Jeremías 27:1-22
27 Índo̱ nixtáa raʼtáñajunʼ Jehoiaquim a̱ʼdióo Josías rey ndrígóo Judá, Jeremías nigruigú ajngáa rígi̱ náa Jeobá:
2 “Rígi̱ rí niʼthúnʼ Jeobá: ‹Atani̱ tikhuu yugo xúʼko̱ má rí maxtoʼóo ga̱jma̱a̱ atámáʼ náa aphaaʼ ga̱jma̱a̱ atruʼwáá.
3 Nda̱wa̱á ataxúʼma náa rey bi̱ xtáa náa Edom, náa rey ndrígóo Moab, náa rey ndrígu̱ún ammonitas, náa rey ndrígóo Tiro ga̱jma̱a̱ náa rey ndrígóo Sidón, maguáan kudúún xa̱bu̱ bi̱ nagún kuñu̱u̱n ajngáa bi̱ niguwáʼ náa Jerusalén bi̱ niguwáʼ gúyáá rey Sedequías bi̱ xtáa náa Judá.
4 Arathún rí magún ku̱ñu̱u̱n ajngáa rígi̱ náa rey ndrígu̱ún:
“Rígi̱ dí naʼthí Jeobá bi̱ naʼtáñajúúnʼ ángeles, Dios ndrígóo Israel, rígi̱ dí ikháanʼ gíʼmaa muthu̱u̱n rey ndrígala:
5 ‹Ikhúún nindxu̱ʼ bi̱ niʼni ku̱ba̱ʼ, bi̱ niʼnii xa̱bu̱ numbaaʼ ga̱jma̱a̱ xujkhúʼ bi̱ kúwá náa tsu̱du̱u̱ ku̱ba̱ʼ nijmuʼ tsiaki̱i̱ ndrígóʼ ga̱jma̱a̱ tsiaki̱i̱ rí gíʼdoo ñawúunʼ, ni̱xnu̱u̱ bi̱ ikhúún nindoʼ ma̱xnu̱u̱.
6 Rí xúgi̱ nixnajxí xúgíʼ xuajin rígi̱ náa ñawúunʼ rey Nabucodonosor bi̱ xtáa náa Babilonia, bi̱ nindxu̱u̱ xa̱bi̱ʼ, nixniu̱u̱ asndu xujkhúʼ bi̱ kúwá xanáá mu muni̱ ñajuunʼ.
7 Xúgíʼ xuajin muni̱ ñajuunʼ ikhaa ga̱jma̱a̱ a̱ʼdióo ma̱ngaa a̱ʼdá xíñíiʼ asndu índo̱ gáʼga̱nú mbiʼi mambáa xuajñuu, ikhú mbaʼa xuajin ga̱jma̱a̱ reyes bi̱ mbaʼwi̱i̱n muni̱ rí mani̱ndxu̱u̱ ñumbáá›.
8 ‹Á mu mbá xuajin o mbá reino naʼni gaʼduunʼ maʼni ñajuunʼ rey Nabucodonosor bi̱ xtáa náa Babilonia ga̱jma̱a̱ tsíyoo gátámáʼ náa rexo̱o̱ yugo ndrígóo rey bi̱ xtáa náa Babilonia, ma̱ni̱ rí mamínuuʼ xuajin rúʼko̱ ga̱jma̱a̱ espada, ewiʼ ga̱jma̱a̱ nandii, eʼthí Jeobá, asndu índo̱ gáni̱ gámbíin náa ñawúunʼ ikhaa›.
9 ‹Xúdxawúún profetas, bi̱ nuni̱ xawan, bi̱ nuthi dí nandoo gáʼthúu̱n xnuʼndaa, bi̱ nuni̱ magia o bi̱ nuni̱ brujo* bi̱ kúwá ga̱jma̱á nindxa̱la, bi̱ nuthala: “Xúni̱ ñajuunʼ rey bi̱ xtáa náa Babilonia”.
10 Numuu rí minduwaʼ nindxu̱u̱ rí nuthala ga̱jma̱a̱ numuu rúʼko̱, ní xákuwáanʼla náa ku̱ba̱la, maʼga kiʼdáanʼ mitsínguánʼ náa ikhúún maxidiráʼaan ga̱jma̱a̱ ikháanʼ makhañála.
11 Mú xuajin bi̱ gátámáʼ náa rexo̱o̱ yugo ndrígóo rey bi̱ xtáa náa Babilonia ga̱jma̱a̱ maʼni ñajuunʼ, maniʼñúuʼ maxtáa náa ku̱bo̱o̱ʼ, eʼthí Jeobá, mu maʼdu ga̱jma̱a̱ maxtáa ikhí›”›”.
12 Ikháá má xúʼko̱ ni̱thu̱u̱n rey Sedequías bi̱ xtáa náa Judá: “Gurigula náa rexa̱a̱la yugo ndrígóo rey bi̱ xtáa náa Babilonia ga̱jma̱a̱ gu̱ni̱ ñajuunʼ ikhaa xúʼko̱ má xuajñuu, mu xúʼko̱ ma̱ndoo makuwáanʼla.
13 Náá numuu rí ikháán ga̱jma̱a̱ xa̱bu̱ xuajñaanʼ gíʼmaa makhañún ga̱jma̱a̱ espada, ewiʼ ga̱jma̱a̱ nandii, xó má Jeobá niʼthí dí magíʼnuu xuajin bi̱ xáʼni ñajuunʼ rey bi̱ xtáa náa Babilonia rá.
14 Xúdxawíín ajngún profetas bi̱ nu̱tha̱la ‹Ikháanʼla xúni̱ ñajuunʼ rey bi̱ xtáa náa Babilonia›, numuu rí nduwaʼ nindxu̱u̱ dí nuthala.
15 ‹Ikhúún na̱nguá nikuʼmíin, eʼthí Jeobá, ikhiin najmún mbiʼyuʼ mu muthi rí nduwaʼ ga̱jma̱a̱ muni̱ rí ikhúún maxidiráʼaan ga̱jma̱a̱ makhañála, xó má ikháanʼ ga̱jma̱a̱ profetas bi̱ nuthala dí marigá›”.
16 Ni̱thu̱u̱n rígi̱ ndxajkun ga̱jma̱a̱ xúgíinʼ xa̱bu̱ xuajin: “Rígi̱ rí naʼthí Jeobá: ‹Xúdxawíín ajngún profetas ndrígala bi̱ kúwíin rutariya̱ʼ, “¡Gu̱ya̱a̱! ¡Inu má ma̱ʼkha̱a̱ kiʼda xúgíʼ dí najmaa náa goʼwóo Jeobá asndu náa Babilonia!”, numuu rí nduwaʼ nindxu̱u̱ rí nuthala.
17 Xúdxawíín rí nuthala. Gu̱ni̱ ñajuunʼ rey bi̱ xtáa náa Babilonia mu xúʼko̱ makuwáanʼ. Náá numuu rí ndaʼyóoʼ maguma gámbáa xuajin rígi̱ rá.
18 Á mu gajkhun dí ikhiin nindxu̱ún profetas ga̱jma̱a̱ nindrigú ajngóo Jeobá, ikha jngóo mbá péñu* gutakáñíí Jeobá bi̱ naʼtáñajúúnʼ ángeles, mu xáʼga kiʼda náa Babilonia xúgíʼ dí najmaa dí xóó naguanúu náa goʼwóo Jeobá, ma̱ngaa náa goʼwóo rey ndrígóo Judá ga̱jma̱a̱ náa Jerusalén›.
19 Numuu dí rígi̱ naʼthí Jeobá bi̱ naʼtáñajúúnʼ ángeles ga̱jma̱a̱ numuu rajkhúu guʼwá náa nduʼyamajkuíí Dios, Lamáa,* carritos ga̱jma̱a̱ i̱ʼwáʼ rí najmaa dí xóó naguanúu náa xuajin rígi̱,
20 dí rey Nabucodonosor bi̱ xtáa náa Babilonia táʼga kagu̱ índo̱ niríyaaʼ náa Jerusalén mu maʼga kayáa náa Babilonia Jeconías a̱ʼdióo Jehoiaquim, rey bi̱ xtáa náa Judá, bi̱ guaʼdáá numún náa Judá ga̱jma̱a̱ náa Jerusalén,
21 rígi̱ rí naʼthí Jeobá bi̱ naʼtáñajúúnʼ ángeles, Dios ndrígóo Israel, ga̱jma̱a̱ numuu rí najmaa náa goʼwóo Jeobá dí xóó naguanúu, xúʼko̱ má dí rígá náa goʼwóo rey ndrígóo Judá ga̱jma̱a̱ Jerusalén:
22 ‹“Magún kudúún náa Babilonia, ikhí maguanúu asndu mbiʼi rí ikhúún gáʼgá gágúu,* eʼthí Jeobá, ikhú matanga̱án ka̱gu̱ʼ marigá gi̱i̱ mbu̱júu̱”›”.
Mbaʼa nota
^ O “xa̱bu̱ xawan”.
^ O “guni̱ mbá rí májánʼ”.
^ Xóo muʼthá, Lamáa dí cobre dí rígá náa guʼwá dí nduyamajkhuíí Dios.
^ O mbáa “naʼthí ga̱jma̱a̱ numún israelitas”.
