Jeremías 28:1-17
-
Hananías bi̱ nindxu̱u̱ profeta minduwaaʼ ga̱jma̱a̱ Jeremías (1-17)
28 Ikháá má tsiguʼ rúʼko̱, rí maʼni a̱jkhu̱ tsiguʼ ga̱jma̱a̱ witsu igu̱nʼ rí xtáa má raʼtáñajunʼ rey Sedequías náa Judá, profeta Hananías a̱ʼdióo Azur bi̱ xtáa náa Gabaón niʼthúnʼ náa goʼwóo Jeobá náa inún ndxajkun ga̱jma̱a̱ náa inún xúgíinʼ xa̱bu̱ xuajin:
2 “Rígi̱ rí naʼthí Jeobá, bi̱ naʼtáñajúúnʼ ángeles, Dios ndrígóo Israel: ‹Maxpígaʼ yugo ndrígóo rey bi̱ xtáa náa Babilonia.
3 Índo̱ gáʼni a̱jma̱ tsiguʼ matangu̱ún kagu̱ʼ mbu̱júu̱ xúgíʼ rí najmaa náa goʼwóo Jeobá dí rey Nabucodonosor bi̱ xtáa náa Babilonia niguwíi ga̱jma̱a̱ ni̱jkha̱ kagu̱u̱ náa Babilonia›”.
4 “‹Ma̱ngaa matangu̱ún ka̱ya̱a̱ Jeconías a̱ʼdióo Jehoiaquim, rey ndrígóo Judá ga̱jma̱a̱ xúgíinʼ bi̱ nigájnún náa Judá ga̱jma̱a̱ ni̱jkha̱ kiʼdiin náa Babilonia, eʼthí Jeobá, numuu rí maxpígaʼ yugo ndrígóo rey bi̱ xtáa náa Babilonia›”.
5 Ikhú profeta* Jeremías niʼthúu̱n profeta Hananías náa inún ndxajkun ga̱jma̱a̱ náa xúgíinʼ xa̱bu̱ xuajin bi̱ kúwá ikhí náa goʼwóo Jeobá.
6 Profeta Jeremías niʼthí: “¡Xúʼko̱ gáʼni!* ¡Gaʼni Jeobá rígi̱! ¡Jeobá gaʼnimbánuu ajngáa rí niratáriyaʼ ga̱jma̱a̱ ma̱ʼkha̱a̱ kagu̱u̱ náa Babilonia xúgíʼ rí najmaa náa goʼwóo Jeobá ga̱jma̱a̱ ma̱ʼkha̱a̱ kagui̱i̱n xúgíinʼ bi̱ ni̱jkha̱ kiʼdiin!
7 Mbá péñu* atadxawíín ajngáa rí matha̱a̱nʼ ikháán ga̱jma̱a̱ xúgíinʼ xa̱bu̱ xuajin.
8 Profetas bi̱ nikúwá nákhá wajyúuʼ, nákhá xóó ndáwa̱a̱n ikháán ni má ikhúún, nitariyaʼ dí marigá guerra, gamiéjunʼ ga̱jma̱a̱ nandii náa mbaʼa xuajin ga̱jma̱a̱ náa nutañajunʼ reyes bi̱ guáʼdáá itháan tsiaki̱i̱.
9 Á mu mbáa profeta naʼthí dí marigá rí tsímáá, i̱ndó mbiʼyáá á mú gajkhun rí Jeobá nikuʼmaa profeta buʼko̱ á mu nambánuu ajngáa rí naʼtáriyaʼ”.
10 Profeta Hananías nirígú kaʼyuuʼ profeta Jeremías yugo rí kaʼmáʼ náa rexo̱o̱ ga̱jma̱a̱ nixpígaʼ.
11 Ikhú Hananías niʼthí náa inún xúgíinʼ xa̱bu̱ xuajin: “Rígi̱ rí naʼthí Jeobá: ‹Xígi̱ kaʼnii gáxpígaʼ yugo ndrígóo rey Nabucodonosor bi̱ xtáa náa Babilonia índo̱ gáʼni a̱jma̱ tsiguʼ ga̱jma̱a̱ marígúu náa rexu̱ún xúgíinʼ xa̱bu̱ xuajin›”. Ikhú profeta Jeremías niguajthun kambo̱o̱ ni̱jkha̱a̱.
12 Nda̱wa̱á rí profeta Hananías nixpígaʼ yugo rí kaʼmáʼ náa rexo̱o̱ Jeremías, ikhú Jeremías nigruigú ajngóo Jeobá:
13 “Ayuʼ ga̱jma̱a̱ aratháán Hananías: ‹Rígi̱ rí naʼthí Jeobá: “Ikháán nitaxpígaʼ mbá yugo rí ixi̱, mu rí xúgi̱ matani̱ mbá dí ajua̱nʼ”.
14 Numuu dí rígi̱ rí naʼthí Jeobá, bi̱ naʼtáñajúúnʼ ángeles, Dios ndrígóo Israel: “Matámáʼ mbá yugo dí ajua̱nʼ náa rexu̱ún xúgíinʼ xa̱bu̱ xuajin mu muni̱ ñajuunʼ rey Nabucodonosor bi̱ xtáa náa Babilonia, ikhiin mbaʼyóoʼ rí muni̱ ñajuunʼ. Asndu xujkhú xáná maxnajxíin náa ikhaa”›”.
15 Ikhú profeta Jeremías niʼthúu̱n profeta Hananías: “¡Hananías, mbá péñu, atadxawíín! Ikháán na̱nguá nikuʼmáán Jeobá, ikháán nitani̱ rí xuajin rígi̱ maku̱mu̱ún kuyáá rí minduwaʼ.
16 Ikha jngóo, rígi̱ rí naʼthí Jeobá: ‹¡Atayáá! Ma̱ni̱ mbátiga̱a̱n náa tsu̱du̱u̱ ku̱ba̱ʼ. Tsiguʼ má rígi̱ makhañáaʼ, numuu rí nitani̱ dí xa̱bu̱ muxujximíjna̱ náa inuu Jeobá›”.
17 Profeta Hananías nikháñuu ikháá má tsiguʼ rúʼko̱, índo̱ niʼni juwan igu̱nʼ.
