Jeremías 26:1-24
26 Mbiʼi rí nixtáa raʼtáñajunʼ Jehoiaquim a̱ʼdióo Josías, rey ndrígóo Judá, Jeremías nigruigú ajngóo Jeobá rígi̱:
2 “Rígi̱ dí naʼthí Jeobá: ‹Ayuʼ gáriejún náa goʼwóo Jeobá ga̱jma̱a̱ arathún xúgíinʼ xa̱bu̱ xuajin Judá bi̱ naguwáʼ náa goʼwóo Jeobá mu mbuyamajkuíí. Arathún xúgíʼ dí ikhúún gátháa̱nʼ, xátarkaʼwumáʼáanʼ nimbá ajngáa.
3 Mbáa mudxawíín ga̱jma̱a̱ mámbáa gániñuuʼ kambo̱o̱ dí raʼkhí, xúʼko̱ ikhúún mariʼkhu̱u̱ rí nindxa̱ʼwa̱mínáʼ* ga̱jma̱a̱ numuu gamiéjunʼ dí niku̱mu̱ʼ makuʼmá náa ikhiin numuu dí ra̱májánʼ eni̱.
4 Arathún: “Rígi̱ dí naʼthí Jeobá: ‹Á mu ikháanʼ tsédxawunʼ ni má tsénimbáníí xtángoo ndrígóʼ rí ni̱xna̱la,
5 ga̱jma̱a̱ á mu tsédxawíín rí nuthi xa̱bi̱ʼ bi̱ nindxu̱ún profeta,* bi̱ ikhúún nángi eʼni eʼkumíin* náa ikháanʼla bi̱ ikháanʼ tsédxawíín rí nuthi,
6 ikhú ma̱ni̱ rí guʼwá rígi̱ manidxu̱u̱ xóo Siló, ga̱jma̱a̱ xuajin rígi̱ mani̱ndxu̱u̱ mbá xkri̱da náa i̱ʼwáʼ xuajin dí rígá náa tsu̱du̱u̱ ku̱ba̱ʼ mu mbuyáá xú kaʼnii nindxu̱u̱ mbá rí najuiʼtátsrígú›”›”.
7 Ndxajkun, profetas ga̱jma̱a̱ xúgíinʼ xa̱bu̱ xuajin nidxawíín rí niʼthí Jeremías náa goʼwóo Jeobá.
8 Índo̱ Jeremías niguámbóo niʼthí xúgíʼ dí Jeobá nikuʼmaa maʼthúún xúgíinʼ xa̱bu̱ xuajin, ikhú ndxajkun, profetas ga̱jma̱a̱ xúgíinʼ xa̱bu̱ xuajin nirtuwiin ga̱jma̱a̱ nitháán: “Gajkhun rí makañáanʼ.
9 Náá numuu rí nijmaaʼ mbiʼyuu Jeobá marataríyaʼ dí ‹Guʼwá rígi̱ mani̱ndxu̱u̱ xóo Siló ga̱jma̱a̱ xuajin rígi̱ maguanáa, ni xákúwá xa̱bu̱ rá.›” Ikhú xúgíinʼ xa̱bu̱ niruguama̱ʼa̱a̱n Jeremías náa goʼwóo Jeobá.
10 Índo̱ príncipes bi̱ kúwá náa Judá nidxawíín ajngáa rígi̱, ikhú nigájnún náa goʼwóo rey nitsimún náa goʼwóo Jeobá ga̱jma̱a̱ nitri̱gi̱i̱n náa riejun nuxi̱ʼ ndrígóo goʼwóo Jeobá.
11 Ndxajkun ga̱jma̱a̱ profetas nithúún príncipes ga̱jma̱a̱ xúgíinʼ xa̱bu̱ xuajin: “Xa̱bu̱ bugi̱ kaʼyoo makhañúu, numuu rí niʼtáriyaʼ dí magíʼnuu xuajin rígi̱ xóo ikháanʼ míjnáaʼ má nidxawíín”.
12 Ikhú Jeremías niʼthúún xúgíinʼ príncipes ga̱jma̱a̱ xúgíinʼ xa̱bu̱ xuajin: “Jeobá nindxu̱u̱ bi̱ nikuʼmún ma̱ta̱ xúgíʼ ajngáa dí nidxawíínla dí magíʼnuu guʼwá rígi̱ ga̱jma̱a̱ xuajin rígi̱.
13 Ikha jngóo dí xúgi̱ guri̱ʼkhu̱u̱ xóo nindxa̱la ga̱jma̱a̱ dí nu̱ni̱ ma̱ngaa guni̱mbala ajngóo Jeobá Dios ndrígala, mu xúʼko̱ Jeobá xákuʼma gamiéjunʼ rí nindxaʼwámína̱ʼ makuʼma náa ikháanʼla.
14 Mú ikhúún, gi̱i̱ xtáá ga̱jma̱á nindxa̱la, gu̱niu̱nʼ asndu ndiéjunʼ má dí májánʼ gúya̱a̱la.
15 Mú gu̱ya̱a̱ gajkhun rí á mu nuxíñu̱u̱n, maguma gacháanʼ ga̱jma̱a̱ eʼdiuu mbáa xa̱bu̱ bi̱ nda̱a̱ aʼkhúun* xúʼko̱ má xuajin rígi̱ ga̱jma̱a̱ xa̱bu̱ bi̱ kúwá, numuu rí gajkhun dí Jeobá nindxu̱u̱ bi̱ nikuʼmún ma̱ta̱ xúgíʼ ajngáa rígi̱ dí nidxawíínla”.
16 Ikhú príncipes ga̱jma̱a̱ xúgíinʼ xa̱bu̱ xuajin nithúún ndxajkun ga̱jma̱a̱ profetas: “Xa̱bu̱ bugi̱ na̱nguá kaʼyoo makhañúu, numuu rí nijmuu mbiʼyuu Jeobá Dios ndrígúlú mu maʼthúlú”.
17 Ma̱ngaa tikhuun xabuanii bi̱ kúwá náa xuajin nitujxu̱u̱n ga̱jma̱a̱ nithúún xúgíinʼ xa̱bu̱ bi̱ nigimbíin:
18 “Miqueas bi̱ na̱ʼkha̱ náa Moréset nindxu̱u̱ bi̱ niʼtáriyaʼ nákhá mbiʼi rí nixtáa rey Ezequías náa Judá, niʼthún xúgíinʼ xa̱bu̱ xuajin Judá: ‹Rígi̱ dí naʼthí Jeobá bi̱ naʼtáñajúúnʼ ángeles:
“Sion mani̱ndxu̱u̱ xóo mbá ku̱ba̱ʼ dí muxnáá xku̱bi̱,Jerusalén mani̱ndxu̱u̱ xóo mbá ru̱tsu̱u̱ dí niguma gámbáanáa bíjní dí grígu Guʼwá* mani̱ndxu̱u̱ mbá bíjní náa marigá i̱ndó ixi̱”›.
19 Lá rey Ezequías bi̱ nixtáa náa Judá ga̱jma̱a̱ xúgíinʼ xa̱bu̱ xuajin nixiyáa xáʼ. Lá raʼkháa nimíñuu kaʼyoo Jeobá ga̱jma̱a̱ niʼtákáñuu Jeobá* ikhú Jeobá niriʼkhu̱u̱ rí nindxa̱ʼwáminaʼ ga̱jma̱a̱ numuu gamiéjunʼ rí niʼthí makuʼma xáʼ. Ikháánʼlú xúgi̱ inu muʼni rí ma̱ʼkha̱nú mbá gamiéjunʼ mba̱a̱ inulú.
20 Ma̱ngaa nixtáa i̱mba̱a̱ xa̱bu̱ bi̱ niʼtáriyaʼ ga̱jma̱a̱ numuu mbiʼyuu Jeobá, Uriya a̱ʼdióo Semaya bi̱ na̱ʼkha̱ náa Quiryat-Jearim, bi̱ niʼtáriyaʼ ga̱jma̱a̱ numuu xuajin rígi̱ ma̱ngaa numuu ku̱ba̱ʼ rígi̱, niʼthí ikháá má xóo rí naʼthí Jeremías.
21 Rey Jehoiaquim, xúgíinʼ xa̱bekha bi̱ guáʼdáá tsiaki̱i̱ ga̱jma̱a̱ xúgíinʼ príncipes nidxawíín ajngáa rí niʼthí, ikhú rey niraʼwíí rí maxíyáa. Índo̱ Uriya niʼdxawuun rígi̱, nimíñuu ga̱jma̱a̱ nigáyúu ni̱jkha̱ Egipto.
22 Ikhú rey Jehoiaquim nikuʼmaa Elnatán a̱ʼdióo Acbor gajmíi̱n eʼwíinʼ xa̱bekha náa Egipto.
23 Ikhiin niriya̱a̱ʼ Uriya náa Egipto ga̱jma̱a̱ niguwáánʼ kuya̱a̱ náa inuu rey Jehoiaquim, bi̱ nixíyáa ga̱jma̱a̱ espada ga̱jma̱a̱ nidama̱ʼa̱n xuyuuʼ náa najuiʼdi̱ín xa̱bu̱ ngíníi”.
24 Ahicam a̱ʼdióo Safán nimbáyúu Jeremías, tániñuuʼ rí muxnaxi̱i̱ náa ñawúúnʼ xa̱bu̱ xuajin mu muxiyáa.
Mbaʼa nota
^ O “magáwíinʼ a̱jkiu̱nʼ”.
^ O “gaʼyee, bi̱ naʼthí dí marigá”.
^ Náa ajngáa hebreo naʼthí, “nákhá miʼcha̱ nakuʼmíin”.
^ Náa ajngáa hebreo naʼthí, “maguwaʼ ku̱yala eʼdi rí nda̱a̱ aʼkhúun”.
^ O “náa bíjní dí grígu guʼwá rí nduyamajkuíí Dios”.
^ O “niʼni rí makáwábaaʼ a̱jkiu̱u̱n Jeobá”.
