̱ ñawúúnʼ”.
^ O “ajngáa rí ki̱wu̱n”. Náa ajngáa hebreo a̱jngáa rígi̱ a̱jma̱ rí nandoo gáʼthúu̱n: ‹Ajngóo Dios dí ki̱wu̱n› ga̱jma̱a̱ ‹mbá rí mikiwu̱n›.
