Jeremías 30:1-24
-
Dios naxná ajngóo rí magímbi̱ín xa̱bu̱ xuajñuu ga̱jma̱a̱ maʼni̱i̱ a̱jkiu̱ún (1-24)
30 Jeremías nigruigú ajngáa rígi̱ náa Jeobá:
2 “Rígi̱ rí naʼthí Jeobá, Dios ndrígóo Israel: ‹Ataniraʼmáʼ náa mbá libro xúgíʼ ajngáa rí ikhúún gátha̱a̱n.
3 “Atayáá, na̱ʼkha̱ mbiʼi, eʼthí Jeobá, magímbi̱ín bi̱ ni̱jkha̱ kiʼdiin náa xuajñunʼ, Israel ga̱jma̱a̱ Judá, eʼthí Jeobá, ga̱jma̱a̱ maʼkháaʼ kagui̱i̱n náa ku̱ba̱ʼ rí nixnu̱u̱n wajin xiʼñúúnʼ mu maʼni ku̱bu̱únʼ”›”.
4 Rígi̱ nindxu̱u̱ ajngáa rí Jeobá niʼthúu̱n Israel ga̱jma̱a̱ Judá.
5 Rígi̱ rí naʼthí Jeobá:
“Nidxawíínxu̱ rí xa̱bu̱ kúwá rundxaʼwaskhá,i̱ndó gamíi rígá, nda̱a̱ rí tsímáá.
6 Mbá péñu,* gura̱jxi̱, á mu mbáa xa̱biya̱ ma̱ndoo magiʼdaa ada̱.
Á mu na̱nguá, náá numuu rí nda̱ñu̱u̱n xúgíinʼ xa̱bu̱ xkujiinʼ kurajtuun awúúnxó má mbáa a̱ʼgu̱ bi̱ xtáa ragíʼdaa a̱ʼdióo rá.
Náá numuu dí xúgíinʼ miʼxájtiʼ inún xá.
7 ¡Phú migíná, ra̱ʼkhá tháán gamíi mbiʼi rúʼko̱!
Nda̱a̱ i̱mba̱ mbiʼi xóo rúʼko̱.
Nindxu̱u̱ mbá mbiʼi ngíná náa Jacob.
Mú ikhaa maguma kríya̱a̱ʼ”.
8 “Mbiʼi rúʼko̱, eʼthí Jeobá bi̱ naʼtáñajúúnʼ ángeles, maxpígaʼ yugo ndrígáaʼ ga̱jma̱a̱ marígúu náa rexa̱a̱ʼ ma̱ngaa maxkuʼtungaa dí kaxtuʼwáaʼ ga̱jma̱a̱ ni xátangaán ma̱nindxa̱a̱ʼ ñumbáá náa inún xa̱bu̱ bi̱ naguwaáʼ.
9 Ikháán matani̱ ñajuunʼ Jeobá Dios ndrígáaʼ ga̱jma̱a̱ David bi̱ nindxu̱u̱ rey ndrígáaʼ, bi̱ ikhúún makujxi̱i̱ náa ikháanʼ”.
10 “Ikháán, Jacob bi̱ nindxa̱a̱ʼ xa̱bi̱ʼ, xámíñáaʼ, eʼthí Jeobá,ni má xáguáʼáanʼ, Israel.
Numuu rí ma̱ni̱ kríña̱a̱nʼ náa mbá ku̱ba̱ʼ rí mitsínguánʼ,ga̱jma̱a̱ bi̱ naguwáʼ náa ikháán náa ku̱ba̱ʼ rí ni̱jkha̱ kiʼdiin.
Jacob matanga̱a̱ ni xáguma ngínáa, maxtáa tsímáá,asndu nimbáa ndawa̱a̱ tsáa maʼni míñuu”.
11 “Numuu rí ikhúún xtáá ga̱jma̱á nindxa̱a̱ʼ, eʼthí Jeobá, mu ma̱ni̱ kríña̱a̱nʼ.
Ma̱ni̱ gámbáa xúgíʼ xuajin náa nixidíráʼaanʼ,mú ikháán xánimbáti̱ga̱a̱n.
Ma̱ni̱ matamíniiʼ má tsiaki̱i̱,maxpríguaaʼ asndu náa mbri̱ga̱a̱ rí kaʼyoo”.
12 Numuu dí rígi̱ rí naʼthí Jeobá:
“Nda̱a̱ xóo maʼni̱i̱ náa gamiéjunʼ rí nitraʼníí.
Xándoo maguma thanáá náa nigawáanʼ.
13 Ndáwa̱a̱ nimbáa bi̱ mawiji̱ maʼthí ga̱jma̱a̱ numaaʼ,nda̱a̱ xóo maguma thanáá ska rí xta.
Ikháán nda̱a̱ xóo maguma thanaaʼ.
14 Xúgíinʼ ñawaanʼ bi̱ nindaaʼ xtañún nimbumún kuyaaʼ.
Na̱nguá eñáanʼ itháan.
Numuu rí ni̱ni̱ gawáanʼ xó má mbáa bi̱ sia̱nʼ ga̱jmu̱ʼ,ni̱ni̱ gínán xó má gáñu̱u̱n mbáa bi̱ xkawiʼ a̱jkiu̱u̱n,ga̱jma̱a̱ numuu rí nikiéʼkháanʼ ma̱ngaa rí nitaxúdaminaʼ wéñuuʼ aʼkhá.
15 Náá numuu rí nataxiéʼkhá ga̱jma̱a̱ numuu rí natamíniiʼ rá.
¡Xáʼni̱i̱ náa nigawáanʼ!
Numuu dí ra̱ʼkhá tháán nikiéʼkháanʼ ga̱jma̱a̱ mbaʼa aʼkhá rí nitaxúdaminaʼikha jngóo ikhúún niña̱a̱ʼ rígi̱.
16 Ikhúún ma̱ni̱ gámbíin xúgíinʼ bi̱ nuni̱ gámbáanʼ,ga̱jma̱a̱ xúgíinʼ xa̱bu̱ sia̱nʼ ndrígáaʼ maʼga kiʼdiin.
Xúgíinʼ bi̱ nurawí káyáaʼ rí xtaʼdáá, mangiin magajnúʼ káñúnʼ dí guáʼdáá,ma̱ngaa ma̱ni̱ rí xúgíinʼ bi̱ nuni̱ kuʼwáaʼ maguma kuʼwúún”.
17 “Ma̱ni̱ dí maʼni̱i̱ a̱jkia̱a̱nʼ ga̱jma̱a̱ ma̱ni̱ thanuu náa nigawáanʼ, eʼthí Jeobá,maski ajndu na̱nguá nindúún gundríguíin ga̱jma̱a̱ nixna mbiʼyaaʼ:
‹Sion, bi̱ ndawa̱a̱ tsáa eyáa̱ʼ›”.
18 Rígi̱ rí naʼthí Jeobá:
“Magímbíi̱n bi̱ ni̱jkha̱ kiʼdiin bi̱ nikúwá náa guʼwá xtíin ndrígóo Jacob,magáwíinʼ a̱jkiu̱nʼ gáʼni guʼwá xtíin ndrígu̱ún.
Xuajin maguma májáanʼ náa kúbága̱jma̱a̱ torre rí wíji̱ xa̱ʼ mawi̱ji̱ náa má kaʼyoo.
19 Ikhiin muni̱ ajmúú rí muxna̱a̱ núma̱aʼ, mundxa̱ʼwa̱ ga̱jma̱a̱ gagi.
Ma̱ni̱ rí maʼni mbaʼin xáʼni nguéjmi̱i̱n,ra̱ʼkhá tháán mbaʼin gáʼni,xáʼni nguéjmi̱i̱n kayuuʼ.
20 E̱ji̱i̱n ikhaa mani̱ndxu̱ún xóo nákha ginii,maguánú mani̱ndxu̱ún mbá xuajin rí guáʼdáá tsiaki̱i̱ náa inuʼ ikhúún.
Ma̱ni̱ rí mumíniiʼ bi̱ nuni̱ ngíníi.
21 Bi̱ mbayá edxu̱u̱ mani̱ndxu̱u̱ mbáa rí ikhiin,ga̱jma̱a̱ náa majñu̱únʼ ikhiin magajnúu mbáa bi̱ maʼtáñajúúnʼ.
Ma̱ni̱ rí ma̱ʼkha̱ kanuu ga̱jma̱a̱ ikhaa ma̱ʼkha̱ náa ikhúún”.
“Á mu na̱nguá, tsáá xámíñuu* ma̱ʼkha̱ kanuu náa ikhúún rá.”, eʼthí Jeobá.
22 “Ikháanʼ mani̱ndxa̱la xuajñunʼ ga̱jma̱a̱ ikhúún mani̱ndxu̱ʼ Dios ndrígala”.
23 ¡Gu̱ya̱a̱! Mbá giñámbiʼ ndrígóo Jeobá mambaʼtariya̱ʼ ga̱jma̱a̱ sia̱nʼ,mbá giñámbiʼ magajtaa xóo nanuʼ náa edxu̱ún xa̱bu̱ xkawi̱i̱nʼ.
24 Xáwi̱ji̱i̱ rí nakásngañu̱u̱ʼ Jeobáasndu índo̱ gáʼnimbánuu rí naʼthúu̱n a̱jkiu̱u̱n maʼni.
Ikháanʼ makrua̱ʼa̱la májánʼ rígi̱ índo̱ gáʼni iwáá mbiʼi.
Mbaʼa nota
^ O “guni̱ mbá rí májánʼ”.
^ Náa ajngáa hebreo naʼthí, “rí nikudaminaʼ maʼni a̱jkiu̱u̱n”.
