Jeremías 3:1-25
3 Xa̱bu̱ nurajxi̱míjna̱: “Á mu mbáa xa̱biya̱ naʼtángawuu a̱ʼgiu̱u̱, ikhaa naniña̱a̱ʼ ga̱jma̱a̱ ikhaa na̱jkha̱nú nanindxu̱u̱ a̱ʼgiu̱u̱ i̱mba̱a̱ xa̱bu̱, lá ma̱ndoo mata̱nga̱a̱ mbayáa mbu̱júu̱ xáʼ.”
Lá raʼkháa ku̱ba̱ʼ rúʼko̱ niguma tsagáá mbá kaʼyuuʼ ráʼ.
“Ikháán nitagujuamínáʼ náa mbaʼin ñawaanʼ,lá xúgi̱ ndayóoʼ matanga̱án náa inuʼ ikhúún ráʼ.” Eʼthí Jeobá.
2 “Ataxújxi̱ edxa̱a̱ʼ ma̱ta̱ya̱a̱ bíjní dí tsaʼtsaʼ ga̱jma̱a̱ atayáá.
Náá mina̱a̱ʼ rí túrugua̱a̱n ga̱jma̱a̱ tsiaki̱i̱ xá.
Ga̱jma̱a̱ numún ikhiin niraʼwún náa mijngii kamba̱a̱,xóo mbáa xa̱bu̱ bi̱ najnguʼúun* náa ku̱ba̱ʼ mijxooʼ.*
Natani̱ má xúʼko̱ tsagáá ku̱ba̱ʼga̱jma̱a̱ rí natagujuamínáʼ ma̱ngaa dí raʼkhí tani̱.
3 Ikha jngóo tséxnúu gakhi̱i̱ ruʼwani má ruʼwa rí naxnúu nda̱wa̱á.
Natani̱* xóo mbáa a̱ʼgu̱ bi̱ nagujuamínáʼ bi̱ tséti̱yu̱u̱ʼ,asndu na̱nguá eʼni gawáanʼ rí nitani̱.
4 Mú rí xúgi̱ naratákáñúʼ:
‹¡Anu̱ʼ,* ikháán nindxa̱a̱ʼ bi̱ nambájxu̱ʼ ga̱jmu̱ʼ asndu nákha dxáʼgú nindxu̱ʼ!
5 Lá mbaʼyóoʼ makiʼnáá kámuuo matiejxíi má xúʼko̱ sia̱nʼ ráʼ.›
Rúʼko̱ dí naratá,mú natani̱ má xúʼko̱ dí ra̱májánʼ asndu xó má eʼnga̱a̱ʼ”.
6 Nákha mbiʼi rí nixtáa rey Josías, Jeobá niʼthúnʼ: “‹Lá nitayáá rí niʼni Israel a̱ʼgu̱ bi̱ táwi̱ji̱ jmbu ráʼ. Nitsimuu náa xúgíʼ kúbá rí mitsídánʼ ga̱jma̱a̱ nito̱ʼo̱o̱ náa agoo xúgíʼ ixi̱ maxaʼ dí mba̱ʼu̱ mu magujuamínáʼ.
7 Maski ajndu niʼni xúgíʼ rúʼko̱, ikhúún ni̱thu̱u̱n má xúʼko̱ dí matanga̱a̱ ga̱jma̱a̱ nindxu̱ʼ, mú ikhaa na̱nguá nitanga̱a̱ ga̱jma̱a̱ Judá ndaʼyoo rí naʼni ndxájuu, bi̱ niʼni nduwúúnʼ.
8 Índo̱ ndi̱yo̱o̱ rúʼko̱, nikuʼmáa maʼga̱a̱ Israel bi̱ táwi̱ji̱ jmbu ga̱jma̱a̱ nixnu̱u̱ i̱yi̱i̱ʼ náa naʼthí rí niniʼñáaʼ numuu rí nikudaminaʼ aʼkhá ga̱jma̱a̱ i̱mba̱a̱.* Mú Judá bi̱ nindxu̱u̱ gi̱ʼtio̱o̱, ma̱ngaa niʼni nduwúúnʼ, na̱nguá nimíñuu kaʼyoʼ, ikhaa ma̱ngaa ni̱jkha̱ ga̱jma̱a̱ nigujuamínáʼ.
9 Támíñúu magujuamínáʼ niʼni tsagoo má xúʼko̱ ku̱ba̱ʼ, nikudaminaʼ aʼkhá ga̱jma̱a̱ itsí ma̱ngaa ixi̱.
10 Maski ajndu nirígá xúgíʼ rúʼko̱, Judá bi̱ nindxu̱u̱ gi̱ʼtio̱o̱ bi̱ niʼni nduwúúnʼ, na̱nguá nitanga̱a̱ ga̱jma̱a̱ xúgíʼ a̱jkiu̱u̱n náa inuʼ ikhúún, i̱ndó niʼthíí›, eʼthí Jeobá”.
11 Ikhú Jeobá niʼthúnʼ: “Israel bi̱ táwi̱ji̱ jmbu nisngájma rí nindxu̱u̱ itháán májáanʼ xóo Judá bi̱ niʼni nduwúúnʼ.
12 Ayuʼ gárátha̱ ajngáa rígi̱ náa norte:
‹“Gatanga̱án Israel bi̱ tséʼnimbo̱o̱, eʼthí Jeobá. Xáyala ga̱jma̱a̱ sia̱nʼ,* numuu rí ikhúún na̱ni̱ rí jmbu, eʼthí Jeobá. Xákiʼnún asndu kámuu.
13 Atayáá rí nikiéʼkháanʼ numuu rí nitaxújximinaʼ náa inuu Jeobá Dios ndrígáaʼ. Nidxu̱ʼ má xúʼko̱ kidxu̱únʼ bi̱ tsétatsiniiʼ, náa agoo xúgíʼ ixi̱ mba̱ʼu̱ rí maxaʼ, mú aʼwóʼ na̱nguá nindala gúdxawíín”, eʼthí Jeobá›”.
14 “E̱ji̱n bi̱ tsénimbala gutangáanʼla, eʼthí Jeobá. Numuu dí ikhúún ni̱jkhánú ninindxu̱ʼ bi̱ phú ajmbiala* ga̱jma̱a̱ maríyáaʼ mbáa náa mámbá xuajin ga̱jma̱a̱ a̱jmi̱i̱n náa mámbá guʼwíin, ga̱jma̱a̱ maʼkháaʼ kaguáanʼ náa Sion.
15 Ma̱xnia̱la baxtúu bi̱ muni̱ xó má eyoʼ ikhúún,* ikhiin muxniʼtsala ga̱jma̱a̱ ku̱ma̱ ma̱ngaa muni̱ rí mikruaʼala.
16 Náa mbiʼi rúʼko̱, ikháanʼ maʼni mbaʼáanʼla wéñuuʼ maʼni mbaʼáanʼla náa mbaʼa xuajin, eʼthí Jeobá. Ikhiin xátangi̱ín muthi ‹¡Arca* dí nimbánuu ndrígóo Jeobá!›. Ni xúndxa̱ʼwa̱míjna̱ ga̱jma̱a̱ numuu ikhaa, xármáʼáan a̱jkiu̱ún kuyáá, ni má xúyáaʼ ga̱jma̱a̱ ni má xátanga̱a̱ maguma i̱mba̱.
17 Mbiʼi rúʼko̱ muxna mbiʼíí Jerusalén xíliu̱u̱* Jeobá, xúgíʼ xuajin magimbíin mu muni̱ mba̱a̱ mbiʼyuu Jeobá náa Jerusalén, ga̱jma̱a̱ xátangi̱i̱n muni̱ rí nagua̱ʼa̱ maʼni a̱jkiu̱ún dí xkawiʼ”.
18 “Mbiʼi rúʼko̱ goʼwóo Judá ga̱jma̱a̱ goʼwóo Israel mbóó gágún, náa mámbá níjniúu mámbáa ga̱jma̱a̱ mbóó gaguwáanʼ náa ku̱ba̱ʼ dí rígá náa norte, mu maguwáanʼ náa ku̱ba̱ʼ dí nixnu̱u̱n wajin xiʼñúúnʼ mu maʼni ku̱bu̱únʼ.
19 Ikhúún nindxa̱ʼwa̱mínáʼ: ‹¡Ga̱jma̱a̱ gagi nigíwáa̱nʼ náa majñu̱únʼ e̱ji̱nʼ ma̱ngaa nixna̱a̱ʼ ku̱ba̱ʼ dí mitsaanʼ,* dí itháán mitsaanʼ dí rígá náa majñu̱únʼ xuajin!›.* Ma̱ngaa nindxa̱ʼwa̱mínáʼ rí ikháanʼla muthu̱nʼ ‹¡Anu̱ʼ nindxa̱a̱ʼ!› Ga̱jma̱a̱ xúniʼñáánʼ rajkua ki̱dxu̱ʼ.
20 ‹Mú, xó má eʼni mbáa a̱ʼgu̱ bi̱ naʼni nduwaaʼ ajmbio̱o̱* ga̱jma̱a̱ naniñuuʼ, xúʼko̱ niñuʼla ikháanʼ, goʼwóo Israel, ni̱ni̱ nduwúúnʼla ikhúún›, eʼthí Jeobá”.
21 Náa bíjní dí tsaʼtsaʼ nawáán mbá aʼwá,rí nambi̱ya̱ʼ ga̱jma̱a̱ rí naʼtájkháan xuajin Israel,numuu rí túni̱ dí májánʼ,nimbumún kuyáá Jeobá Dios ndrígu̱ún.
22 “E̱ji̱n bi̱ tsénimbala gutangáanʼla.
Ikhúún mani̱i̱ a̱jkia̱la ga̱jma̱a̱ numuu rí tsénimbala”.
“¡Kuwáanʼxu̱ gi̱i̱! Nigúwáʼxu̱ náa ikháán,numuu rí ikháán Tátá Jeobá, nindxa̱a̱ʼ Dios ndrígúxu̱.
23 Rí phú gajkhun, bíjní ga̱jma̱a̱ gitsaʼwá dí rígá náa kúbá nindxu̱u̱ minduwaʼ.
Rí phú gajkhun, bi̱ maʼnikríyaaʼ Israel nindxu̱u̱ Jeobá Dios ndrígúlú.
24 Asndu nákha e̱ji̱n ñajunxu, dios bi̱ naʼni marigá ma̱jti̱ʼ niʼni gámbóo ñajunʼ gakhi̱i̱ rí nini̱ wajin xiʼñúxu,mugiu̱ún ga̱jma̱a̱ xediu̱ún,jiámiu̱ún ga̱jma̱a̱ wa̱ʼxiúnʼ.
25 Ga̱jma̱a̱ ma̱jti̱ʼ mu̱ʼgua̱a̱ʼ gúnúʼxuʼ,mumbráʼamijnáxu̱ ga̱jma̱a̱ gamiéjunʼ ndrígúxu̱,numuu rí nixuʼdámíjnáxu̱ aʼkhá náa inuu Jeobá Dios ndrígúxu̱,Ikháanʼxu̱ ga̱jma̱a̱ anu̱xu̱, asndu nákha nindxu̱xu̱ e̱ji̱n asndu rí mbiʼi xúgi̱,na̱nguá ninimbuxu̱ aʼwóo Jeobá Dios ndrígúxu̱”.
Mbaʼa nota
^ Náa ajngáa hebreo naʼthí, “árabe”.
^ O “desierto”.
^ Náa ajngáa hebreo naʼthí, “xtaʼdáá inaaʼ”.
^ O “táteʼ”.
^ Náa ajngáa hebreo naʼthí, “xákrui̱ígú inuʼ náa ikháanʼla”.
^ O “jmba̱ya̱la”.
^ Náa ajngáa hebreo naʼthí, “a̱jkiu̱nʼ”.
^ O “E̱jna̱”.
^ O “trono”.
^ O “nagui̱i̱”.
^ Náa ajngáa hebreo naʼthí, “bi̱ mbaʼin náa xuajin”.
^ Náa ajngáa hebreo naʼthí, “bi̱ xtáa ga̱jma̱a̱”.
