Jeremías 24:1-10
-
Higo dí májánʼ ga̱jma̱a̱ higo dí ra̱májánʼ (1-10)
24 Ikhú Jeobá nisngájmuʼ a̱jma̱ canasta rí kajti higo dí tri̱ga̱ náa inuu guʼwá rí nduʼyamajkuíí Jeobá. Rígi̱ nirígá nda̱wa̱á dí rey Nabucodonosor* ndrígóo Babilonia ni̱jkha̱ kayáa Jeconías* a̱ʼdióo Jehoiaquim, rey ndrígóo Judá, ma̱ngaa ni̱jkha̱ kagui̱i̱n príncipes bi̱ kúwá náa Judá, ga̱jma̱a̱ bi̱ nuni̱ xúgíʼ enii ñajunʼ dí mitsaanʼ* ma̱ngaa bi̱ nuñajunʼ ga̱jma̱a̱ ajua̱nʼ,* niguwíin náa Jerusalén ga̱jma̱a̱ ni̱jkha̱ kagui̱i̱n náa Babilonia.
2 Mbá canasta rí kajti higo dí májánʼ, rí wapháá e̱ʼgo̱o̱, mú i̱mba̱ canasta rí kajti higo dí ra̱májánʼ, dí raʼkhánii kayuuʼ miʼtsu.
3 Ikhú Jeobá nirajxu̱ʼ: “Jeremías, ndiéjunʼ dí xtaa ratayáá rá.” Ikhúún ni̱thu̱u̱n: “Higo, higo dí májánʼ ra̱ʼkhá tháán miʼtsí, mú higo dí ra̱májánʼ xkawiʼ kayuuʼ, raʼkánii miʼtsu”.
4 Ikhú nigruígú ajngóo Jeobá. Niʼthúnʼ:
5 “Rígi̱ rí naʼthí Jeobá, Dios ndrígóo Israel: ‹Xó má higo dí májánʼ rígi̱, xúʼko̱ má gáyóo dí nindxu̱ún míjíinʼ xa̱bu̱ Judá, bi̱ ni̱jkha̱ kiʼdiin, nigúwíin náa ku̱ba̱ʼ rígi̱ mu maʼga kiʼdiin náa ku̱bu̱únʼ xa̱bu̱ caldeos.
6 Mba̱ya̱jngawiin mu makuwá májánʼ ga̱jma̱a̱ ma̱ni̱ rí matangi̱i̱n náa ku̱ba̱ʼ rígi̱. Ikhúún ma̱ni̱ rí muguaʼdáá, raʼkháa dí ma̱ni̱ gámbíin, ma̱ni̱ rí makuwíin, raʼkháa dí marubuwíin.
7 Maxnu̱u̱n mbá a̱jkiu̱ún rí maʼndún muniʼniúúnʼ mu maguánú mbuyáá dí ikhúún nindxu̱ʼ Jeobá. Ikhiin mani̱ndxu̱ún xa̱bu̱ xuajñunʼ ga̱jma̱a̱ ikhúún mani̱ndxu̱ʼ Dios ndrígu̱ún, numuu rí matangi̱ín náa ikhúún ga̱jma̱a̱ xúgíʼ a̱jkiu̱ún.
8 Mú higo dí ra̱májánʼ dí raʼkhánii kayuuʼ miʼtsu, rígi̱ rí naʼthí Jeobá: “Xígi̱ kaʼnii gáyóo rey Sedequías bi̱ xtáa náa Judá, gajmíi̱n príncipes ndrígióo ga̱jma̱a̱ xa̱bu̱ Jerusalén bi̱ xóó naguanún náa ku̱ba̱ʼ rígi̱ ma̱ngaa bi̱ kúwá náa ku̱ba̱ʼ ndrígóo Egipto.
9 Ma̱ni̱ rí mani̱ndxu̱ún mbá gamíi ga̱jma̱a̱ mbá gamiéjunʼ náa xúgíinʼ xa̱bu̱ ñajunʼ bi̱ kúwá náa tsu̱du̱u̱ ku̱ba̱ʼ, ikhiin mutawéñúúnʼ, mani̱ndxu̱ún mbá xkri̱da xóo xa̱bu̱ bi̱ nuraʼníí gamiéjunʼ, mutsijmiin ga̱jma̱a̱ mutha tsríguíin náa xúgíʼ mbaaʼ rí maxidiríʼiin.
10 Ga̱jma̱a̱ makunguanʼ espada náa ikhiin, ewiʼ ga̱jma̱a̱ nandii, asndu maguma gámbíin náa ku̱ba̱ʼ rí nixnu̱u̱n ikhiin ga̱jma̱a̱ wajin xiʼñúúnʼ”›”.
Mbaʼa nota
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ Ma̱ngaa mbiʼyuu Joaquín ga̱jma̱a̱ Conías.
^ O “nagui̱i̱”.
^ O mbáa “bi̱ nuni̱ xtájtsí”.
