Jeremías 29:1-32
29 Rígi̱ nindxu̱u̱ rí naʼthí náa i̱yi̱i̱ʼ dí profeta* Jeremías nikuʼma asndu náa Jerusalén mu maʼga inún xabuanii bi̱ kúwá náa majñu̱únʼ bi̱ ni̱jkha̱ kiʼdiin, xúʼko̱ má náa inún ndxajkun, profetas ga̱jma̱a̱ náa xúgíinʼ xa̱bu̱ xuajin, bi̱ Nabucodonosor niguwíin náa Jerusalén ni̱jkha̱ kagui̱i̱n náa Babilonia,
2 nda̱wa̱á dí rey Jeconías ga̱jma̱a̱ ru̱dúu̱, mangiin xa̱bu̱ ñajunʼ bi̱ kúwá náa guʼwá ñajunʼ, príncipes bi̱ kúwá náa Judá ga̱jma̱a̱ náa Jerusalén ma̱ngaa xa̱bu̱ bi̱ nuni̱ xúgíʼ enii ñajunʼ dí mitsaanʼ* ma̱ngaa bi̱ nuñajunʼ ga̱jma̱a̱ ajua̱nʼ bi̱ nigájnún náa Jerusalén.
3 Nikuʼma i̱yi̱ʼ rígi̱ ga̱jma̱a̱ Elasá a̱ʼdióo Safán ma̱ngaa Guemarías a̱ʼdióo Hilquías, bi̱ rey Sedequías nikuʼmiin asndu náa Judá mu magún náa Babilonia mu muxnajxi̱mi̱jna̱ náa inuu rey Nabucodonosor bi̱ xtáa náa Babilonia. Náa i̱yi̱i̱ʼ naʼthí:
4 “Rígi̱ rí naʼthí Jeobá bi̱ naʼtáñajúúnʼ ángeles, Dios ndrígóo Israel, naʼthúún xúgíinʼ bi̱ ni̱jkha̱ kiʼdiin, bi̱ ni̱ni̱ rí magajnún náa Jerusalén maʼga kiʼdiin náa Babilonia:
5 ‹Gu̱nila guʼwá ga̱jma̱a̱ gakuwáanʼla ikhí. Gudula ixi̱, ga̱jma̱a̱ guphula xndúu.
6 Gunigúúnʼla, gaguaʼdíin jiámá ga̱jma̱a̱ wa̱ʼxa̱ʼ,* gu̱xna̱ tsígúunʼ e̱jña̱la, guniʼñúúnʼ rí waʼxiala munu̱ju̱nʼ mu xúʼko̱ mangiin muguaʼdíin jiámiún ga̱jma̱a̱ wa̱ʼxiúnʼ. Gaguaʼdíin e̱jña̱la ikhí, xúʼko̱ xáʼni nguéjmáanʼ.
7 Guʼyáʼ rí tsímáá náa xuajin rí nikuʼmáanʼ muʼguala ga̱jma̱a̱ gutakáñíi Jeobá ga̱jma̱a̱ numuu xuajin rúʼko̱, numuu rí á mu narígá rí tsímáá ikhí, makuwáanʼla tsímáá mangáanʼ.
8 Numuu dí rígi̱ rí naʼthí Jeobá bi̱ naʼtáñajúúnʼ ángeles, Dios ndrígóo Israel: “Xúniʼñámíjná dí maguma nduwáanʼla guni̱ profetas ni má bi̱ nuni̱ xawan bi̱ kúwá náa majñala, ni má xuxnatiʼñamijná mudxawíín xnuʼndaa rí ikhiin nuguaʼdáá.
9 Numuu rí najmún mbiʼyuʼ mu mutariya̱ʼ rí minduwaʼ. Ikhúún na̱nguá nikuʼmíin›, eʼthí Jeobá”›”.
10 “Numuu dí rígi̱ rí naʼthí Jeobá: ‹Índo̱ gárámuuʼ 70 tsiguʼ náa Babilonia, ikhúún mañewa̱nla ga̱jma̱a̱ manimbánuu rí nikuʼdáminaʼ ma̱ni̱, matanga̱án kaguáanʼla náa mbaaʼ rígi̱›.
11 ‹Numuu rí nda̱yo̱o̱ májánʼ ndiéjunʼ rí nandoʼ ma̱ni̱ ga̱jma̱a̱ numala, eʼthí Jeobá. Ma̱ni̱ rí makuwáanʼla tsímáá raʼkháa dí muguaʼdáá gamiéjunʼ. Mu ikháanʼla makuwáanʼ májánʼ nda̱wa̱á ga̱jma̱a̱ marigá mbá rí muguaʼtíinʼla.
12 Ikháanʼla mundxa̱ʼwo̱ʼ, maguwa̱a̱ʼ náa ikhúún mu mutakáñúʼ ga̱jma̱a̱ ikhúún madxawanla›.
13 ‹Ikháanʼ mbuʼñúunʼla ga̱jma̱a̱ muxkamún numuu rí mbuʼñúunʼla ga̱jma̱a̱ xúgíʼ a̱jkia̱la.
14 Maniʼñáminaʼ rí muxkamúnla, eʼthí Jeobá. Magímbi̱ín bi̱ ni̱jkha̱ kiʼdiin náa xúgíʼ xuajin, magímbáanʼla náa xúgíʼ mbaaʼ rí ikhúún nixidíráʼáanʼ, eʼthí Jeobá. Ga̱jma̱a̱ maʼkháaʼ kaguáanʼ náa mbaaʼ rí nigájnala›.
15 Numuu rí ikháanʼ nitala: ‹Jeobá má nixniúlú profetas náa Babilonia›.
16 Numuu dí rígi̱ nindxu̱u̱ rí Jeobá naʼthúu̱n rey bi̱ nagi̱ʼi̱ náa xíliu̱u̱* David ga̱jma̱a̱ xúgíinʼ xa̱bu̱ bi̱ kúwá náa xuajin rígi̱, a̱ngia̱la bi̱ na̱nguá nigún ga̱jma̱a̱ nindxa̱la índo̱ ni̱jkha̱ kiʼdáanʼ:
17 ‹Rígi̱ rí naʼthí Jeobá bi̱ naʼtáñajúúnʼ ángeles: “Makuʼmá espada náa ikhiin, ewiʼ ga̱jma̱a̱ nandii, ga̱jma̱a̱ ma̱ni̱ rí mani̱ndxu̱ún xóo higo rí niʼga* dí xándoo miʼtsu numuu rí ra̱májánʼ nindxu̱u̱”›.
18 ‹Ma̱xkúún ga̱jma̱a̱ espada, ewiʼ ga̱jma̱a̱ nandii, ma̱ni̱ rí mani̱ndxu̱ún mbá gamíi náa xúgíinʼ xa̱bu̱ ñajunʼ bi̱ kúwá náa tsu̱du̱u̱ ku̱ba̱ʼ, mbá rí majuiʼthá tsrígú, mbá rí maʼniún tsiánguá, mbá náa rí mujuiyú ga̱jma̱a̱ mutawéñúúnʼ náa xúgíʼ xuajin rí ikhúún gaxidiríʼiin,
19 numuu rí ikhiin na̱nguá nidxawíín ajngáa rí nigún ku̱ñu̱u̱n xa̱bi̱ʼ bi̱ nindxu̱ún profetas, eʼthí Jeobá, bi̱ ikhúún nángi eʼni nikuʼmíin›.*
‹Ikháanʼla na̱nguá nini̱mba̱la›, eʼthí Jeobá.
20 Ikha jngóo gudxawíín ajngóo Jeobá, xúgiáanʼ ikháanʼla bi̱ ni̱jkha̱ kiʼdáanʼ bi̱ nigájnala náa Jerusalén ni̱jkha̱ kiʼdáanʼ náa Babilonia.
21 Rígi̱ rí naʼthí Jeobá bi̱ naʼtáñajúúnʼ ángeles, Dios ndrígóo Israel, dí naʼthí ga̱jma̱a̱ numuu Acab a̱ʼdióo Colaya ga̱jma̱a̱ Sedequías a̱ʼdióo Maaseya, bi̱ najmún mbiʼyuʼ mu mutariya̱ʼ rí minduwaʼ náa ikháanʼla: ‹Maxnajxíin náa ñawúunʼ rey Nabucodonosor* bi̱ xtáa náa Babilonia, ikháanʼla mbu̱ya̱a̱ xóo magudíin.
22 Rí maguáʼníí ikhiin, bi̱ nigájnún náa Judá ni̱jkha̱ kiʼdiin náa Babilonia majmúún índo̱ mutha tsrígú. Muthi: “¡Jeobá gáʼni ga̱jma̱á nindxa̱a̱ʼ xó má niʼni ga̱jma̱a̱ Sedequías ma̱ngaa Acab, bi̱ rey ndrígóo Babilonia nikumbíinʼ!”.
23 Numuu dí ra̱ʼkhá tháán ma̱jti̱ʼ rí nini̱ náa Israel nixudamíjna̱ aʼkhá* gajmiún guʼñu̱ún eʼwíinʼ ga̱jma̱a̱ nijmún mbiʼyuʼ mu mutariya̱ʼ rí minduwaʼ, rí ikhúún tátañájúúnʼ.
“Ikhúún nindxu̱ʼ bi̱ ndaʼyoo ga̱jma̱a̱ ikhúún nindxu̱ʼ testigo”, eʼthí Jeobá›”.
24 “Ga̱jma̱a̱ Semaya bi̱ na̱ʼkha̱ náa Nehelam maratha̱a̱n:
25 Rígi̱ rí naʼthí Jeobá bi̱ naʼtáñajúúnʼ ángeles, Dios ndrígóo Israel: “Ikháán nitaxuʼma mbá i̱yi̱ʼ ga̱jma̱a̱ mbiʼyaaʼ náa xúgíinʼ xa̱bu̱ xuajin Jerusalén, náa Sofonías a̱ʼdióo Maaseya, bi̱ nindxu̱u̱ ndxajkun, ma̱ngaa náa xúgíinʼ ndxajkun. Ikhí naʼthí:
26 Jeobá niʼni rí ikháán ma̱nindxa̱a̱ʼ ndxajkun náa xtiʼkhuu Jehoiadá mu ma̱ta̱ya̱a̱ xóo eguma ñajunʼ náa goʼwóo Jeobá, mu ma̱ngaa ma̱ta̱ya̱a̱ ndiéjunʼ gátani̱i̱ mbáa skágunʼ bi̱ naʼni xóo mbáa profeta ga̱jma̱a̱ matagídáaʼ náa ixi̱,*
27 náá numuu rí na̱nguá nitaxpríguíí Jeremías bi̱ na̱ʼkha̱ náa Anatot, bi̱ xtáa raʼni xóo mbáa profeta náa ikháanʼla rá.
28 Numuu rí asndu nikuʼma ajngáa rígi̱, náa inuxu̱ʼ gi̱i̱ náa Babilonia: “¡Manújngoo mba̱yu̱u̱ʼ mbiʼi! Gu̱nila guʼwá ga̱jma̱a̱ gakuwáanʼla ikhí. Gudula ixi̱ ga̱jma̱a̱ guphula xndúu...”›”›”.
29 Índo̱ ndxajkun Sofonías niguxnuu i̱yi̱i̱ʼ rígi̱ mu maʼdxawun profeta Jeremías,
30 ikhú Jeremías nigruigú ajngóo Jeobá rígi̱:
31 “Ataxuʼma ajngáa rígi̱ náa xúgíinʼ bi̱ ni̱jkha̱ kiʼdiin: ‹Rígi̱ rí naʼthí Jeobá ga̱jma̱a̱ numuu Semaya bi̱ na̱ʼkha̱ náa Nehelam: “Numuu rí Semaya niʼtáriya̱ʼ náa ikháanʼla ikhúún na̱nguá nikuʼmaa ga̱jma̱a̱ niʼni rí maku̱ma̱la ku̱ya̱a̱ rí minduwaʼ,
32 rígi̱ rí naʼthí Jeobá: ‹Ma̱ni̱ rí mamínuuʼ Semaya bi̱ na̱ʼkha̱ náa Nehelam gajmíi̱n bi̱ naguwáʼ náa ikhaa. Nimbáa xa̱biya̱ bi̱ xtáa náa goʼwóo xákríya̱a̱ʼ náa xuajin rígi̱, ikhaa xáʼyoo xúgíʼ rí májánʼ dí ma̱ni̱ ga̱jma̱a̱ numuu xuajñuʼ, eʼthí Jeobá, numuu rí niʼni rí xa̱bu̱ muxujximíjna̱ náa inuu Jeobá›”›”.
Mbaʼa nota
^ O “gaʼyee, bi̱ naʼthí dí marigá”.
^ O “nagui̱i̱”.
^ O “i̱jín go̱ʼo̱”.
^ O “trono ndrígóo”.
^ O mbáa “nijmídá”.
^ Náa ajngáa hebreo naʼthí, “nákhá miʼcha̱ nikuʼmíin”.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ O “cepo”. Náa ajngáa hebreo naʼthí, “rígi̱ nindxu̱u̱ náa nuxudaʼ ñawu̱únʼ, rajkhún ga̱jma̱a̱ edxu̱ún”.
